ᐱᕈᑎᖅᑎᓂᖅ ᐱᕆᖃᑎᒌᖃᑎᖃᓂᕐᒥᑦ ᐊᑕᖐᔪᓂᑦ ᐊᓯᔾᔩᖅᑐᓂᑦ

1.2.1. ᐱᔾᔪᑎᖓ ᐊᒻᒪ ᐊᑐᐊᒐᖏᑦ

ᐊᑎᓕᐅᖅᑐᒍ ᐃᓄᐃᑦ−ᓄᓇᖓᑦ ᓇᓗᓇᐃᖅᓯᓂᕐᒧᑦ ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᓐᓂᕐᒧᑦ, ᑎᓴᒪᑦ ᐃᓄᐃᑦ ᓄᓇᑖᓂᕐᒧᑦ ᑲᑐᔾᔨᖃᑎᒌᑦ, ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᒐᕙᒪᖓᑦ ᑲᓇᑕ ᓇᓗᓇᐃᖅᓯᓚᐅᖅᑐᑦ ᑲᑐᑎᔭᖏᓐᓂ ᑐᕌᒐᖏᓐᓂ ᓴᖅᑭᑎᑦᑎᓗᑎ ᐃᓅᖃᑎᒌᓐᓂᕐᒧᑦ−ᑮᓇᐅᔭᓕᕆᓂᕐᒧᑦ ᐊᒻᒪ ᐱᖅᑯᓯᓄᑦ ᐊᔾᔨᒌᑦᑎᑦᑎᓂᕐᒧᑦ ᐃᓄᓐᓂᑦ ᐊᒻᒪ ᐊᓯᖏᓐᓂ ᑲᓇᑕᒥᐅᑕᓂᑦ. ᑲᔪᖏᖅᓯᒪᔪᑦ ᓄᑕᐅᓐᖑᑎᑦᑎᓂᒥᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᖃᑎᒌᓐᓂᕐᒧᑦ, ᖃᓄᐃᓕᓯᒋᐊᕐᓂᖃᖅᑎᑎᓪᓗᑎ ᑲᑐᑎᑕᐅᔪᓂᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ, ᐊᒻᒪ ᖃᐅᔨᓴᖅᑕᐅᓂᖓ ᐱᕙᓪᓕᐊᓂᖓ.

ᐋᖅᑭᑦᑕᖁᓯᒪᔪᓂᑦ ᐅᖃᖅᓯᒪᓂᖏᓐᓄᑦ ᐋᖅᑭᔅᓯᒪᓂᖏᓐᓂ, ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᓕᕆᑎᑦᑎᓂᐊᖅᓯᒪᔪᑦ ᖃᓄᐃᓕᓯᒋᐊᓂᕐᒥᑦ ᐱᓕᕆᖃᑎᒌᓐᓂᒃᑯᑦ ᐊᒻᒪ ᑎᒥᐅᔪᓂᑦ ᐱᓕᕆᖃᑎᒌᓐᓂᕐᑯᑦ. ᓴᓇᓯᒪᓂᖃᖅᑐᖅ ᐱᓕᕆᑎᑦᑎᓗᓂ ᑲᑎᓐᖓᔪᓂᑦ ᐊᑐᖅᑕᐅᔪᓂᑦ ᐃᓄᓐᓄᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᖃᑎᖏᓐᓂ ᐊᒻᒪ ᐱᐅᓯᑎᒋᐊᕐᓗᒍ ᒐᕙᒪᓕᒫᒧᑦ ᐊᑐᖅᑕᐅᓂᖓ. ᐱᓕᕆᐊᕆᓂᐊᕐᓗᒋᑦ ᑖᒃᑯᐊ ᑐᕌᒐᐃᑦ, ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛ ᑎᓴᒪᓂᑦ ᑐᕌᒐᖃᖅᑐᑦ:

• ᓇᓗᓇᐃᕐᓗᒋᑦ ᑲᑐᑎᔭᐅᔪᑦ ᓯᕗᓪᓕᐅᔾᔭᐅᔭᕆᐊᓖᑦ ᓇᒦᓐᓂᖏᑦ ᖃᓄᐃᓕᓯᒋᐊᓂᕐᒧᑦ;
• ᓴᖅᑭᑎᑦᑎᓗᑎ ᐃᖅᑲᓇᐃᔮᖑᓂᐊᖅᑐᓂᑦ ᐸᕐᓇᐅᑎᓂᑦ ᐃᓚᒋᔭᐅᔪᓂᑦ ᓴᓴᓯᒪᓂᖓᓄᑦ ᐱᓕᕆᖃᑎᒌᓐᓂᐅᔪᑦ ᐊᒻᒪ ᖃᓄᐃᓕᓯᒋᐊᓂᕐᒧᑦ ᑐᓂᔭᐅᓯᒪᔪᓂᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ;
• ᓴᖅᑭᑎᑦᑎᓗᑎ ᑐᓐᖓᕕᐅᔪᓐᓇᓂᕐᒧᑦ ᓴᖅᑭᑎᑦᑎᓗᑎ ᓴᖅᑭᖅᑎᑕᐅᔪᓂᑦ ᖃᐅᔨᓴᖅᑕᐅᓗᑎ ᑲᔪᓯᑦᑎᐊᕐᓂᖓᓄᑦ; ᐊᒻᒪ
• ᐅᓂᒃᑳᓕᐅᕐᓗᑎ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᕙᓪᓕᐊᓂᖓᓄᑦ ᐊᑦᑐᐊᓂᓕᓐᓄᑦ ᑭᒡᒐᑐᖅᑕᐅᔪᓄᑦ.

ᐃᖅᑲᓇᐃᔮᕆᔭᖓ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᑐᑭᖃᕋᓱᐊᖅᑐᑦ ᐃᑲᔪᕐᓗᑎ ᐃᖅᑲᓇᐃᔮᒥᑦ ᐱᓕᕆᐊᖑᕙᓪᓕᐊᓕᖅᑐᒥᑦ ᐊᓯᖏᑎᒍᑦ ᐱᕙᓪᓕᐊᓂᖏᑎᒍᑦ ᐃᓄᐃᑦ−ᒐᕙᒪᐃᑦ ᐱᓕᕆᖃᑎᒌᓐᓂᖏᑦ ᒐᕙᒪᑐᖃᒃᑯᓐᓂᑦ, ᑲᓇᑕᒥ ᐊᕕᑦᑐᖅᓯᒪᔪᓂᑦ/ᐅᑭᐅᑕᖅᑐᒥ ᐊᕕᑦᑐᖅᓯᒪᔪᓂᑦ.

ᐃᓚᒋᔭᐅᔪᑦ ᐊᖏᖅᑐᑦ ᐊᐅᓚᓂᖃᕐᓗᑎ ᐊᑐᐊᒐᖏᓐᓂ ᐱᓕᕆᖃᑎᒌᓐᓂᕐᒧᑦ, ᐊᖏᖃᑎᒌᓐᓂᕐᒧᑦ, ᑕᑯᔅᓴᐅᑎᐊᓂᕐᒧᑦ, ᓈᒻᒪᑎᐊᓂᕐᒧᑦ, ᐊᒻᒪ ᐃᑉᐱᒋᑦᑎᐊᕐᓗᒋᑦ ᓄᓇᑖᓂᕐᒧᑦ ᐊᖏᕈᑏᑦ, ᓄᓇᖃᖅᑳᖅᓯᒪᔪᓄᑦ ᐱᔪᓐᓇᐅᑎᖏᑦ, ᐊᒻᒪ ᐃᓄᓐᓄᑦ ᑭᒃᑯᓕᒫᓄᑦ ᐱᔪᓐᓇᐅᑎᖏᑦ ᓇᓗᓇᐃᖅᑕᐅᓯᒪᔪᑦ ᐅᑯᓂᖓ ᓯᓚᕐᔪᐊᕐᒥᐅᓕᒫᓄᑦ ᓇᓗᓇᐃᖅᑕᐅᓂᖏᑦ ᐱᔪᓐᓇᐅᑎᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ (UNDRIP).

1.2.2. ᐱᓕᕆᖃᑎᖏᑦ

ᐃᓚᒋᔭᐅᔪᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓂᑦᓂᕈᐊᖅᑕᐅᓯᒪᔪᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂᑦ ᓯᕗᓕᖅᑏᑦ, ᐱᖃᓯᐅᑎᓪᓗᑎ ᓂᕈᐊᖅᑕᐅᓯᒪᔪᑦ ᑎᓴᓂᑦ ᐃᓄᐃᑦ ᓄᓇᑖᓂᕐᒧᑦ ᑲᑐᔾᔨᖃᑎᒌᓂᑦ ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ, ᑲᓇᑕᒥ ᓯᕗᓕᖅᑎ ᐊᖏᔪᖅᑳᖓ, ᐊᒻᒪ ᒐᕙᒪᑐᖃᒃᑯᓐᓂᑦ ᒥᓂᔅᑕᐃᑦ ᓂᕈᐊᖅᑕᐅᓯᒪᔪᑦ ᒪᓕᓐᓂᖃᖅᑐᑎᑦ ᑲᑐᑎᑕᐅᔪᓂᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ. ᐊᖏᔪᖅᑳᖏᑦ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ−ᑲᓇᑕ, ᐊᒻᒪ ᑲᓇᑕᒥ ᐃᓄᐃᑦ ᒪᒃᑯᑦᑐᑦ ᑲᑎᒪᔨᖏᑦ ᐱᖃᓯᐅᔾᔭᐅᓯᒪᔪᑦ ᐃᒪᒋᔭᐅᖏᓐᓇᖃᑦᑕᓂᐊᖅᑐᑎᑦ.

ᐅᑯᐊ ᐅᓂᒃᑳᑦ ᐅᖃᐅᓯᖃᖅᑐᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓂ ᐃᓚᒋᔭᐅᔪᑦ ᐊᒻᒪ ᐃᓚᒋᔭᐅᖃᑕᐅᖏᓐᓇᖅᑐᑦ ᐊᒻᒪ ᑲᑐᔾᔨᖃᑎᒌᖏᓐᓄᑦ ᐃᖅᑲᓇᐃᔭᖅᑎᖏᑦ ᐱᓕᕆᖃᑎᒌᓐᓂᖃᖅᑐᑦ ᐃᒪᐃᓕᖓᓪᓗᑎ "ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᖃᑎᒋᑦᑐᑦ."

1.2.3. ᓴᓇᓯᒪᓂᖓ ᐊᒻᒪ ᐱᕙᓪᓕᐊᓂᖏᑦ

ᑕᑯᔅᓴᐅᑎᑕᐅᔪᖅ ᐊᔾᔨᙳᐊᖅ 1, ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓴᓇᓯᒪᓂᖓ ᐱᖓᓲᓕᖅᑲᖓᔪᑦ, ᐱᖃᓯᐅᑎᓪᓗᑎ ᓯᕗᓕᖅᑏᑦ ᑲᑎᒪᔨᕋᓛᑦ, ᐊᖏᔪᖅᑲᐅᑏᑦ ᐃᖅᑲᓇᐃᔭᖅᑏᑦ ᑲᑎᒪᔨᕋᓛᑦ,ᐊᒻᒪ ᐱᓕᕆᔩᑦ ᐊᑐᓂ ᓯᕗᓪᓕᐅᔾᔭᐅᔭᕆᐊᓕᓐᓄᑦ. ᑲᒪᒋᔭᕆᐊᖃᖅᑕᖏᑦ ᐊᑐᓂ ᐱᖓᓲᓕᖅᑲᖓᔪᓂᑦ ᐃᒪᐃᓕᖓᔪᑦ.

• ᓯᕗᓕᖅᑏᑦ ᑲᑎᒪᔨᕋᓛᑦ – ᑲᒪᒋᔭᖃᖅᑐᑦ ᐊᖏᖅᓯᓂᕐᒧᑦ ᐊᑐᑎᑕᐅᔪᓂᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ ᖃᓄᐃᓕᓯᒋᐊᓂᕐᒧᑦ, ᐃᑲᔪᕐᓂᖃᖅᑐᑎᑦ ᐃᖅᑲᓇᐃᔮᖑᓂᐊᖅᑐᓂᑦ ᐸᕐᓇᐅᑎᓂᑦ, ᐅᖃᐅᓯᖃᕐᓂᖅ ᐱᕙᓪᓕᐊᓂᖓᓄᑦ ᐊᒻᒪ ᓇᓗᓇᐃᖅᑕᐅᓂᖏᓐᓄᑦ ᖃᓄᐃᑦᑐᑐᐃᓐᓇᐃᑦ ᐃᓱᒫᓘᑕᐅᔪᑦ ᐅᕝᕙᓘᓐᓃᑦ ᓇᒧᓐᖓᕐᓂᖓᓄᑦ ᐋᖅᑭᒋᐊᕈᑏᑦ ᐱᑕᖃᕆᐊᖃᖅᑐᓂᑦ, ᐊᒻᒪ ᓇᓗᓇᐃᖅᑕᐅᓂᖏᓐᓄᑦ ᑮᓇᐅᔭᓂ ᑭᓱᓕᕆᔾᔪᑎᓂᑦ.
• ᐊᖏᔪᖅᑲᐅᑏᑦ ᐃᖅᑲᓇᐃᔭᖅᑏᑦ ᑲᑎᒪᔨᕋᓛᑦ – ᑲᒪᒋᔭᖃᖅᑐᑦ ᓇᓗᓇᐃᖅᑕᐅᓂᖏᓐᓄᑦ ᐊᒻᒪ ᓴᖅᑭᑎᑦᑎᓂᕐᒧᑦ ᑲᑐᑎᑕᐅᔪᓂᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ ᖃᓄᐃᓕᓯᒋᓂᕐᒧᑦ, ᓇᓗᓇᐃᖅᑕᐅᓂᖏᑦ ᐃᓱᒫᓘᑕᐅᔪᑦ ᐱᑕᖃᕆᐊᖃᖅᑎᑦᑎᔪᑦ ᒐᕙᒪᓕᒫᒥᑦ ᐊᑐᖅᑕᐅᓂᖓ, ᓇᓗᓇᐃᖅᑕᐅᓂᖏᑦ ᑮᓇᐅᔭᐃᑦ ᑭᓱᓕᕆᔾᔪᑏᑦ, ᖃᐅᔨᓴᖃᑦᑕᕐᓂᖅ ᐊᒻᒪ ᑐᑭᒧᐊᖅᑎᑎᓗᑎ ᓇᓗᓇᐃᔭᖅᓯᒪᓂᖏᓐᓄᑦ ᐱᓕᕆᔨᓂᑦ, ᐋᖅᑭᔅᓯᖃᑦᑕᕐᓂᖅ ᐊᑲᐅᖏᓕᐅᕈᑎᓂᑦ, ᐊᒻᒪ ᑎᑎᕋᖅᑕᐅᓂᖏᓐᓄᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ ᑲᑎᒪᔾᔪᑎᔅᓴᐃᑦ.
• ᐱᓕᕆᔩᑦ – ᓴᖅᑭᖅᑎᑕᐅᓯᒪᔪᑦ ᐊᑐᓂ ᓯᕗᓪᓕᐅᔾᔭᐅᔭᕆᐊᓕᓐᓄᑦ ᐊᒻᒪ ᑲᒪᒋᔭᖃᖅᑐᑦ ᓴᖅᑭᑎᑦᑎᓂᕐᒥᑦ ᐃᖅᑲᓇᐃᔮᖑᓂᐊᖅᑐᓂᑦ ᐸᕐᓇᐅᑎᓂᑦ ᓇᓗᓇᐃᔭᐃᓂᒃᑯᑦ ᑎᑎᕋᖅᓯᒪᔪᓂᑦ ᐊᒻᒪ ᐊᕐᕌᒍᑕᒫᑦ ᐱᕙᓪᓕᐊᓂᖓᓄᑦ ᐅᓂᒃᑳᑦ.

ᓯᕗᓕᖅᑏᑦ ᑲᑎᒪᔨᕋᓛᖏᑦ ᑲᑎᒪᖃᑦᑕᖅᑐᑦ ᐱᖓᓱᐊᑎᖅᑐᑎᑦ ᐊᕐᕌᒍᑕᒫᑦ, ᐱᖃᓯᐅᑎᓪᓗᑎ ᐊᕐᕌᒍᑕᒫᑦ ᑲᑎᒪᖃᑎᖃᕐᓂᖅ ᑲᓇᑕᒥ ᐊᖏᔪᖅᑳᖓᓂᑦ. ᐊᖏᔪᖅᑲᐅᑏᑦ ᐃᖅᑲᓇᐃᔭᖅᑏᑦ ᑲᑎᒪᔨᕋᓛᑦ ᑲᑎᖃᑦᑕᖅᑐᑦ ᐱᖓᓱᐊᑎᖅᑐᑎᑦ ᐊᕐᕌᒍᑕᒫᑦ ᖃᑦᑏᓐᓇᐅᓛᕆᔪᓐᓇᖅᑕᖏᑦ, ᑕᖅᑭᒋᒐᔪᑦᑕᖓᓂ ᓯᕗᓂᐊᒍᑦ ᐊᑐᓂ ᓯᕗᓕᖅᑏᑦ ᑲᑎᒪᔨᕋᓛᑦ ᑲᑎᒪᓂᖓᓄᑦ. ᐱᓕᕆᔩᑦ ᑲᑎᒪᖃᑦᑕᖅᑐᑦ ᐊᕐᕌᒍᓕᒫᒥᑦ ᑲᑎᒪᔭᕆᐊᖃᖅᑎᓪᓗᒋᑦ, ᐊᑕᐅᓯᐊᖃᑦᑕᒐᔪᑦᑐᑦ ᑕᖅᑭᑕᒫᑦ.

1.2.4. ᐱᓕᕆᔭᐅᔪᑦ ᐊᒻᒪ ᖃᓄᐃᓐᓂᕆᔭᖏᑦ

ᑕᑯᔅᓴᐅᑎᑕᐅᔪᖅ ᐊᔾᔨᙳᐊᖅ 2, 13−ᖑᓚᐅᖅᑐᑦ ᓯᕗᓪᓕᐅᔾᔭᐅᔭᕆᐊᓖᑦ ᐊᒻᒪ ᐊᑕᐅᓯᖅ ᓄᖅᑲᖅᑎᑕᐅᑲᐃᓐᓇᖅᑐᓂ ᓯᕗᓪᓕᐅᔾᔭᐅᔭᕆᐊᓕᓐᓂᑦ ᐅᓇᐅᓕᖅᑎᓪᓗᒍ 2022. ᐅᑯᐊᖑᓚᐅᖅᑐᑦ 247 ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᓇᓗᓇᐃᖅᑕᐅᔪᑦ ᐱᓕᕆᔨᓄᑦ ᐃᓚᒋᔭᐅᓪᓗᓯᑎ, ᐱᖃᓯᐅᑎᓪᓗᑎ ᐃᖅᑲᓇᐃᔭᖅᑎᖏᑦ 23 ᒐᕙᒪᑐᖃᒃᑯᑦ ᐱᓕᕆᕕᖏᓐᓂ ᐊᒻᒪ ᑎᒥᐅᔪᓂᑦ. ᐊᔾᔨᙳᐊᖅ 3 ᓇᓗᓇᐃᔭᐃᓂᖃᖅᑎᑦᑎᔪᖅ ᓯᕗᓕᖅᑏᑦ ᑲᑎᒪᔨᕋᓛᑦ ᑲᑎᒪᓂᖏᓐᓄᑦ ᐊᒻᒪ ᓂᕈᐊᖅᑕᐅᓯᒪᔪᑦ ᖃᓄᐃᓐᓂᕆᔭᖏᑦ ᕆᒋᐊᖅᑐᓂ 2017 ᑎᑭᑦᑐᒍ 2022.^{Footnote 2}

1.2.5. ᐊᐅᓚᑦᑎᓂᕐᒧᑦ ᐊᒻᒪᓗ ᐊᓪᓚᕝᕕᓕᕆᓂᕐᒧᑦ

ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᓄᓇᖃᖅᑳᖅᓯᒪᔪᓕᕆᔨᒃᑦ ᐋᖅᑭᒍᑎᖃᓂᕐᒧᑦ ᑎᑎᕋᕐᕕᖓ ᑲᑐᑎᓪᓗᑎ ᐊᐅᓚᑦᑎᔪᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᕙᓪᓕᐊᓂᖏᓐᓄᑦ, ᐱᖃᓯᐅᑎᓪᓗᑎ ᐊᐅᓚᑦᑎᓂᕐᒥᑦ ᑲᑎᒪᓂᕐᒧᑦ ᐃᖅᑲᓇᐃᔮᖑᒋᐊᓖᑦ, ᐊᑐᐃᓐᓇᕈᐃᓂᕐᒧᑦ ᑲᑎᒪᓂᕐᒧᑦ ᓱᓇᒃᑯᑖᓂᑦ, ᐊᒻᒪ ᖃᐅᔨᑎᑦᑎᓂᕐᒧᑦ ᓄᑖᓂᑦ ᐱᓕᕆᔨᓄᑦ ᐃᓚᒋᔭᐅᔪᓂᑦ, ᐊᒻᒪᓗᑦᑕᐅᖅ ᐊᐅᓚᑕᐅᓂᖏᑦ ᐱᕙᓪᓕᐊᔪᓕᕆᔨᓄᑦ ᓴᖅᑭᖅᑎᑕᐅᔪᑦ, ᐃᕐᖏᓐᓈᕈᑎᒃᑯᑦ ᑐᑭᓯᒋᐊᕐᕕᖓ ᐃᓗᓕᖏᑦ, ᐊᒻᒪ ᖃᕋᓴᐅᔭᒃᑰᖅᑐᓂᑦ ᐃᓗᓕᖏᑦ ᒪᕐᕉᓐᓄᒃ ᑲᑎᒪᓂᐅᔫᓐᓄᒃ ᐊᕐᕌᒍᑕᒫᑦ.

ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᑲᓇᑕᒥ ᐊᖏᔪᖅᑳᖓ ᐊᓪᓚᕕᖓ ᐊᐅᓚᑦᑎᔪᑦ ᑲᑎᒪᓂᕐᒧᑦ ᐃᖅᑲᓇᐃᔮᖑᒋᐊᓕᓐᓂᑦ ᐊᒻᒪ ᑐᓴᐅᒪᔾᔪᑎᓕᕆᓂᕐᒧᑦ ᐱᓕᕆᔭᐅᔪᓂᑦ ᐊᑕᐅᓯᕐᒧᑦ ᑲᑎᒪᓂᕐᒧᑦ ᐊᕐᕌᒍᑕᒫᑦ, ᐱᖃᓯᐅᑎᓪᓗᑎ ᑲᑐᑎᔭᐅᔪᓂᑦ ᐱᕙᓪᓕᐊᔪᓕᕆᔨᓄᑦ ᓴᖅᑭᖅᑎᑕᐅᔪᓂᑦ ᐊᒻᒪ ᑐᓴᕋᔅᓴᓄᑦ ᑲᑎᒪᑎᑦᑎᓂᕐᒧᑦ ᐱᕙᓪᓕᐊᔪᓕᕆᔨᓄᑦ.

1.2.6. ᑭᓱᓕᕆᔾᔪᑏᑦ

ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐊᒻᒪ ᐅᑭᐅᑕᖅᑐᓕᕆᓂᕐᒧᑦ ᑲᓇᑕᒥ (CIRNAC) ᑐᓐᖓᕕᖃᖅᑐᑦ (ᕿᑎᓪᓗᐊᑕᖓ, ᑲᔪᓰᓐᓇᖅᑐᑦ) ᑮᓇᐅᔭᖃᖅᑎᑕᐅᓂᕐᒧᑦ ᐃᖅᑲᓇᐃᔮᖑᔪᓄᑦ ᓯᕗᒧᑦᑎᑕᐅᓗᑎ ᐋᖅᑭᒍᑎᖃᓂᕐᒧᑦ ᐅᑯᑎᒎᓇ ᐱᖓᓱᓂᑦ "ᐃᓚᒋᔭᐅᖏᓐᓇᖅᑐᑦ ᑲᑐᑎᔭᐅᔪᓂᑦ ᐊᐅᓚᓂᖏᓐᓄᑦ" ᐃᓄᓐᓄᑦ, ᐊᓪᓚᐃᑦ, ᐊᒻᒪ ᒪᐃᑎ. ᐅᕙᓂ 2018, ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐊᒻᒪ ᐅᑭᐅᑕᖅᑐᓕᕆᓂᕐᒧᑦ ᑲᓇᑕᒥ ᐱᓚᐅᖃᖅᑐᑦ $76.4 ᒥᓕᐊᓐ ᐅᖓᑖᓄ ᑕᓪᓕᒪᓄᑦ ᐊᕐᕌᒍᓄᑦ ᑖᔅᓱᒧᖓ ᐃᖅᑲᓇᐃᔮᒧᑦ. ᑖᒃᑯᓇᖓᑦ ᑲᑎᑦᑐᒋᑦ ᐊᒥᓲᓂᖏᑦ, $54.5 ᒥᓕᐊᓐ ᐃᓕᐅᖅᑲᖅᑕᐅᓚᐅᖅᑐᑦ ᑮᓇᐅᔭᖃᖅᑎᑕᐅᓗᑎ ᐃᓚᒋᔭᐅᖃᑕᐅᓂᖏᓐᓄᑦ ᐃᓄᐃᑦ, ᐊᓪᓚᐃᑦ, ᐊᒻᒪ ᒪᐃᑏ ᐱᓕᕆᖃᑎᖏᑦ, ᐱᖃᓯᐅᑎᓪᓗᑎ $13 ᒥᓕᐊᓐ ᐃᓄᓐᓄᑦ ᐱᓕᕆᖃᑎᖏᓐᓄᑦ ᐃᓚᒋᔭᐅᓂᖏᓐᓄᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓂᑦ. ᐃᓄᐃᑦ ᑕᐱᕇᑦ ᑲᓇᑕᒥ ᐊᐅᓚᑦᑎᓚᐅᖅᑐᑦ ᑖᔅᓱᒥᖓ ᑮᓇᐅᔭᖃᖅᑎᑕᐅᓂᕐᒧᑦ ᐃᓄᐃᑦ ᐱᓕᕆᖃᑎᖏᓐᓄᑦ.

2.3.1. ᐊᑐᖅᑕᐅᓂᖓ

ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᒃᑯᑦ ᓇᐅᑦᑎᖅᓱᕐᓂᖅ, ᖃᐅᔨᓴᐃᓂᕐᒧᑦ, ᐊᒻᒪ ᐃᓕᓐᓂᐊᓂᕐᒧᑦ (MEL) ᐱᓕᕆᔩᑦ ᑲᒪᒋᔭᖃᓚᐅᖅᑐᑦ ᖃᐅᔨᓴᐃᓂᕐᒥᑦ, ᐱᓕᕆᐊᖑᓚᐅᖅᑐᖅ ᑲᑐᑎᔪᓂᑦ ᖃᐅᔨᓴᖅᑎᓂᑦ. ᖃᐅᔨᓴᐃᓂᕐᒧᑦ ᐱᓕᕆᔩᑦ ᐱᖃᓯᐅᔾᔭᐅᒥᒪᔪᑦ ᑎᓴᒪᓂᑦ ᑎᒥᐅᑉ ᐃᓗᐊᓂ ᖃᐅᔨᓴᖅᑏᑦ ᐅᑯᓇᖓᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐊᒻᒪ ᐅᑭᐅᑕᖅᑐᓕᕆᓂᕐᒧᑦ ᑲᓇᑕᒥ ᐊᒻᒪ ᓯᓚᑖᓃᖔᖅᑐᖅ ᖃᐅᔨᓴᖅᑎ, ᐃᓚᓯᓚᐅᖅᑐᖅ ᐊᓯᐊᓂ ᑎᒥᐅᔪᓂᑦ ᐃᒪᒋᔭᐅᔪᒥᑦ.

ᐱᓕᕆᔩᑦ ᐊᑐᕐᓂᖃᓚᐅᖅᑐᑦ ᐊᑐᖅᑕᐅᓂᖓᓄ ᐱᓕᕆᖃᓗᐊᑕᖃᖅᑐᑦ ᐊᑐᖅᑕᐅᓂᖓ.^{Footnote 3} ᓴᓇᓯᒪᔪᓕᐅᓚᐅᖅᑕᖓ ᖃᐅᔨᓴᐃᓂᕐᒧᑦ ᐃᑲᔪᖅᑕᐅᓗᑎ ᓇᒻᒥᓂᖃᓂᕐᒧᑦ ᐊᒻᒪ ᐊᑐᖅᑕᐅᓂᖏᓐᓄᑦ ᐱᔾᔪᑎᒋᔭᖏᓐᓄᑦ ᐊᑐᖃᑦᑕᖅᑐᓄᑦ, ᓯᕗᓕᖅᑎᑦ ᐊᒻᒪ ᐊᖏᔪᖅᑲᐅᑏᑦ ᐃᖅᑲᓇᐃᔭᖅᑏᑦ ᐃᓚᒋᔭᐅᖃᑕᐅᔪᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓂᑦ. ᐊᑑᑎᖃᑦᑎᐊᓂᐊᕐᓗᓂ, ᐱᓕᕆᔩᑦ ᐱᖃᓯᐅᔾᔨᓚᐅᖅᑐᑦ ᐃᓄᓐᓂᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᔨᖏᓐᓂ ᐸᕐᓇᐃᓂᕐᒥᑦ ᖃᐅᔨᓴᐃᓂᕐᒧᑦ, ᕿᒥᕐᕈᓪᓗᑎ ᖃᐅᔨᔭᐅᔪᓂᑦ, ᐊᒻᒪ ᓴᖅᑭᑎᑦᑎᓪᓗᑎ ᐊᑐᓕᖁᔭᐅᔪᓂᑦ.

2.3.2. ᐊᑐᖅᑕᐅᓂᖏᓐᓄᑦ

ᖃᐅᔨᓴᐃᓂᐅᔪᖅ ᐊᑐᓚᐅᖅᑐᖅ ᐊᒥᓱᒐᓚᓐᓂᑦ ᐊᑐᖅᑕᐅᔪᓂᑦ ᐊᒻᒪ ᑐᑭᓯᒋᐊᕈᑎᑦ ᓇᑭᓐᖔᕐᓂᖏᑦ, ᓇᓗᓇᐃᔭᖅᑕᐅᓯᒪᔪᑦ ᐊᑖᓂ, ᓇᓗᓇᐃᕈᑎᖃᑦᑎᐊᓂᐊᕐᓗᑎ ᖃᐅᔨᔭᐅᔪᑦ. ᐃᓚᓕᐅᔾᔭᐅᓯᒪᔪᑦ C, D, ᐊᒻᒪ E ᓇᓗᓇᐃᔭᐃᓂᖃᖅᑎᑦᑎᔪᑦ ᐊᐱᖅᓱᓂᕐᒧᑦ ᐱᕙᓪᓕᐊᓂᖓᓄᑦ, ᐆᑦᑐᕋᐅᑦ, ᐊᒻᒪ ᖃᐅᔨᓴᐃᓂᐅᔪᑦ, ᐊᐱᖅᓱᓂᕐᒧᑦᑲᐊᑐᒐᖏᑦ, ᐊᒻᒪ ᖃᐅᔨᓴᓂᕐᒧᑦᐆᑦᑐᖃᐅᑎᑦ.

ᐊᔾᔨᒌᖏᓐᓂᖏᑦ ᐊᕕᑦᑐᖅᓯᒪᔪᒥ−ᒐᕙᒪᑐᖃᒃᑯᑦ ᑎᒥᐅᔫᓐᓂᒃ ᐱᓕᕆᖃᑎᒌᓐᓂᖏᑦ

ᐊᒥᓱᒐᒪᐃᑦ ᐃᓄᐃᑦ ᐱᓕᕆᔩᑦ ᓇᓗᓇᐃᖅᓯᓚᖅᑐᑦ ᐊᕕᑦᑐᖅᓯᒪᔪᑦ−ᒐᕙᒪᑐᖃᒃᑯᑦ ᐱᓕᕆᖃᑦᑕᐅᑎᓂᖏᑦ ᐱᓕᕆᖃᑦᑕᐅᑎᓂᓪᓗᐊᑕᕆᓪᓗᓂᒋᑦ ᒐᕙᒪᑐᖃᒃᑯᓐᓄᑦ. ᐊᒥᓲᖏᑦᑐᑦ ᓇᓗᓇᐃᔭᐃᓚᐅᖅᑐᑦ ᐃᖅᑲᓇᐃᔭᖃᑦᑕᖅᑐᑎᑦ ᐊᕕᑦᑐᖅᓯᒪᔪᒧ ᑐᕌᖓᔪᓄᑦ ᐃᓱᒫᓘᑕᐅᔪᓂᑦ ᐊᒻᒪ ᓄᓇᑖᓂᕐᒧᑦ ᐊᑐᓕᖅᑎᑕᐅᓂᖓ ᑎᐅᔪᓂᑦ ᐅᖃᖃᑎᒌᓐᓂᒃᑯᑦ ᐱᓕᕆᖃᑎᒌᓐᓂᒃᑯᑦ ᐊᒻᒪ ᑖᒃᑯᐊ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᑕᖃᖅᑎᑦᑎᔪᑦ ᐃᑲᔪᖅᑐᓂᑦ ᑲᑎᒪᓂᕐᒥᑦ ᐃᓱᒫᓘᑕᐅᔪᓄᑦ ᐃᓄᓐᓄᑦ ᐃᓄᓕᒫᓄᑦ. ᐃᓕᓐᓂᐊᕐᓂᓕᕆᓂᕐᒧᑦ ᖃᐅᔨᓴᕐᓂᐅᕋᑖᖅᓯᒪᔪᑦ ᓇᓗᓇᐃᖅᓯᓯᒪᔪᑦ ᑖᒃᑯᐊ ᑲᑐᑎᑕᐅᔪᑦ ᐊᐅᓚᑦᑎᓂᕐᒧᑦ, ᓲᕐᓗ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ, ᐱᑕᖃᕆᐊᖃᖅᑐᑦ ᓴᓂᐊᓃᓪᓗᑎ ᐅᓪᓗᒥᐅᔪᒥ ᐊᖏᕈᑎᓂᑦ ᐃᓄᓐᓂᑦ ᐱᔪᓐᓇᑎᑦᑎᓗᑎ ᐊᑐᕐᓂᖃᕐᓗᑎ ᐃᒻᒥᒧᑦ ᑲᔪᖏᖅᓯᒪᓂᕐᒧᑦ.^{Footnote 4}

ᐊᑦᑐᐊᓂᖃᕐᓂᖏᑦ ᑲᓇᑕᒥ ᐊᕕᑦᑐᖅᓯᒪᔪᑦ/ᐅᑭᐅᑕᖅᑐᒥ ᐊᕕᑦᑐᖅᓯᒪᔪᑦ ᒐᕙᒪᐃᑦ

ᐊᒥᓱᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᐊᐱᖅᓱᖅᑕᐅᔪᑦ ᐅᖃᓚᐅᖅᑐᑦ ᐱᑕᖃᕆᐊᖃᕆᐊᖃᖅᑐᓂ ᖃᐅᔨᒪᔭᐅᒃᑲᓂᕐᓗᑎ ᐊᑦᑐᐊᓂᖃᕐᓂᖏᑦ ᑲᓇᑕᒥ ᐊᕕᑦᑐᖅᓯᒪᔪᑦ/ᐅᑭᐅᑕᖅᑐᒥ ᐊᕕᑦᑐᖅᓯᒪᔪᑦ ᒐᕙᒪᒃᑯᑦ ᐊᑦᑐᐊᓂᖃᕐᓂᖏᓐᓄᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᖏᑦ ᐃᖅᑲᓇᐃᔭᖅᑕᖏᑦ ᖄᖓᒎᖃᑦᑕᐅᑎᓂᖃᖅᑐᑎ ᒐᕙᒪᐅᔪᓂᑦ, ᓲᕐᓗ ᐱᖁᑎᕐᔪᐊᓂᑦ, ᐃᓪᓗᓕᕆᓂᕐᒥᑦ ᐊᒻᒪ ᐃᓕᓐᓂᐊᕐᓂᓕᕆᓂᕐᒥᑦ. ᐊᒥᓲᖏᑦᑐᑦ ᐃᓄᐃᑦ ᐱᓕᕆᔩᑦ ᓇᓗᓇᐃᖅᓯᓚᐅᖅᑐᑦ ᐃᓱᒫᓘᑎᓂᑦ ᐱᔾᔪᑎᖃᖅᑐᓂᑦ ᖃᓄᐃᓘᖃᑦᑕᐃᑎᓂᖏᓐᓄᑦ ᑲᓇᑕᒥ ᐊᕕᑦᑐᖅᓯᒪᔪᑦ/ᐅᑭᐅᑕᖅᑐᒥ ᐊᕕᑦᑐᖅᓯᒪᔪᑦ ᐱᓕᕆᖃᑎᖏᓐᓂ ᓴᖅᑭᐸᓪᓕᐊᔪᑦ ᐃᓕᐅᖅᑕᐅᔪᓄᑦ ᒐᕙᒪᑐᖃᒃᑯᓐᓂᑦ ᑮᓇᐅᔭᖃᖅᑎᑕᐅᓂᕐᒧᑦ ᑐᕌᑦᑕᐅᑎᒋᔪᓄᑦ ᐃᓄᐃᑦ ᓄᓇᑖᓂᕐᒧᑦ ᑲᑐᔾᔨᖃᑎᒌᓄᑦ ᐊᒻᒪ ᐊᑦᑎᓪᓕᒋᐊᕈᓐᓇᑐᐃᓐᓇᕆᐊᖃᕐᓂᖓ ᑲᓇᑕᒥ ᐊᕕᑦᑐᖅᓯᒪᔪᑦ/ᐅᑭᐅᑕᖅᑐᒥ ᐊᕕᑦᑐᖅᓯᒪᔪᑦ ᐱᓕᕆᑎᑦᑎᓂᖏᑦ. ᐊᒥᓲᖏᑦᑐᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂ ᐱᓕᕆᔩᑦ ᐅᖃᐅᓯᖃᓚᐅᖅᑐᑦ ᐱᔾᔪᑎᖃᖅᑐᓂᑦ ᐱᑕᖃᕆᐊᖃᕐᓂᖓᓄᑦ ᐊᐅᓚᑕᐅᓂᖃᕐᓗᓂ ᑲᓇᑕᒥ ᐊᕕᑦᑐᖅᓯᒪᔪᑦ/ᐅᑭᐅᑕᖅᑐᒥ ᐊᕕᑦᑐᖅᓯᒪᔪᑦ ᐱᓕᕆᖃᑎᖏᓐᓂ ᐊᑐᓕᖅᑎᑕᐅᓂᖏᓐᓄᑦ ᐃᓚᖏᓐᓂ ᓇᒦᓐᓂᖏᓐᓂ.

ᑕᑯᔭᕗᑦ ᐱᑕᖃᕆᐊᖃᕐᓂᖓ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᓕᓴᖅᓯᓗᑎ [ᑲᓇᑕᒥ ᐊᕕᑦᑐᖅᓯᒪᔪᑦ/ᐅᑭᐅᑕᖅᑐᒥ ᐊᕕᑦᑐᖅᓯᒪᔪᑦ] ᐃᓱᒪᒋᔭᐅᓂᖏᓐᓄᑦ. ᐃᓚᖏᓐᓂ ᑖᒃᑯᐊ ᑭᓱᐃᑦ ᑲᑎᓐᓂᖃᕆᐊᖃᖅᑐᑦ, …ᐱᔭᐅᔭᕆᐊᖃᕈᕕᑦ ᐃᓚᒋᔭᐅᓗᑎ ᐋᖅᑭᒍᑎᒧᑦ, ᐃᓚᒋᔭᐅᔭᕆᐊᖃᖅᑐᑎᑦ ᐅᖃᖃᑎᒌᓐᓂᐅᔪᓂᑦ

ᐃᓄᐃᑦ ᐱᓕᕆᔩᑦ ᐱᖓᓱᓂᑦ ᐊᕕᑦᑐᖅᓯᒪᔪᓂᑦ ᐃᓱᒪᒋᔭᖃᓚᐅᖅᑐᑦ ᑲᓇᑕᒥ ᐊᕕᑦᑐᖅᓯᒪᔪᑦ/ᐅᑭᐅᑕᖅᑐᒥ ᐊᕕᑦᑐᖅᓯᒪᔪᑦ ᒐᕙᒪᐃᑦ ᐱᓕᕆᖃᑎᖏᑦ ᐱᔪᒪᓂᖃᑦᑎᐊᓚᐅᖅᑐᑦ ᐱᓕᕆᖃᑎᒌᖃᑎᖃᑎᒋᓗᒋᑦ ᑐᓂᔭᐅᔭᕆᐊᖃᕐᓂᖅᓴᓂ ᐆᑦᑐᖃᐅᑦ ᐋᖅᑭᑦᑕᐅᓯᒪᔪᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓄᑦ ᐊᒻᒪ ᓇᓕᒧᓕᕈᓐᓇᕐᓂᖓ ᓴᖅᑭᖅᑎᑕᐅᔪᑦ ᐃᓄᓐᓄᑦ ᑐᕌᖓᒧᓂᑦ ᑮᓇᐅᔭᖃᖅᑎᑕᐅᓂᕐᒧᑦ. ᐊᒥᓲᓂᖅᓴᐃᑦ ᐊᐱᖅᓱᖅᑕᐅᔪᑦ ᐅᖃᐅᓯᔅᓴᖃᓚᐅᖅᑐᑦ ᑖᔅᓱᒥᖓ ᐃᓱᒫᓘᑕᐅᔪᒥᑦ ᐃᑲᔪᖅᓱᓚᐅᖏᑦᑐᑦ ᐱᖃᓯᐅᑎᓪᓗᑎ ᑲᓇᑕᒥ ᐊᕕᑦᑐᖅᓯᒪᔪᑦ/ᐅᑭᐅᑕᖅᑐᒥ ᐊᕕᑦᑐᖅᓯᒪᔪᑦ ᒐᕙᒪᐃᑦ ᐱᓕᕆᖃᑎᖏᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓂᑦ, ᑭᓯᐊᓂ ᑕᑯᔪᒪᓚᐅᖅᑐᑦ ᐃᒻᒥᑰᖅᑐᒥᑦ, ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᖅᑎᑐᑦ ᐊᐅᓚᓂᖃᖅᑐᓂᑦ ᖁᕝᕙᓯᓐᓂᕆᔭᖓᓂ.

3.3.1. ᐱᕙᓪᓕᐊᓂᖓ ᑐᕌᖅᑐᑦ ᓯᕗᒧᑦᑎᑦᑎᒋᐊᓂᕐᒧᑦ ᐱᓕᕆᖃᑎᒌᓐᓂᐅᔪᑦ

(5 ᐅᓪᓗᕆᐊᑦ – ᖁᕝᕙᓯᑦᑐᖅ ᖁᕝᕙᓯᓐᓂᖓ ᐱᕙᓪᓕᐊᓂᖓᓄ ᖃᐅᔨᓴᓂᕐᒧᑦ ᐅᖃᐅᓯᐅᔪᖅ)

ᐊᑕᖏᖅᑐᒋᑦ ᖃᐅᔨᔭᐅᓯᒪᔪᑦ ᖃᐅᔨᓴᐃᓂᕐᒥᑦ ᓇᓗᓇᐃᖅᓯᔪᑦ ᑖᒃᑯᐊ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐊᖏᔪᒥᑦ ᐃᖏᕋᓂᓯᒋᐊᖅᓯᒪᔪᑦ ᓯᕗᒧᒋᐊᑎᑦᑎᓂᕐᒧᑦ ᐱᓕᕆᖃᑎᒌᓐᓂᖏᓐᓄᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ. ᐊᐱᖅᓱᖅᑕᓕᒫᖑᔪᑦ ᐊᒻᒪ ᐊᒥᓲᓂᖅᓴᐃᑦ (91%) ᖃᓯᐅᔨᓴᓂᕐᒧᑦ ᑭᐅᔪᓂᑦ ᐊᖏᓚᐅᖅᑐᑦ ᑖᒃᑯᐊ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓯᕗᒧᒋᐊᖅᓯᒪᓂᖃᖅᑐᑦ ᐱᓕᕆᖃᑎᒌᓐᓂᖏᓐᓄᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ. ᑎᑎᕋᖅᓯᒪᔪᓂᑦ ᑭᐅᔾᔪᑎᖏᓐᓂ, ᐊᒥᓱᑦ ᖃᐅᔨᓴᓂᕐᒧᑦ ᑭᐅᔪᑦ ᓇᓗᓇᐃᖅᓯᓚᐅᖅᑐᑦ ᐱᓕᕆᖃᑎᒌᓕᐅᓂᕐᒥᑦ ᐊᒻᒪ ᐱᐅᓯᑎᒋᐊᖅᓯᒪᔪᓂᑦ ᐱᓕᕆᖃᑎᖃᒌᓐᓂᕐᒧᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓄᑦ ᑎᑭᑕᐅᓯᒪᓪᓗᐊᑕᖅᑐᓂ. ᖃᐅᔨᓴᐃᔩᑦ ᖃᐅᔨᓚᐅᖅᑐᑦ ᐃᑉᐱᒍᓱᑦᑎᐊᕐᓂᖃᖅᑐᓂᑦ ᐱᓕᕆᖃᑎᒌᓐᓂᐅᔪᓂᑦ ᓯᕗᓕᖅᑏᑦ ᑲᑎᒪᔨᕋᓛᖏᑦ ᑲᑎᒪᓂᖏᓐᓂ.

ᐊᑦᑐᐃᓂᖃᖅᑎᑦᑎᓯᒪᓂᖏᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐊᖏᔫᓯᒪᔪᖅ – ᐱᓕᕆᐊᓪᓗᐊᑕᖃᖅᑐᓂᑦ ᐅᖃᖃᑎᒌᓐᓂᐅᔪᑦ, ᓯᕗᒧᑦ ᐃᓱᒪᒋᔭᖃᓂᕐᒧᑦ ᐅᖃᖃᑎᒌᓐᓂᐅᔪᑦ, ᐊᒻᒪ ᐋᖅᑭᑦᑕᐅᑲᓐᓂᖅᓯᒪᔪᑦ ᐱᓕᕆᖃᑎᒌᓐᓂᐅᔪᑦ. ᑕᑯᔅᓴᐅᑎᑦᑎᔪᑦ ᐱᐅᔪᒥᑦ ᐱᓕᕆᖃᑎᖃᕈᓐᓇᕐᓂᖏᑦ ᐃᓄᐃᑦ ᑲᓇᑕᒥ

ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᑕᖃᖅᑎᑦᑎᓯᒪᔪᑦ ᐃᓕᓴᕆᔭᐅᓯᒪᔪᒥᑦ, ᐃᓄᐃᑦ ᓄᓇᖓᓕᒫᒧᑦ ᐱᕙᓪᓕᐊᓂᖓ ᐱᓕᕆᖃᑎᒌᓕᐅᓂᕐᒥᑦ, ᑐᑭᓯᐅᒪᖃᑦᑕᐅᑎᓂᕐᒥᑦ ᐊᒻᒪ ᐱᓕᕆᖃᑎᒌᖃᑎᖃᓂᕐᒧᑦ ᖃᓄᐃᓕᓯᒋᐊᕐᓂᐅᔪᑦ. ᐊᒥᓱᒐᓚᐃᑦ ᐃᓄᐃᑦ ᓯᕗᓕᖅᑎᑦ ᐊᒻᒪ ᐱᓕᕆᔩᑦ ᐅᖃᓚᐅᖅᑐᑦ ᑖᒃᑯᐊ ᓯᕗᓂᐊᒍᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᑲᑎᒪᓂᖏᓐᓄᑦ ᒐᕙᒪᑐᖃᒃᑯᑦ ᐱᓕᕆᖃᑎᖏᓐᓂ ᐊᔾᔨᒌᖃᑦᑕᓚᐅᖏᑦᑐᑦ, ᐊᒻᒪ ᑕᐃᒪᐃᓐᓂᖃᑐᐃᓐᓇᖅᑐᑎᑦ ᐊᑕᐅᓯᒡᒍᑎᑦ ᒥᓂᔅᑕᐃᑦ ᐃᒻᒥᒧᑦ ᐱᔪᒪᓂᖃᖅᑎᓪᓗᒋᑦ ᐅᕝᕙᓘᓐᓂᑦ ᐃᓄᐃᑦ ᐊᔭᐅᖅᓯᑎᓪᓗᒋᑦ ᐊᑕᐅᓯᕐᒥᑦ ᒥᓂᔅᑕᓄᑦ ᐊᓪᓚᕕᖓᖏᓐᓄᑦ.

ᐱᑕᖃᑐᐃᓐᓇᕐᓂᖓᓄᑦ ᑎᐅᔪᓂᑦ ᐱᓕᕆᖃᑎᒌᑦᑐᓂ ᑲᑎᒪᓂᕐᒧᑦ ᐅᑯᓇᖓᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ ᐊᖏᔪᒻᒪᕆᐅᔪᖅ ᑎᑭᑕᐅᓯᒪᔪᖅ. ᐊᓯᔾᔨᖅᑕᐅᓯᒪᔪᖅ ᐱᓕᕆᖃᑎᒌᓐᓂᖏᑦ ᐃᓄᐃᑦ, ᐃᓄᐃᑦ ᓄᓇᖓᑦ, ᐊᒻᒪ ᒐᕙᒪᑐᖃᒃᑯᑦ.

ᐊᒥᓲᓂᖅᓴᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂᓄ ᐱᓕᕆᔩᑦ ᐅᖃᓚᐅᖅᑐᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓴᓐᖓᑎᑦᑎᒋᐊᓚᐅᖅᑐᑦ ᐃᖅᑲᓇᐃᔭᓂᕐᒧᑦ ᐱᓕᕆᖃᑎᒌᓐᓂᐅᔪᓂᑦ ᓯᕗᓕᖅᑎᓂᑦ ᐊᒻᒪ ᓇᓗᓇᐃᔭᖅᓯᒪᓂᖏᓐᓄᑦ ᖁᕝᕙᓯᓐᓂᖏᓐᓂ. ᐊᒥᓱᒐᓚᐃᑦ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᓇᓗᓇᐃᖅᓯᓚᐅᖅᑐᑦ ᓴᓐᖏᔪᒥᑦ ᐃᖅᑲᓇᐃᔭᓂᕐᒧᑦ ᐱᓕᕆᖃᑎᒌᓐᓂᖏᓐᓄᑦ ᓯᕗᓕᖅᑎᑦ ᐊᒻᒪ ᐱᓕᕆᔩᑦ ᑕᒪᒃᑭᐅᓪᓗᑎ ᐃᖏᕋᓂᖃᖅᑎᑦᑎᔪᑦ ᐊᒻᒪ ᖃᓄᐃᓐᓂᕆᓪᓗᓂᒋᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ.

ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᖁᕝᕙᕆᐊᖅᑎᑦᑎᓚᐅᖅᑐᑦ ᐃᓄᓐᓄᑦ ᐱᕕᔅᓴᐅᔪᓐᓇᖅᑐᓂᑦ ᐊᔭᐅᖅᓯᒋᐊᕐᓗᑎ ᒐᕙᒪᑐᖃᒃᑯᑦ ᐊᑐᐊᒐᖏᓐᓂ, ᐅᖃᖅᓯᒪᔭᖏᓐᓄᑦ ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ. ᐊᒥᓱᒐᓚᐃᑦ ᐱᓕᕆᔩᑦ ᐅᖃᓚᐅᖅᑐᑦ ᐱᔪᓐᓇᑎᑦᑎᓚᐅᖅᑐᑦ ᒪᑐᐃᖓᔪᒥᑦ ᐅᖃᖃᑎᒌᓐᓂᐅᔪᓂᑦ ᐱᔾᔪᑕᐅᔪᓂᑦ ᓯᓚᑖᓂ ᐊᑕᐅᓯᕐᒧᑦ ᐱᓕᕆᕕᒻᒧᑦ ᑐᕌᒐᖏᓐᓂ, ᐃᓚᖏᑦ ᐃᓚᓯᓪᓗᑎ ᑖᓐᓇ ᐱᑕᖃᕆᐊᖃᓚᐅᖅᑐᓂ ᐊᓯᔾᔩᓂᖃᖅᑐᒧᑦ. ᐊᒥᒐᓚᐃᑦ ᐱᓕᕆᔩᑦ ᐅᖃᓚᐅᖅᑐᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᑐᑭᒧᐊᖅᑎᑦᑎᓯᒪᔪᑦ ᐊᑐᖅᑕᐅᓚᐅᖅᓯᒪᖏᑦᑐᓂᑦ ᐱᔾᔪᑎᖃᖅᑐᓂᑦ ᒐᕙᒪᑐᖃᒃᑯᑦ ᐃᓱᒪᓕᐅᕐᓂᖏᓐᓄᑦ ᐊᑦᑐᐃᓂᖃᕈᓐᓇᖅᑐᓂᑦ ᐃᓄᓐᓂᑦ.

ᖃᐅᔨᓴᖅᑕᐅᖃᑦᑕᔪᔪᒍᑦ ᓯᕗᒧᒋᐊᓂᕐᒧᑦ ᐊᑕᐅᓯᒡᒍᑎᐅᓪᓗᑎ ᐊᖏᖅᑕᐅᓯᒪᔭᕇᖅᓯᒪᔪᓄᑦ ᒥᓂᔅᑕᓄᑦ. ᒫᓐᓇ, ᓴᖅᑭᑎᑦᑎᖃᑎᒌᒍᑎᒋᓚᐅᑕᕗᑦ ᐃᓄᓐᓂᑦ ᐱᓕᕆᖃᑎᑦᑎᓐᓂ ᐊᒻᒪ ᒥᓂᔅᑕᓅᖅᑐᑎᑦ.

ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᐊᐱᖅᓱᖅᑕᐅᔪᑦ ᐅᖃᓚᐅᖅᑐᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᖁᕝᕙᕆᐊᖅᑎᑦᑎᓯᒪᔪᑦ ᒐᕙᒪᑐᖃᒃᑯᓐᓂᑦ ᐱᓕᕆᖃᑎᖏᓐᓂ ᑐᑭᓯᔭᐅᓐᓗᑎ ᐃᓄᐃᑦ ᐊᒻᒪ ᐃᓄᐃᑦ ᓄᓇᖓᑦ. ᐊᒥᓱᒐᓚᐃᑦ ᐃᓄᐃᑦ ᐱᓕᕆᔩᑦ ᑕᑯᓚᐅᖅᑐᑦ ᐱᔪᒪᓂᖃᖅᑐᓂᑦ ᒐᕙᒪᑐᖃᒃᑯᑦ ᐱᓕᕆᖃᑎᖏᓐᓂ ᓄᑖᓂᑦ ᐊᑐᕋᓱᐊᕐᓗᑎ ᓇᓗᓇᖅᑐᓄᑦ ᐊᑐᐊᒐᕐᒧᑦ ᐃᓱᒫᓘᑕᐅᔪᓄᑦ ᖃᓄᐃᓐᓂᕆᓪᓗᓂᐅᒃ.

3.3.2. ᑐᕌᒐᖓ 1: ᓇᓗᓇᐃᕐᓗᒋᑦ ᐊᑐᑎᑕᐅᔪᑦ ᓯᕗᓪᓕᐅᔾᔭᐅᔭᕆᐊᓖᑦ ᓇᒦᓐᓂᖏᑦ ᖃᓄᐃᓕᓯᒋᐊᓂᕐᒧᑦ

(4 ᐅᓪᓗᕆᐊᑦ – ᖁᕝᕙᓯᑦᑐᒦᑦᑐᖅ ᖁᕝᕙᓯᓐᓂᖓ ᐱᕙᓪᓕᐊᓂᖓᓄ ᖃᐅᔨᓴᓂᕐᒧᑦ ᐅᖃᐅᓯᐅᔪᖅ)

ᐊᒥᓲᓂᖅᓴᐃᑦ ᐊᐱᖅᓱᖅᑕᐅᔪᑦ ᐊᒻᒪ ᐊᒥᓲᓂᖅᓴᒻᒪᕆᒋᔭᖏᑦ (91%) ᖃᐅᔨᓴᓂᕐᒧᑦ ᑭᐅᔪᓂᑦ ᐊᖏᓚᐅᖅᑐᑦ ᐊᖏᔪᒥᑦ ᐱᕙᓪᓕᐊᓂᖃᖅᓯᒪᓪᓗᑎ. ᓯᕗᓪᓕᖅᐹᖓᓂ ᐊᕐᕌᒍᖓᓂ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ, ᓯᕗᓕᖅᑏᑦ ᐊᖏᖅᓯᓚᐅᖅᑐᑦ ᐊᕐᕕᓂᓕᓐᓂᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ ᓇᒦᓐᓂᖏᓐᓄᑦ ᐊᒻᒪ ᐃᓚᓯᓯᒪᓪᓗᑎ ᐊᕐᕕᓂᓕᒃᑲᓂᕐᓂᑦ ᑕᐃᒪᓐᖓᓂᑦ (ᑕᑯᓗᒍ ᐊᔾᔨᙳᐊᖅ 2).

ᑖᒃᑯᐊ [ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛ] ᐊᑐᖅᑎᐊᕐᓂᖃᓛᖃᕐᕕᒋᔭᖓ. ᓯᕗᓪᐹᖑᔪᖅ ᐱᔭᕇᖅᓯᒪᔭᖏᓐᓂᑦ. ᓇᓗᓇᐃᖅᑕᐅᓂᖏᓐᓄᑦ ᐊᒻᒪ ᓇᓗᓇᐃᖅᓯᒪᑦᑎᐊᖅᑐᓂᑦ ᐅᖃᐅᓯᐅᓂᖏᓄᑦ ᑲᑐᑎᔭᐅᔪᑦ ᓯᕗᓪᓕᐅᔾᔭᐅᔭᕆᐊᓖᑦ

ᐊᒥᓱᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᐊᐱᖅᓱᖅᑕᐅᔪᑦ ᖁᕕᐊᓱᒍᑎᖃᒪᐅᖅᑐᑦ ᒐᕙᒪᑐᖃᒃᑯᑦ ᑭᐅᓂᖏᓐᓄᑦ ᐃᓄᐃᑦ ᐱᓕᕆᖃᑎᖏᓐᓄᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ. ᐃᓄᐃᑦ ᐱᓕᕆᖃᑎᖏᑦ ᑐᔅᓯᕋᓚᐅᖅᑑᒐᓗᐊᑦ ᐊᒥᓲᓂᖅᓴᓂᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ ᓇᒦᓐᓂᖏᓐᓄᑦ, ᐃᓛᓐᓂᒃᑯᑦ ᒐᕙᒪᑐᖃᒃᑯᑦ ᐱᓕᕆᖃᑎᖏᑦ ᑐᔅᓯᕋᒪᐅᕐᒥᔪᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ ᓇᒦᓐᓂᖏᓐᓄᑦ, ᓲᕐᓗ ᓄᑖᖅ ᐃᒻᒥᑰᕐᓂᖅ, ᓴᐳᒻᒥᑦᑎᓂᖅ ᐊᒻᒪ ᐊᑦᑕᓇᐃᖅᓯᒪᓂᕐᒧᑦ ᙳᓄᓪᓕᐅᔾᔭᐅᔭᕆᐊᓖᑦ. ᐊᒥᓱᒐᒪᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᒐᕙᒪᑐᖃᒃᑯᑦ ᐱᓕᕆᖃᑎᖏᓐᓂ ᐃᓚᒋᔭᐅᓂᖅᓴᐅᓗᑎ ᓇᓗᓇᐃᖅᑕᐅᓂᖏᓐᓄᑦ ᐊᒻᒪ ᐅᖃᐅᓯᐅᓂᖏᓐᓄᑦ ᓯᕗᓪᓕᐅᔾᔭᐅᔭᕆᐊᓖᑦ, ᓇᓗᓇᐃᖅᓯᓂᖃᖅᑐᑎᑦ ᑖᒃᑯᐊ ᐃᓄᐃᑦ ᐱᓕᕆᖃᑎᖏᑦ ᑐᑭᒧᐊᖅᑎᑦᑎᓗᑎ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᐱᓕᕆᒋᐊᖃᖅᑕᖏᑦ.

ᐃᓚᖏᑦ ᐊᔅᓱᕈᕈᑕᐅᔪᑦ ᐊᑦᑐᐊᓂᖃᐃᓐᓇᖅᑐᑦ ᐋᖅᑭᑦᑕᐅᓂᖏᓐᓄᑦ ᐊᒻᒪ ᐊᐅᓚᑕᐅᓂᖏᓐᓄᑦ ᓯᕗᓪᓕᐅᔾᔭᐅᔭᕆᐊᓖᑦ, ᐅᖃᐅᓯᔪᖅ ᓇᓗᓇᐃᔭᒃᑲᓂᖅᓯᒪᔪᑦ ᐅᕙᓂ ᐃᓚᖓ 3.5. ᐊᒥᓱᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᐅᖃᓚᐅᖅᑐᑦ ᐊᒥᓲᓗᐊᖅᑐᑎᑦ ᓯᕗᓪᓕᐅᔾᔭᐅᔭᕆᐊᓖᑦ ᐊᒻᒪ ᐱᓕᕆᖃᑎᖏᑦ ᓯᕗᓪᓕᐅᔾᔨᔭᕆᐅᕆᐊᓖᑦ ᐃᓗᐊᓂ ᐃᓕᐅᖅᑲᐃᔪᓐᓇᓂᐊᕐᖓᑕ ᓈᒻᒪᑦᑐᓂᑦ ᑭᓱᓕᕆᔾᔪᑎᓂᑦ ᐊᒻᒪ ᑎᑭᑦᑎᓗᑎ ᐊᓯᔾᔨᐸᓪᓕᐊᓂᖃᖅᑐᒥᑦ ᐊᓯᔾᔨᖅᑐᒧᑦ. ᐊᒥᓱᑦ ᐅᖃᓚᐅᖅᑐᑦ ᐱᓕᕆᖃᑎᖏᑦ ᕿᒥᕐᕈᔭᕆᐊᖃᖅᑐᑎᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ ᓇᒦᓐᓂᖏᓐᓂ ᐊᒻᒪ ᑖᒃᑯᐊ ᐱᓕᕆᖃᑎᒌᑦᑐᓕᒫᖑᔪᑦ ᐃᑲᔪᖅᓱᑎᐊᕐᓗᓂᒋᑦ.

ᑭᓪᓕᖃᖅᑐᒥᑦ ᐱᕕᔅᓴᖃᖅᑐᒍᑦ ᐃᓱᒫᓘᑕᐅᔪᑦ ᓴᖅᑭᑕᐅᑎᓪᓗᒋᑦ ᓯᕗᓕᖅᑎᓄᑦ, ᑕᐃᒪᐃᓐᓂᖓᓄᑦ ᐊᑦᑕᓇᕈᑎᑕᖃᖅᑐᖅ ᓯᐊᒻᒪᖅᑎᑕᐅᓗᐊᓂᕐᒧᑦ. ᐋᖅᑭᑦᑕᐅᓂᖏᑦ ᓯᕗᓪᓕᐅᔾᔭᐅᔭᕆᐊᓖᑦ ᐊᒻᒪ ᓇᓂᓗᒍ ᑖᓐᓇᓪᓗᐊᖅ ᓇᓕᒧᑎᑦᑎᔪᒥᑦ ᐊᔅᓱᕈᓇᖅᑐᖅ

3.3.3. ᑐᕌᒐᖓ 2: ᓴᖅᑭᖅᑎᑕᐅᓗᑎ ᐃᖅᑲᓇᔮᖑᓂᐊᖅᑐᓄᑦ ᐸᕐᓇᐅᑏᑦ ᓴᓇᓯᒪᓂᖃᖅᑎᑦᑎᔪᑦ ᐱᓕᕆᖃᑎᒌᓐᓂᐅᔪᓂᑦ ᐊᒻᒪ ᖃᓄᐃᓕᓯᒋᐊᓂᕐᒧᑦ

(3 ᐅᓪᓗᕆᐊᑦ – ᕿᑎᕋᖅᑐᖅ ᖁᕝᕙᓯᓐᓂᖓ ᐱᕙᓪᓕᐊᓂᖓᓄ ᖃᐅᔨᓴᓂᕐᒧᑦ ᐅᖃᐅᓯᐅᔪᖅ)

ᐊᒥᓲᓂᖅᓴᐃᑦ ᐊᐱᖅᓱᖅᑕᐅᔪᑦ ᐅᖃᓚᐅᖅᑐᑦ ᐱᓕᕆᖃᑎᖏᑦ ᐱᐅᔪᒥᑦ ᐱᕙᓪᓕᐊᓂᖃᖅᓯᒪᔪᑦ ᑐᕌᖅᑐᒥᑦ ᑐᕌᒐᖓᓂ. ᐊᒥᓲᓂᖅᓴᐃᑦ (85%) ᖃᐅᓴᓂᕐᒧᑦ ᑭᐅᔪᑦ ᐊᖏᓚᐅᖅᑐᑦ ᑖᒃᑯᐊ ᑲᑎᒪᔨᕋᓛᑦ ᓴᖅᑭᑎᑦᑎᓯᒪᔪᑦ ᓇᓗᓇᐃᖅᓯᒪᔪᒥᑦ, ᓈᒻᒪᑦᑐᒥᑦ ᐃᖅᑲᓇᐃᔮᖑᓂᐊᖅᑐᓂᑦ ᐸᕐᓇᐅᒻᒥᑦ. ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᔨᕆᔩᑦ ᐅᖃᓚᐅᖅᑐᑦ ᑲᑐᑎᔭᐅᔪᖅ ᐃᖅᑲᓇᐃᔮᖑᔪᖅ ᐸᕐᓇᐃᓂᕐᒧᑦ ᐱᕙᓪᓕᐊᓂᖓ, ᐃᓛᓐᓂᒃᑯᑦ ᐱᒡᒐᓇᖅᐸᒃᑲᓗᐊᖅᑐᓂ, ᐃᑲᔫᑎᖃᓚᐅᖅᑐᖅ ᐱᔾᔪᑎᒋᓗᒍ ᓴᓐᖓᑎᑦᑎᒋᐊᕐᓂᖓᓄᑦ ᐱᓕᕆᖃᑎᒌᓐᓂᖏᓐᓄᑦ ᐊᒻᒪ ᐊᐅᓚᑕᐅᓂᖏᓐᓄᑦ.

ᑭᓯᐊᓂᓕ, ᐱᐅᓂᖏᑦ ᐃᖅᑲᓇᐃᔮᖑᓂᐊᖅᑐᓄᑦ ᐸᕐᓇᐅᑏᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ ᓇᒦᓐᓂᖏᓐᓄᑦ, ᒪᓕᑦᑐᒋᑦ ᖃᐅᔨᓴᖅᑏᑦ ᖃᐅᔨᓴᖅᓯᒪᔭᖏᑦ ᐊᒻᒪ ᐃᓱᒪᒋᔭᐅᔪᑦ ᑲᑐᑎᔭᐅᔪᑦ ᐃᓚᖏᓐᓂᑦ ᐊᐱᖅᓱᕐᓂᐅᔪᓂᑦ. ᐃᓚᖏᑦ ᐃᖅᑲᓇᐃᔮᖑᓂᐊᖅᑐᓄᑦ ᐸᕐᓇᐅᑏᑦ ᐱᑕᖃᑦᑎᐊᖅᑑᔮᖏᑦᑐᑦ ᓇᓗᓇᐃᖅᓯᒪᔪᓂᑦ, ᓈᒻᒪᓐᓂᖓᓄᑦ ᐊᑐᖅᑕᐅᓂᐊᖅᑐᒥᑦ ᐊᑦᑐᐊᓂᓕᓐᓄᑦ ᑐᕌᒐᖓᓄᑦ ᓯᕗᓪᓕᐅᔾᔭᐅᔭᕆᐊᓕᓐᓄᑦ. ᐃᓚᒋᐊᕐᓗᒍ, ᐃᓚᖏᑦ ᓇᓗᓇᐃᖅᓯᓚᐅᖏᑦᑐᑦ ᑭᒃᑯᑦ ᑲᒪᒋᔭᖃᕐᒪᖔᑕ ᑐᓂᔭᐅᔪᓐᓇᖅᑐᓂᑦ, ᑐᓂᔭᐅᔪᓐᓇᖅᑐᑦ ᐱᔭᐅᔭᕆᐊᖃᓕᖅᑎᓪᓗᒋᑦ, ᐊᒻᒪ ᑭᓱᓕᕆᔾᔪᑏᑦ ᐱᔭᐅᔭᕆᐊᖃᖅᑐᑦ.

ᐃᓛᓐᓂᒃᑯᑦ ᐱᒡᒐᓇᖃᑦᑕᖅᑐᖅ ᓇᓗᓇᐃᕐᓗᒋᑦ ᖃᓄᐃᑦᑐᑦ ᖃᓄᐃᓕᓯᒋᐊᕈᑏᑦ ᐱᓕᕆᐊᖑᔪᓐᓇᕐᒪᖔᑕ ᕿᑎᓪᓗᐊᑕᖓᓅᕐᓗᓂ ᐊᒻᒪ ᑕᑯᔅᓴᐅᑎᑦᑎᓗᓂ ᐱᕙᓪᓕᐊᓂᖓᓄᑦ. ᑕᒪᑐᒥᖓ ᐱᑦᑎᐊᓂᖅᓴᐅᓕᖅᑐᒍᑦ, ᑭᓯᐊᓂ ᐊᖏᔪᒥᑦ ᐱᓕᕆᐊᔅᓴᖃᕆᐊᖃᖅᑐᒍᑦ.

ᐃᓱᒫᓘᑎᑕᖃᓚᐅᕐᒥᔪᖅ ᐃᓚᖏᑦ ᖃᓄᐃᓐᓂᕆᔭᖏᑦ ᐊᒻᒪ ᑐᓂᔭᐅᔪᓐᓇᖅᑐᑦ, ᐃᑲᔪᓱᖅᑕᐅᒐᓗᐊᖅᑐᓂ ᓯᕗᓕᖅᑎᓄᑦ, ᑲᔪᖏᖅᓯᒪᓂᖃᑦᑎᐊᓚᐅᖏᑦᑐᑦ ᐱᓕᕆᖃᑎᒌᑦᑐᓕᒫᓄᑦ. ᐃᓚᖏᑦ ᐃᖅᑲᓇᐃᔮᖑᓂᐊᖅᑐᑦ ᐸᕐᓇᐅᑏᑦ ᐱᔾᔪᑎᖃᓗᐊᓚᐅᖅᑐᑦ ᐃᓱᒫᓘᑕᐅᔪᓂᑦ ᓇᓗᓇᐃᖅᓯᒪᔪᓄᑦ ᐊᑕᐅᓯᕐᒧᑦ ᐅᕝᕙᓘᓐᓃᑦ ᐊᓯᒃᑲᓐᓂᖓ ᐃᓄᐃᑦ ᐊᕕᑦᑐᖅᓯᒪᔪᖅ ᐅᕝᕙᓘᓐᓃᑦ ᐃᑲᔪᖅᓱᑕᐅᑦᑎᐊᓚᐅᖏᑦᑐᖅ ᐃᓄᓐᓄᑦ ᐱᓕᕆᖃᑎᒌᑦᑐᓕᒫᓄᑦ. ᐊᒥᓱᒐᓚᐃᑦ ᒐᕙᒪᑐᖃᒃᑯᓐᓂᑦ ᐊᒻᒪ ᐃᓄᐃᑦ ᐱᓕᕆᔩᑦ ᐃᓱᒫᓗᓚᐅᖅᑐᑦ ᐃᖅᑲᓇᐃᔮᖑᓂᐊᖅᑐᓂᑦ ᐸᕐᓇᐅᑎᓂᑦ ᐃᖅᑲᖅᑐᐃᕕᒃᑰᓚᐅᖅᑐᑦ ᐊᒻᒪ ᑕᐃᒪᐃᓐᓂᖓᓄᑦ ᐊᐅᓚᑕᐅᔪᓐᓇᖏᑦᑐᖅ ᑲᑎᒪᔨᕋᓛᓄᑦ. ᐃᓚᖏᑦ ᐃᖅᑲᓇᐃᔮᖑᓂᐊᖅᑐᓄᑦ ᐸᕐᓇᐅᑏᑦ ᑕᑯᔅᓴᐅᓂᖃᓚᐅᖅᑐᑦ ᖃᓄᐃᓕᓯᒋᐊᕐᓂᐅᔪᓂᑦ ᐃᓄᐃᑦ ᐱᓕᕆᖃᑎᖏᓐᓂ ᑕᑯᔪᒪᓚᐅᖅᑕᖏᓐᓂ, ᑭᓯᐊᓂ ᒐᕙᒪᑐᖃᒃᑯᑦ ᐱᓕᕆᖃᑎᖏᑦ ᑲᔪᖏᖅᓯᒪᑦᑎᐊᓚᐅᖏᑦᑐᑦ, ᑕᐃᒪᐃᓐᓂᕋᖅᑕᐅᔪᓄᑦ ᐊᒥᓱᒐᓚᓐᓄᑦ ᐃᓄᓐᓄᑦ ᐱᓕᕆᔨᓄᑦ. ᑖᒃᑯᐊ ᓴᓐᖐᓐᓂᕆᔭᖏᑦ ᐃᖅᑲᓇᐃᔮᖑᓂᐊᖅᑐᓂᑦ ᐸᕐᓇᐅᑎᓂᑦ ᐊᑦᑕᓇᕈᑎᖃᖅᑎᑦᑎᔪᑦ ᐱᓕᕆᖃᑎᒌᓐᓂᐅᔪᓂᑦ, ᑕᑯᔅᓴᐅᑎᑕᐅᓯᔪᑦ ᐅᖃᖅᑕᐅᓯᒪᔪᓂᑦ ᐊᑖᓂ.

ᐊᑑᑎᖃᖏᑦᑐᖅ ᓴᖅᑭᑎᑦᑎᓗᓂ ᓴᓐᖐᑦᑐᓂᑦ ᐃᖅᑲᓇᐃᔮᖑᓂᐊᖅᑐᓂᑦ ᐸᕐᓇᐅᑎᓂᑦ. ᑖᓐᓇ ᓴᖅᑭᑎᑦᑎᔪᖅ ᑕᑎᒋᔭᐅᒍᓐᓃᕐᓂᖏᓐᓄᑦ ᐃᓄᓐᓂᑦ ᓯᕗᓕᖅᑎᓂᑦ ᐊᒻᒪ ᐊᐅᓚᓂᖃᑦᑎᐊᖏᑦᑐᑦ ᒐᕙᒪᑐᖃᒃᑯᑦ ᐱᓕᕆᖃᑎᖏᑦ ᑕᕐᕆᓯᒪᔪᓐᓇᕐᓗᑎ ᑐᓄᐊᓂ ᐃᖅᑲᓇᐃᔮᖑᓂᐊᖅᑐᓂᑦ ᐸᕐᓇᐅᑎᓂᑦ ᓇᓗᓇᐃᖅᓯᒪᑦᑎᐊᖏᑦᑐᓂᑦ. ᐲᔭᕆᐊᖃᖅᑕᕗᑦ ᐊᐅᓚᓂᖃᑦᑎᐊᖏᑦᑐᑦ ᐊᒻᒪ ᐱᑕᖃᕈᓐᓃᑎᓪᓗᒋᑦ ᐅᖃᐅᒥᖃᖅᑎᓪᓗᑕ ᓇᓗᓇᐃᖅᓯᒪᔪᓂᑦ ᐃᓱᒫᓘᑕᐅᔪᓂᑦ ᐊᒻᒪ ᐱᓕᕆᐊᖃᕐᓂᖅᓴᐅᓗᑕ ᐅᕙᒍᑦ ᐅᑉᐱᕆᔭᖏᓐᓂ ᑎᑭᒍᓐᓇᖅᑕᑎᓐᓂᑦ

3.3.4. ᑐᕌᒐᖓ 3: ᑐᓐᖓᕕᐅᔪᓐᓇᓕᕐᓗᑎ ᐊᒻᒪ ᓴᖅᑭᑎᑦᑎᓗᑎ ᖃᐅᔨᓴᖅᑕᐅᓯᒪᔪᓂᑦ ᐊᑐᖅᑕᐅᓂᐊᖅᑐᓂᑦ

(1 ᐅᓪᓗᕆᐊᖅ – ᐊᑦᑎᑦᑐᖅ ᖁᕝᕙᓯᓐᓂᖓ ᐱᕙᓪᓕᐊᓂᖓᓄ ᖃᐅᔨᓴᓂᕐᒧᑦ ᐅᖃᐅᓯᐅᔪᖅ)

ᖃᐅᔨᓴᖅᑎᑦ ᖃᐅᔨᓚᐅᖅᑐᑦ ᑖᒃᑯᐊ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᓴᓇᓯᒪᓂᖏᑦ ᐱᖃᓯᐅᔾᔨᔪᑦ ᓴᖏᔪᒥᑦ ᑐᓐᖓᕕᐅᔪᓐᓇᓂᕐᒥᑦ ᓇᓗᓇᐃᔭᖅᓯᒪᓂᖏᓐᓄᑦ ᖁᕝᕙᓯᓐᓂᖓᓂ ᑎᑭᑦᑐᒍ ᓯᕗᓕᖅᑎᓄᑦ ᑲᑎᒪᔨᕋᓛᓄᑦ. ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂᑦ ᐱᓕᕆᔩᑦᐅᖃᓚᐅᖅᑐᑦ ᑖᒃᑯᐊ ᑐᓴᖅᑎᑦᑎᖃᑦᑕᕐᓂᖏᑦ ᐊᖏᔪᖅᑲᐅᑏᑦ ᐃᖅᑲᓇᐃᔭᖅᑏᑦ ᑲᑎᒪᔨᕋᓛᖏᑦ ᐊᒻᒪ ᓯᕗᓕᖅᑏᑦ ᑲᑎᒪᔨᕋᓛᖏᑦ ᓴᖅᑭᑎᑦᑎᓚᐅᖅᑐᑦ ᑐᓐᖓᕕᐅᔪᓐᓇᖅᑐᓂᑦ ᐊᒻᒪ ᑲᔪᖏᖅᓴᖅᑐᒋᑦ ᓯᕗᓪᓕᐅᔾᔭᐅᓗᑎ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᑲᔪᖏᖅᓯᒪᔭᖏᓐᓄᑦ. ᐱᓗᐊᖅᑐᒥᑦ, ᐊᕐᕌᒍᑕᒫᑦ ᓯᕗᓕᖅᑏᑦ ᑲᑎᒪᔨᕋᓛᖏᑦ ᑲᑎᒪᖃᑎᖃᕐᓂᖏᑦ ᑲᓇᑕᒥ ᐊᖏᔪᖅᑳᖓᓐᓂ ᒥᓂᔅᑕᐃᑦ ᐸᓯᔭᔅᓴᐅᔭᕆᐊᖃᖅᑐᑎᑦ ᐱᓕᕆᕕᖏᓐᓄᑦ ᐃᖅᑲᓇᐃᔭᖃᑎᖃᕐᓂᖏᓐᓄᑦ ᐃᓄᐃᑦ ᐱᓕᕆᖃᑎᖏᓐᓂᑦ.

ᑭᓯᐊᓂᓕ, ᖃᐅᔨᓴᖅᑏᑦ ᖃᐅᔨᓯᒪᔪᑦ ᐊᒥᓲᖏᑦᑐᑦ ᐃᖅᑲᓇᐃᔭᕐᕕᐅᔪᑦ ᓇᓗᓇᐃᖅᓯᓚᐅᖅᑐᑦ ᖃᐅᔨᓴᕈᑎᒥᓂᕐᓂᑦ ᐅᕝᕙᓘᓐᓃᑦ ᓇᓗᓇᐃᖅᓯᒍᑎᓂᑦ ᖃᐅᔨᓴᕐᓗᒋᑦ ᖃᓄᐃᓐᓂᕆᔭᖏᑦ. ᐊᒥᓱᑦ ᒐᕙᒪᑐᖃᒃᑯᑦ ᐊᒻᒪ ᐃᓄᐃᑦ ᐱᓕᕆᔩᑦ ᐅᖃᓚᐅᖅᑐᑦ ᐃᖅᑲᓇᐃᔭᒃᑲᓐᓂᕆᐊᖅᑐᑎᑦ ᖃᐅᔨᓴᕐᓗᒍ ᐱᕙᓪᓕᐊᓂᖓ ᖃᐅᔨᒪᔭᐅᓗᑎ ᐃᖅᑲᓇᐃᔮᖑᔪᑦ ᐱᔭᕇᖅᑕᐅᔪᑦ. ᐊᒥᓲᖏᑦᑐᑦ ᐃᖅᑲᓇᐃᔮᖑᓂᐊᖅᑐᓄᑦ ᐸᕐᓇᐅᑏᑦ ᓱᓕᔫᓚᐅᖅᑐᑦ ᖃᓄᐃᓐᓂᕆᔭᖏᓐᓂ ᑐᓐᖓᓂᖃᖅᑐᑦ – ᓇᐃᑦᑐᓂᑦ-, ᕿᑎᕋᖅᑐᑦ-, ᐊᒻᒪ ᐊᑯᓂᐅᔪᒧᑦ ᖃᓄᐃᓐᓂᕆᔭᖏᑦ ᐊᒻᒪ ᓇᓗᓇᐃᖅᓯᒍᑏᑦ ᖃᐅᔨᓴᕐᓗᒍ ᐱᕙᓪᓕᐊᓂᖓ. ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᐃᖅᑲᓇᐃᔮᖏᑦ ᐊᓯᔾᔨᖃᑦᑕᕐᖓᑕ ᐱᓕᕆᖃᑎᒌᓐᓂᕐᒥᑦ ᐱᕈᖅᑎᑦᑎᓂᕐᒧᑦ ᐊᒻᒪ ᐸᕐᓇᐃᓂᕐᒧᑦᐊᑐᓕᖅᑎᑕᐅᓂᖓᓄᑦ, ᖃᐅᔨᒪᔭᐅᓂᖓᓄᑦ ᐱᕙᓪᓕᐊᓂᖓ ᑐᕌᖅᑐᑦ ᖃᓄᐃᓐᓂᕆᔭᖏᓐᓂ ᐃᑲᔪᕈᓐᓇᖅᑐᑦ ᐱᓕᕆᖃᑎᖏᓐᓂ ᓇᓗᓇᐃᕐᓗᒋᑦ ᐃᓱᒫᓘᑕᐅᔪᑦ ᐊᒻᒪ ᖃᓄᐃᑦᑐᑐᐃᓐᓇᐃᑦ ᐊᓯᔾᔨᕆᐊᖃᖅᑐᑦ ᐱᐅᓯᑎᒋᐊᕐᓗᒍ ᐱᕙᓪᓕᐊᓂᖓ.

3.3.5. ᑐᕌᒐᖓ 4: ᑐᓴᖅᑎᑦᑎᓂᖅ ᐱᕙᓪᓕᐊᓂᖓᓄ ᐊᑦᑐᐊᓂᓕᓐᓄᑦ ᑭᒡᒐᑐᖅᑕᐅᔪᓄᑦ

(2 ᐅᓪᓗᕆᐊᑦ – ᐊᑦᑎᑦᑐᒦᑦᑐᖅ ᖁᕝᕙᓯᓐᓂᖓ ᐱᕙᓪᓕᐊᓂᖓᓄ ᖃᐅᔨᓴᓂᕐᒧᑦ ᐅᖃᐅᓯᐅᔪᖅ)

ᐱᓕᕆᖃᑎᒌᑦᑐᑦ ᑎᑭᑦᑎᓚᐅᖅᑐᑦ ᑭᓪᓕᖃᖅᑎᑕᐅᔪᓂᑦ ᐱᕙᓪᓕᐊᓂᖓᓄᑦ ᑐᓴᖅᑎᑦᑎᓂᕐᒧᑦ ᐊᑦᑐᐊᓂᓕᓐᓄᑦ ᑭᒡᒐᑐᖅᑕᐅᔪᓄᑦ. ᐃᓚᖏᑦ ᑐᓴᐅᒪᔾᔪᑎᓕᕆᓂᕐᒧᑦ ᐱᓕᕆᔭᐅᓚᐅᖅᑐᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᑲᓇᑕᒥ ᐊᖏᔪᖅᑲᖓᓂ ᐊᓪᓚᕕᖓᓂ ᐃᕐᖏᓐᓈᕈᑎᒃᑯᑦ ᖃᐅᔨᒋᐊᕐᕕᖓᒍᑦ, ᐱᕙᓪᓕᐊᔪᓄᑦ ᓴᖅᑭᖅᑎᑕᐅᔪᑦ, ᐱᕙᓪᓕᐊᔪᓕᕆᓄᑦ ᑐᓴᖅᑎᑦᑎᓂᕐᒧᑦ, ᐊᒻᒪ ᐊᕐᕌᒍᑕᒫᑦ ᐅᓂᒃᑳᑦ, ᐊᒻᒪᓗᑦᑕᐅᖅ ᐃᓚᖏᓐᓂ ᐃᓄᐃᑦ ᓄᓇᑖᓂᕐᒧᑦ ᑲᑐᔾᔨᖃᑎᒌᓂᑦ ᐅᖃᓕᒫᒐᖅᑎᒍᑦ ᐊᒻᒪ ᓄᓇᓕᒻᒥ ᓈᓚᐅᑎᒃᑯᑦ. ᐊᒥᓱᒐᒪᐃᑦ ᐃᓄᐃᑦ ᐱᓕᕆᔩᑦ ᐊᒻᒪ ᓯᕗᓕᖅᑏᑦ ᐅᖃᓚᐅᖅᑐᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᑲᑎᒪᑎᑎᓪᓗᓂ ᐃᓄᐃᑦ ᓄᓇᖓᓐᓂ ᐃᑲᔪᖅᓯᒪᔪᑦ ᓴᖅᑭᑎᑦᑎᓪᓗᑎ ᐱᓕᕆᒋᐊᖃᖅᑕᖏᓐᓄ ᐃᓄᐃᑦ. ᑭᓯᐊᓂᓕ, ᖃᐅᔨᓴᖅᑎᑦ ᓇᓂᓯᓚᐅᖏᑦᑐᑦ ᑲᑐᑎᔭᐅᔪᓂᑦ, ᐊᐅᓚᑕᐅᔪᓂᑦ ᑐᓴᐅᒪᔾᔪᑎᓕᕆᓂᕐᒧᑦ ᐸᕐᓇᐅᒻᒥᑦ ᐊᒻᒪ ᐊᒥᓱᒐᓚᐃᑦ ᑐᓴᐅᒪᔾᔪᑎᓕᕆᓂᕐᒨᖓᔪᑦ.

ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᓇᓗᓇᐃᖅᓯᓚᐅᖅᑐᑦ ᖁᓚᕐᓇᖅᑐᓂᑦ ᑖᒃᑯᐊ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᑐᑭᓯᔭᐅᑦᑎᐊᖅᓯᒪᓂᖏᓐᓄᑦ ᑕᐃᒃᑯᓄᖓ ᑕᕝᕗᖓᓪᓚᕆᒃ ᐃᓚᒋᔭᐅᔪᓂᑦ, ᐱᖃᓯᐅᑎᓪᓗᑎ ᐊᓯᖏᑦ ᐃᖅᑲᓇᐃᔭᖅᑏᑦ ᐊᒻᒪ ᓯᕗᓕᖅᑏᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᓂᑦ ᐱᓕᕆᖃᑎᖓᓂ ᑲᑐᔾᔨᖃᑎᒌᓂᑦ, ᑲᓇᑕᒥ ᐊᕕᑦᑐᖅᓯᒪᔪᑦ/ᐅᑭᐅᑕᖅᑐᒥ ᐊᕕᑦᑐᖅᓯᒪᔪᑦ ᒐᕙᒪᐃᑦ, ᐃᓄᐃᑦ ᐊᒻᒪ ᐊᓯᖏᑦ ᑲᓇᑕᒥᐅᑕᐃᑦ. ᐊᒥᓲᓂᖅᓴᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᐊᐱᖅᓱᖅᑕᐅᔪᑦ ᐅᖃᓚᐅᖅᑐᑦ ᑐᓴᖅᑎᑎᒃᑲᓐᓂᖃᑦᑕᓂᕐᒧᑦ ᐃᓄᓐᓄᑦ ᐊᒻᒪ ᐊᓯᖏᓐᓄᑦ ᑲᓇᑕᒥᑕᐅᓂᑦ ᐱᑕᖃᕆᐊᖃᖅᑐᓂ. ᖃᒥᒐᒪᐃᑦ ᐅᖃᓚᐅᖅᑐᑦ ᑐᓴᖅᑎᑦᑎᖃᑦᑕᑲᓐᓂᓂᕐᒧᑦ ᐱᔭᐅᔭᕆᐊᖃᖅᑐᑎ ᐊᓯᖏᓐᓄᑦ ᐃᖅᑲᓇᐃᔭᖅᑎᓄᑦ ᐃᓄᐃᑦ ᓄᓇᑖᓂᕐᒧᑦ ᑲᑐᔾᔨᖃᑎᒋᓂᑦ ᐊᒻᒪ ᐃᓚᒋᔭᐅᖃᑕᐅᖏᓐᖅᑐᑦ ᑲᑐᔾᔨᖃᑎᒌᑦ ᐊᒻᒪ ᐃᖅᑲᓇᐃᔭᖅᑎᓄᑦ ᐊᒻᒪ ᓯᕗᓕᖅᑎᓄᑦ ᑲᓇᑕᒥ ᐊᕕᑦᑐᖅᓯᒪᔪᑦ/ᐅᑭᐅᑕᖅᑐᒥ ᐊᕕᑦᑐᖅᓯᒪᔪᑦ ᒐᕙᒪᓂᑦ.

ᑎᒥᐅᑉ ᐃᓗᐊᓂ, ᑐᓴᖅᑎᑦᑎᖃᑦᑕᖅᑐᒍᑦ ᑭᒡᒐᑐᖅᑕᐅᔪᓂᑦ [ᐅᕙᒍᑦ ᐊᕕᑦᑐᖅᓯᒪᔪᖓᓂ] ᐱᔾᔪᑎᖅᑐᓂᑦ ᐱᓕᕆᐊᑦᑎᓐᓂ, ᑭᓯᐊᓂ ᑐᑭᓯᔭᐅᓯᒪᓂᖅᑕᖃᖏᑦᑐᖅ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᑭᓲᒻᒪᖔᑦ. ᓇᓗᓇᐃᔭᕈᓐᓇᖅᑕᕗᑦ ᑲᑎᒪᖃᑎᖃᕐᓂᐅᔪᖅ ᓯᕗᓕᖅᑎᓂᑦ, ᑭᓯᐊᓂ ᐊᑕᖐᔪᒥᑦ ᖁᕕᐊᒋᔭᖃᖅᑕᒋᖏᑕᒃᑲ ᖃᓄᑎᒋ ᐱᐅᓂᖓᓄᑦ

[ᐱᔾᔪᑎᖃᖅᑐᓄᑦ ᑐᓴᖅᑎᑦᑎᖃᑦᑕᓂᕐᒧᑦ ᐱᕙᓪᓕᐊᓂᖓᓄᑦ,] ᐱᒻᒪᕆᐅᔪᖅ, ᐱᓕᕆᔭᐅᖃᑦᑕᖅᓯᒪᔪᑐᖃᖅ ᑖᒃᑯᐊ ᐃᓄᐃᑦ ᖃᐅᔨᒪᔭᕆᐊᖃᖅᑕᖏᓐᓂ

3.3.6. ᐱᕙᓪᓕᐊᓂᖓ ᓯᕗᒧᒋᐊᓂᕐᒧᑦ ᖃᓄᐃᓕᓯᒋᐊᓂᕐᒧᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ ᓇᒦᓐᓂᖏᓐᓄᑦ

(2.5 ᐅᓪᓗᕆᐊᑦ – ᐊᑦᑎᑦᑐᒦᑦᑐᖅ ᕿᑎᕋᖅᑐᒧᑦ ᖁᕝᕙᓯᓐᓂᖓ ᐱᕙᓪᓕᐊᓂᖓᓄ ᖃᐅᔨᓴᓂᕐᒧᑦ ᐅᖃᐅᓯᐅᔪᖅ)

ᐊᒥᓲᓂᖅᓴᐃᑦ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᐊᒻᒪ ᐊᒥᓱᑦ ᐃᓄᐃᑦ ᐱᓕᕆᔩᑦ ᓇᓗᓇᐃᔭᐃᓚᐅᖅᑐᑦ ᐱᕙᓪᓕᐊᓂᖓ ᐱᐅᔫᓪᓗᓂ ᐊᑕᖏᖅᑐᒍ, ᑭᓯᐊᓂ ᐊᔾᔨᒌᖏᑦᑐᑦ ᓯᕗᓪᓕᐅᔭᐅᔭᕆᐊᓕᓐᓂᑦ ᓇᒦᓐᓂᖏᑦ. ᐊᒥᓲᓂᖅᓴᐃᑦ (80%) ᖃᐅᔨᓴᓂᒃᒧᑦ ᑭᐅᔪᑦ ᐊᖏᓚᐅᖅᑐᑦ ᑖᒃᑯᐊ ᑲᑎᒪᔨᕋᓛᖏᑦ ᓯᕗᒧᒋᐊᖅᓯᒪᓂᖃᖅᑐᑎᑦ ᐃᖅᑲᓇᐃᔮᖑᓂᐊᖅᑐᓄᑦ ᐸᕐᓇᐅᑎᒥᑦ ᑐᕌᒐᖏᓐᓂ, ᑭᓯᐊᓂ ᐊᓲᓂᖅᓴᐃᑦ ᓇᓗᓇᐃᖅᓯᓚᐅᕐᒥᔪᑦ ᐊᐳᕈᑎᐅᔪᓂᑦ ᐱᕙᓪᓕᐊᓂᖓᓄᑦ.

ᐊᑕᖏᖅᑐᒋᑦ ᑭᓱᓕᒫᑦ ᐱᒡᒐᓇᖏᑐᖏᓐᓇᐅᖏᑦᑐᑦ ᐊᒻᒪ, ᑕᐃᒪᐃᓐᓂᕈᑎ, ᓵᖓᓃᒃᑲᔭᖅᑐᑦ ᓯᓚᑖᓂ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᓂᑦ, ᑕᕿᒪᕆᓐᓂᖓᓄᑦ ᑭᓱᓂᑦ ᓅᑦᑎᕆᒐᓛᓐᓂᖅ ᐱᒻᒪᕆᐅᔪᑦ ᖁᕕᐊᓱᒍᑎᒋᓪᓗ.

ᐊᖏᓂᖓ ᑖᔅᓱᒧᖓ ᖃᐅᔨᓴᐃᓂᕐᒧᑦ ᐱᖃᓯᐅᔾᔨᓚᐅᖏᑦᑐᑦ ᖃᐅᔨᓴᓂᕐᒥᑦ ᐱᕙᓪᓕᐊᓂᖏᓐᓄᑦ ᐊᑐᓂ ᓯᕗᓪᓕᐅᔾᔭᐅᔭᕆᐊᓖᑦ ᐊᑕᐅᓯᒡᒍᑕᐅᓗᑎ. ᑖᓐᓇ ᐃᓚᖓ ᓇᓗᓇᐃᔭᐃᓯᒪᓂᖃᖅᑎᑦᑎᔪᑦ ᐊᐱᖅᓱᖅᑕᐅᔪᓂᑦ ᐊᒻᒪ ᖃᐅᔨᓴᓂᕐᒧᑦ ᑭᐅᔪᓂᑦ ᐃᓱᒪᒋᔭᖏᓐᓂ ᕙᓪᓕᐊᓂᖓᓄᑦ.

ᑲᔪᖏᖅᓯᒪᔪᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ ᓯᕗᓕᖅᑏᑦ

ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ ᓯᕗᓕᖅᑏᑦ ᐱᓪᓚᕆᐅᔪᒥᑦ ᑲᔪᖏᖅᓯᒪᓂᖏᑦ ᐃᖅᑲᓇᐃᔭᕐᓗᑎ ᐱᓕᕆᖃᑎᒌᓐᓂᒃᑯᑦ ᐱᑕᖃᕆᐊᖃᓚᐅᖅᑐᖅ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᐊᐅᑑᑎᖃᑦᑎᐊᕐᓂᖓᓄᑦ, ᒪᓕᑦᑐᒋᑦ ᐱᓕᕆᔨᓄᑦ ᐊᒻᒪ ᓯᕗᓕᖅᑎᓄᑦ. ᐊᒥᓱᒐᓚᑦ ᑭᐅᔪᑦ ᐅᖃᓚᐅᖅᑐᑦ ᓴᖅᑭᑎᑦᑎᓯᒪᓪᓗᑎ ᐱᓕᕆᓂᖃᑦᑎᐊᖅᑐᒥᑦ ᐃᓂᐅᔪᒥᑦ ᐱᓕᕆᖃᑎᒌᓐᓂᕐᒧᑦ ᐊᒻᒪ ᐃᑲᔪᖅᑐᑎ ᐋᖅᑭᑦᑕᐅᓪᓗᓂ ᐃᖅᑲᓇᐃᔮᖑᓂᐊᖅᑐᑦ ᓇᓗᓇᐃᔭᖅᓯᒪᓂᖏᓐᓄᑦ ᖁᕝᕙᓯᓐᓂᖓᓂ.

ᐊᒥᓱᑦ ᐱᓕᕆᔩᑦ ᐊᒻᒪ ᓯᕗᓕᖅᑏᑦ ᐅᖃᓚᐅᖅᑐᑦ ᐃᓚᒋᔭᐅᑎᑕᐅᓂᖏᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂ ᓯᕗᓕᖅᑏᑦ ᑐᑭᒧᐊᖅᑎᑦᑎᓂᖃᖅᑐᑦ, ᑲᔪᖏᖅᓴᐃᓂᕐᒥᑦ, ᐊᒻᒪ ᑐᓐᖓᕕᐅᔪᓐᓇᓂᕐᒥᑦ ᐱᓕᕆᔨᓄᑦ. ᐊᒥᓱᒐᓚᐃᑦ ᑖᒃᑯᓇᓂ ᐊᐱᖅᓱᖅᑕᐅᔪᑦ ᐅᖃᓚᐅᖅᑐᑦ ᑕᕝᖢᖓᑦᑕᐅᑎᒋ ᐃᓚᒋᔭᐅᑎᑕᐅᓂᖓ ᑲᓇᑕᒥ ᐊᖏᔪᖅᑳᖓᑦ ᐱᓕᕆᐊᖃᓗᐊᖅᑐᑦ ᒥᓂᔅᑕᓄᑦ ᑐᓴᖅᓴᐅᓗᑎ ᐊᒻᒪ ᐱᒻᒪᕆᐅᓪᓗᓂ ᐃᖏᕋᓯᑎᑕᐅᓂᖓᓄᑦ ᒐᕙᒪᓕᒫᖏᑦ ᐊᑐᖅᑕᐅᓂᖓ ᐱᑕᖃᕆᐊᖃᖅᑎᓪᓗᒍ. ᐅᓂᒃᑳᑦ ᑲᑎᒪᔩᑦ ᓄᓇᖃᖅᑳᖅᓯᒪᔪᓄᑦ ᐃᓄᖏᓐᓄᑦ (RCAP) ᓇᓗᓇᐃᖅᓯᓯᒪᔪᑦ ᐱᑕᖃᕆᐊᖃᕐᓂᖓᓄᑦ ᑕᕝᕗᖓᑦᑕᐅᑎᒋ ᐃᓚᒋᔭᐅᑎᑕᐅᓂᖏᑦ ᓄᓇᖃᖅᑳᖅᓯᒪᔪᑦ ᐊᒻᒪ ᒐᕙᒪᑐᖃᒃᑯᑦ ᓯᕗᓕᖅᑎᖏᑦ, ᐱᓗᐊᖅᑐᒥᑦ ᑲᓇᑕᒥ ᐊᖏᔪᖅᑳᖓ, ᓄᑕᐅᓐᖑᖅᑎᑕᐅᓂᖓᓄᑦ ᓄᓇᖃᖅᑳᖅᓯᒪᔪᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᓐᓂᖏᑦ.^{Footnote 5}

ᐱᒋᐊᕐᓂᖓᓂ, [ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᓴᓐᖏᓂᖓ] ᑲᔪᖏᖅᓯᒪᓂᐅᔪᖅ. ᖃᐅᔨᒪᓪᓗᒍ ᑕᒪᓐᓇ ᑕᐃᒪᐃᓐᓂᖃᖅᑎᓪᓗᒍ, ᐱᓕᕆᐊᖃᕐᓂᓴᐅᓪᓗᑎ ᐃᓄᓐᓄᑦ ᐃᓱᒫᓘᑕᐅᔪᓂᑦ

[ᐱᔾᔪᑎᖃᖅᑐᓂᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᓴᓐᖏᓂᖏᓐᓄᑦ], ᓯᕗᓪᓕᖅ ᐊᒻᒪ ᐱᒻᒪᕆᐅᓛᖑᓪᓗᓂ, ᑭᒃᑯᓕᒫᑦ ᐊᑦᑐᐊᓂᖃᖅᑐᑦ ᐃᓪᓗᕈᓯᕐᒦᑦᑐᑦ. ᓯᕗᓪᓕᐅᔾᔭᐅᔭᕆᐊᖃᕐᓂᖓᓄᑦ ᐊᖏᔪᖅᑲᐅᑎᐅᓛᓄᑦ ᓯᕗᓕᖅᑎᓄᑦ ᐊᒻᒪ ᐃᓄᓐᓅᖓᔪᓂᑦ ᐱᔨᑦᑎᖅᑕᓂᑦ.

ᐃᓄᑦᑎᒍᑦ ᓯᕗᓕᖅᑏᑦ ᑲᑎᒪᓂᖏᑦ

ᐊᒥᓱᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᔩᑦ ᐊᒻᒪ ᓯᕗᓕᖅᑏᑦ ᐅᖃᓚᐅᖅᑐᑦ ᐃᓄᑦᑎᒍᑦ ᓯᕗᓕᖅᑏᑦ ᑲᑎᒪᔨᕋᓛᑦ ᑲᑎᒪᓂᖏᑦ ᓴᓐᖓᑎᑦᑎᒋᐊᓚᐅᖅᑐᑦ ᓯᕗᓕᖅᑏᑦ ᐃᖅᑲᓇᐃᔭᓂᕐᒧᑦ ᐱᓕᕆᖃᑎᒌᓐᓂᕐᒧᑦ ᐊᒻᒪ ᐅᕙᓃᒍᓐᓇᑎᑦᑎᓪᓗᑎ ᐅᖃᐅᓯᖃᖅᑐᑎᑦ ᐱᑕᖃᕆᐊᖃᖅᑐᓂᑦ ᐱᕙᓪᓕᐊᓂᖓᓄᑦ. ᐊᒥᓲᖏᑦᑐᑦ ᐅᖃᓚᐅᖅᑐᑦ ᐃᓕᓴᕆᔭᐅᓯᒪᔪᓂᑦ ᓴᓂᕌᒍ ᐅᖃᖃᑎᒌᓐᓂᐅᔪᓂᑦ ᐃᑲᔪᖅᓯᒪᔪᑦ ᓯᕗᓕᖅᑏᑦ ᓴᖅᑭᑎᑦᑎᓗᑎ ᓄᑖᓂᑦ ᐃᓱᒪᒋᔭᐅᔪᓂᑦ.

ᐃᓄᑦᑎᒍᑦ ᑲᑎᒪᓂᐅᔪᑦ ᐃᓄᐃᑦ ᓄᓇᖓᓐᓂ ᐱᒻᒪᕆᐅᓯᒪᔪᖅ ᐃᓕᓐᓂᐊᕐᕕᐅᓪᓗᓂ ᒥᓂᔅᑕᓄᑦ ᐊᒻᒪ ᐊᖏᔪᖅᑲᐅᑎᓄᑦ ᐃᖅᑲᓇᐃᔭᖅᑎᓄᑦ, ᑐᑭᓯᑎᑦᑎᓂᖅᓴᐅᓪᓗᑎ ᐃᓄᐃᑦ ᓄᓇᓕᖏᓐᓂ, ᒪᓕᑦᑐᒋᑦ ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᔩᑦ ᐊᒻᒪ ᓯᕗᓕᖅᑏᑦ.

ᐋᖅᑭᔅᓯᒪᓂᕆᓚᐅᖅᑕᖓ ᐊᒻᒪ ᐱᕙᓪᓕᐊᓂᖏᑦ ᐱᓕᕆᖃᑎᒌᓐᓂᕐᒧᑦ

ᐊᒥᓲᓂᖅᓴᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᔨᖏᑦ ᐊᐱᖅᓱᖅᑕᐅᔪᑦ ᐅᖃᓚᐅᖅᑐᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᐋᖅᑭᔅᓯᒪᓂᕆᓚᐅᖅᑕᖓ ᐊᒻᒪᐱᕙᓪᓕᐊᓂᖏᑦ ᐱᔾᔪᑎᖃᖅᑎᑦᑎᔪᓪᓗᐊᑕᐅᓚᐅᖅᑐᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᐊᑑᑎᖃᑦᑎᐊᕐᓂᖓᓄᑦ. ᐊᑕᖏᐸᓗᑦᑐᑎ ᐅᖃᓚᐅᖅᑐᑦ ᓴᓇᓯᒪᓂᖓ ᐱᔪᓐᓇᑦᑎᐊᓚᐅᖅᑐᖅ ᐊᑕᖏᖅᑐᒍ. ᐊᒥᓱᑦ ᐅᖃᓚᐅᖅᑐᑦ ᓇᓗᓇᐃᖅᓯᒪᔪᓂᑦ ᐃᓗᓕᖏᓐᓂ ᓴᓐᖏᓂᕆᓪᓗᓂᒋᑦ, ᐃᒪᐃᓕᖓᓪᓗᑎ.

• ᖁᓕᕇᑦᑐᓂᑦ ᓴᓇᓯᒪᓂᖓ, ᓯᕗᓕᖅᑏᑦ ᑲᑎᒪᔨᕋᓛᑦ ᐊᖏᔪᖅᑲᐅᑎᓂᑦ ᐃᖅᑲᓇᐃᔭᖅᑎᓂᑦᑲᑎᒪᔨᕋᓛᓂᑦ ᐊᒻᒪ ᐱᓕᕆᔪᓂᑦ, ᑲᑎᓐᖓᓂᖏᑦ ᐃᖅᑲᓇᔭᕐᓂᖏᑦ ᓯᕗᓕᖅᑏᑦ, ᐊᖏᔪᖅᑲᐅᑏᑦ ᐃᖅᑲᓇᐃᔭᖅᑏᑦ, ᐊᒻᒪ ᓇᓗᓇᐃᔭᖅᓯᒪᓂᖏᓐᓄᑦ ᐃᖅᑲᓇᐃᔭᖅᑏᑦ ᐊᑐᓂᖏᓐᓂ ᐱᓕᕆᖃᑎᖏᓐᓂ ᑲᑐᔾᔨᖃᑎᒋᓂᑦ ᐊᒻᒪ ᑲᑐᔾᔨᖃᑎᒌᓕᒫᓂᑦ.
• ᓯᐊᒻᒪᖅᓯᒪᔪᒥᑦ ᑭᒡᒐᑐᖅᑕᐅᓂᖏᑦ ᐃᓄᐃᑦ ᐱᓕᕆᖃᑎᖏᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᕕᖏᑦ ᐊᑐᓂ ᖁᕝᕙᓯᓐᓂᖏᓐᓂ ᐱᔾᔪᑕᓪᓗᐊᑕᐅᓪᓗᑎ ᓴᖅᑭᑎᑦᑎᓂᕐᒧᑦ ᐃᓱᒪᒋᔭᐅᓯᒪᔪᓂᑦ ᖃᓄᐃᓕᓯᒋᐊᕐᓂᐅᔪᓂᑦ ᓇᓗᓇᐃᖅᑐᓄᑦ ᐊᑐᐊᒐᕐᓄᑦ ᐃᓱᒫᓘᑕᐅᔪᓂᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᓂᑦ.

  ᑖᒃᑯᓂᖓᓪᓗᐊᖅ ᐱᓐᖑᐊᖅᑎᖃᖅᑐᓯ ᓵᒥ ᐱᓕᕆᐊᕆᓗᒋᑦ ᐃᓱᒫᓘᑕᐅᔪᑦ. ᑖᓐᓇ ᐱᐅᔪᒻᒪᕆᒃ ᐃᓚᖓ ᐊᑖᒍᑦ ᐋᖅᑭᔅᓯᒪᔪᓂᑦ ᐊᒻᒪ ᐱᓕᕆᔪᓂᑦ. ᐅᕙᓐᓄᑦ, ᓯᓚᑖᓅᖃᑦᑕᖅᑐᑦ ᒐᕙᒪᖃᕐᕕᐅᔪᒥ ᐃᓱᒫᓘᑕᐅᔪᓂᑦ "ᑖᓐᓇ ᐱᓕᕆᕕᒋᖏᑕᕋ." ᓵᒦᑦᑐᐃᓐᓇᐅᔪᒍᑦ, ᑕᒪᓕ ᖃᓄᖅ ᐋᖅᑭᓂᐊᖅᑲᕗᑦ ᐃᓱᒫᓘᑕᐅᔪᖅ? ᑖᓐᓇ ᐃᓚᒋᔭᖓ [ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ] ᓴᓐᖏᓂᖏᑦ.

  ᐱᒻᒪᕆᐅᓂᖅᑕᖃᕐᒥᔪᖅ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗᑦᑕᐅᖅ ᐃᓄᐃᑦ ᐊᕕᑦᑐᖅᓯᒪᔪᓂᑦ ᐃᓚᒋᔭᐅᓪᓗᑎ ᐅᖃᖃᑎᖃᕐᓂᐅᔪᓂᑦ ᒐᕙᒪᑐᖃᒃᑯᑦ ᐱᓕᕆᕕᖏᓐᓂᑭ ᐋᖅᑭᔅᓯᒪᔪᓂᑦ ᐊᒻᒪ ᐊᐅᓚᓂᖃᑦᑎᐊᖅᑐᓂᑦ ᐅᖃᖃᑎᒌᓐᓂᐅᔪᑦ.

• ᑲᑎᒪᑐᐃᓐᓇᖃᑦᑕᕐᓂᖏᑦ ᐊᖏᔪᖅᑲᐅᑏᑦ ᐃᖅᑲᓇᐃᔭᖅᑏᑦ ᐊᒻᒪ ᓯᕗᓕᖅᑏᑦ ᑲᑎᒪᔨᕋᓛᖏᑦ ᐱᓕᕆᓂᖃᖅᑐᑦ ᑐᓐᖓᕕᐅᔪᓐᓇᓂᕐᒥᑦ ᐊᒻᒪ ᐱᒻᒪᕆᐅᔪᓂᑦ ᑕᑯᔅᓴᐅᑎᑦᑎᔪᑦ ᐱᕙᓪᓕᐊᓂᖓᓄᑦ.

  ᖃᐅᔨᒪᒍᑦᑕ ᑭᓱᑐᐃᓐᓇᕐᒥ ᓴᖅᑭᖅᑐᖃᕐᓂᐊᑎᓪᓗᒍ ᐊᖏᔪᖅᑲᐅᑎᓂᑦ ᐃᖅᑲᓇᐃᔭᖅᑎᓂᑦ ᐅᕝᕙᓘᓐᓃᑦ ᓯᕗᓕᖅᑏᑦ, ᓇᓗᓇᖏᑦᑐᖅ ᐃᓕᓐᓂᑦ…ᓇᓗᓇᐃᖅᓯᔪᑦ ᖃᐅᔨᒪᓗᒋᑦ ᑭᓲᓂᖏᑦ. …ᐃᑲᔪᖅᑐᑦ ᐅᕙᑦᑎᓐᓂ ᑐᓐᖓᕕᐅᔪᓐᓇᓂᕐᒧᑦ.

• ᐅᖃᐅᓯᐅᓯᒪᔪᑦ ᑲᑐᑎᔭᐅᔪᑦ ᓯᕗᓪᓕᐅᔾᔭᐅᔭᕆᐊᓖᑦ ᐊᒻᒪ ᐃᖅᑲᓇᐃᔮᖑᓂᐊᖅᑐᓂᑦ ᐸᕐᓇᐅᑏᑦ ᐱᑕᖃᕆᐊᖃᖅᓯᒪᔪᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᐊᑑᑎᖃᑦᑎᐊᕐᓂᖓᓄᑦ. ᐊᒥᓱᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂᑦ ᐱᓕᕆᔩᑦ ᓇᓗᓇᐃᖅᓯᓚᐅᖅᑐᑦ ᐊᔾᔨᐸᓗᖏᓐᓂ ᑕᑯᓐᓇᖅᑕᐅᔪᓂᑦ ᐃᓄᐃᑦ ᐱᓕᕆᖃᑎᖏᓐᓄᑦ ᐅᖃᖅᑕᐅᓯᒪᔪᑦ ᐊᑖᓂ.

  ᐋᖅᑭᔅᓯᓯᒪᔪᒍᑦ ᑐᕌᖅᑕᐅᔪᓂᑦ ᐊᒻᒪ ᐊᑐᖅᑕᐅᓚᐅᖅᓯᒪᖏᑦᑐᓂᑦ ᐅᕙᒍᑦ ᐃᖅᑲᓇᐃᔮᖑᓂᐊᖅᑐᓂᑦ ᐸᕐᓇᐅᑎᖏᓐᓂ. ᓯᕗᓕᖅᑏᑦ ᑲᑎᒪᓂᖏᑦ ᑐᓂᖓᕕᔅᓴᐅᔪᓐᓇᖃᖅᑎᑦᑎᔪᑦ. ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᐅᖃᓪᓚᕝᕕᑐᐃᓐᓇᐅᖁᓚᐅᖏᑕᕗᑦ, ᑕᐃᒪᐃᓐᓂᖓᓄᑦ ᐱᒻᒪᕆᐅᔪᖅ ᖃᓄᐃᓘᕈᑎᖃᕐᓗᓂ ᖃᐅᔨᓴᕈᓐᓇᕐᓗᒋᑦ ᐱᕙᓪᓕᐊᓂᕆᔭᕗᑦ. ᐃᖅᑲᓇᐃᔮᖑᒋᐊᓕᒃ ᐱᔭᕇᓚᐅᖅᑲᕘᑦ, ᐋᒡᒐᐅᒍᓂ, ᓱᒻᒪᑦ?

ᓴᓐᖏᔪᒥᑦ ᐱᓕᕆᖃᑎᒌᓐᓂᐅᔪᖅ ᐃᓄᓐᓂᑦ ᐱᓕᕆᖃᑎᖏᓐᓂ

ᐱᓕᕆᖃᑎᒌᓐᓂᖏᑦ ᐃᓄᓐᓂᑦ ᐱᓕᕆᖃᑎᖏᓐᓂ, ᐱᓗᐊᖅᑐᒥᑦ ᑎᓴᒪᓂᑦ ᐃᓄᐃᑦ ᓄᓇᑖᓂᕐᒧᑦ ᑲᑐᔾᔨᖃᑎᒌᓂᑦ, ᐃᖏᕋᑎᑦᑎᔪᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᓂᑦ ᐊᒻᒪ ᓴᓐᖓᑎᑦᑕᐅᓯᒪᔪᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᓄᑦ. ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂᑦ ᐱᓕᕆᔩᑦ ᐅᖃᓚᐅᖅᑐᑦ ᑎᑭᑦᑎᓂᐅᔪᑦ ᐃᓂᒋᔭᐅᒐᔪᑦᑐᓂᑦ ᒐᕙᒪᑐᖃᒃᑯᑦ ᐊᑐᐊᒐᖏᓐᓄᑦ ᐃᓱᒫᓘᑕᐅᔪᓄᑦ ᖁᕝᕙᕆᐊᖅᑎᑦᑎᔪᖅ ᐃᓄᐃᑦ ᐱᓕᕆᖃᑎᖏᓐᓂ ᖃᓄᐃᓘᕐᕕᖃᕐᓗᑎ ᒐᕙᒪᑐᖃᒃᑯᑦ ᐃᓱᒪᓕᐅᕐᓂᖏᓐᓄᑦ. ᐊᒥᓱᑦ ᐃᓄᐃᑦ ᐱᓕᕆᔩᑦ ᐅᖃᓚᐅᖅᑐᑦ ᐃᓄᐃᑦ ᑲᑎᒪᔩᑦ ᓯᕗᓂᐊᓂ ᐊᑐᓂ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᑲᑎᒪᓂᖏᓐᓄᑦ ᐱᔾᔪᑎᓪᓗᐊᑕᐅᔪᑦ.

ᑖᓐᓇ ᑲᑐᑎᑕᐅᔪᑦ ᐃᒪᐃᓐᓂᐊᖅᑐᖅ ᐊᒻᒪ ᑕᑯᔅᓴᐅᑎᑦᑎᓂᐊᖅᑐᖅ [ᐃᓄᐃᑦ ᓄᓇᑖᓂᕐᒧᑦ ᑲᑐᔾᔨᖃᑎᒌᓂᑦ] ᐱᔅᒐᓇᖏᓂᖅᓴᐅᑎᑦᑎᓯᒪᔪᑦ ᒐᕙᒪᑐᖃᒃᑯᑦ ᖃᐃᓗᑎ ᐊᒻᒪ ᑭᐅᔪᓐᓇᕐᓗᑎ. ᐃᑲᔪᐃᓂᖃᖅᓯᒪᔪᖅ ᑕᒪᒃᑮᓐᓂ ᐊᕙᑎᖏᓐᓂ.

ᑲᑐᑎᔭᐅᔪᖅ, ᕿᑎᐊᒍ ᐊᐅᓚᑕᐅᔪᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᐋᖅᑭᒍᑎᖃᓂᕐᒧᑦ ᑎᑎᕋᕐᕕᖓ

ᐊᒥᓱᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂᑦ ᐱᓕᕆᔩᑦ ᑎᒃᑯᐊᓚᐅᖅᑐᑦ ᕿᑎᐊᓄᑦ ᐊᐅᓚᑕᐅᓂᖓᓄᑦ ᐃᖅᑲᓇᐃᔮᖑᔪᖅ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ CIRNAC ᐱᓪᓗᐊᑕᐅᓪᓗᓂ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᐊᑑᑎᖃᑦᑎᐊᕐᓂᖓᓄᑦ.

ᒪᓕᑦᑐᒋᑦ ᐊᒥᓱᓄᑦ ᐃᓄᐃᑦ ᐊᕕᑦᑐᖅᓯᒪᔪᓂᑦ ᐱᓕᕆᔨᓄᑦ, ᕿᑎᖓᓃᑎᑕᐅᓂᖏᑦ ᐃᓄᐃᑦ ᐱᓕᕆᖃᑎᖏᑦ ᐃᓚᒋᔭᐅᑎᑕᐅᓂᖏᓐᓄᑦ ᐃᓄᐃᑦ ᑕᐱᕇᑦ ᑲᓇᑕᒥ ᐱᔪᓐᓇᑎᐊᖅᓯᒪᔪᖅ. ᐊᒥᓱᒐᓚᐃᑦ ᐃᓄᐃᑦ ᐊᕕᑦᑐᖅᓯᒪᔪᓂᑦ ᐱᓕᕆᔩᑦ ᐅᖃᓚᐅᖅᑐᑦ ᖁᕕᐊᒋᔭᖃᕐᓂᕋᖅᑐᑎᑦ ᐃᓄᐃᑦ ᑕᐱᕇᑦ ᑲᓇᑕᒥ ᓇᓗᓇᐃᔭᖅᓯᒪᓂᖏᓐᓄᑦ ᓯᕗᓕᖅᑎᐅᓂᕐᒧᑦ ᒐᕙᒪᑐᖃᒃᑯᑦ ᐊᑐᐊᒐᖏᓐᓂ ᐱᔪᓐᓇᕐᓂᖃᕐᕕᒋᓚᐅᖏᑕᖓ. ᐊᒥᓱᑦ ᐱᓕᕆᔩᑦ ᓇᓗᓇᐃᖅᓯᓚᐅᖅᑐᑦ ᖁᕕᐊᒋᔭᖃᖅᑐᑎᑦ ᐊᑐᖅᑕᐅᓂᖓ ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᔪᖅᑲᐅᑎᓂᑦ ᐃᖅᑲᓇᐃᔭᖅᑎᓂᑦ, ᐅᖃᓚᐅᖅᑐᑦᐃᑉᐱᒍᓱᑦᑎᐊᖅᑐᑎ ᐃᓄᐃᑦ ᐱᓕᕆᖃᑎᖏᓐᓂ ᐃᓱᒪᓕᐅᓂᕐᒧᑦ. ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂᑦ ᐱᓕᕆᔩᑦ ᐊᒻᒪ ᓯᕗᓕᖅᑏᑦ ᐅᖃᐅᒥᖃᓚᐅᖅᑐᑦ ᐱᐅᔪᓂᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᔪᖅᑲᐅᑎᓂᑦ ᐃᖅᑲᓇᐃᔭᖅᑎᓂᑦ ᑐᑭᒧᐊᖅᑎᑎᓪᓗᑎ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᐱᕙᓪᓕᐊᓂᖓᓄᑦ.

ᐃᓱᒪᒋᔭᕋ ᐃᑲᔫᑎᖃᑦᑎᐊᖅᑐᓂ ᑕᑯᓪᓗᒋᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᐅᓚᑦᑎᓂᖏᓐᓄᑦ ᐱᕙᓪᓕᐊᓂᖓᓄᑦ ᐊᒻᒪ ᐊᕕᑦᑐᖅᓯᒪᔪᓄᑦ ᐃᑲᔪᖅᑐᓂᑦ – ᐱᔪᓐᓇᕐᕕᖃᖏᑦᑐᒍᑦ ᐊᒻᒪ ᓇᓗᓇᐃᔭᖅᓯᒪᓂᖏᓐᓄᑦ ᖃᐅᔨᒪᔭᐅᔪᓂᑦ ᐊᑕᖏᓕᒫᖅᑐᒋᑦ ᑎᑎᕋᖅᓯᒪᔪᑦ ᐅᕙᒍᑦ ᓇᒻᒥᓂᖅ ᐊᕕᑦᑐᖅᓯᒪᔪᓂᑦ. ᕿᑎᐊᓃᑦᑎᑕᐅᓪᓗᓂ ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᔪᒥᑦ ᐃᑲᔫᑎᖃᖅᓯᒪᔪᖅ.

ᐊᒥᓱᒐᓚᐃᑦ ᒐᕙᒪᑐᖃᒃᑯᓐᓂ ᐱᓕᕆᔩᑦ ᐅᖃᓚᐅᖅᑐᑦ ᐋᖅᑭᒍᑎᖃᓂᕐᒧᑦ ᑎᑎᕋᕐᕕᖓ ᐃᑲᔪᕐᓂᖃᖅᑎᑦᑎᓚᐅᖅᑐᑦ ᐊᐅᓚᑦᑎᓂᕐᒧᑦ. ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂᑦ ᐱᓕᕆᔩᑦ ᐅᐱᒋᓚᐅᖅᑕᖏᑦ ᑕᒪᒃᑭᒃ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ CIRNAC ᐃᖅᑲᓇᐃᔭᖅᑎᖏᑦ ᑲᒪᒋᔭᖃᖅᑐᑦ ᐊᐅᓚᑦᑎᓂᕐᒧᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᑦ ᑲᑎᒪᓂᖏᓐᓄᑦ.

ᖃᐅᔨᒪᓇᓱᑦᑎᐊᖅᑐᑦ ᑖᒃᑯᐊ ᑲᑎᒪᓂᐅᔪᑦ ᑕᐃᒪᐃᓐᓂᖃᕐᓗᑎ ᐊᒻᒪ ᓴᖅᑮᑎᑦᑎᓗᑎ ᑕᑯᔅᓴᐅᑎᑦᑎᔪᓂᑦ ᐅᖃᐅᓯᐅᔪᓂᑦ ᐊᒻᒪ ᐱᔾᔪᑕᐅᔪᓂᑦ. ᐃᓛᓐᓂᒃᑯᑦ ᐃᓄᐃᑦ ᐱᓕᕆᐊᖃᖏᓪᓗᐊᖃᑦᑕᖅᑐᑦ ᐊᐅᓚᑦᑎᓂᕐᒧᑦ ᐃᑲᔪᓂᕐᒧᑦ ᐱᔭᐅᔭᕆᐊᖃᖅᑐᓂᑦ ᐃᒪᓐᓇᑎᑐᑦ ᐊᒻᒪ ᐅᕙᓂ ᓴᓐᖏᔫᔪᖅ. ᐱᑕᖃᕆᐊᖃᓪᓚᕆᑦᑐᖅ ᐱᓕᕆᖃᑎᒌᓐᓂᐅᔪᓄᑦ

ᐊᔅᓱᕈᖅᑐᑎ ᐃᖅᑲᓇᐃᔭᖅᑐᑦ ᓇᓗᓇᐃᔭᖅᓯᒪᓂᖏᓐᓄᑦ ᐊᒻᒪ ᐊᐅᓚᑦᑎᓂᕐᒧᑦ ᐃᖅᑲᓇᐃᔭᖅᑏᑦ

ᓇᓗᓇᓚᐅᖏᑦᑐᖅ ᖃᐅᔨᓴᐃᔨᐅᔪᓄᑦ ᐊᒥᓲᒪᑕ ᐊᔅᓱᕈᖅᑐᑦ ᐃᖅᑲᓇᐃᔭᖅᑐᑦ ᓇᓗᓇᐃᔭᖅᓯᒪᓂᖏᓐᓄᑦ ᐊᒻᒪ ᐊᐅᓚᑦᑎᓂᕐᒧᑦ ᐃᖅᑲᓇᐃᔭᖅᑏᑦ ᐃᓚᒋᔭᐅᖃᑕᐅᔪᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᓛᓂᑦ, ᑖᒃᑯᐊᖑᓐᓂᖏᑉᐸᑕ ᐱᕙᓪᓕᐊᓂᑭᑦᑑᒐᔭᖅᑐᖅ. ᐃᓄᐃᑦ ᐱᓕᕆᖃᑎᖏᓐᓂ ᐱᓗᐊᖅᑐᒥᑦ, ᖃᐅᔨᓴᐃᔩᑦ ᖃᐅᔨᓚᐅᖅᑐᑦ ᐃᖅᑲᓇᐃᔭᖅᑎᓂᑦ ᐃᖅᑲᓇᐃᔭᖃᑦᑕᖅᑐᑎ ᐊᔅᓱᕈᓐᓇᖅᑐᒥᑦ ᖃᓄᐃᓐᓂᕆᔭᖏᓐᓂᑦ, ᐊᑦᑐᖅᑕᐅᓯᒪᓪᓗᑎ ᐃᖅᑲᓇᐃᔭᖅᑎᖃᑦᑎᐊᖏᓐᓂᕐᒧᑦ ᐊᒻᒪ ᓄᖅᑲᖃᑦᑕᖅᑐᑦ ᑭᖑᕐᕕᖅᑕᐅᖃᑦᑕᕐᓂᖏᑦ. ᐊᒥᓱᒐᓚᐃᑦ ᐃᓄᐃᑦ ᐱᓕᕆᔩᑦ ᓇᓗᓇᐃᖅᓯᓚᐅᖅᑐᑦ ᐃᒻᒥᒧᑦ ᑲᔪᖏᖅᓯᒪᓂᕐᒧᑦ ᒐᕙᒪᑐᖃᒃᑯᑦ ᐱᓕᕆᔨᖏᑦ ᑲᔪᓯᑦᑎᐊᕐᓂᖓᓄᑦ ᐱᔾᔪᑎᖃᖅᑎᑦᑎᔪᑦ ᐊᒥᓱᒐᓚᓐᓂᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᖅᑲᓇᐃᔮᖏᓐᓂ, ᐱᑕᖃᕆᐊᖃᖅᑐᑦ ᐊᓯᔾᔩᓂᖃᖅᑎᑦᑎᔪᑦ ᐊᓯᔾᔨᖅᑐᓂᑦ.

ᐃᖅᑲᓇᐃᔭᖅᑎᖃᕈᓐᓇᕐᓂᖅ

ᐊᒥᓲᓂᖅᓴᐃᑦ ᐃᓄᐃᑦ ᐱᓕᕆᔩᑦ ᐊᒻᒪ ᐊᒥᓱᑦ ᒐᕙᒪᑐᖃᒃᑯᑦ ᐱᓕᕆᔩᑦ ᐅᖃᓚᐅᖅᑐᑦ ᐃᖅᑲᓇᐃᔭᖅᑲᕈᓐᓇᓂᕐᒧᑦ ᑭᓪᓕᖃᖅᑎᑕᐅᔪᑦ, ᐱᓗᐊᖅᑐᒥᑦ ᐃᓄᐃᑦ ᐱᓕᕆᖃᑎᖏᓐᓂ, ᐱᐅᖏᑦᑐᓂᑦ ᐊᑦᑐᐃᓂᖃᖅᑎᑦᑎᔪᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᕙᓪᓕᐊᓂᖓᓂᑦ. ᒐᕙᒪᑐᖃᒃᑯᑦ ᐱᓕᕆᖃᑎᖏᑦ ᐃᖅᑲᓇᐃᔭᖅᑎᖃᕈᓐᓇᑎᐊᖅᑐᑎᑦ, ᑖᒃᑯᐊᑦᑕᐅᖅ ᓵᓐᖓᑦᑎᔪᑦ ᐊᔅᓱᕈᕈᑕᐅᔪᓂᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᖅᑲᓇᐃᔮᖏᓐᓂ ᐱᔭᕇᖅᓯᓗᑎ, ᒪᓕᑦᑐᒋᑦ ᐊᒥᓱᒐᓚᐃᑦ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᐊᒻᒪ ᐃᓄᐃᑦ ᐱᓕᕆᔩᑦ. ᐊᒥᓲᓂᖅᓴᐃᑦ (68%) ᖃᐅᔨᓴᓂᕐᒧᑦ ᑭᐅᔪᑦ ᐊᖏᓚᐅᖅᑐᑦ ᑖᒃᑯᐊ ᑲᑐᔾᔨᖃᑎᒌᒋᔭᖏᑦ ᐊᑐᖃᑦᑕᖅᓯᒪᔪᑦ ᐱᔪᓐᓇᕐᓂᖏᓐᓄᑦ ᐊᔅᓱᕈᕈᑕᐅᔪᓂᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦᓂᑦ ᐃᖅᑲᓇᐃᔮᖓᓂ. ᐊᒥᓱᑦ ᐊᓯᑦ ᐊᔅᓱᕈᕈᑕᐅᔪᑦ ᓇᐅᓗᓇᐃᖅᑕᐅᓯᒪᔪᑦ ᖃᐅᔨᓴᐃᓂᕐᒧᑦ ᐅᑎᖃᑦᑕᖅᑐᑦ ᐃᖅᑲᓇᐃᔭᖅᑏᑦ ᓯᐊᒻᒪᖅᑎᑕᐅᓗᐊᕐᓂᖏᓐᓄᑦ.

ᐃᓚᐃᓐᓇᖏᑦ ᒥᑭᔪᑦ ᐱᓕᕆᓪᓗᐊᑕᖅᑐᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᐊᓯᓕᒫᖏᓐᓂ ᐃᓄᐃᑦ ᐱᓕᕆᖃᑎᖏᓐᓂ ᖃᓂᒌᑦᑐᓂᑦ ᐃᓚᒋᔭᐅᔪᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᖅᑲᓇᐃᔮᖓᓂ, ᖃᐅᔨᔭᐅᓯᒪᔪᑦ ᖃᐅᔨᓴᐃᔨᓄᑦ, ᐊᒻᒪ ᓇᓗᓇᐃᖅᑕᐅᓯᒪᓪᓗᑎ ᐊᐱᖅᓱᒻᖅᑕᐅᓂᖏᓐᓄᑦ ᐃᓄᐃᑦ ᐱᓕᕆᔩᑦ. ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᔪᒥᑦ ᐃᓚᖓᓂ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᓕᕆᑎᑦᑎᓂᖃᖅᑐᑦ ᐊᒻᒪ ᓇᓗᓇᐃᔭᖅᓯᒪᓂᖕᓐᓄᑦ ᐊᑐᐊᒐᕐᓂᑦ ᐃᖅᑲᓇᐃᔮᖑᔪᓂᑦ, ᑭᓯᐊᓂ ᐃᖅᑲᓇᐃᔮᖅᑕᖃᖏᑦᑐᖅ ᑲᔪᖏᖅᓯᒪᔪᒧᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦᓄᑦ. ᐊᒥᓱᒐᓚᐃᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᐊᕕᑦᑐᖅᓯᒪᔪᓂᑦ ᐱᓕᕆᔩᑦ ᐅᖃᖅᓯᒪᔪᑦ ᐱᑕᖃᕆᐊᖃᖅᑐᓂ ᑲᔪᖏᖅᑕᐅᓯᒪᔪᓂᑦ ᐊᖏᔪᖅᑲᐅᑎᓂᑦ ᐊᒻᒪ ᐊᐅᓚᑦᑎᓂᕐᒧᑦ ᐃᖅᑲᓇᐃᔮᓂ ᐅᑯᓇᓂ ᐃᓄᐃᑦ ᑕᐱᕇᑦ ᑲᓇᑕᒥ ᐊᐅᓚᑦᑎᓗᑎ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᕙᓪᓕᐊᓂᖓᓄᑦ ᐊᒻᒪ ᑐᑭᒧᐊᕈᑎᖃᖅᑎᑦᑎᓗᑎ ᐊᓯᖏᓐᓄᑦ ᐃᖅᑲᓇᐃᔭᖅᑎᓄᑦ ᐃᓚᒋᔭᐅᖃᑕᐅᔪᓄᑦ. ᓄᖅᑲᖃᑦᑕᖅᑐᑦ ᑭᖑᕐᕕᖅᑕᐅᓂᖏᑦ ᐃᖅᑲᓇᐃᔮᓪᓗᐊᑕᐅᔪᓂᑦ ᑭᖑᕙᖅᑎᑦᑎᓚᐅᕐᒥᔪᑦ ᐱᕙᓪᓕᐊᓂᖓᓂ ᐊᒻᒪ ᓴᖅᑭᑎᑦᑎᓪᓗᑎ ᐊᖏᔪᓂᑦ ᐃᖅᑲᓇᐃᔮᖑᓂᐊᖅᑐᓂᑦ ᐃᓐᓗᐃᓂᐊᖅᑐᓄᑦ.

ᐊᑕᖏᐸᓗᑦᑐᑎᑦ ᐃᓄᐃᑦ ᐱᓕᕆᔩᑦ ᐊᒻᒪ ᐊᒥᓱᒐᓚᐃᑦ ᒐᕙᒪᑐᖃᒃᑯᓐᓂ ᐱᓕᕆᔩᑦ ᐅᖃᓚᐅᖅᑐᑦ ᑭᓪᓕᖃᖅᑎᑕᐅᓪᓗᑎ ᓄᓇᑖᓂᕐᒧᑦ ᑲᑐᔾᔨᖃᑎᒌᑦ ᐃᖅᑲᓇᐃᔭᖅᑎᖃᕈᓐᓇᕐᓂᖏᓐᓄᑦ ᐃᓕᐅᖅᑲᖅᑕᐅᓯᒪᔪᑦ ᐅᕗᖓ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐊᑦᑐᐃᓂᖃᓚᐅᖅᑐᑦ ᐱᕙᓪᓕᐊᓂᖓᓂ ᐃᓚᖏᓐᓂ ᐱᓕᕆᕗᓂᑦ ᑎᒥᐅᔪᓂᑦ. ᐃᓛᓐᓂᒃᑯᑦ, ᐃᓚᖏᑦ ᑎᒥᐅᔪᑦ ᑎᑭᑦᑎᒍᓐᓇᖃᑦᑕᖏᑦᑐᑦ ᐱᑕᖃᕆᐊᖃᖅᑎᑕᐅᔪᓂᑦ ᖃᑦᑏᓐᓇᐅᓂᖅᓴᐅᓪᓗᑎ ᐱᖓᓱᑦ ᑎᓴᒪᓂᑦ ᐃᓄᐃᑦ ᓄᓇᑖᓂᕐᒧᑦ ᑲᑐᔾᔨᖃᑎᒌᓂᑦ ᑭᒡᒐᖅᑐᐃᔪᓂᑦ ᐱᑕᖃᕆᐊᖃᖅᑎᑕᐅᔪᓂᑦ. ᐊᒥᓱᒐᓚᐃᑦ ᐱᓕᕆᔩᑦ ᐅᖃᓚᐅᖅᑐᑦ ᐃᓚᒋᔭᐅᖃᑕᐅᓂᖏᑦ ᐸᐅᒃᑑᑎᑦ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ−ᑲᓇᑕ, ᐊᒻᒪ ᑲᓇᑕᒥ ᐃᓄᐃᑦ ᒪᒃᑯᑦᑐᑦ ᑲᑎᒪᔨᖏᑦ ᑭᓪᓕᖃᖅᑎᑕᐅᓚᐅᕐᒥᔪᑦ ᑭᓱᓕᕆᔾᔪᑎᓄᑦ ᐱᑕᖃᕈᓐᓇᕐᓂᖏᓐᓄᑦ.

ᐃᖅᑲᓇᐃᔮᕆᔭᖓ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᐅᔪᓐᓇᖅᑐᖅ ᑭᓯᐊᓂ ᐊᕕᑦᑐᖅᓯᒪᔪᑦ ᐱᔪᓐᓇᕐᓂᖃᖅᑎᓪᓗᒋᑦ ᐃᓚᒋᔭᐅᖃᑕᐅᓗᑎ ᐃᖅᑲᓇᐃᔮᖑᔪᒥᑦ

ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂ ᐱᓕᕆᖃᑎᒌᑦᑐᑦ ᓇᓗᓇᐃᖅᓯᓚᐅᖅᑐᑦ ᖁᕝᕙᕆᐊᖅᑕᐅᔭᕆᐊᖃᕐᓂᖓᓄᑦ, ᐊᑯᓂᐅᔪᒧᑦ ᑮᓇᐅᔭᖃᖅᑎᑕᐅᓂᕐᒧᑦ ᐃᓄᐃᑦ ᐱᓕᕆᖃᑎᖏᓐᓄᑦ ᐃᖅᑲᓇᐃᔭᖅᑎᖃᓂᕐᒧᑦ ᐊᒻᒪ ᐊᓯᖏᓐᓄ ᐊᐅᓚᓂᖏᓐᓄᑦ ᐊᑭᖏᓐᓄᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᓚᒋᔭᐅᖃᑕᐅᓂᖓᓄᑦ. ᐊᓲᖏᑦᑐᑦ ᐃᓄᐃᑦ ᓄᓇᑖᓂᕐᒧᑦ ᑲᑐᔾᔨᖃᑎᒌᑦ ᑮᓇᐅᔭᖃᖅᑎᑕᐅᖏᓯᒪᔪᑦ ᐊᔾᔨᒌᖏᑦᑐᓄᑦ ᐱᔾᔪᑕᐅᔪᓄᑦ ᓯᕗᓪᓕᖅᐹᖏᓐᓂ ᑎᓴᒪᓂ ᐊᕐᕌᒍᓂᑦ.

ᐊᒥᓱᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂᑦ ᐱᓕᕆᔩᑦ ᐅᖃᓚᐅᖅᑐᑦ ᑮᓇᐅᔭᖃᖅᑎᑕᐅᑦᑎᐊᖏᓐᓂᖅ ᐃᓚᐃᓐᓇᕆᔭᖓ ᐊᔅᓱᕈᕈᑕᐅᔪᓂᑦ. ᐊᒥᓱᒐᓚᐃᑦ ᐅᖃᓚᐅᖅᑐᖅ ᐃᖅᑲᓇᐃᔭᖅᑎᑦᑎᓂᖅ ᐊᒻᒪ ᐱᓯᒪᑦᑎᓂᖅ ᐊᖏᔪᖅᑲᐅᑎᓂᑦ ᐃᖅᑲᓇᐃᔭᖅᑎᓂᑦ ᐊᑐᐊᒐᕐᓂᑦ ᖃᐅᔨᒪᓂᖃᖅᑐᓂᑦ ᐱᒡᒐᓇᓚᐅᖅᑐᖅ. ᐃᓚᖏᑦ ᐊᐱᖅᓱᖅᑕᐅᔪᑦ ᐅᖃᓚᐅᖅᑐᑦ ᖃᓄᖅᑑᖅᓯᒪᔪᓂᑦ ᐊᑐᖅᑕᐅᓂᐅᔪᑦ ᐋᖅᑭᑦᑕᐅᓗᑎ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᖅᑲᓇᐃᔭᖅᑎᖃᓂᕐᒧᑦ ᐃᓱᒫᓘᑕᐅᔪᑦ ᐱᑕᖃᕆᐊᖃᓚᐅᖅᑐᑦ, ᓲᕐᓗ ᑐᕌᖓᑎᑕᐅᔪᓄᑦ ᐃᓕᓐᓂᐊᑎᑦᑎᓂᕐᒥᑦ ᐊᒻᒪ ᐃᓕᓐᓂᐊᖅᑎᑕᐅᓂᕐᒥᑦ. ᐱᓕᕆᔩᑦ ᐊᑕᐅᓯᕐᒥᑦ ᐊᕕᑦᑐᖅᓯᒪᔪᒥᑦ ᓴᖅᑭᑎᑦᑎᓚᐅᖅᑐᑦ ᐃᖅᑲᓇᐃᔭᐃᓐᓇᖅᑐᒥ ᓯᕗᓕᖅᑎᒥᑦ ᐃᖅᑲᓇᐃᔮᒥᑦ ᑲᔪᖏᖅᑎᑕᐅᓯᒪᔪᖅ ᐊᐅᓚᑦᑎᑭᓗᓂ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᖅᑲᓇᐃᔮᖏᓐᓂ ᐊᒻᒪ ᓯᐊᒻᒪᑎᓪᓗᒍ ᓇᓗᓇᐃᔭᖅᓯᒪᓂᖏᓐᓄᑦ ᐃᖅᑲᓇᐃᔮᖑᔪᑦ ᐊᒥᓱᒐᓚᓐᓄᑦ ᐊᑐᐊᒐᓕᕆᓂᕐᒧᑦ ᐃᖅᑲᓇᐃᔮᓂᑦ.

ᐊᐅᓚᑦᑎᓂᕐᒧᑦ ᐊᒻᒪ ᐊᐅᓚᑕᐅᓂᖏᓐᓄᑦ ᐊᑐᖅᑕᐅᔪᑦ

ᐊᐱᖅᓱᕐᓂᐅᔪᓂᑦ ᐊᒻᒪ ᖃᐅᔨᓴᓂᕐᒧᑦ ᑭᐅᔪᓂᑦ, ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᔨᖏᑦ ᐊᒻᒪ ᓯᕗᓕᖅᑏᑦ ᓇᓗᓇᐃᖅᓯᓚᐅᖅᑐᑦ ᐊᔾᔨᒌᖏᑦᑐᓂᑦ ᐊᔭᐅᖅᓯᔪᓂᑦ ᐊᐅᓚᑦᑎᓂᕐᒧᑦ ᐊᒻᒪ ᐊᐅᓚᑕᐅᓂᖏᓐᓄᑦ ᐊᔅᓱᕈᕈᑕᐅᔪᓂᑦ ᖃᒪᒋᔭᐅᔭᕆᐊᖃᖅᑐᓂᑦ.

ᐱᒋᐊᖅᑎᑕᐅᓂᖏᑦ ᐊᒻᒪ ᐊᐅᓚᑕᐅᓂᖏᑦ ᒐᕙᒪᑐᖃᒃᑯᑦ ᐱᓕᕆᖃᑎᖏᑦ

ᐊᒥᓱᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᓯᕗᓕᖅᑏᑦ ᐊᒻᒪ ᐱᓕᕆᔩᑦ ᑕᑯᔪᒪᓚᐅᖅᑐᑦ ᐱᒋᐊᖅᑎᑕᐅᓂᖏᑦ ᐊᒻᒪ ᐊᐅᓚᑕᐅᓂᖏᑦ ᒐᕙᒪᑐᖃᒃᑯᑦ ᐱᓕᕆᕕᓕᒫᖏᓐᓂ ᐱᐅᓯᑎᒋᐊᖅᑕᐅᓗᑎ.

ᐊᒥᓱᒐᓚᐃᑦ ᑭᒡᒐᖅᑐᐃᔩᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᖃᑎᖏᑦ ᐃᓱᒪᓚᐅᖅᑐᑦ ᐃᓚᒋᔭᐅᑎᑕᐅᓂᖅᓴᐅᓗᑎ ᐱᖓᓱᑦ ᒐᕙᒪᑐᖃᒃᑯᓐᓄᑦ ᑎᒥᓪᓕᐊᑕᐅᔪᑦ – ᑮᓇᐅᔭᓕᕆᔩᑦ ᑲᑎᒪᔨᖏᑦ, ᑮᓇᐅᔭᓕᕆᓂᕐᒧᑦ, ᐊᒻᒪ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᑦ ᐊᓪᓚᕕᖓ – ᐱᔪᓐᓇᑎᑦᑎᒐᔭᖅᑐᑦ ᒐᕙᒪᑐᖃᒃᑯᑦ ᐊᑐᑦᑎᐊᓂᖅᓴᐅᓗᑎ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓯᕗᓪᓕᐅᔾᔭᕆᐊᓕᓐᓂᑦ ᓇᒦᓐᓂᖏᓐᓄᑦ. ᐊᒥᓱᒐᓚᐃᑦ ᐅᖃᓚᐅᖅᑐᑦ ᐃᓚᒋᔭᐅᖃᑕᐅᓂᖏᑦ ᑎᒥᓪᓗᐊᑕᐅᔪᑦ ᐱᑕᖃᕆᐊᖃᓚᐅᖅᑐᑦ ᐋᖅᑭᑦᑕᐅᓗᓂ ᑮᓇᐅᔭᖃᖅᑎᑕᐅᓂᕐᒧᑦ ᐃᓱᒫᓘᑕᐅᔪᑦ. ᐊᓯᖏᑦ ᐅᖃᓚᐅᖅᑐᑦ ᐱᑕᖃᕆᐊᖃᓚᐅᖅᑐᑦ ᐱᓕᕆᑦᑎᐊᓂᖅᓴᐅᓗᑎ ᒐᕙᒪᓕᒫᒧᑦ ᑭᐅᔪᓄᑦ, ᓲᕐᓗ ᐊᑐᓕᖅᑎᑕᐅᓂᖓ ᐃᓄᐃᑦ ᓄᓇᖓᑦ ᐊᑐᐊᒐᖅ, ᐊᒻᒪ ᑲᔪᖏᖅᓴᕐᓗᒋᑦ ᐊᓯᖏᑦ ᐱᓕᕆᕕᐅᔪᑦ ᐊᑕᖏᔪᒥᑦ ᐃᓚᒋᔭᐅᓗᑎ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᖅᑲᓇᐃᔮᖓᓂ.

ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐅᑭᐅᑕᖅᑐᓕᕆᓂᕐᒧᓪᓗ ᑲᓇᑕᒥ ᓱᓕ ᑕᑯᓐᓇᖅᑕᐅᔪᑦ ᐱᓕᕆᖃᑕᐅᔪᑦ ᐃᓄᐃᑦ. ᑕᐃᒪᐃᓐᓂᖓᓄᑦ, ᐱᓕᕆᑐᐃᓐᓇᕋᔭᖅᑕᕗᑦ ᐱᓕᕆᕕᐅᔪᖅ ᐊᒻᒪ ᓯᐊᒻᒪᑎᑦᑎᒐᓱᐊᕐᓗᑕ ᒐᕙᒪᓕᒫᒧᑦ ᐊᑐᖅᑕᐅᓂᖓ.

ᐊᒥᓱᒐᓚᐃᑦ ᐃᓄᐃᑦ ᐱᓕᕆᔩᑦ ᑕᑯᔪᒪᓚᐅᖅᑐᑦ ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐅᑭᐅᖅᑕᖅᑐᓕᕆᓂᕐᒧᓪᓗ ᑲᓇᑕᒥ ᓴᓐᖏᓂᖅᓴᒥᑦ ᐱᓕᕆᐊᖃᕐᓗᑎ ᐃᓚᒋᔭᐅᑎᑦᑎᓂᕐᒧᑦ ᐊᓯᖏᓐᓂ ᐱᓕᕆᕕᐅᔪᓂᑦ, ᐃᓱᒪᒋᔭᐅᓪᓗᑎ ᐊᖏᔪᒥᑦ ᐃᓚᒋᔭᐅᑎᑦᑎᓂᕐᒧᑦ ᑲᒪᒋᔭᐅᓪᓗᓂ ᐃᓄᐃᑦ ᑕᐱᕇᑦ ᑲᓇᑕᒥ ᐃᖅᑲᓇᐃᔭᖅᑎᖏᓐᓄᑦ ᐊᒻᒪ ᐃᓄᐃᑦ ᓯᕗᓕᖅᑎᓄᑦ. ᐊᒥᓱᒐᓚᐃᑦ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᐊᐱᖅᓱᖅᑕᐅᔪᑦ ᐅᖃᐅᔾᔨᒋᐊᓚᐅᕐᒥᔪᑦ ᑖᒃᑯᐊ ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐅᑭᐅᖅᑕᖅᑐᓕᕆᓂᕐᒧᓪᓗ ᑲᓇᑕᒥ ᐊᖏᖅᓯᓗᑎ ᐱᓕᕆᔭᖃᕐᓂᖅᓴᓂᑦ, ᑕᑯᔅᓴᐅᑎᑕᐅᔪᓂᑦ ᐊᑖᓂ.

ᐃᓱᒪᖃᑦᑕᕐᒥᔪᖓ ᐱᔾᔪᑎᖏᓐᓂ ᐱᓕᕆᒋᐊᓕᖏᓐᓂ ᑎᑎᕋᕐᕕᖓ ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐅᑭᐅᖅᑕᖅᑐᓕᕆᓂᕐᒧᓪᓗ ᑲᓇᑕᒥ. ᐃᓱᒪᖃᑦᑕᖅᑐᖓ ᐱᓕᕆᓂᖃᕈᓐᓇᕐᒪᖔᑕ ᓈᒻᒪᓂᖅᓴᓂᑦ ᐊᑐᐊᒐᕐᓂᑦ ᐊᔾᔨᒌᓐᓂᖃᖅᑐᓂᑦ ᐱᓕᕆᐊᕆᒋᐊᓕᖏᓐᓂ. ᑕᐃᒫᔅᓴᐃᓐᓇᖅ ᐃᑉᐱᓐᓂᐊᔪᖓ ᐱᓕᕆᖃᕐᓂᓴᐅᒻᒪᑕ ᐊᒻᒪ ᖃᐅᔨᒪᓇᓱᑦᑎᐊᖅᑐᑎᑦ ᑖᓐᓇᐅᖏᓐᓇᕐᓄᓗᓂ … ᐅᓇᐅᓪᓗᓂ ᐊᐅᓚᑦᑎᓂᕐᒧᑦ ᐱᓕᕆᐊᖃᓂᕐᒧᑦ ᖃᓄᐃᑦᑑᓂᖓ ᑎᑎᕋᕐᕕᒃ.

ᐊᒥᓱᒐᓚᐃᑦ ᐃᓄᐃᑦ ᐱᓕᕆᔩᑦ ᐊᐱᖅᑯᑎᖃᓚᐅᖅᑐᑦ ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐅᑭᐅᖅᑕᖅᑐᓕᕆᓂᕐᒧᓪᓗ ᑲᓇᑕᒥ ᐱᔪᓐᓇᐅᑎᖃᕐᒪᖔᑕ, ᐃᓱᒪᒋᔭᐅᔪᖅ ᐅᕝᕙᓘᓐᓃᑦ ᐱᓪᓚᕆᐅᔪᖅ, ᑐᑭᒧᐊᖅᑎᑦᑎᓗᑎ ᒐᕙᒪᓕᒫᒥᑦ ᐱᓕᕆᔭᐅᔪᓂᑦ ᐊᐅᓚᓂᖃᑦᑎᐊᖅᑐᓂᑦ. ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐅᑭᐅᖅᑕᖅᑐᓕᕆᓂᕐᒧᓪᓗ ᑲᓇᑕᒥ ᑐᕌᒐᖃᓕᖅᑎᑕᐅᓯᒪᔪᑦ ᐊᐅᓚᑦᑎᓗᑎ ᐊᓯᖏᓐᓂᐱᓕᕆᕕᓐᓂᑦ ᐃᓚᒋᔭᐅᖃᑕᐅᓂᖏᓐᓄᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓂᑦ, ᑭᓯᐊᓂ ᐊᓯᖏᑦ ᐱᓕᕆᕕᐅᔪᑦ ᕌᒐᖃᓕᖅᑎᑕᐅᓯᒪᖏᑦᑐᑦ ᐃᓚᒋᔭᐅᖃᑕᐅᓗᑎ.

ᐊᔅᓱᕈᕈᑕᐅᔪᑦ ᒐᕙᒪᓕᒫᒧᑦ ᐃᖅᑲᓇᐃᔮᖑᔪᑦ ᑎᑎᕋᖅᑕᐅᓯᒪᑦᑎᐊᖅᑐᑦ ᐊᒻᒪ ᐃᓚᖏᑦ ᑐᑭᒧᐊᕈᑏᑦ ᓇᓂᔭᐅᔪᓐᓇᖅᑐᑦ ᑎᑎᕋᖅᓯᒪᔪᓂᑦ ᑭᓱᓂᑦ ᐱᑕᖃᕆᐊᖃᖅᑎᑕᐅᔪᓂᑦ ᐊᐅᓚᓂᖃᑦᑎᐊᓂᐊᕐᓗᑎ, ᐱᖃᓯᐅᑎᓪᓗᑎ ᓇᓗᓇᐃᖅᓯᒪᔪᑦ ᑐᕌᒐᖏᑦ, ᓂᕈᐊᖅᑕᐅᓯᒪᔪᓕᕆᓂᕐᒧᑦ ᑲᔪᖏᖅᑕᐅᓯᒪᔪᑦ ᖁᑦᑎᓂᖅᐹᖏᓐᓂ, ᓈᒻᒪᑦᑐᓂᑦ ᑲᑐᑎᓕᖅᑕᐅᓯᒪᔪᓂᑦ ᒐᕙᒪᒃᑯᑦ ᓴᓇᓯᒪᓂᖏᑦ, ᐊᒻᒪ ᓴᓐᖏᔪᒥᑦ ᐱᖅᑯᓯᖃᓂᕐᒥᑦ ᐱᓕᕆᖃᑎᒌᓐᓂᐅᔪᓂᑦ.^{Footnote 6} ᖃᐅᔨᓴᐃᓂᐅᕋᑖᓚᐅᖅᑐᑦ ᒥᓂᔅᑕᓂᑦ ᑐᑭᒧᐊᕈᑏᑦ ᒐᕙᒪᑐᖃᖅᑯᑦ ᐊᑐᖅᑕᖓᓂ ᐅᓪᓗᒥᐅᔪᒥᑦ ᐊᖏᕈᑎᒥᑦ ᐊᑐᓕᖅᑎᑕᐅᓂᖓᓄᑦ ᖃᐅᔨᓚᐅᖅᑐᑦ ᑖᒃᑯᐊ ᖃᐅᔨᓴᖃᑦᑕᓂᕐᒧᑦ ᐊᐅᓚᓂᖏᑦ ᐊᒻᒪ ᐃᓕᓴᕆᔭᐅᓯᒪᓂᖅᓴᓂ ᐊᑐᖅᑕᐅᔪᓂᑦ ᐱᑕᖃᕆᐊᖃᓚᐅᖅᑐᑦ ᑎᑭᑦᑎᓗᑎ ᓇᓕᒧᑦᑐᓂᑦ ᐊᐅᓚᑦᑎᓂᕐᒧᑦ.^{Footnote 7} ᖃᐅᔨᔭᐅᓯᒪᔪᑦ ᐅᖃᐅᔾᔨᒋᐊᖅᑐᑦ ᑖᒃᑯᐊ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᖃᓄᐃᓕᓂᖃᕋᔅᓴᐅᒻᒪᑕ ᑖᒃᑯᓄᖓ ᐊᔅᓱᕈᕈᑕᐅᔪᓄᑦ ᐊᒻᒪ ᐱᓕᕆᐊᖃᒃᑲᓐᓂᕆᐊᖃᖅᑐᑎᑦ ᐊᑕᖐᔪᒥ ᑎᑭᑦᑎᓗᑎ ᒐᕙᒪᓕᒫᒧᑦ ᐊᑐᖅᑕᐅᓂᖓ ᐱᓕᕆᖃᑎᖏᓐᓄᑦ ᑕᑯᓐᓇᖅᑕᖏᓐᓂᑦ.

ᐊᖏᓂᖓ ᐃᓚᓕᐅᔾᔭᐅᓂᖓ GBA+

ᖃᐅᔨᓴᐃᔩᑦ ᖃᐅᔨᓚᐅᖅᑐᑦ ᓇᓗᓇᐃᖅᓯᒪᑦᑎᐊᖏᑦᑐᓂᑦ ᐃᓚᓕᐅᔾᔭᐅᓂᖏᓐᓄᑦ ᐊᕐᓇᐅᓂᖏᓐᓄᑦ ᐊᖑᑕᐅᓂᖏᓐᓄᑦ ᐃᓱᒪᒋᔭᖃᓂᕐᒧᑦ ᐅᕝᕙᓘᓐᓃᑦ ᐊᑐᖅᑕᐅᓂᖓ GBA+ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᖅᑲᓇᐃᔮᖓᓂ. ᐊᒥᓱᒐᓚᐃᑦ ᐃᓄᐃᑦ ᐱᓕᕆᔩᑦ ᐅᖃᓚᐅᖅᑐᑦ ᐃᓱᒪᒋᔭᖃᐃᓐᓇᖅᑐᑦ ᐊᕐᓇᖑᓂᖏᓐᓄᑦ ᐊᖑᑕᐅᓂᖏᓐᓄᑦ ᐊᒻᒪ ᐊᓯᖏᓐᓂ ᐱᔾᔪᑎᖃᖅᑎᑦᑎᔪᓂᑦ ᐸᕐᓇᐃᓂᕐᒧᑦ ᐱᓕᕆᔭᐅᔪᓂᑦ ᐊᕕᑦᑐᖅᓯᒪᔪᖏᓐᓄᑦ, ᑭᓯᐊᓂ ᐃᓕᓴᕆᔭᐅᓯᒪᓂᒃᑰᖏᑦᑐᖅ. ᐊᒥᓲᓂᖅᓴᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᐊᐱᖅᓱᖅᑕᐅᔪᑦ ᐅᖃᓚᐅᖅᑐᑦ ᑕᑯᓯᒪᖏᑦᑐᑦ GBA+ ᐊᑐᖅᑕᐅᔪᒥ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᖅᑲᓇᐃᔮᖓᓂ ᐊᒻᒪ ᐊᖏᓂᖅᓴᐅᕌᕐᔪᑦᑐᑦ ᐱᖓᓱᓂᑦ (35%) ᖃᐅᔨᓴᓂᕐᒧᑦ ᑭᐅᔪᑦ ᐃᓱᒪᓚᐅᖅᑐᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᓚᓕᐅᔾᔭᐅᓯᒪᓂᖃᖅᑐᑦ ᐊᕐᓇᐅᓂᖏᓐᓄᑦ ᐊᖑᑕᐅᓂᖏᓐᓄᑦ ᐃᓱᒪᒋᔭᖃᓂᕐᒧᑦ, ᓲᕐᓗ ᐊᑐᖅᑎᑕᐅᓗᓂ GBA+.

ᐊᔅᓱᕈᕈᑕᐅᔪᑦ

ᖃᐅᔨᓴᓂᕐᒧᑦ ᑭᐅᔪᑦ ᐊᒻᒪ ᐊᐱᖅᓱᕐᓂᐅᔪᑦ ᐅᖃᐅᔾᔨᒋᐊᖅᑐᑦ ᑭᓪᓕᖃᖅᑎᑕᐅᔪᑦ ᖃᐅᔨᒪᑎᑦᑎᓂᕐᒧᑦ GBA+ ᐊᒻᒪ ᐃᑲᔫᑎᖃᕈᓐᓇᕐᓂᖏᑦ ᐊᐳᕆᑎᐅᓪᓗᓂ ᐃᓚᓕᐅᔾᔭᐅᓂᖏᓐᓄᑦ. ᐊᒥᓱᒐᓚᐃᑦ ᐃᓄᐃᑦ ᐱᓕᕆᔩᑦ ᐅᖃᓚᐅᖅᑐᑦ ᐃᓄᓐᓄᑦ ᑐᕌᖓᔪᑦ ᓴᓇᕐᕈᑏᑦ ᐊᒻᒪ ᐃᓕᓐᓂᐊᓂᕐᒧᑦ ᐱᑕᖃᕆᐊᖃᓚᐅᖅᑐᑦ ᐊᑐᖅᑕᐅᓗᓂ GBA+ ᓈᒻᒪᑦᑐᒥᑦ ᐃᓄᓐᓄᑦ ᑎᑎᕋᖅᓯᒪᔪᖏᓐᓂ.

ᐊᔾᔨᒌᖏᑦᑐᑦ ᑕᑯᓐᓇᖅᑕᐅᔪᑦ ᐱᔾᔪᑎᖃᖅᑐᑦ ᐱᓕᕆᒋᐊᓕᖏᓐᓂᑦ ᐊᒻᒪ ᑲᒪᒋᔭᕆᐊᖃᖅᑕᖏᓐᓂ GBA+ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓂᑦ ᐊᐳᕈᑎᐅᕐᒥᔪᑦ. ᐊᒥᓲᖏᑦᑐᑦ ᒐᕙᒪᑐᖃᒃᑯᓐᓂᑦ ᐊᒻᒪ ᐃᓄᐃᑦ ᐱᓕᕆᔩᑦ ᐊᒻᒪ ᒐᕙᒪᑐᖃᒃᑯᓐᓂ ᓯᕗᓕᖅᑏᑦ ᓇᓗᓇᐃᖅᓯᓚᐅᖅᑐᑦ ᐸᐅᒃᑑᑎᑦ ᐃᓚᒋᔭᐅᓂᖏᑦ ᐃᑲᔪᖅᑐᑎ ᓈᒻᒪᑦᑐᓂᑦ ᑭᒡᒐᖅᑐᐃᓂᖃᓂᕐᒧᑦ ᐊᒻᒪ ᑭᐅᔭᐅᔪᓄᑦ ᐊᔾᔨᒌᖏᑦᑐᓄᑦ ᐃᓄᐃᑦ ᑎᒥᖏᓐᓄᑦ. ᐊᒥᓱᒐᓚᐃᑦ ᐃᓄᐃᑦ ᐱᓕᕆᔩᑦ ᑐᓂᓯᔭᐅᖁᔨᓚᐅᖅᑐᑦ ᐸᐅᒃᑑᑎᒃᑯᑦ ᐊᑕᖐᔪᒥᑦ ᐃᓚᒋᔭᐅᓗᑎ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓂᑦ ᓴᓐᖓᑦᑎᒋᐊᕐᓗᒍ ᑖᓐᓇ ᐃᓱᒪᒋᔭᐅᔪᖅ ᐱᓕᕆᒋᐊᖃᕐᓂᖓ. ᑭᓯᐊᓂᓕ, ᐊᒥᓱᒐᓚᐃᑦ ᐃᓄᐃᑦ ᐱᓕᕆᔩᑦ ᐅᖃᓚᐅᖅᑐᑦ ᐱᓕᕆᖃᑎᒌᑦᑐᓕᒫᑦ ᐱᔭᕆᐊᖃᓚᐅᖅᑐᑦ ᑲᒪᒋᔭᖃᓂᕐᒧᑦ GBA+. ᑖᓐᓇ ᑭᖑᓂᐊᒍᑦ ᑕᑯᓐᓇᖅᑕᐅᔪᖅ – ᑖᓐᓇ ᑲᒪᒋᔭᖃᕆᐊᖃᕐᓂᖅ ᐊᑐᖅᑕᐅᔭᕆᐊᓕᒃ ᑲᑐᔾᔨᖃᑎᒌᓕᒫᓄᑦ ᐃᓚᒋᔭᐅᔪᓂᑦ ᐃᓄᓐᓄᑦ ᐊᑐᐊᒐᕐᓂᑦ ᐊᒻᒪ ᐱᓕᕆᐊᓕᐅᓂᕐᒥᑦ – ᐃᓱᒪᒋᔭᐅᔪᖅ ᓯᓚᕐᔪᐊᒥ ᐊᑑᑎᖃᑦᑎᐊᖅᑐᓂ ᐊᑐᖅᑕᐅᕙᑦᑐᖅ.^{Footnote 9}

ᓇᓗᓇᐃᔭᖅᓯᒪᔪᓂᑦ ᖃᐅᔨᓴᐃᓂᖅ ᖃᓄᐃᓕᖓᓂᖓᓄᑦ ᐅᖓᑖᓃᑦᑐᖅ ᐊᖏᓂᖓᓄᑦ ᑖᔅᓱᒥᖓ ᖃᐅᔨᓴᐃᓂᕐᒥᑦ, ᖃᐅᔨᔭᐅᓯᒪᔪᑦ ᓇᓗᓇᐃᖅᓯᔪᑦ ᐊᖏᔪᒐᓚᒻᒥᑦ ᐃᖅᑲᓇᐃᔭᕆᐊᖃᖅᑐᑦ ᐃᓚᓕᐅᓪᔭᐅᓗᓂ GBA+ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᖅᑲᓇᐃᔮᖓᓄᑦ ᓈᒻᒪᑦᑐᓂᑦ ᐃᓄᓐᓄᑦ ᑎᑎᕋᖅᓯᒪᔪᓄᑦ.

ᒐᕙᒪᑐᖃᒃᑯᑦ ᐊᕐᓇᐅᓂᖏᓐᓄᑦ ᐊᖑᑕᐅᓂᖏᓐᓄᑦ ᖃᐅᔨᓴᐃᓂᖅ ᐃᓚᖏᓪᓗ ᒪᑭᒪᑎᑕᔅᓴᐅᔪᓐᓇᖅᑎᑕᐅᓂᖓ ᐱᑕᖃᖅᑎᑦᑎᔪᑦ "ᐃᓕᑦᑕᐅᓯᒪᔪᑦ" ᐃᑲᔫᑎᖃᕈᓐᓇᖅᑐᐃᓐᓇᕆᐊᖃᖅᑐᓂᑦ. ᓇᓗᓇᐃᖅᓯᔪᑦ ᐱᖓᓲᔪᖅᑐᓂᑦ ᐱᑕᖃᕆᐊᖃᖅᑐᓂᑦ ᐃᓗᓕᖏᓐᓂ ᑲᑐᔾᔨᖃᑎᒋᒧᑦ ᐱᔭᕆᐊᖃᖅᑕᖏᓐᓂ ᐃᓚᓕᐅᔾᔨᒍᓐᓇᕐᓗᑎ GBA+ ᒪᑭᒪᑎᑕᔅᓴᐅᓂᖓ:

• ᐊᑐᐊᒐᕐᓂᑦ ᐅᓂᒃᑳᑦ;
• ᐱᔭᐅᔭᕆᐊᓕᓐᓂᑦ ᖃᐅᔨᓴᕐᓂᖅ;
• ᑲᒪᒋᔭᖃᐊᖃᓂᕐᒧᑦ ᐱᓕᕆᑯᒃ;
• ᐃᓕᓐᓂᐊᕐᓂᖅ ᐊᒻᒪ ᓴᓇᕐᕈᑏᑦ;
• "ᐱᓕᕆᐊᓐᖓᐅᑎᐅᒋᐊᖅᑐᑦ" ᐱᓕᕆᔭᐅᔪᑦ; ᐊᒻᒪ
• ᓇᐅᑦᑎᖅᓱᐃᓂᖅ.

ᐱᓕᕆᐊᖃᕐᒥᔪᖅᑕᐅᖅ ᑲᒪᒋᔭᖃᕆᐊᖃᕐᓂᐅᔪᖅ GBA+ ᐃᓚᒋᓕᖅᑕᐅᔭᕆᐊᓕᒃ ᐊᑐᓂ ᑲᑐᔾᔨᖃᑎᒌᓄᑦ ᐊᒻᒪ ᐃᓄᓕᒫᓄᑦ – ᓯᕗᓕᖅᑎᓂᑦ ᐊᒻᒪ ᐊᖏᔪᖅᑲᐅᑎᓂᑦ ᐃᖅᑲᓇᐃᔭᖅᑎᓂᑦ, ᓇᓗᓇᐃᖅᑕᐅᔭᕆᐊᖃᖅᑐᑦ ᑐᓐᖓᕕᐅᔪᓐᓇᕐᓂᖏᓐᓄᑦ, ᐊᑐᐊᒐᕐᓄᑦ ᐊᒻᒪ ᐱᓕᕆᐊᓄᑦ ᐃᖅᑲᓇᐃᔭᖅᑎᓄᑦ, ᐱᐅᓛᒥᑦ ᐃᓂᖓᓃᑦᑐᑦ ᐊᑐᖅᑕᐅᓗᓂ GBA+ ᐃᖅᑲᓇᐃᔮᖏᓐᓂ.

ᒐᕙᒪᒃᑯᑦ ᑲᔪᖏᖅᓯᒪᓂᖏᑦ

ᒐᕙᒪᑐᖃᒃᑯᑦ ᓂᕈᐊᖅᑕᐅᓯᒪᓂᕐᒧᑦ ᑲᔪᖏᖅᓯᒪᔭᖏᑦ ᐋᖅᑭᒍᑎᖃᓂᕐᒧᑦ ᐊᒻᒪ ᐃᓕᐅᖅᑲᖅᑕᐅᓂᖏᓐᓄᑦ ᑐᓐᖓᕕᓪᓗᐊᑕᖓ (ᕿᑎᐊᓂ, ᑲᔪᓰᓐᓇᖅᑐᑦ) ᑮᓇᐅᔭᖃᖅᑎᑕᐅᓂᖏᓐᓄᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐊᐅᓚᓂᖏᓐᓄᑦ ᓴᐳᒻᒥᑦᑎᔪᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓂᑦ ᕿᓚᒥᐅᔪᒧᑦ. ᐊᐅᓚᓂᖓᓄ ᐃᓚᓕᐅᔾᔨᔭᕆᐊᓖᑦ ᐃᓄᓐᓂᑦ ᐊᑐᓕᖅᑎᑕᐅᓂᖓᓄᑦ ᐃᓄᐃᑦ ᓄᓇᖓᑦ ᐊᑐᐊᒐᖅ ᐊᒻᒪ ᓯᓚᕐᔪᐊᕐᒥᐅᓕᒫᓄᑦ ᓇᓗᓇᐃᖅᑕᐅᓂᖏᑦ ᐱᔪᓐᓇᐅᑎᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐱᖁᔭᖅ ᓱᓕᑎᑦᑎᔪᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᒪᑭᒪᑎᑕᔅᓴᐅᓂᖏᓐᓄᑦ. ᑭᓯᐊᓂᓕ, ᐊᒥᓱᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᓯᕗᓕᖅᑏᑦ ᐊᒻᒪ ᐱᓕᕆᔩᑦ ᐊᐱᖅᓱᖅᑕᐅᔪᑦ ᐃᓱᒫᓘᑎᖃᓚᐅᖅᑐᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐊᑦᑕᓇᖅᑐᒦᒍᓐᓇᑐᐃᓐᓇᕆᐊᖃᕐᓂᖏᓐᓄᑦ ᐊᓯᔾᔨᖅᑐᓄᑦ ᒐᕙᒪᒃᑯᑦ ᓯᕗᓕᖅᑎᓐᓂ ᐅᕝᕙᓘᓐᓃᑦ ᑐᕌᒐᖏᓐᓂ, ᐃᓱᒫᓘᑕᐅᔪᖅ ᑕᑯᔅᓴᐅᑎᑕᐅᔪᖅ ᖃᐅᔨᓴᓂᕐᒧᑦ ᑭᐅᔪᓂᑦ. ᐃᓕᓐᓂᐊᕐᓂᓕᕆᓂᕐᒧᑦ ᖃᐅᔨᓴᕐᓂᐅᔪᖅ ᑕᑯᔅᓴᐅᑎᑦᑎᔪᑦ ᐊᑦᑕᓇᕈᑎᑕᖃᕈᓐᓇᕐᓂᖓ ᓄᓇᖃᖅᑳᖅᓯᒪᔪᑦ−ᒐᕙᒪᒃᑯᑦ ᐱᓕᕆᖃᑎᒌᓐᓂᖏᑦ ᐊᓯᔾᔨᖅᑐᓄᑦ ᓂᕈᐊᖅᑕᐅᖃᑦᑕᖅᑐᓂᑦ ᓯᕗᓕᖅᑎᓂᑦ.^{Footnote 10}

ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂᑦ ᐱᓕᕆᔩᑦ ᑕᑯᓯᒪᔪᑦ ᓴᖅᑭᖅᑎᑕᐅᔭᕆᐊᓖᑦ ᒐᕙᒪᑐᖃᒃᑯᑦ ᑲᔪᖏᖅᓯᒪᔭᖏᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓄᑦ. ᐃᓚᖏᑦ ᐃᓕᓐᓂᐊᕐᓂᓕᕆᓂᕐᒧᑦ ᖃᐅᔨᓴᖅᑏᑦ ᐊᑐᓕᖁᔨᔪᑦ ᐊᑐᖅᑕᐅᔭᓕᐅᓂᕐᒥᑦ ᐃᓕᓴᕆᔭᐅᓗᑎ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐊᑦᑎᓪᓕᒋᐊᕐᓗᒍ ᐊᑦᑕᓇᖅᑐᒦᒍᓐᓇᕐᓂᖏᓐᓄᑦ ᓂᕈᐊᖅᑕᐅᖃᑦᑕᖅᑐᓄᑦ ᐊᓯᔾᔨᖅᑐᓄᑦ.^{Footnote 11} ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᐅᖃᐅᔾᔨᒋᐊᕈᑎᖃᓚᐅᖅᑐᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᑕᖃᐃᓐᓇᓕᕐᓗᑎ, ᐱᖃᓯᐅᑎᓪᓗᑎ ᓴᖅᑭᖅᑎᑕᐅᓗᑎ ᒪᓕᒐᖅᑎᒍᑦ, ᓴᖅᑭᑎᑦᑎᓗᑎ ᐊᖏᕈᒻᒥᑦ ᐅᕝᕙᓘᓐᓃᑦ ᐊᓯᖏᓐᓂ ᐋᖅᑭᓱᖅᑕᐅᓯᒪᑦᑎᐊᖅᑐᓂᑦ ᑐᓐᖓᓂᖃᖅᑐᑦ ᐅᑯᓇᓂ ᐃᓄᐃᑦ ᓄᓇᖓᑦ ᐃᓕᓴᕆᔭᐅᓂᖓ ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᓐᓂᖏᑦ, ᐃᑲᔪᓱᖅᑕᐅᓗᓂ ᒥᓂᔅᑕᓄᑦ ᑐᑭᒧᐊᕈᑎᒧᑦ ᐊᑦᑐᐊᓂᖃᖅᑐᓄᑦ ᐊᑐᓕᖅᑎᑕᐅᓂᖓᓄ ᓯᓚᕐᔪᐊᕐᒥᐅᓕᒫᓄᑦ ᓇᓗᓇᐃᖅᑕᐅᓂᖏᑦ ᐱᔪᓐᓇᐅᑎᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐱᖁᔭᖅ, ᐊᒻᒪ ᓴᖅᑭᑎᑦᑎᓗᑎ ᐱᑕᖃᐃᓐᓇᖅᑐᒥ, ᑲᑐᑎᔭᐅᔪᒥ ᐊᐅᓚᑦᑎᓂᕐᒧᑦ ᑎᒥᐅᔪᒥᑦ.

ᐊᒥᓱᒐᒪᐃᑦ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᐅᖃᓚᐅᖅᑐᑦ ᐊᓯᔾᔨᖅᑕᐅᓂᖓ ᐱᖅᑯᓯᐅᕙᑦᑐᖅ ᒐᕙᒪᑐᖃᒃᑯᑦ ᐱᓕᕆᕕᖏᓐᓄ ᐱᓗᑎ ᓇᓗᓇᐃᖅᑕᐅᓯᒪᔪᓂᑦ ᑐᓐᖓᕕᖃᖅᑐᓂᑦ ᐊᑐᖅᑕᐅᓂᖓ ᐱᑕᖃᕆᐊᖃᖅᑐᖅ ᒪᑭᒪᑎᑕᐅᔪᓐᓇᕐᓂᖓᓄᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ. ᐊᑕᐅᓯᖅ ᒐᕙᒪᑐᖃᒃᑯᓐᓄᑦ ᐱᓕᕆᔨ ᐊᑐᓕᖁᔨᓚᐅᖅᑐᖅ ᐊᐅᓚᑦᑎᓂᕐᒧᑦ ᓇᓖᕌᕋᔅᓴᐃᑦ ᐱᐅᓂᖅᓴᒥᑦ ᐃᓚᓕᐅᔾᔨᓗᑎ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓂᑦ ᐊᒻᒪ ᐃᓄᐃᑦ ᓄᓇᖓᑦ ᐊᑐᐊᒐᖅ ᒐᕙᒪᑐᖃᒃᑯᑦ ᐱᕙᓪᓕᐊᓂᖏᓐᓄᑦ, ᑕᑯᔅᓴᐅᑎᑕᐅᔪᑦ ᐊᑖᓂ.

… ᖃᓄᐃᑦᑐᓂᑦ ᐊᐅᓚᑦᑎᓂᕐᒧᑦ ᐊᖏᕈᒻᒥᑦ ᐃᓂᖓᓅᖅᓯᔪᓐᓇᖅᑭᑕ ᑐᖏᓕᖏᓐᓄᑦ ᒥᔅᑕᐃᑦ ᐅᕝᕙᓘᓐᓃᑦ ᐃᑲᔪᖅᑎᖏᓐᓄᑦ ᑐᖏᓕᖏᓐᓄᑦ ᒥᓂᔅᑕᐃ? … ᐃᓱᒪᒋᔭᕋ ᐱᐅᔫᓇᓱᖏᓪᓗᒍ ᐃᓱᒪᒋᔭᐅᓂᖓ ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐅᑭᐅᑕᖅᑐᓕᕆᓂᕐᒧᑦ ᑲᓇᑕᒥ ᐊᒻᒪ ᖃᐅᔨᓴᖅᑏᑦ ᑲᑎᒪᔨᖏᑦ ᐊᓪᓚᕕᖓ ᐃᓱᒪᒋᔭᖃᕐᓗᑎ ᖃᓄᐃᓘᖅᑕᐅᑲᓐᓂᕆᐊᖃᖅᑐᓂ [ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ] ᐊᖅᑯᑎᖓᓃᑦᑎᐊᖏᓐᓇᕐᓗᑎ.

ᑕᑯᔅᓴᐅᑎᑦᑎᓂᖅ ᖃᓄᐃᓐᓂᕆᔭᖏᓐᓂ

ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂᑦ ᐱᓕᕆᔩᑦ ᐅᖃᓚᐅᖅᑐᑦ ᐱᐅᓛᖑᔪᖅ ᒪᑭᒪᑎᓪᓗᒍ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ, ᐱᑕᖃᖏᓐᓂᖓ ᒪᓕᒐᖅᑎᒍᑦ ᐊᒻᒪ ᓄᑖᖅ ᐊᐅᓚᑦᑎᓂᕐᒧᑦ ᐋᖅᑭᑕᐅᓯᒪᔪᑦ, ᑕᑯᔅᓴᐅᑎᑦᑎᓗᑎ ᖃᓄᐃᓐᓂᕆᔭᖏᓐᓂ ᐊᒻᒪ ᑐᓴᐅᒪᔾᔪᑎᒋᑦᑎᐊᕐᓗᒋᑦ ᐊᐅᓚᓂᖃᑦᑎᐊᖅᑐᒥᑦ. ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᑎᑭᑦᑎᖏᑉᐸᑕ ᑕᖏᓕᓐᓂᑦ ᖃᓄᐃᓐᓂᕆᔭᖏᓐᓂ, ᐃᓄᐃᑦ ᒐᕙᒪᑐᖃᒃᑯᑦ ᐱᓕᕆᖃᑎᖏᑦ ᑲᔪᖏᖅᓯᒪᖏᓂᖅᓴᐅᔪᓐᓇᖅᑐᑦ ᐃᓕᐅᖅᑲᐃᓗᑎ ᐱᕕᔅᓴᐅᔪᒥᑦ ᐊᒻᒪ ᑭᓱᓕᕆᔾᔪᑎᓂᑦ.

ᒪᑭᒪᑎᑕᔅᓴᐅᓂᖓ ᑐᓐᖓᓂᖃᓂᐊᖅᑐᑦ – ᓴᖅᑭᑎᑦᑎᕚᖃᓄᐃᓐᓂᐅᔪᓂᑦ? ᐱᔪᒪᓂᖅᑕᖃᖅᑳ ᐊᒻᒪ ᐱᔭᐅᓗᑎ ᒐᕙᒪᑐᖃᒃᑯᑦ ᐊᑐᖅᑕᖏᓐᓂ? ᐊᐅᓚᑦᓂᖃᑦᑎᐊᓂᖅᓴᐅᕚ ᓴᓂᐊᓂ ᑎᐅᔪᓂᑦ ᐅᖃᖃᑎᒌᓐᓂᐅᔪᓂᑦ ᐊᐅᓚᓂᖏᓐᓂ ᐊᒻᒪ ᐊᖏᓂᖅᓴᒥᑦ ᐊᒥᓱᒐᓚᓐᓂᑦ ᑎᒥᐅᔪᓂᑦ ᐊᐅᓚᓂᕆᔭᖏᓐᓂ? …ᑖᒃᑯᐊ ᐱᖓᓱᑦ ᑕᕝᕙᓃᖏᓐᓇᕈᑎ, ᒪᑭᒪᑎᑕᔅᓴᐅᔪᖅ.

ᐊᓯᖏᑦ ᐊᑦᑕᓇᕈᑎᐅᔪᓐᓇᖅᑐᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛ ᒪᑭᒪᑎᑕᔅᓴᐅᓂᖓᓄᑦ

ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐊᑦᑕᓇᖅᑐᒦᒍᓐᓇᓕᖅᑐᖅ ᓇᒻᒥᓂᖅ ᑲᔪᓯᑦᑎᐊᕐᓂᖓᓄᑦ, ᐊᒥᓲᓂᖏᓐᓄᑦ ᓯᕗᓪᓕᐅᔾᔭᐅᔭᕆᐊᓖᑦ ᐃᖏᕋᓂᖅᓴᐅᓪᓗᑎ ᐱᓕᕆᖃᑎᖏᓐᓄᑦ ᐃᖅᑲᓇᐃᔭᖅᑎᓂᑦ ᐱᑕᖃᕈᓐᓇᕐᓂᖏᓐᓄᑦ ᐊᒻᒪ ᐱᕙᓪᓕᐊᑎᑕᐅᓂᖓ ᐊᐅᓚᑦᑎᓂᕐᒧᑦ ᐊᒻᒪ ᐊᐅᓚᑕᐅᓂᖏᓐᓄᑦ ᐊᑐᖅᑕᐅᔪᑦ, ᐅᖃᐅᓯᐅᓯᒪᔪᑦ ᐃᓚᖓ 3.5. ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᖃᑎᖏᓐᓂᑦ ᓇᓗᓇᐃᖅᓯᓚᐅᖅᑐᑦ ᐃᖅᑲᓇᐃᔭᖅᑎᖃᕈᓐᓇᓂᕐᒧᑦ ᐱᔪᓐᓇᕐᓂᖏᓐᓄᑦ ᒫᓐᓇᑦᑕᐅᑎᒋ ᐊᑦᑕᓇᕈᑎᐅᓪᓗᓂ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐊᐅᓚᓂᖃᑦᑎᐊᕐᓂᖓᓄᑦ.

ᐊᒥᓱᒐᓚᐃᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐱᓕᕆᔩᑦ ᐅᖃᓚᐅᖅᑐᑦ ᒐᕙᒪᓕᒫᒧᑦ ᐊᑦᑎᓪᓕᒋᐊᖅᑐᑦ ᑮᓇᐅᔭᖅᑐᓂᕐᒧᑦ ᐱᐅᖏᑦᑐᒥᑦ ᐊᑦᑐᐃᓂᖃᕈᓐᓇᖅᑐᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ ᓇᒦᓐᓂᖏᓐᓄᑦ, ᐅᑎᒧᑦ ᐊᑦᑎᓪᓕᒋᐊᖅᑎᑦᑎᔪᓐᓇᖅᑐᖅ ᐱᓕᕆᖃᑎᖏᓐᓄᑦ ᐱᔪᒪᓂᖏᓐᓄᑦ ᐱᕕᔅᓴᖃᕐᕕᖏᓐᓂ ᐊᒻᒪ ᑲᒪᒋᔭᖃᕈᒪᓂᕐᒧᑦ. ᐱᓕᕆᖃᑎᒌᑦᑐᑦ ᐊᑐᓕᕈᓐᓇᓂᕐᒧᑦ ᑭᐅᓂᖏᑦ ᐊᓯᔾᔨᐸᓪᓕᐊᔪᓄᑦ ᐃᓅᖃᑎᒌᓐᓂᕐᒧᑦ ᐊᒻᒪ ᓂᕈᐊᖅᑕᐅᓯᒪᔪᓄᑦ ᖃᓄᐃᓐᓂᕆᔭᖏᓐᓂ ᓯᕗᓪᓕᖅᐹᖏᓐᓂ ᑕᓪᓕᒪᓂᑦ ᐊᕐᕌᒍᓂ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ, ᓲᕐᓗ ᐋᓐᓂᐊᕐᓇᐅᑎᓪᓗᒍ, ᐱᓪᓗᐊᑕᐅᓚᐅᖅᑐᑦ ᐊᐅᓚᓂᖃᑦᑎᕐᓂᖓᓄᑦ, ᑲᔪᓯᑎᑕᐅᔪᑦ ᐊᑐᓕᕈᓐᓇᓂᕐᒧᑦ ᐱᑕᖃᕆᐊᖃᓂᐊᖅᑐᑦ ᓂᕈᐊᖅᑕᐅᕙᑦᑐᑦ ᐊᒻᒪ ᑮᓇᐅᔭᓕᕆᓂᕐᒧᑦ ᖃᓄᐃᓐᓂᕆᔭᖏᓐᓂ ᐊᓯᔾᔨᑎᓪᓗᒋᑦ.

ᓇᓗᓇᐃᒃᑯᑎ

ᐆᑦᑐᕋᐅᑦ ᐱᔾᔪᑎᖃᑦᑎᐊᓚᐅᖅᑐᖅ, ᐱᓕᕆᐊᖃᕐᓂᓴᐅᓪᓗᓂ ᐃᓄᓐᓂᑦ ᖃᐅᔨᒪᓂᖃᑦᑎᐊᖅᑐᓂᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᕙᓪᓕᐊᓂᖏᓐᓂ ᐊᒻᒪ ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᓐᓂᖏᑦ, ᐊᒻᒪ ᓈᒻᒪᒋᔭᐅᓚᐅᖅᑐᖅ ᑭᒡᒐᖅᑐᐃᓗᑎ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓂᑦ, ᐱᖃᓯᐅᑎᓪᓗᑎ ᐊᑕᖏᖅᑐᒋ ᐃᓄᐃᑦ ᐱᓕᕆᖃᑎᖏᑦ ᐊᒻᒪ ᐊᔾᔨᒌᖏᑦᑐᑦ ᐊᔾᔨᒌᖏᑦᑐᓃᖔᖅᑐᑦ 23 ᒐᕙᒪᑐᖃᒃᑯᑦ ᐱᓕᕆᕕᖏᓐᓂ ᐃᓚᒋᔭᐅᔪᓂᑦ.

ᐆᑦᑐᕋᐅᑦ ᐱᖃᓯᐅᔾᔨᓚᐅᖅᑐᖅ 70 ᐃᓄᓐᓂᑦ:

• ᐃᓄᐃᑦ ᓯᕗᓕᖅᑏᑦ (8)
• ᒐᕙᒪᑐᖃᒃᑯᓐᓄᑦ ᓯᕗᓕᖅᑏᑦ (5)
• ᐃᓄᐃᑦ ᐱᓕᕆᔩᑦ (25)
• ᒐᕙᒪᑐᖃᒃᑯᓐᓄᑦ ᐱᓕᕆᔩᑦ (25)
• ᐊᓯᖏᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᓐᓂᑦ ᖃᐅᔨᒪᓂᐅᔪᓂᑦ ᑎᒍᒥᐊᖅᑎᐅᔪᑦ (7)

ᐅᑯᓇᓂ 70 ᐊᐱᖅᓱᖅᑕᐅᔪᓐᓇᖅᑐᓂᑦ ᓂᕈᐊᖅᑕᐅᔪᓂᑦ, 66 ᐃᓚᒋᔭᐅᖃᑕᐅᓚᐅᖅᑐᑦ ᐊᐱᖅᓱᓂᕐᒥᑦ.

ᖃᐅᔨᓴᕐᓂᖅ

ᖃᐅᔨᓴᕐᓗᒋᑦ ᐊᐱᖅᓱᓂᕐᒧᑦ ᖃᓄᐃᓐᓂᕆᔭᖏᑦ, ᖃᐅᔨᓴᐃᔩᑦ ᐋᖅᑭᔅᓱᓚᐅᖅᑕᖏᑦ ᑭᐅᔪᓄᑦ ᑭᐅᔾᔪᑎᖏᑦ ᖃᐅᔨᓴᐃᓂᒃᑯᑦ ᐅᖃᐅᓯᐅᔪᓂᑦ ᐊᒻᒪ ᓇᓗᓇᐃᔭᖅᑐᒋᑦ ᐃᓱᒪᒋᔭᐅᓪᓗᐊᑕᖅᑐᑦ ᑭᐅᔪᓄᑦ ᑎᒥᐅᔪᒧᑦ.

ᖃᐅᔨᓴᐃᔩᑦ ᐊᑐᓚᐅᖅᑐᑦ ᐱᖓᓱᓂᑦ ᐊᔾᔨᒌᖏᑦᑐᓂ ᖃᐅᔨᓴᐃᓂᕐᒥᑦ ᖃᐅᔨᒋᐊᖅᑐᒋᑦ ᑐᓐᖓᕕᒋᔭᔅᓴᐅᓂᖏᓐᓄᑦ ᑐᑭᓯᒋᐊᕈᑏᑦ ᓄᐊᑕᐅᔪᑦ. ᑖᓐᓇ ᐱᖃᓯᐅᔾᔨᓚᐅᖅᑐᖅ ᐃᓱᒪᒋᔭᐅᔪᑦ ᑐᓂᔭᐅᓚᐅᕐᒪᖔᑕ ᐃᓚᒋᔭᐅᖃᑕᐅᔪᓄᑦ ᐊᒥᓱᒐᓚᓐᓂᑦ ᑭᐅᔪᓂᑦ ᑎᒥᐅᔪᓂᑦ ᐊᒻᒪ ᐊᔾᔨᒌᓐᓂᖃᕐᒪᖔᑕ ᖃᐅᔨᔭᐅᓯᒪᔪᓂᑦ ᐱᓕᕆᐊᒥᑦ ᑎᑎᕋᖅᑕᐅᓯᒪᔪᓂᑦ, ᐃᓕᓐᓂᐊᕐᓂᓕᕆᓂᕐᒧᑦ ᖃᐅᔨᓴᓂᕐᒧᑦ, ᐊᒻᒪ ᖃᐅᔨᓴᐃᔩᑦ ᖃᐅᔨᔭᖏᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᑲᑎᒪᓂᖏᓐᓄᑦ.

ᖃᐅᔨᓴᐃᔩᑦ ᐊᑐᓚᐅᕐᒥᔪᑦ ᐱᖓᓱᓂᑦ ᐊᔾᔨᒌᖏᑦᑐᓂ ᖃᐅᔨᓴᐃᓂᕐᒥᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐅᑭᐅᑕᖅᑐᓕᕆᓂᕐᒧᓪᓗ ᑲᓇᑕᒥ ᓯᕗᓕᖅᑎᐅᖃᑕᐅᔪᑦ ᐊᒻᒪ ᓯᓚᑖᓃᖔᖅᑐᖅ ᖃᐅᔨᓴᐃᓂᕐᒧᑦ ᐅᖃᐅᔾᔨᒋᐊᖅᑎ ᕿᒥᕐᕈᔭᐅᓪᓗᑎ ᑎᑎᕋᖅᑕᐅᓯᒪᔪᑦ ᐊᐱᖅᓱᕐᓂᓕᒫᖑᔪᓂᑦ, ᕿᒥᕐᕈᔭᐅᓪᓗᑎ ᓇᓗᓇᐃᔭᖅᓯᒪᓂᖏᑦ ᐅᓂᒃᑳᓂᑦ, ᐊᔾᔨᒌᓐᖑᐊᑎᑦᑐᒋᑦ ᖃᐅᔨᓴᐅᓂᕐᒧᑦ.

ᑐᓴᖅᑎᑦᑎᓂᖅ

ᖃᐅᔨᓴᐃᓂᕐᒧᑦ ᐅᓂᒃᑳᑦ ᓇᓗᓇᐃᔭᐃᔪᑦ ᓴᖅᑭᖃᑦᑕᕐᓂᖏᓐᓄᑦ ᐃᓱᒪᒋᔭᐅᔪᓂᑦ ᐊᑐᖅᑐᑎᑦ ᐅᖃᐅᓯᕐᓂᑦ ᓲᕐᓗ "ᐊᒥᓲᓂᖅᓴᐃᑦ," "ᐊᒥᓱᒐᓚᐃᑦ," ᐊᒻᒪ "ᐊᒥᓲᖏᑦᑐᑦ,"ᐱᑎᒪᓪᓗᒋᑦ ᐱᐅᓂᖏᓐᓅᖓᔪᑦ ᐊᐱᖅᓱᓂᕐᒧᑦ ᐆᑦᑐᕋᐅᑦ. ᑖᒃᑯᐊ ᐅᖃᐅᓰᑦ ᐊᑐᖅᑕᐅᓚᐅᖅᑐᑦ ᐅᓂᒃᑳᓂᑦ ᐃᒪᐃᓕᖓᓪᓗᑎ:

• ᐊᒥᓱᑦ – ᐅᖓᑖᓂ 90%
• ᐊᒥᓲᓂᖅᓴᐃᑦ ᐅᕝᕙᓘᓐᓃᑦ ᐊᒥᓲᓂᖅᓴᖏᑦ – 50-90%
• ᐊᒥᓱᑦ – 30-50%
• ᐊᒥᓱᒐᓚᐃᑦ – 10-30%
• ᐊᒥᓲᖏᑦᑐᑦ – ᑐᖔᓃᑦᑐᑦ 10%

ᐃᓚᖏᓐᓂ ᖃᓄᐃᓐᓂᐅᔪᓂᑦ, ᑭᐅᔪᓕᒫᑦ ᑐᑭᖃᖅᑎᑎᓪᓗᑎ ᓇᓗᓇᐃᔭᐃᓯᒪᓂᖃᖅᑎᑦᑎᓚᐅᖅᑐᑦ ᑕᑯᓐᓇᖅᑕᐅᒐᔪᑦᑐᒥᑦ, ᓲᕐᓗ ᐱᔾᔪᑎᖃᖅᑐᓄᑦ ᐊᑦᑐᐊᓂᖃᕐᓂᖏᓐᓄᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᔭᕆᐊᓕᖏᓐᓄᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ ᑲᑐᔾᔨᖃᑎᒌᖏᓐᓂᑦ. ᑖᒃᑯᓂᖓ ᖃᓄᐃᓐᓂᐅᔪᓂᑦ, ᖃᐅᔨᓴᐃᔩᑦ ᐊᑐᓚᐅᖅᑐᑦ ᐅᖃᐅᓯᕐᒥᑦ "ᐊᑕᖏᖅᑐ" ᓇᓗᓇᐃᔭᐃᓪᓗᑎ ᓴᖅᑭᖃᑦᑕᕐᓂᖏᓐᓄᑦ ᐃᓱᒪᒋᔭᐅᔪᓂᑦ.

ᐱᒋᐊᕐᖓᕐᓂᖓ

[Iᓇᓗᓇᐃᕐᓗᒍ ᑭᓇᐅᓂᕆᔭᐃᑦ ᐃᓚᒋᔭᐅᓪᓗᑎ ᑲᑐᑎᔪᓂᑦ ᖃᐅᔨᓴᐃᔩᑦ.]

ᖄᖏᖅᓯᒪᓕᖅᑎᓪᓗᒋᑦ ᑕᓪᓕᒪᑦ ᐊᕐᕌᒍᐃᑦ ᐊᑐᓕᖅᑎᑕᐅᓂᖓᓄᑦ, ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓯᕗᓕᖅᑏᑦ ᐃᖅᑲᓇᐃᔮᖏᓐᓂᑦ ᑲᑎᑦᑎᕆᒍᒪᔪᑦ, ᑲᑎᖅᓱᐃᓗᑎ ᐃᓕᑦᑕᐅᓯᒪᔪᓂᑦ ᐊᑐᖃᑦᑕᖅᓯᒪᔭᖏᓐᓂ, ᐊᒻᒪ ᐸᕐᓇᓪᓗᑎ ᑭᖑᓪᓕᕐᒧᑦ ᐱᓕᕆᐊᖑᓕᕐᓂᖓᓄᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ. ᐊᖏᖅᓯᒪᔪᑦ ᐱᓕᕆᐊᖃᕐᓗᑎ ᑲᑐᑎᔭᐅᔪᓂᑦ ᐃᓄᐃᑦ−ᒐᕙᒪᑐᖃᒃᑯᑦ ᑎᒥᐅᑉ ᐃᓗᐊᓂ ᖃᐅᔨᓴᐃᓂᕐᒧᑦ. ᐱᔾᔪᑎᒋᔭᖓ ᖃᐅᔨᓴᐃᓂᕐᒧᑦ ᓇᓗᓇᐃᕐᓗᒋᑦ ᑭᓱᑦ ᐱᔪᓐᓇᕐᒪᖔᑕ ᐊᒻᒪ ᕿᓱᑦ ᐱᐅᓯᑎᒋᐊᖅᑕᐅᔪᓐᓇᕐᒪᖔᑕ ᓴᓐᖓᖅᑎᒋᐊᕈᓐᓇᓂᐊᕐᓗᒋᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᕙᓪᓕᐊᓂᖏᑦ.

ᓇᓗᓇᐃᖅᑕᐅᓯᒪᔪᑎᑦ ᐊᐱᖅᓱᖅᑕᐅᓂᕐᒧᑦ ᐃᕝᕕᑦ ᐃᓚᒋᔭᐅᖃᑕᐅᓂᖓᓄᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓄᑦ ᐊᒻᒪ ᖁᔭᓐᓇᒦᖅᑐᒍᑦ ᐊᖏᕈᓐᓇᕋᕕᑦ ᐊᐱᖅᓱᖅᑕᐅᓂᕐᒧᑦ. ᐊᐱᖅᓱᕐᓂᐅᔪᖅ ᐊᑯᓂᐅᓂᖃᓂᐊᖅᑐᖅ ᐃᑲᕐᕋᐅᑉ ᑐᖔᓂ ᐊᒻᒪ ᓄᖅᑲᖅᑎᒍᓐᓇᖅᑕᐃᑦ ᐊᐱᖅᓱᕐᓂᐅᔪᖅ ᖃᖓᑐᐃᓐᓇᒃᑯᑦ.

ᓂᐱᓕᐅᕆᖏᑦᑐᒍᑦ ᐊᐱᓱᕐᓂᐅᔪᒥᑦ. ᑲᑐᑎᔪᑦ ᖃᐅᔨᓴᐃᔩᑦ ᐃᒪᐃᓐᓂᐊᕐᑐᑦ, ᑭᓯᐊᓂᓕ, ᑎᑎᕋᖅᓯᓂᐊᖅᑐᑦ ᑭᓯᐊᓂ ᐃᕝᕕᑦ ᐅᖃᐅᓯᔅᓴᓐᓂ ᐊᒻᒪ ᐃᓱᒪᒋᔭᖏᓐᓂ ᐊᓯᐊᓅᔾᔮᖏᑦᑐᑦ ᐊᒻᒪ ᑐᓂᔭᐅᔾᔮᖏᑦᑐᑦ ᑎᑎᕋᖅᓯᒪᔭᖏᑦ ᓯᓚᑖᓄ ᖃᐅᔨᓴᐃᔨᓂᑦ. ᑭᓇᐅᓂᕆᔭᐃᑦ ᓇᓗᓇᐃᔾᔮᖏᑕᕗᑦ ᐅᕝᕙᓘᓐᓃᑦ ᐊᓯᖏᓐᓂ ᐃᓄᓄᓐᓂ ᓇᑭᓐᖔᕐᕕᒋᓗᒍ ᑕᑯᓐᓇᖅᑕᐅᔪᓂᑦ ᓇᓗᓇᐃᖅᑕᐅᓯᒪᔪᑦ ᐊᓯᖏᓐᓂ ᐃᓚᖏᓐᓂ ᖃᐅᔨᓴᐃᓂᕐᒥᑦ, ᐱᖃᓯᐅᑎᓪᓗᑎ ᖃᐅᔨᓴᐃᓂᕐᒧᑦ ᐅᓂᒃᑳᑦ.

ᑭᒃᑯᑐᐃᓐᓇᐃᑦ ᑐᐊᕕᖏᓪᓗᑎ ᐅᕙᑦᑎᓐᓄᑦ ᐅᖃᓪᓚᖁᔭᕗᑦ ᖃᓄᑐᐃᓐᓇᖅ ᐅᖃᕈᓐᓇᕐᓗᑎ ᐊᒻᒪ ᓱᓕᔪᓂᑦ. ᐊᐱᖅᑯᑎᑕᖃᕈᓂ ᐃᕝᕕᑦ ᑭᐅᔪᓐᓇᖏᑕᖓᓂᑦ ᐅᕝᕙᓘᓐᓃᑦ ᑭᐅᔪᒪᖏᑕᕐᓂᑦ, ᖃᐅᔨᑎᓐᓂᐊᖃᓐᖓ ᐊᒻᒪ ᐊᓯᐊᓅᕐᓂᐊᖅᑐᖓ ᐊᐱᖅᑯᑎᒧᑦ. ᑲᔪᓯᒍᓐᓇᖅᑭᑖ ᐊᐱᖅᓱᕐᓂᐅᔪᒥᑦ ᑖᓐᓇ ᑐᓐᖓᕕᒋᓗᒍ?

1. ᐱᒋᐊᕐᓂᕆᓗᒍ, ᐅᖃᑎᓐᖓ ᓇᐃᑦᑐᒥᑦ ᐃᕝᕕᑦ ᐃᓚᒋᔭᐅᖃᑕᐅᓂᖓᓄᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓄᑦ ᐅᓪᓗᒥᒧᑦ ᑎᑭᑦᑐᒍ.

ᐊᑦᑐᐊᓂᖃᕐᓂᖓ

2. ᑭᓲᕙ ᑐᑭᓯᐅᒪᓂᕆᔭᐃᑦ ᐱᔭᕆᐊᖃᖅᑕᖓᓂ ᐅᕝᕙᓘᓐᓃᑦ ᐱᔭᕆᐊᖃᖅᑕᖏᓐᓂ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᓕᕆᐊᖃᖅᓯᒪᕙᑦ ᓴᖅᑭᖅᑎᑕᐅᓚᐅᖅᓯᒪᔪᒻᒪᓂᑦ ᑕᓪᓕᒪᑦ ᐊᕐᕌᒍᓯᒪᓕᖅᑐᓂᑦ?
3. ᑖᒃᑯᐊ ᐱᔭᐅᔭᕆᐊᓖᑦ ᓱᓕ ᐊᑦᑐᐊᓂᖃᖅᑳᑦ?
4. ᐱᔭᐅᔭᕆᐊᓖᑦ ᐊᓯᔾᔨᖅᓯᒪᕚᑦ ᖃᓄᑐᐃᓐᓇᖅ, ᐊᒻᒪ ᑕᐃᒪᐃᒃᑯᓂ, ᖃᓄᖅ?

ᐊᔾᔨᒌᓐᓂᖃᕐᓂᖏᑦ

5. ᐃᑲᔪᓐᖓ ᑐᑭᓯᑦᑎᐊᓂᓴᕆᓗᒍ ᓯᐊᒻᒪᖅᓯᒪᓂᖅᓴᓂᑦ ᓇᓗᓇᐃᔭᖅᓯᒪᔪᓂᑦ ᐃᓗᐊᓂ ᑖᒃᑯᐊ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐅᓚᓂᕆᔭᖏᓐᓂ. ᖃᐅᔨᒪᔪᒍᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓴᖅᑭᖅᑎᑕᐅᓚᐅᖅᓯᒪᔪᖅ ᓯᕗᒧᑦᑎᑦᑎᒋᐊᓂᕐᒧᑦ ᐱᓕᕆᖃᑎᒋᓐᓂᖏᓐᓄᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ ᐊᒻᒪ ᓯᕗᒧᑦᑎᒋᐊᕐᓗᒋᑦ ᖃᓄᐃᓕᓯᒋᐊᓂᕐᒧᑦ ᓯᕗᓪᓕᐅᔾᔭᐅᔭᕆᐊᓕᓐᓄᑦ ᓇᒦᓐᓂᖏᓐᓄᑦ. ᐊᓯᖏᓐᓂ ᑎᒥᐅᔪᓂᑦ ᐅᖃᖃᑎᒌᓐᓂᖃᖅᑐᓂᑦ ᐊᐅᓚᓂᖅᑕᖃᖅᑳ ᐃᕝᕕᑦ ᖃᐅᔨᒪᔭᖓᓂ ᑖᒃᑯᐊ ᐃᓄᐃᑦ ᐊᒻᒪ ᒐᕙᒪᒃᑯᑦ ᐱᓕᕆᖃᑦᑕᖅᑐᑦ ᐱᓕᕆᖃᑎᒌᑦᑐᑎ ᐱᔾᔪᑕᐅᔪᓂᑦ ᐊᖏᕈᑕᐅᓯᒪᔪᓂᑦ ᐃᓱᒫᓘᑕᐅᔪᓂᑦ? [ᑕᕝᕙᑦᑕᐅᑎᒋ ᑕᐃᒪᐃᒋᐊᖃᕈᓂ: ᓄᓇᑖᓂᕐᒧᑦ ᐋᔩᖃᑎᒌᓐᓂᐅᔪᑦ, ᐱᓕᕆᖃᑦᑕᐅᑎᓂᖏᑦ ᑲᓇᑕᒥ ᐊᕕᑦᑐᖅᓯᒪᔪᓂᑦ/ᐅᑭᐅᑕᖅᑐᒥ ᐊᕕᑦᑐᖅᓯᒪᔪᓂᑦ ᑎᒥᐅᔪᓂᑦ, ᐃᒻᒥᒃᑰᕈᓐᓇᖅᓯᓂᕐᒧᑦ ᐋᔩᖃᑎᒌᓐᓂᐅᔪᑦ?]
6. ᑖᓐᓇ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐊᔾᔨᒌᓐᓂᖃᖅᑳ ᑖᒃᑯᓂᖓ – ᐊᔾᔨᒌᓐᓂᖃᖅᑳᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᓄᑦ?
7. ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᖏᑦ ᐃᓚᓯᓂᖃᖅᑎᑦᑎᕚᒃᑦ ᐱᒻᒪᕆᒋᔭᐅᓂᖏᓐᓄᑦ ᐊᒻᒪ/ᐅᕝᕙᓘᓐᓃᑦ ᐅᑎᒧᑦ ᐃᓪᓗᐊᓄᖔᖅ?
8. ᖄᖓᒎᖃᑦᑕᐅᑎᔪᖃᖅᑳ ᐅᕝᕙᓘᓐᓃᑦ ᐊᔾᔨᒌᓂᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐊᒻᒪ ᑖᒃᑯᓂᖓ ᐊᓯᖏᓐᓄᑦ ᐱᕙᓪᓕᐊᓂᐅᔪᓄᑦ?
9. ᐃᕝᕕᑦ ᐃᓱᒪᒋᔭᖓᓂ, ᖃᓄᑎᒋᒧᑦ ᐅᖓᓯᓐᓂᖃᖅᑐᒧᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᒪᓕᓐᓂᖃᖅᑲᑦ ᒐᕙᒪᑐᖃᒃᑯᑦ ᐊᑐᐊᒐᖏᓐᓄᑦ ᐊᑦᑐᐊᓂᓕᓐᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖏᓐᓄᑦ, ᐃᓄᓐᓄᑦ ᐊᑐᐊᒐᐃᑦ ᐃᓂᒋᓕᖅᑕᖏᓐᓂ ᐊᒻᒪ ᓯᓚᕐᔪᐊᒥ ᐋᖅᑭᒍᑎᐅᔪᑦ, ᓲᕐᓗ ᓯᓚᕐᔪᐊᕐᒥᐅᓕᒫᓄᑦ ᓇᓗᓇᐃᖅᑕᐅᓂᖏᑦ ᐱᔪᓐᓇᐅᑎᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ (UNDRIP)?

ᐊᑐᑦᑎᐊᕐᓂᖓ

10. ᐃᕝᕕᑦ ᑕᑯᓐᓇᖅᑕᖓᓂᑦ, Iᖃᓄᑎᒋᒧᑦ ᐅᖓᓯᓐᓂᖃᖅᑐᒧᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᕙᓪᓕᐊᓂᖃᖅᓯᒪᕙᑦ ᓇᓗᓇᐃᖅᑕᐅᓂᖏᓐᓄᑦ ᑲᑐᑎᔭᐅᔪᑦ ᓯᕗᓪᓕᐅᔾᔭᐅᔭᕆᐊᓖᑦ ᓇᒦᓐᓂᖏᓐᓄᑦ ᖃᓄᐃᓕᓯᒋᐊᓂᕐᒧᑦ?
11. ᐊᒻᒪᓗᑦᑕᐅᖅ ᐱᕙᓪᓕᐊᓂᖓᓄᑦ ᓴᖅᑭᑎᑦᑎᓂᕐᒧᑦ ᐃᖅᑲᓇᐃᔮᖑᓂᐊᖅᑐᓂᑦ ᐸᕐᓇᐅᑎᓂᑦ ᑖᒃᑯᓂᖓ ᑲᑐᑎᔭᐅᔪᓂᑦ ᓯᕗᓪᓕᐅᔾᔭᐅᔭᕆᐊᓖᑦ ᓇᒦᓐᓂᖏᑦ?
12. ᐃᓛᓪᓕᑭᐊᖅ ᐱᕙᓪᓕᐊᓂᖓ ᓴᖅᑭᑎᑦᑎᓂᕐᒧᑦ ᑐᓂᖓᕕᐅᔪᓐᓇᓂᕐᒧᑦ ᓴᖅᑭᑎᑦᑎᓗᑎ ᐊᒥᓱᓂᑦ ᖃᐅᔨᓴᖅᑕᐅᓯᒪᔪᓂᑦ ᖃᐅᔨᓴᕈᑎᒋᓗᒍ ᑲᔪᓯᑦᑎᐊᕐᓂᖓᓄᑦ?
13. ᐃᓛᓪᓕᑭᐊᖅ ᐱᕙᓪᓕᐊᓂᖏᓐᓄᑦ ᑐᓴᖅᑎᑦᑎᓂᕐᒧᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓯᓚᑖᓃᑦᑐᓄᑦ ᐱᓕᕆᖃᑎᖏᓐᓄᑦ ᐊᒻᒪ ᐃᓄᓐᓄᑦ, ᐱᖃᓯᐅᑎᓪᓗᑎ ᐃᓄᐃᑦ ᐊᒻᒪ ᐊᓯᖏᑦ ᑲᓇᑕᒥᐅᑕᐃᑦ – ᑕᒪᓐᓇ ᖃᓄᖅ ᐃᖏᕋᓂᖃᓕᖅᑲ?
14. ᐃᕝᕕᑦ ᐃᓱᒪᒋᔭᖓᓂ, ᖃᓄᑎᒋ ᑲᔪᓯᑦᑎᐊᖅᓯᒪᓂᖃᖅᑲᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓯᕗᒧᒋᐊᖅᑎᑦᑎᓂᕐᒧᑦ ᐱᓕᕆᖃᑎᒌᓐᓂᖏᑦ ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ, ᐱᖃᓯᐅᑎᓪᓗᑎ ᐃᓕᓴᕆᔭᐅᓂᖏᑦ ᐊᒻᒪ ᓯᕗᒧᒋᐊᖅᑎᑦᑎᓂᕐᒧᑦ ᐃᓄᐃᑦ ᐱᔪᓐᓇᐅᑎᖏᓐᓂ? ᖃᓄᐃᑦᑑᓚᐅᖅᑲ ᐱᓕᕆᖃᑦᑕᐅᑎᓂᖏᑦ ᓯᕗᓂᐊᒍᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐊᒻᒪ ᖃᓄᖅ ᐊᓯᔾᔨᖅᓯᒪᕙ, ᐊᓯᔾᔨᖅᓯᒪᓂ?
15. ᖃᓄᑎᒋᒧᑦ ᐅᖓᓯᓐᓂᖃᖅᑐᒧᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᕙᓪᓕᐊᓂᖃᖅᓯᒪᕙᑦ ᓯᕗᒧᒋᐊᖅᑎᑦᑎᓂᕐᒧᑦ ᖃᓄᐃᓕᓯᒋᐊᓂᕐᒧᑦ ᓯᕗᓪᓕᐅᔾᔭᐅᔭᕆᐊᓖᑦ ᓇᒦᓐᓂᖏᓐᓄᑦ? ᓇᓪᓕᐊ ᓯᕗᓪᓕᐅᔾᔭᐅᔭᕆᐊᓖᑦ ᓇᒦᓐᓂᖏᑦ ᐃᕝᕕᑦ ᐃᓱᒪᒋᔭᖓᓂ ᓯᕗᒧᓗᐊᖅᓯᒪᓛᖑᕙᑦ? ᓇᓪᓕᐊ ᓯᕗᒧᑦᑎᐊᖅᓯᒪᖏᓚᑦ? [ᓇᓗᓇᐃᕈᑦ ᐃᓚᖏᑦ ᐊᐱᖅᓱᖅᑕᐅᔪᑦ ᐅᖃᐅᓯᔅᓴᖃᑐᐃᓐᓇᕈᓐᓇᖅᑐᑦ ᓯᕗᓪᓕᐅᔾᔭᐅᔭᕆᐊᓖᑦ ᓇᒦᓐᓂᖏᓐᓄ ᐃᓚᒋᔭᐅᕕᒋᓯᒪᔭᖏᓐᓂ. ᑕᐃᒪᐃᒃᑯᓂ, ᐊᐱᕆᓗᒋᑦ ᑕᑯᓐᓇᖅᑕᖏᑦ ᖃᓄᑎᒋ ᖃᓄᐃᓕᓯᒋᐊᕈᑏᑦ ᓯᕗᒧᒋᐊᑦᑎᐊᖅᓯᒪᕙ ᑖᔅᓱᒧᖓ ᓇᒦᓐᓂᖓᓄᑦ]
16. ᓱᒻᒪᑦ ᐃᓱᒪᒋᕕᐅᒃ ᖃᓄᐃᓕᓯᒋᐊᕐᓂᐅᔪᑦ ᐃᓚᖏᓐᓂ ᓯᕗᓪᓕᐅᔾᔭᐅᔭᕆᐊᓖᑦ ᓇᒦᓐᓂᖏᓐᓄᑦ ᑲᔪᓯᑦᑎᐊᓂᖅᓴᐅᓯᒪᕙᑦ ᓴᓂᐊᓂ ᐊᓯᖏᓐᓂ?
17. ᖃᐅᔨᒋᐊᒃᑲᓂᕐᕕᒋᓚᕗᑦ ᓇᓗᓇᐃᔭᖅᓯᒪᔪᓂᑦ. ᑐᓴᕈᒪᔭᒃᑲ ᐃᔾᕕᑦ ᑕᑯᓐᓇᖅᑕᖏᓐᓂ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓴᓐᖏᓂᖏᑦ ᐊᒻᒪ ᓴᓐᖐᓐᓂᖏᑦ ᐊᑦᑐᐊᒥᓂᓕᓐᓄᑦ ᐸᕐᓇᐃᓂᕐᒧᑦ, ᐊᐅᓚᓂᖏᓐᓄᑦ, ᐊᐅᓚᑕᐅᓂᖓᓄᑦ ᐊᒻᒪ ᑐᓴᖅᑎᑦᑎᓂᕐᒧᑦ? ᐱᒋᐊᖅᑳᕐᓗᑕ ᓴᓐᖏᓂᖏᓐᓂ, ᐱᒋᐊᕐᕕᒋᓗᒍ ᐸᕐᓇᐃᓂᕐᒧᑦ ᐊᒻᒪ ᑭᖑᓪᓕᖅ ᐊᐅᓚᓂᖏᓐᓅᓕᕐᓗᑕ, ᐊᐅᓚᑕᐅᓂᖓ ᐊᒻᒪ ᑐᓴᖅᑎᑦᑎᓂᕐᒧᑦ. ᓇᓗᓇᐃᕈᓐᓇᖅᑭᒌᑦ ᖃᓄᐃᑦᑐᑐᐃᓐᓇᐃᑦ ᓴᓐᖐᓐᓂᖏᑦ ᐅᕝᕙᓘᓐᓃᑦ ᐱᑕᖃᑦᑎᐊᖏᑦᑐᑦ ᐸᕐᓇᐃᓂᕐᒥᑦ, ᐊᐅᓚᓂᖏᓐᓄᑦ, ᐊᐅᓚᑦᑎᓂᕐᒧᑦ ᐊᒻᒪ ᑐᓴᖅᑎᑦᑎᓂᕐᒧᑦ? ᑭᓲᕙ ᐃᓱᒪᒋᖄᑎᖅᐹᕆᔭᐃᑦ?
18. ᐊᓯᖏᓐᓂ ᐊᔅᓱᕈᕈᑎᑕᖃᖅᑳ ᐅᕝᕙᓘᓐᓃᑦ ᐱᕈᕐᕕᔅᓴᐅᔪᓐᓇᖅᑐᓂᑦ ᐃᓕᓐᓄᑦ ᐊᒻᒪ/ᐅᕝᕙᓘᓐᓃᑦ ᐃᕝᕕᑦ ᑲᑐᔾᔨᖃᑎᒌᖓᓄᑦ ᓵᓐᖓᔭᖏᓐᓂ, ᐆᑦᑑᑎᒋᓗᒍ ᐊᑦᑐᐊᓂᓕᓐᓄᑦ ᐋᖅᑭᑦᑕᐅᓂᖏᓐᓄᑦ ᓯᕗᓪᓕᐅᔾᔭᐅᔭᕆᐊᓕᓐᓂᑦ, ᓴᖅᑭᑎᑦᑎᓂᕐᒥᑦ ᐊᒻᒪ ᐊᑐᓕᖅᑎᑦᑎᓂᕐᒥᑦ ᐃᖅᑲᓇᐃᔮᖑᓂᐊᖅᑐᓂᑦ ᐸᕐᓇᐅᑏᑦ, ᒪᓕᓐᓂᖃᖅᑐᑎᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐊᑐᐊᒐᖏᑦ, ᑐᓴᐅᒪᑎᑦᑎᓗᑎ ᑎᒥᐅᑉ ᐃᓗᐊᓂ ᐊᒻᒪ ᓯᓚᑖᓂ, ᐊᒻᒪ ᐱᓕᕆᐊᖃᕐᓂᖅ ᑲᑐᔾᔨᖃᑎᒌᒨᖓᔪᓂᑦ, ᐱᖅᑯᓯᓄᑦ ᐊᒻᒪ ᒐᕙᒪᖃᕐᕕᐅᔪᓄᑦ ᐊᒥᓱᑦ ᓇᓗᓇᖅᑐᑦ? ᑭᓱᒥᑦ ᐃᓱᒪᒋᔭᖃᖅᑭᑦ? [ᐊᑐᒃᑲᓂᕐᓗᒋᑦ ᑎᑎᕋᖅᓯᒪᔪᑦ ᐆᑦᑐᕋᐅᑎᓂᑦ ᑕᐃᒪᐃᒋᐊᖃᕈᓂ]
19. ᖃᓄᐃᑦᑐᑦ ᐊᓯᔾᔨᖅᑐᑦ, ᐱᑕᖃᕈᓂ, ᐱᑕᖃᕆᐊᖃᖅᑐᒋᕕᑦ ᓴᓐᖓᑦᑎᒋᐊᕐᓗᒍ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᕙᓪᓕᐊᓂᖏᑦ?

ᐊᖑᑕᐅᓂᖓ ᐊᕐᓇᐅᓂᖓ

20. ᖃᓄᖅ ᐃᓱᒪᒋᔭᖃᖅᑭᑦ ᐊᖏᓂᖓᓂ ᑖᒃᑯᐊ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᓚᓕᐅᔾᔨᓯᒪᔭᖏᑦ ᐊᕐᓇᐅᓂᖏᓐᓄᑦ ᐊᖑᑕᐅᓂᖏᓐᓄᑦ ᐃᓱᒪᒋᔭᐅᔪᓂᑦ ᐸᕐᓇᐃᓂᕐᒧᑦ, ᐊᐅᓚᑦᑎᓂᕐᒧᑦ, ᐊᒻᒪ ᑐᓴᖅᑎᑦᑎᓂᕐᒧᑦ? ᐃᑉᐱᒋᔭᐅᓂᖃᖅᓯᒪᕚᑦ ᐊᕐᓇᐅᓂᖏᓐᓄᑦ ᐊᖑᑕᐅᓂᖏᓐᓄᑦ ᐃᕝᕕᑦ ᖃᐅᔨᒪᔭᖓᓂᑦ? ᐊᕐᓇᐅᓂᖏᓐᓄᑦ ᐊᖑᑕᐅᓂᖏᓐᓄᑦ−ᑐᓐᖓᓂᖃᖅᑐᑦ ᐃᓚᖏᓪᓗ (GBA+) ᐅᖃᐅᓯᐅᓯᒪᕚ ᓇᓪᓕᐊᓐᓂᑐᐃᓐᓇᖅ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᑲᑎᒪᓂᖏᓐᓄᑦ?
21. ᖃᓄᐃᑦᑐᑦ ᐊᔅᓱᕈᕈᑕᐅᔪᑦ ᐅᕝᕙᓘᓐᓃᑦ ᐱᕈᕐᕕᔅᓴᐅᔪᓐᓇᖅᑐᑦ, ᐱᑕᖃᕈᓂ, ᐃᓄᐃᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᖃᑎᒌᑦᑐᑦ ᓵᓐᖓᑦᑎᕙᑦ ᐃᓚᓕᐅᔾᔭᐅᓂᖏᓐᓄᑦ ᐊᕐᓇᐅᓂᖏᓐᓄᑦ ᐊᖑᑕᐅᓂᖏᓐᓄᑦ ᐃᓱᒪᒋᔭᐅᓂᖏᓐᓄᑦ?

ᒪᑭᑕᑎᑕᔅᓴᐅᓂᖓ

22. ᐃᓕᓐᓂᑦ ᑐᓴᕈᒪᔪᖓ ᐃᕝᕕᑦ ᑕᑯᓐᓇᖅᑕᖏᓐᓂ ᒪᑭᒪᑎᑕᔅᓴᐅᓂᖓᓄᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ. ᐃᕝᕕᑦ ᐃᓱᒪᒋᔭᖓᓂ, ᖃᓄᐃᑦᑐᑦ ᐱᔾᔪᑎᖃᖅᑎᑦᑎᔪᑦ ᐃᑲᔪᐃᓂᖃᖅᑲᑦ ᐅᕝᕙᓘᓐᓃᑦ ᓄᖅᑲᖓᑎᑦᑎᕙᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓴᖅᑭᑎᑦᑎᓂᖏᓐᓄᑦ ᑲᔪᓰᓐᓇᖅᑐᓂᑦ ᐃᑲᔫᓯᐊᓂᑦ ᐊᑯᓂᐅᔪᒧᑦ ᐊᑦᑐᐊᓂᖃᖅᑐᓄᑦ ᑐᕌᒐᖏᓐᓄᑦ? ᓇᐃᓈᕐᓗᒍ, ᖃᓄᑎᒋ ᒪᑭᒪᑎᑕᔅᓴᐅᕙ? ᐊᒻᒪ ᓱᕐᒪᑦ?
23. ᖃᓄᐃᑦᑐᑦ ᖃᓄᐃᓕᓯᒋᐊᕈᑎᑦ, ᐱᑕᖃᕈᓂ, ᐱᔭᐅᔭᕆᐊᖃᖅᑲᑦ ᑖᒃᑯᐊ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓴᖅᑭᑎᑦᑎᔪᓐᓇᓂᐊᕐᒪᑕ ᐊᑯᓂᐅᓂᖃᖅᑐᓂᑦ ᐃᑲᔫᓯᐊᓂᑦ ᐊᑯᓂᐅᔪᒧᑦ?

ᐃᓕᑦᑕᐅᔪᑦ

24. ᐃᕝᕕᑦ ᐃᓚᒋᔭᐅᓂᖓᓄᑦ, ᑭᓱᓂᑦ ᐃᓕᔅᓯᒪᕕᑦ ᐱᔾᔪᑎᖃᖅᑐᓂᑦ ᐃᓄᐃᑦ−ᒐᕙᒪᑐᖃᒃᑯᑦ ᐱᓕᕆᖃᑎᒌᓐᓂᖏᓐᓄᑦ ᐊᒻᒪ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᕙᓪᓕᐊᓂᖓ? ᖃᓄᐃᑦᑐᑦ ᐃᓕᑦᑕᐅᓯᒪᔪᑦ ᐃᓱᒪᒋᕕᒋᑦ? ᖃᓄᐃᑦᑐᓂᑦ ᑐᑭᓯᐅᒪᓂᖃᖅᑭᑦ?
25. ᑭᖑᒧᑦ ᑕᑯᓪᓗᒋᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ, ᑭᓱᓂᑦ ᐊᔾᔨᒋᖏᑕᖏᓐᓂ ᖃᓄᐃᓘᕆᐊᖃᓚᐅᖅᑲᑦ ᐊᐅᓚᓂᖃᑦᑎᐊᓂᖅᓴᐅᖁᓪᓗᒍ? ᑭᓱᑦ ᐱᑕᖃᓚᐅᖏᓚᑦ? ᑭᓱᑦ ᐱᔭᐅᔭᕆᐊᖃᒃᑲᓐᓂᓚᐅᖅᖃᑦ. ᑭᓱᓂᑦ ᐱᔭᐅᔭᕆᐊᖃᖏᓂᖅᓴᐅᓚᐅᖅᑲᑦ, ᐊᒻᒪ ᓱᒻᒪᑦ? [ᑕᕝᕙᑦᑕᐅᑎᒋ ᑕᐃᒪᐃᒋᐊᖃᕈᓂ, ᐃᓕᑦᑕᐅᔪᓄᑦ ᐊᑦᑐᐊᓂᓕᓐᓄᑦ ᐱᔪᓐᓇᕐᓂᖏᓐᓄᑦ/ᐃᖅᑲᓇᐃᔮᖑᔭᕆᐊᓖᑦ, ᐊᐅᓚᓂᖏᓐᓅᖓᔪᑦ, ᐊᐅᓚᑕᐅᓂᖓ, ᑎᒥᐅᑉ ᐃᓗᐊᓂ ᐊᒻᒪ ᓯᓚᑖᓂ ᑐᓴᐅᒪᔾᔪᑎᓕᕆᓂᕐᒧᑦ, ᐱᖅᑯᓯᓄᑦ, ᐊᔾᔨᒋᑦᑎᑦᑎᓂᕐᒧᑦ.]

ᐊᓯᖏᑦ

26. ᒪᑐᓚᐅᖅᑎᓐᓇᑕ, ᐊᓯᖏᓐᓂ ᐅᖃᐅᓯᔅᓴᓂᑦ ᐅᖃᐅᓯᖃᕈᒪᕕᑦ?

ᖁᔭᓐᓇᒦᒃ ᐱᕕᖃᕈᓐᓇᕋᑖᕋᕕᑦ ᐅᖃᖃᑎᖃᖅᑐᑎᑦ ᐅᕙᑦᑎᓐᓂ. ᑭᐅᔭᓯ ᑐᑭᓯᒋᐊᕈᑎᓕᒫᓪᓗ ᑲᑎᖅᓱᖅᓯᒪᔭᕗᑦ ᐊᒻᒪ ᓴᖅᑭᑎᑦᑎᓗᑕ ᑎᑎᕋᖅᑕᐅᒋᐊᓐᖓᖅᓯᒪᔪᓂᑦ ᖃᐅᔨᓴᐃᓂᕐᒧᑦ ᐅᓂᒃᑳᓂᑦ ᐱᓕᕆᖃᑎᒋᓗᒋᑦ ᐃᓄᐃᓪᓗ ᑲᓇᑕᒥ ᒐᕙᒪᖔᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᖏᑦ ᖃᐅᔨᓴᖃᑦᑕᓂᕐᒧᑦ, ᖃᐅᔨᓴᐃᓂᕐᒧᑦ ᐊᒻᒪ ᐃᓕᓐᓂᐊᓂᕐᒧᑦ ᐱᓕᕆᔨᓄᑦ ᑎᒥᐅᔪᓄᑦ. ᐊᐱᖅᑯᑎᔅᓴᖃᕈᕕᑦ, ᐅᖃᓛᕕᒋᔪᓇᖅᑕᐃᑦ ᐅᕝᕙᓘᓐᓃᑦ ᖃᕋᓴᐅᔭᒃᑯᑦ ᐋᓐ ᔩᒡᓗ ᐅᕙᓂ ᐃᓄᐃᑦ ᑕᐱᕇᑦ ᑲᓇᑕᒥ ᐅᕝᕙᓘᓐᓃᑦ ᑕᐃᐋᓐ ᐱᐊᓕᖕᔅᓕ ᐅᕙᓂ ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐅᑭᐅᑕᖅᑐᓕᕆᓂᕐᒧᓪᓗ ᑲᓇᑕᒥ, ᑐᑭᒧᐊᖅᑎᐅᖃᑕᐅᔪᑦ ᖃᐅᔨᓴᐃᔩᑦ. [ᐱᑕᖃᖅᑎᑕᐅᓗᑎ ᑐᑭᓯᒋᐊᕐᕕᖏᑦ ᐱᔭᐅᔭᕆᐊᖃᕈᑎ.]

ᐱᓕᕆᖃᑎᖏᑦ

ᓇᑉᐸᖏᑦ ᑐᖔᓃᑦᑐᑦ (46%) ᑭᐅᔪᑦ ᐱᓕᕆᖃᑎᖃᖃᑦᑕᓚᐅᖅᑐᑦ ᐃᓄᐃᑦ ᐱᓕᕆᖃᑎᖏᓐᓂ (ᐃᓄᐃᑦ ᑕᐱᕇᑦ ᑲᓇᑕᒥ, ᐃᓄᐃᑦ ᓄᓇᑖᓂᕐᒧᑦ ᑲᑐᔾᔨᖃᑎᒌᖑᓪᓗᑎ, ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ, ᐅᕝᕙᓘᓐᓃᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ−ᑲᓇᑕ). ᐅᖓᑖᓃᕌᔾᔪᑦᑐᑦ ᓇᑉᐸᖓᓂ (53%) ᐱᓕᕆᖃᑎᖃᓚᐅᖅᑐᑦ ᒐᕙᒪᑐᖃᒃᑯᑦ ᐱᓕᕆᖃᑎᖏᓐᓄᑦ.

ᓇᓗᓇᐃᖅᑕᐅᓂᖏᑦ

ᒪᕐᕉᒃ ᐱᖓᓱᓂᑦ (66%) ᑭᐅᔪᑦ ᓇᓗᓇᐃᓚᐅᖅᑐᑦ ᓄᓇᖃᖅᑳᖅᓯᒪᔫᓐᓇᑎ, 20% ᐃᓄᒃ (ᐃᓄᒃ ᐅᕝᕙᓘᓐᓃᑦ ᐃᓅᕕᐊᓗᒃ), 10% ᐊᓯᒋᓪᓗᓂᖏᑦ ᓄᓇᖃᖅᑳᖅᓯᒪᔪᑦ, ᐊᒻᒪ 4% ᐅᖃᕈᒪᓚᐅᖏᑦᑐᑦ.

ᐊᖑᑕᐅᓂᖓ ᐊᕐᓇᐅᓂᖓ

ᐊᒥᓲᓂᖅᓴᐃᑦ (60%) ᑭᐅᔪᑦ ᓇᓗᓇᐃᓚᐅᖅᑐᑦ ᐊᕐᓇᐅᓪᓗᑎ, ᐊᑕᐅᓯᖅ ᐱᖓᓱᓂᑦ (33%) ᐊᖑᑕᐅᓪᓗᑎ, ᐊᑕᐅᓯᖅ ᐃᒻᒥᓂᒃ ᓇᓗᓇᐃᓚᐅᖅᑐᖅ ᒪᕐᕉᓐᓂ ᑕᕐᓂᓕᒃ, ᐊᒻᒪ 6% ᐅᖃᕈᒪᓚᐅᖏᑦᑐᑦ.