ᒥᓂᔅᑕ ᕙᓐᑖᓪ, ᐊᓇᓐᑕᓴᒐᕇ, ᐊᒻᒪᓗ ᕼᐊᔾᑐ ᑐᓴᕐᑎᑦᑎᔪᑦ ᓄᓇᕗᑦ ᐅᓪᓗᐊᓂ

ᐋᑐᕚ, ᐋᓐᑎᐅᕆᐅ (ᔪᓚᐃ 9, 2024) – ᐅᑯᐊ ᒥᓂᔅᑕ ᑕᓐ ᕙᓐᑖᓪ, ᒥᓂᔅᑕᖓᑦ ᐅᑭᐅᖅᑕᖅᑐᒧᑦ, ᒥᓂᔅᑕ ᒋᐅᓕ ᐊᓇᓐᑕᓴᒐᕇ, ᒥᓂᔅᑕᖓ ᐃᓄᓕᕆᔨᑐᑲᒃᑯᑦ ᑲᓇᑕ; ᐊᒻᒪᓗ ᒥᓂᔅᑕ ᐹᑎ ᕼᐊᔾᑐ, ᒥᓂᔅᑕᖓ ᓄᓇᖅᑲᖅᑳᖅᓯᒪᔪᓄᑦ ᐱᔨᑦᑎᕋᐅᑎᑦ, ᑐᓴᒐᒃᓴᒥᖕᓂᒃ ᑐᓂᓯᖃᐅᔪᑦ ᐅᓪᓗᒥ:

"ᐅᓪᓗᒥ ᐃᓚᐅᕗᒍᑦ ᑕᒪᕐᒥᒃ 25 ᓄᓇᓖᑦ ᑕᒪᐃᓐᓂ ᓄᓇᕗᒻᒥ ᖁᕕᐊᓱᒃᑐᑦ ᓄᓇᕗᑉ ᐅᓪᓗᐊᓂᒃ. ᐅᓇ ᖁᕕᐊᓱᒍᑎᕗᑦ ᓄᓇᕗᒻᒥᒃ, ᑐᑭᖃᖅᑐᖅ "ᓄᓇᕗᑦ", ᐱᒻᒪᕆᐅᔪᒥᒃ ᓴᕿᑎᑦᑎᕕᖃᕈᓐᓇᖅᐳᒍᑦ ᐊᒻᒪᓗ ᐅᐱᒍᓱᒃᐳᒍᑦ ᐊᑑᑎᖃᕐᓂᖅᐹᒥᒃ ᐃᑲᔫᓯᐊᖅᑎᑦᑎᓯᒪᔪᓯ ᑖᒃᑯᐊ ᓄᓇᕗᒻᒥᐅᑦ ᐊᒻᒪᓗ ᐊᖏᒡᓕᒋᐊᕐᓂᖓ ᑕᒪᐃᓐᓄᑦ ᐃᓄᓕᒫᓄᑦ ᐱᓯᒪᓂᖃᖅᖢᓂ, ᑲᑉᐱᐊᓇᖅᑐᖃᔮᓐᖏᑦᑐᖅ ᐊᒻᒪᓗ ᑲᑉᐱᐊᓇᖅᑐᖃᓚᐅᖅᓯᒪᓂᐊᓐᖏᑦᑐᑦ ᑲᓇᑕᒥ ᑕᒪᐃᓐᓄᑦ, ᐃᓅᓯᓕᕆᓂᒃᑯᑦ ᐊᒻᒪᓗ ᐱᐅᓯᓕᕆᓂᒃᑯᑦ ᓴᖕᖏᔫᕗᑦ, ᐊᒻᒪᓗ ᒪᑭᒪᓇᓱᐊᕈᑎᒃᓴᐃᑦ ᐱᕙᓪᓕᐊᑎᑕᐅᕗᑦ ᓄᓇᕗᒻᒥ ᐊᒻᒪᓗ ᑕᒪᐃᓐᓂ ᑲᓇᑕᒥ.

ᑕᕝᕙᓂ ᐅᓪᓗᒥ 1993, ᑲᓇᑕᐅᑉ ᒪᓕᒐᓕᐅᕐᕕᒃᔪᐊᖓ ᑲᔪᓯᑎᑦᑎᓚᐅᖅᑐᖅ ᓄᓇᕗᒻᒥᒃ ᓄᓇᑖᕈᑎᑦ ᐊᖏᕈᑎᓂᒃ ᐱᖁᔭᕐᔪᐊᖅ ᐊᒻᒪᓗ ᓄᓇᕗᑦ ᐊᖏᕈᑎ ᐱᖁᔭᕐᔪᐊᖅ, ᐅᑯᐊᓗ ᑎᑭᐅᑎᓚᐅᖅᑐᑦ ᓄᓇᕗᒻᒥ ᐃᓕᓴᕆᔭᐅᓪᓗᓂ ᑎᐅᓂᑐᐊᓕᖑᕐᓂᖓᓂᒃ ᐊᐃᕆᓕ 1, 1999. ᐅᑯᐊ ᑲᓇᑕᐅᑉ ᒪᓕᒐᓕᐅᕐᕕᒃᔪᐊᖓ ᐱᖁᔭᕐᔪᐊᖅ ᐱᓯᒪᓂᖃᖅᑐᖅ ᐃᓚᒌᖕᓂᐊᖅᑐᑦ ᐊᒻᒪᓗ ᐃᓗᑐᓂᐊᖅᑐᖅ ᐊᒻᒪᓗ ᐱᔪᓐᓇᐅᑎᖃᖅᑐᑦ ᐃᓄᐃᑦ ᐱᔨᑦᑎᕋᕐᓗᒍ ᓄᓇ ᐊᒻᒪᓗ ᒪᓕᒐᖅ ᐊᔪᖏᑎᑦᑎᔪᖅ ᐊᑐᕐᓗᒍ ᐊᒻᒪᓗ ᐃᓱᒪᓕᐅᕈᑎᒋᓗᒍ ᑕᒪᕐᒥᓕᒫᖅ ᑎᐅᓕᑐᐊᓕᒃᑯᑦ ᑐᑭᒧᐊᒃᑎᑦᑎᓂᕐᒥᒍᑦ, ᐊᕙᑎᒥᖕᓂᒃ ᖃᓄᐃᖏᑦᑎᐊᖅᑎᑦᑎᓂᖅ, ᓄᓇᒥ ᐊᐅᓚᑦᑎᓂᖅ, ᐊᑐᕐᓗᒋᑦ ᐃᑲᔫᑎᑦ, ᐊᑐᓕᖅᑕᐅᑎᑦᑎᓗᑎᒃ ᑲᔪᓰᓐᓇᕈᓐᓇᖅᑐᓂᒃ ᓱᕈᖅᓴᐃᓐᖏᑦᑐᓂᒃ, ᐊᒻᒪᓗ ᓴᐳᒻᒥᓗᒋᑦ ᓄᓇᕗᑦ ᐊᒥᓱᑦ ᐆᒪᔪᓕᒫᑦ ᐊᕙᑎᓕᒫᖏᓪᓗ.

ᑕᒪᑐᒪᓂ ᐊᕐᕌᒍᒥ ᑎᑭᐅᑎᕗᒍᑦ 25-ᓂᒃ ᐅᑭᐅᖃᓕᖅᑐᖅ ᓴᕿᑕᐅᓚᐅᕐᓂᖓ ᓄᓇᕗᑦ, ᓇᓪᓕᐅᓐᓂᖅᓯᐅᑦᓯᐊᕆᑦ ᐊᑎᓕᐅᖅᑕᐅᓚᐅᕐᓂᖓ ᓄᓇᕗᑦ ᓄᓇᖏᑦ ᐊᒻᒪᓗ ᐃᑲᔫᑎᑦ ᓴᒃᑯᐃᔭᐅᓪᓗᑎᒃ ᒐᕙᒪᒃᑯᓂᑦ ᐊᕙᑖᓂᑦ ᓄᓇᕗᑦ ᒐᕙᒪᒃᑯᑦ, ᓄᓇᕗᑦ ᑐᓐᖓᕕᒃ ᑎᒥᖓ, ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ - ᐊᖏᓛᖅ ᐊᑐᖅᑕᐅᔪᑦ ᓇᖕᒥᓂᖅ-ᒐᕙᒪᖃᕈᓐᓇᖅᓯᓪᓗᑎᒃ ᓄᓇᕗᒻᒥᐅᑦ. ᑕᐃᒪᓗ ᓴᒃᑯᐃᔭᐅᒍᓂ ᑕᒪᕐᒥᒃ 2027-ᒥ, ᓄᓇᕗᒻᒥᐅᑦ ᐊᐅᓚᑦᑎᔪᓐᓇᖅᓯᓂᐊᖅᑐᑦ ᓄᓇᒥᖕᓂᒃ, ᐃᒪᑦᑎᐊᕙᖕᓂᒃ, ᐊᒻᒪᓗ ᐅᕋᒃᑕᕆᐊᑦ ᓄᓇᕗᒻᒥ ᐊᒻᒪᓗ ᐃᑲᔫᑎᑦ ᐃᓱᒪᓕᐅᕆᓂᐊᕐᓗᒋᑦ ᐊᐅᓚᑦᑎᓂᐊᕋᒥᒃ ᑖᒃᑯᓂᖓ

ᓇᓪᓕᐅᓐᓂᖅᓯᐅᖅᐳᒍᑦ ᓄᓇᕗᑦ ᐅᓪᓗᐊᓂ, ᑲᔪᓯᔪᒥᒃ ᐱᕚᓪᓕᖅᐸᓪᓕᐊᓂᐊᖅᑐᒍᑦ ᓴᐃᒪᖃᑎᒌᑦᑎᐊᕐᓂᕐᒧᑦ ᐃᑲᔪᕐᓗᒋᑦ ᓇᖕᒥᓂ-ᒐᕙᒪᖃᕈᓐᓇᖅᑐᑦ ᓄᓇᕗᒻᒥᐅᑦ ᐊᒻᒪᓗ ᑕᒪᕐᒥᒃ ᐃᓄᐃᑦ ᓴᖕᖏᒃᑎᒋᐊᕐᓗᑎᒃ ᐃᓄᐃᑦ-ᑲᓇᑕᐅᑉ ᒐᕙᒪᒃᑯᖏᑦ ᐃᓚᒌᒍᓯᖏᒃ. ᑲᔪᓯᓂᐊᖅᑐᖅ ᓴᓇᖃᑎᒌᖕᓂᕗᑦ ᐱᓕᕆᖃᑎᒋᔭᕗᓪᓗ ᐱᐅᔪᒥᒃ ᐊᖁᓯᐅᕐᓂᐊᕋᑦᑕ ᓱᕈᖅᓴᐃᓐᖏᑦᑐᓂᒃ ᐱᕙᓪᓕᐊᑎᑦᑎᓂᒃᑯᑦ, ᐱᐅᓯᑐᖃᖏᑦ ᐅᑎᖅᑎᑕᐅᓗᑎᒃ, ᐊᒻᒪᓗ ᐱᐅᓯᕚᓪᓕᖅᑎᓪᓗᒋᑦ ᐃᓅᓯᓕᕆᓂᖅ ᐊᒻᒪᓗ ᒪᑭᒪᓇᓱᐊᕈᑎᖏᑦ ᓄᓇᕗᒻᒥᐅᑦ.

Happy Nunavut Day! Nunavut ullunganit nalliunirsiutsiarit! ᓇᓪᓕᐅᓐᓂᖅᓯᐅᑦᓯᐊᕆᑦ ᓄᓇᕗᑦ ᐅᓪᓗᐊᓂ!"