ᐅᖃᖅᑕᖏᑦ ᐃᔾᔪᕐᓇᐃᓐᓂᖓᑕ ᐃᒃᓯᕋᕐᔪᐊᕌᐱᒃ ᕗᕋᓐᓯᔅ, ᒪᔅᕗᐊᑭᔅ

ᒪᑕᒻ ᒐᕙᓄ ᔨᐊᓄᕈᓪ,
ᒥᔅᑐ ᐳᕋᐃᒻ ᒥᓂᔅᑕ,
ᐊᓲᔪᓯ ᓄᓇᖃᖅᑳᖅᓯᒪᔪᑦ ᐃᓄᐃᑦ ᒪᔅᕗᐊᑭᔅᒥ ᑕᕝᕙᓂᓗ ᓄᓇᖓᓂ ᑲᓇᑕᐅᑉ,
ᐊᓲᔪᓯ ᖃᑕᙳᑎᒃᑳ ᓇᔭᒃᑲᓗ!

ᐅᑕᖅᑭᓯᒪᕗᖓ ᑕᕝᕙᓃᖃᑎᒋᓂᐊᕋᔅᓯ! ᑕᕝᕙᓂ, ᑕᕝᕙᙵᑦ ᐃᓂᒥᑦ ᐊᒃᑐᐊᔪᒧᑦ ᐋᓐᓂᕐᓇᖅᑐᓄᑦ ᐃᖅᑲᐅᒪᔭᐅᔪᓄᑦ, ᐱᒋᐊᕈᒪᓪᓗᖓ ᐃᓱᒪᒋᔭᓐᓂᒃ ᒪᒥᐊᓐᓂᕐᒧᑦ ᐅᐸᖕᓂᕐᒥᒃ. ᐅᐸᒃᓯᒪᕗᖓ ᓄᓇᑐᖃᔅᓯᓐᓄᑦ ᐅᖃᐅᑎᔭᖅᑐᖅᖢᓯ ᓇᖕᒥᓂᖅ ᓄᒫᓱᖕᓂᓐᓂᒃ, ᐊᐱᕆᓗᒍ ᒎᑎ ᐃᓱᒪᒋᔭᐅᔪᓐᓃᕈᒪᓪᓗᖓ, ᒪᒥᓐᓂᕐᒧᑦ ᐱᑦᑎᐊᓕᕐᓂᕐᒧᓪᓗ, ᐅᖃᐅᓯᕆᓗᒍ ᖃᓂᓐᓂᕋ ᑐᒃᓯᐊᖃᑎᒋᓗᓯ ᑐᒃᓯᐅᑎᓗᓯᓗ. 

ᐃᖅᑲᐅᒪᕙᒃᑲ ᑲᑎᓐᓂᕆᓚᐅᖅᑕᕗᑦ ᕉᒻᒥ ᑎᓴᒪᑦ ᑕᖅᑭᐅᓚᐅᖅᑐᓂ. ᑕᐃᔅᓱᒪᓂ, ᖃᐃᑦᑎᔭᐅᓚᐅᕋᒪ ᒪᕐᕈᐃᓂᒃ ᑲᒥᓂᒃ ᓇᓗᓇᐃᒃᑯᑕᐅᓪᓗᑎᒃ ᐊᒃᓱᕉᑕᐅᓯᒪᔪᓄᑦ ᓄᓇᖃᖅᑳᖅᓯᒪᔪᓄᑦ ᓱᕈᓯᓄᑦ,  ᐱᓗᐊᖅᑐᒥᒃ ᑕᐃᒃᑯᐊ, ᐊᐃᑦᑕᐅᒐᓗᐊᖅ, ᐅᑎᓚᐅᖅᓯᒪᖏᑦᑐᑦ ᐃᓕᓐᓂᐊᕐᕕᖕᓂᑦ. ᐅᑎᖅᑎᑦᑎᖁᔭᐅᓚᐅᕋᒪ ᑲᒥᓂᒃ ᑎᑭᒃᑯᒪ ᑲᓇᑕᒧᑦ, ᑕᐃᒪᐃᓐᓂᐊᖅᖢᖓᓗ ᐃᓱᓕᒃᑯᑎᒃ ᑖᒃᑯᐊ ᓇᐃᑦᑐᑦ ᐅᖃᐅᓰᑦ, ᐃᓱᒪᒋᓗᒍ ᑖᓐᓇ ᓇᓗᓇᐃᒃᑯᑕᖅ, ᑕᖅᑭᓂ ᐊᓂᒍᖅᑐᓂ ᐆᒪᑎᑦᑎᓪᓗᓂ ᓄᒫᓱᖕᓂᕐᓂᒃ, ᓂᙵᕐᔪᐊᕐᓂᕐᓂᒃ ᑕᓗᕈᒃᑯᑎᓂᕐᓂᒡᓗ. ᐃᖅᑲᐅᒪᓪᓗᒋᑦ ᑕᐃᒃᑯᐊ ᓱᕈᓰᑦ ᓲᖃᐃᒻᒪ ᐋᓐᓂᕐᓇᖅᐳᖅ; ᑎᓕᐅᖅᐹᑎᒍᑦ ᐱᓕᕆᖁᓪᓗᑕ ᐊᑐᓂ ᓱᕈᓯᖅ ᐊᐅᓚᑕᐅᓗᓂ ᓇᒡᓕᖕᓂᒃᑯᑦ, ᐅᒃᐱᕐᓇᕐᓂᒃᑯᑦ ᐃᒃᐱᒍᓱᖕᓂᒃᑯᓪᓗ. ᐊᑕᐅᑦᑎᒃᑯᑦ ᓱᓕ, ᑖᒃᑯᐊ ᑲᒦᑦ ᐅᖃᐅᓯᖃᕆᕗᑦ ᐊᖅᑯᑎᒥᒃ ᒪᓕᒐᒃᓴᑦᑎᓐᓂᒃ, ᓇᒧᙵᐅᓂᕐᒥᒃ ᐅᕙᒎᓗᑕ ᐊᑐᕈᒪᔭᑦᑎᓐᓂᒃ. ᐱᓱᖃᑎᒌᒍᒪᕗᒍᑦ, ᑐᒃᓯᐊᖃᑎᒌᒡᓗᑕ ᐱᓕᕆᖃᑎᒌᒡᓗᑕᓗ, ᐊᒃᓱᕈᕐᓃᑦ ᕿᒪᒃᑕᑦᑎᓐᓂᑦ ᓯᕗᒧᐊᕈᑕᐅᔪᓐᓇᕐᓂᐊᕐᒪᑕ ᓯᕗᓂᕐᒧᑦ ᐱᑦᑎᐊᖅᑐᓄᑦ, ᒪᒥᓴᕐᓂᕐᓄᑦ ᐱᑦᑎᐊᓕᖅᑐᓄᓪᓗ.  

ᑕᐃᒪᐃᒻᒪᑦ ᓯᕗᓪᓕᖅᐹᒧᑦ ᐱᒋᐊᕐᓂᖓᓄᑦ ᐅᐸᖕᓂᕐᒪ ᐃᓕᔅᓯᓐᓄᑦ ᑕᒫᓃᑉᐳᖅ, ᑕᐃᑲᙵᑐᖄᓗᖕᓂᑦ ᑕᑯᓯᒪᔪᖅ ᐅᐸᒃᓯᒪᔪᓂᒃ ᓄᓇᖃᖅᑳᖅᓯᒪᔪᓂᒃ ᐃᓄᖕᓂᒃ. ᑖᒃᑯᐊ ᓄᓇᐃᑦ ᐅᕙᑦᑎᓐᓄᑦ ᐅᖃᓪᓚᒃᑐᑦ: ᐱᔪᓐᓇᖅᑎᑦᑎᔪᑦ ᐅᕙᑦᑎᓐᓂᒃ ᐃᖅᑲᐃᓗᑕ.

ᐃᖅᑲᐃᓗᓂ: ᖃᑕᙳᑎᒃᑲ ᓇᔭᒃᑲᓗ, ᓄᓇᖃᖅᓯᒪᕗᓯ ᑖᒃᑯᓇᓂ ᓄᓇᓂ ᑕᐅᓴᓄᑦ ᐊᕐᕌᒍᓄᑦ, ᐃᓅᓯᖃᖅᖢᓯ ᐃᒃᐱᒍᓱᒃᑐᓂᒃ ᓄᓇᕐᔪᐊᕐᒥᒃ ᐱᓚᐅᖅᑕᔅᓯᓐᓂᒃ ᕿᒪᒃᑕᐅᔾᔪᓯᐊᕆᓪᓗᒍ ᓯᕗᓂᑦᑎᓐᓂᑦ ᑭᖑᕚᕇᓂᑦ ᐱᓯᒪᓪᓗᒋᓪᓗ ᖃᐃᓂᐊᑐᐃᓐᓇᖅᑐᓄᑦ. ᐃᓱᒪᒋᓯᒪᔭᓯ ᑐᓐᓂᖅᑯᓯᖅᑎᑐᑦ ᓴᓇᔨᒥᑦ ᐱᖃᑕᐅᔾᔪᑕᐅᓗᓂ ᐊᓯᓄᑦ ᓇᒡᓕᒋᔭᐅᑦᑎᐊᕐᓗᓂᓗ ᐃᓅᖃᑎᒋᑦᑎᐊᕐᓗᒋᑦ ᑭᓱᓕᒫᑦ ᑕᕝᕙᐅᔪᑦ, ᐃᓅᖃᑎᒌᓪᓛᓗᖕᓂᒃᑯᑦ ᐆᒪᔪᓕᒫᓄᑦ. ᑕᐃᒪᓐᓇ, ᐃᓕᓚᐅᖅᐳᓯ ᐱᕈᖅᓴᐃᓂᕐᓂᒃ ᐃᓚᖃᕐᓂᕐᓄᑦ ᓄᓇᓕᖃᕐᓂᕐᓄᓪᓗ, ᐱᕈᖅᓴᐃᓗᓯᓗ ᓴᙱᔪᓂᒃ ᑲᑎᙵᓂᕐᓂᒃ ᑭᖑᕚᕇᓂ, ᐅᐱᒋᓪᓗᒋᑦ ᐃᓐᓇᓯ ᐸᖅᑭᓪᓗᒋᓪᓗ ᐱᐊᕋᑯᓗᒃᓯ. ᑮᓇᐅᔭᑎᒍᑦ ᐊᑭᓕᒐᒃᓴᐅᖏᑦᑐᑦ ᐱᓕᕆᔾᔪᓯᑐᖃᑦ ᐃᓕᓴᐃᓃᓪᓗ, ᑐᙵᔪᑦ ᐃᓱᒪᒋᔭᖃᕐᓂᕐᓄᑦ ᐊᓯᓂᒃ, ᓱᓕᖃᑦᑕᕐᓂᕐᓄᑦ, ᑲᑉᐱᐊᓱᖏᓐᓂᕐᓄᑦ ᐃᒃᐱᒍᓱᖕᓂᕐᓄᓪᓗ, ᐅᐱᓯᒪᖏᓐᓂᕐᓄᑦ, ᓱᓕᓂᕐᓄᑦ ᐊᑑᑎᓕᖕᓄᓪᓗ  ᓯᓚᑐᓂᕐᓄᑦ!

ᑭᓯᐊᓂ ᑕᐃᒃᑯᐊ ᓯᕗᓪᓕᖅᐹᑦ ᑐᑎᓃᑦ ᐱᒋᐊᓚᐅᖅᑐᑦ ᑕᕝᕙᓂ ᓄᓇᓂ, ᐊᖅᑯᑎ ᐃᖅᑲᐅᒪᓂᕐᓄᑦ ᓇᒃᓴᖅᐸᑦᑎᒍᑦ, ᓄᓈᓇᖅᖢᓂ, ᑕᐃᒃᑯᓄᖓ ᒪᓕᓚᐅᖅᑐᓄᑦ. ᑲᑎᕝᕕᒋᓚᐅᖅᑕᕗᑦ ᓄᑖᕈᐃᕗᖅ ᐃᓗᓐᓂ ᐃᑎᔪᒥᒃ ᐊᓐᓂᐊᕐᓂᕐᒥᒃ ᐅᒡᒍᐊᕐᓂᕐᒥᒡᓗ ᐃᒃᐱᒋᓯᒪᔭᓐᓂᒃ ᐊᓂᒍᖅᑐᓂ ᑕᖅᑭᓂ. ᐃᓱᒪᒋᕙᒃᑲ ᓄᒫᓇᕐᔪᐊᖅᑐᐊᓗᐃᑦ ᖃᓄᐃᓕᖓᓃᑦ ᐅᓄᖅᑐᐊᓘᔪᓯ, ᐃᓚᓯ ᓄᓇᓕᓯᓗ ᖃᐅᔨᒪᓯᒪᔭᔅᓯᓐᓂᒃ; ᐅᖃᐅᓯᕆᓯᒪᔭᔅᓯᓐᓂᒃ ᐅᕙᓐᓄᑦ ᐊᒃᓱᕈᕐᔪᐊᕈᑎᒋᓚᐅᖅᑕᔅᓯᓐᓂᒃ ᐃᓕᓐᓂᐊᕐᕕᖕᓂ. ᑖᒃᑯᐊ ᐊᒃᓱᕈᕐᔪᐊᕐᓃᑦ ᓇᐅᒃᑯᒃᑭᐊᖅ ᒪᑭᒃᑲᓐᓂᓲᑦ ᑖᓐᓇ ᐅᖃᐅᓯᕆᔭᐅᑕᒫᑦ; ᐅᔾᔨᕈᓱᒃᑐᖓ ᐅᓪᓗᒥ ᑲᑎᓐᓂᕗᑦ ᐃᖅᑲᐃᔾᔪᑕᐅᔪᓐᓇᕐᒪᑦ ᐃᖅᑲᐅᒪᔭᐅᔪᑐᖃᓂᒃ ᐋᓐᓂᖅᓯᒪᔪᑐᖃᓂᒡᓗ, ᐅᓄᖅᑐᓯᒍᓪᓗ ᐃᓗᐊᖅᓴᖏᑦᑐᒃᓴᐅᕗᓯ ᐅᖃᓪᓚᒃᑎᓪᓗᖓ. ᑭᓯᐊᓂ ᓈᒻᒪᒃᐳᖅ ᐃᖅᑲᐅᒪᓗᓂ, ᐳᐃᒍᔭᓐᓂᖅ ᓱᖁᑎᒃᓴᕈᓐᓃᕐᓇᕐᒪᑦ, ᐅᖃᖅᑕᐅᓯᒪᓪᓗᓂᓗ, "ᐃᒡᓗᐊ ᓇᒡᓕᖕᓂᐅᑉ ᖀᒥᒍᓱᖕᓂᐅᖏᒻᒪᑦ, ᓱᖁᑎᒃᓴᖏᓐᓂᐅᖕᒪᑦ... ᐃᒡᓗᐊᓗ ᐃᓅᓂᐅᑉ ᑐᖂᖏᒻᒪᑦ, ᓱᖁᑎᒃᓴᖏᓐᓂᐅᖕᒪᑦ" ( . ᕕᓱᓪ). ᐃᖅᑲᕐᓗᒋᑦ ᓱᕋᖕᓇᖅᑐᐊᓗᐃᑦ ᐊᑐᖅᑕᐅᓚᐅᖅᑐᑦ ᐃᓕᓐᓂᐊᕐᕕᖕᓂ ᐋᓐᓂᕐᓇᕐᒪᑦ, ᓂᙵᖕᓇᕐᒪᑦ ᐋᓐᓂᖅᑎᑦᑎᓲᖑᓪᓗᓂ ᑭᓯᐊᓂ ᐱᔭᕆᐊᖃᖅᖢᓂ.

ᐱᔭᕆᐊᖃᖅᑐᖅ ᐃᖅᑲᐅᒪᓗᒋᑦ ᖃᓄᖅ ᐊᑐᐊᒐᑦ ᐃᓚᓕᐅᔾᔨᓂᕐᓄᑦ ᑐᓐᓂᖅᑯᑎᖃᕐᓂᕐᓄᓪᓗ ᐱᖃᓯᐅᔾᔨᓪᓗᑎᒃ ᐃᓕᓐᓂᐊᕐᕕᖕᓂᒃ, ᓱᕋᖕᓇᓪᓚᒃᑐᐊᓘᓚᐅᖅᑐᑦ ᐃᓄᖕᓄᑦ ᑕᒫᓂᕐᒥᐅᓄᑦ ᓄᓇᓂ. ᑕᕆᐅᑦ ᐊᑭᐊᓂᕐᒥᐅᑦ ᑎᑭᖅᑳᕐᒪᑕ ᑕᒪᐅᖓ, ᐱᕕᖃᕐᔪᐊᓚᐅᖅᑐᑦ ᐱᕈᕐᓇᖅᑐᒥᒃ ᑲᑎᓐᓂᕐᒧᑦ ᐃᓅᓯᑐᖃᖃᑎᒌᖏᑦᑐᓄᑦ, ᐱᖅᑯᓯᑐᖃᓄᑦ ᐊᔾᔨᒌᖏᑦᑐᓄᓪᓗ ᐅᒃᐱᕐᓂᕐᓄᑦ. ᑭᓯᐊᓂ ᐃᓗᐃᑦᑐᒃᑯᐸᓗᒃ ᑕᐃᒪᐃᓚᐅᖏᑦᑐᖅ. ᓱᓕᒃᑲᓐᓂᖅ ᐃᓱᒪᒋᕙᒃᑲ ᐅᓂᒃᑳᖅᓯᒪᔭᓯ ᐅᓐᕙᓐᓄᑦ ᖃᓄᖅ ᐊᑐᐊᒐᑦ ᐃᓚᓕᐅᔾᔨᓂᕐᓄᑦ ᑭᓱᓕᕆᓂᓕᒫᑎᒍᑦ ᐃᓄᑑᑎᑕᐅᓕᖅᑎᑦᑎᓚᐅᖅᑐᑦ ᓄᓇᖃᖅᑳᖅᓯᒪᔪᓂᒃ ᐃᓄᖕᓂᒃ; ᖃᓄᕐᓗᑦᑕᐅᖅ ᐃᓕᓴᐃᔾᔪᓯᑎᒍᑦ ᐅᖃᐅᓯᓯ ᐃᓕᖅᑯᓯᑐᖃᓯᓗ ᐱᐅᔪᓐᓃᖅᑎᑕᐅᓚᐅᖅᑐᑦ ᐳᐃᒍᖅᑕᐅᑎᑕᐅᓇᓱᒃᖢᑎᒡᓗ; ᖃᓄᖅ ᓱᕈᓰᑦ ᑎᒥᒃᑯᑦ, ᐅᖃᐅᓯᒃᑯᑦ ᐃᓱᒪᒃᑯᑦ ᐅᒃᐱᕐᓂᒃᑯᓪᓗ ᐱᑦᑎᐊᖅᑕᐅᖃᑦᑕᓚᐅᖏᑦᑐᑦ; ᐊᖏᕐᕋᒥᓂᑦ ᐊᐅᓚᐅᔾᔭᐅᓚᐅᖅᑐᑦ ᐱᐊᕋᑯᓘᓪᓗᑎᒃ, ᖃᓄᕐᓗ ᑖᓐᓇ ᐊᒃᑐᐃᖏᓐᓇᓚᐅᕐᒪᖔᑦ ᐃᓚᒌᖕᓂᕐᓂᒃ ᐊᖓᔪᖅᑳᓄᑦ ᕿᑐᕐᖓᒥᓄᓪᓗ, ᐃᑦᑐᓄᑦ ᓂᖏᐅᓄᑦ ᐃᕐᖑᑕᓄᓪᓗ.

ᖁᔭᒋᕙᔅᓯ ᑖᔅᓱᒥᖓ ᑐᑭᓯᑎᑦᑐᓐᓇᕋᔅᓯᙵ, ᐅᖃᐅᑎᒐᔅᓯᙵ ᐅᖁᒪᐃᑦᑐᓂᒃ ᓇᖕᒪᒃᑕᔅᓯᓐᓂᒃ ᓱᓕ, ᐅᖃᐅᑎᒐᕕᖓ ᑖᒃᑯᓂᖓ ᐃᖅᑲᐅᒪᔪᒥᓇᖏᑦᑐᐊᓗᖕᓂᒃ. ᐅᓪᓗᒥ ᑕᕝᕙᓃᑦᑐᖓ, ᑕᕝᕙᓂ ᓄᓇᒥ, ᐱᖃᓯᐅᖦᖢᒋᑦ ᐃᑦᑕᕐᒥᑦ ᐃᖅᑲᐅᒪᔭᖏᑦ, ᐳᐃᒍᔾᔭᐃᖅᓯᓯᒪᔪᕐᒥᒃ ᕿᓕᕈᓂᒃ ᒪᒥᖏᑦᑐᓂᒃ ᓱᓕ ᑭᓕᖅᓯᒪᔪᓂᑦ. ᑕᕝᕙᓃᑦᑐᖓ ᓲᖃᐃᒻᒪ ᓯᕗᓪᓕᖅᐹᖅ ᐱᓕᕆᔭᕆᐊᖃᖅᑕᕋ ᒪᒥᐊᑦᑕᖅᑐᕐᓗᖓ ᐅᐸᒃᓯᒪᓂᓐᓄᑦ ᐃᓕᔅᓯᓐᓂ ᓱᓕᒃᑲᓐᓂᖅ ᐊᐱᕆᓗᖓ ᐃᓱᒪᒋᔪᓐᓃᖅᑕᐅᔪᒪᓗᖓ, ᐅᖃᐅᑎᒃᑲᓐᓂᕐᓗᓯ ᒪᒥᐊᑦᑐᓪᓛᓘᔪᖓ. ᒪᒥᐊᑦᑐᖓ ᐱᓪᕆᔾᔪᓯᕐᓄᑦ, ᐊᐃᑦᑖᖑᒐᓗᐊᖅ ᐅᓄᖅᑐᑦ ᑯᕋᐃᔅᑑᓯᒥᐅᑦ ᐃᑲᔪᓚᐅᕐᒪᑕ ᓄᓇᐃᖅᓯᓂᕐᓄᑦ ᐃᓱᒪᖃᕐᓂᕐᓂᒃ ᓄᑭᐅᔪᓂᑦ ᑲᑕᒃᓯᒪᑎᑦᑎᓚᐅᖅᑐᓄᑦ ᓄᓇᖃᖅᑳᖅᓯᒪᔪᓂᒃ ᐃᓄᖕᓂᒃ.  ᒪᒥᐊᑦᑐᖓ. ᐃᓱᒪᒋᔪᓐᓇᐃᕐᕕᐅᔪᒪᕗᖓ, ᐱᓗᐊᖅᑐᓄᑦ ᐱᓕᕆᔾᔪᓯᕐᓄᑦ ᐅᓄᖅᑐᓂᑦ ᑐᒃᓯᐊᕐᕕᖕᓄᑦ ᐃᓚᒋᔭᐅᔪᓂᑦ ᐅᒃᐱᖅᑐᓂᓪᓗ ᐃᓅᖃᑎᒌᓂᑦ ᐃᑲᔪᓚᐅᕐᓂᖏᓐᓄᑦ, ᐱᓛᕆᓇᒍ ᓱᖁᑎᒃᓴᖏᓐᓂᖏᑦ, ᐱᓕᕆᓂᕐᓂ ᐃᓕᖅᑯᓯᑐᖃᓂᒃ ᓱᕋᑦᑎᓂᕐᓄᑦ ᐱᔪᒪᖏᑦᑐᓂᒡᓗ ᐃᓚᓕᐅᔾᔨᓂᖅᑎᒍᑦ ᐊᑐᖁᔭᐅᔪᓄᑦ ᑕᐃᔅᓱᒪᓂᕐᒥᐅᓂᑦ ᒐᕙᒪᓂᑦ, ᓴᖅᑭᔾᔪᑕᐅᓪᓗᓂ ᐃᓕᓴᐃᓂᕐᓄᑦ ᐃᓕᓐᓂᐊᕐᕕᖕᓂᒃ.

ᑯᕋᐃᔅᑑᓯᒃᑯᑦ ᐃᑲᔪᕐᓃᑦ ᓇᐅᖑᓚᐅᖏᒃᑲᓗᐊᖅᑎᓪᓗᒋᑦ, ᐱᑕᖃᓪᓚᓚᐅᖅᑐᖅ ᓇᒡᓕᒍᓱᖕᓂᕐᓂᒃ ᐸᖅᑭᓂᕐᓂᒡᓗ ᓱᕈᓯᓄᑦ, ᐃᓗᐃᑦᑐᒃᑯᑦ ᐊᒃᑐᐃᓃᑦ ᐊᑐᐊᒐᓂᑦ ᐊᒃᑐᐊᔪᓄᑦ ᐃᓕᓐᓂᐊᕐᕕᖕᓄᑦ ᓱᕋᕐᔪᐊᕐᓇᓚᐅᖅᑐᑦ. ᑯᕋᐃᔅᑑᓯᒧᑦ ᐅᒃᐱᕐᓂᑦᑕ ᐅᖃᐅᑎᕚᑎᒍᑦ ᑖᓐᓇ ᑕᒻᒪᓪᓚᖕᓂᐊᓘᓚᐅᕐᒪᑦ, ᒪᓕᖏᑦᑐᖅ ᐃᓕᓴᐃᓂᖏᓐᓄᑦ ᔩᓱᓯ ᑯᕋᐃᔅᑑᓯᐅᑉ. ᐋᓐᓂᕐᓇᖅᑐᖅ ᐃᓱᒪᓪᓗᓂ ᖃᓄᖅ ᑐᙵᕝᕕᑦᑎᐊᕙᐃᑦ ᐅᒃᐱᕆᔭᐅᔪᑦ, ᐅᖃᐅᓰᑦ ᐃᓕᖅᑯᓯᑐᖃᓪᓗ ᑭᓇᐅᓂᓪᓚᑦᑖᕈᑕᐅᓚᐅᖅᑐᑦ ᐃᓅᖃᑎᔅᓯᓐᓄᑦ ᓱᕋᑦᑎᔭᐅᓚᐅᕐᒪᑕ, ᐊᑭᖓᓂᒡᓗ ᐊᑭᓖᖏᓐᓇᕋᔅᓯ ᓱᓕ ᑖᔅᓱᒧᖓ. ᓵᖓᓂ ᑖᔅᓱᒪ ᐱᐅᖏᑦᑐᐊᓘᑉ ᐱᐅᖏᓐᓂᕐᔪᐊᑉ, ᑐᒃᓯᐊᕐᕕᒃ ᓰᖅᑯᖅᑐᖅᐳᖅ ᓵᖓᓂ ᒎᑎᐅᑉ ᑐᒃᓯᕋᖅᐳᓪᓗ ᐃᓱᒪᒋᔪᓐᓇᐃᕐᓂᖏᓐᓄᑦ ᐊᔪᖅᑐᓕᓂᖏᓐᓄᑦ ᕿᑐᕐᖓᖏᑕ (cf. ᔭᓐ ᐸᓪ II, ᐳᓪ ᐃᓐᑲᕐᓇᓯᐅᓂᔅ ᒥᔅᑎᐅᕆᐊᒻ (29 ᓄᕕᐱᕆ 1998), 11: AAS 91 [1999], 140). ᓇᖕᒥᓂᖅ ᐅᕙᖓ ᑖᔅᓱᒥᖓ ᐅᖃᒃᑲᓐᓂᕈᒪᕗᖓ, ᑕᓗᕈᒃᑯᑎᓪᓗᖓ ᑐᑭᓯᓇᑦᑎᐊᖅᖢᖓᓗ. ᑐᒃᓯᕋᓪᓚᒃᐳᖓ ᐃᓱᒪᒋᔭᐅᔪᓐᓇᐃᕐᓂᕐᒧᑦ ᐱᐅᖏᑦᑐᐊᓗᖕᓄᑦ ᐱᓕᕆᔭᐅᔪᓄᑦ ᐅᓄᖅᑐᐊᓗᖕᓄᑦ ᑯᕋᐃᔅᑑᓯᒥᐅᓄᑦ ᓄᓇᖃᖅᑳᖅᓯᒪᔪᑦ ᐃᓄᖕᓄᑦ.

ᖃᑕᙳᑎ ᐊᐃᓐᓄᒃᑲ ᓇᔭᐃᓐᓄᒃᑲᓗ, ᐅᓄᖅᑐᓯᒍᑦ ᑭᒡᒐᖅᑐᖅᑎᓯᒍᓪᓗ ᐅᖃᖅᓯᒪᒐᔅᓯ ᑐᒃᓯᕋᑐᐃᓐᓇᕐᓗᓂ ᐃᓱᒪᒋᔪᓐᓃᕐᕕᐅᔪᒪᓗᓂ ᐃᓱᓕᔾᔪᑕᐅᖏᒻᒪᑦ ᑕᒪᑐᒧᖓ. ᐊᖏᑦᑎᐊᖅᑐᖓ: ᑖᓐᓇ ᐱᒋᐊᕈᑎᑐᐃᓐᓇᐅᖕᒪᑦ ᐱᓕᕆᔭᕆᐊᓕᒃ, ᐱᒋᐊᕐᕕᒃ. ᑐᑭᓯᖕᒥᔪᖓ, "ᑕᑯᓗᓂ "ᑕᑯᓗᓂ ᕿᒪᒃᑕᑦᑎᓐᓄᑦ, ᖃᓄᐃᒋᐊᖏᓪᓗᑎᒃ ᐃᓱᒪᒋᔭᐃᕐᕕᐅᒪᔪᖏᓪᓗᑎᒃ  ᐋᖅᑭᒐᓱᒡᓗᒋᓪᓗ ᓱᕋᒃᑕᐅᓚᐅᖅᑐᑦ ᓈᒻᒪᓚᐅᖅᓯᒪᔾᔮᖏᒻᒪᑕ" ᐊᒻᒪᓗ "ᓯᕗᓂᕐᒧᑦ ᑕᑯᓗᓂ, ᖃᓄᑐᐃᓐᓇᓕᒫᕆᐊᓃᑦ ᓴᓇᓗᑎᒃ ᐃᓕᖅᑯᓯᑐᖃᓕᖕᓂᒃ ᓄᖅᑲᖅᑎᑦᑎᔪᓐᓴᖅᑐᓂᒃ ᑕᐃᒪᐃᑦᑐᑦ ᑕᐃᒪᐃᖁᓇᒋᑦ" (ᑎᑎᕋᖅ ᐃᓄᖏᓐᓄᑦ ᒎᑎᐅᑉ, 20 ᐋᒌᓯ 2018). ᐱᕐᔪᐊᖑᖕᒥᔪᖅ ᐃᓚᖓ ᑖᒃᑯᓄᖓ ᐱᓕᕆᔾᔪᓯᕐᓄᑦ ᐱᓕᕆᓪᓚᕆᒃᑐᒥᒃ ᖃᐅᔨᓴᖅᑎᑦᑎᓗᑎᒃ ᖃᐅᔨᒪᔭᐅᔪᓄᑦ ᖃᓄᐃᓚᐅᖅᑐᓄᑦ ᕿᒪᒃᑕᑦᑎᓐᓂ ᐃᑲᔪᕐᓗᒋᓪᓗ ᐊᓂᒍᐃᔪᕕᓃᑦ ᐃᓕᓐᓂᐊᕐᕕᖕᓂᒃ ᐊᑐᓕᕐᓂᐊᕐᒪᑕ ᒪᒥᓐᓂᕐᓂᒃ ᐊᒃᓱᕈᕐᔪᐊᖅᓯᒪᔭᕐᒥᓂᑦ.

ᐅᒃᐱᕈᓱᒃᑐᖓ ᑐᒃᓯᐊᖅᐳᖓᓗ ᑯᕋᐃᔅᑑᓯᒥᐅᑦ ᐃᓄᐃᑐᐃᓐᓇᐃᓪᓗ ᑕᕝᕙᓂ ᓄᓇᓂ ᐱᕈᕐᓂᐊᖅᐳᑦ ᑎᒍᓗᒋᑦ ᐃᒃᐱᒋᓗᒋᓪᓗ ᑭᓇᐅᓂᖏᑦ ᐊᑐᖅᓯᒪᔭᖏᓪᓗ ᓄᓇᖃᖅᑳᖅᓯᒪᔪᑦ ᐃᓄᖏᑕ. ᑕᕝᕙᑐᖅ ᐱᖅᑯᓯᓪᓚᑦᑖᑦ ᐊᑐᖅᑕᐅᔪᓐᓇᖅᐳᑦ ᑕᐃᒃᑯᐊ ᐃᓄᐃᑦ ᖃᐅᔨᒪᔭᐅᑦᑎᐊᕐᓂᖅᓴᐅᓂᐊᕐᒪᑕ ᐅᐱᒋᔭᐅᓗᑎᒡᓗ, ᑕᒪᒃᑮᓕᒫᑦ ᐱᓱᒍᓐᓇᖅᓯᓂᐊᕐᒪᑕ ᑲᑎᙵᓗᑎᒃ. ᐅᕙᓐᓄᓪᓕ, ᑎᓕᐅᕇᓐᓇᕐᓂᐊᖅᐳᖓ ᖃᓄᐃᑕᐅᓇᓱᒃᑐᓄᑦ ᓴᓐᓂᖓᔪᓕᐅᖅᑎᓕᒫᓂᒃ ᐃᑲᔪᕐᓗᑎᒃ ᓄᓇᖃᖅᑳᖅᓯᒪᔪᓂᒃ ᐃᓄᖕᓂᒃ. ᑕᐃᒪᐃᓯᒪᕗᖓ ᐊᔾᔨᒌᙱᕈᓘᔭᖅᑐᓂ ᖃᖓᓂ ᖃᓄᐃᑦᑐᓂᓗ, ᑲᑎᓐᓂᖅᑎᒍᑦ, ᑐᒃᓯᕋᐅᑎᑎᒍᑦ ᑎᑎᕋᕐᓂᖅᑎᒍᓪᓗ ᐊᔪᕆᖅᓱᐃᔨᓄᑦ ᑐᒃᓯᕋᐅᑎᒃᑯᑦ. ᑐᑭᓯᔪᖓ ᑖᒃᑯᐊᓕᒫᖅ ᐱᕕᖃᕆᐊᖃᕐᓂᐊᕐᒪᑕ ᕿᓄᐃᓵᕐᓂᕐᒥᒡᓗ. ᐅᖃᐅᓯᖃᖅᑐᒍᑦ ᐱᓕᕆᔾᔪᓯᕐᓂᒃ ᐳᑐᓯᓂᐊᖅᑐᓂᒃ ᐆᒻᒪᑎᓂᒃ. ᑕᕝᕙᓃᓐᓂᕋ ᑲᓇᑕᒥᓗ ᐊᔪᕆᖅᓱᐃᔩᑦ ᐊᖏᖅᓯᒪᓂᖏᑦ ᓇᓗᓇᐃᕈᑕᐅᕗᑦ ᐊᖏᖅᓯᒪᓂᑦᑎᓐᓄᑦ ᓯᕗᒧᐊᖏᓐᓇᖁᓪᓗᑕ ᑕᕝᕘᓇ ᐊᖅᑯᑎᒃᑯᑦ.

ᐱᖃᓐᓇᕆᑦᑎᐊᖅᑕᒃᑲ, ᑖᓐᓇ ᐅᐸᒃᓯᒪᓂᖅ ᖃᔅᓯᑲᓪᓚᓄᑦ ᐅᓪᓗᓅᕐᒪᑦ ᓄᓇᓂᓗ ᐅᖓᓯᒌᒃᑐᓂ ᐃᒻᒥᓄᑦ, ᑕᐃᒪᐃᒃᑲᓗᐊᖅᑎᓪᓗᒍ, ᐱᕕᖃᖅᑎᖏᑉᐹᖓ ᐊᖏᕆᐊᒃᓴᖅ ᐅᓄᖅᑐᓄᑦ ᖃᐃᖁᔨᔪᓂᒃ ᐱᓯᒪᔭᓐᓂᒃ ᐅᐸᖁᔭᐅᓪᓗᖓ ᓄᓇᓂᒃ ᓲᕐᓗᑐᑦ ᑲᒻᓘᑉᔅ, ᕕᓂᐱᐊᒡ ᐊᔾᔨᒌᖏᑦᑐᓪᓗ ᓄᓇᐃᑦ ᓴᔅᑲᑎᕗᐊᓐᒥ, ᔪᑲᓐᒥ ᓄᓇᑦᑎᐊᕐᒥᓗ. ᑕᐃᒪᐃᒃᑲᓗᐊᖅᑎᓪᓗᒍ, ᖃᐅᔨᒪᒋᑦᑎ ᑕᒪᒃᑭᖅᖢᓯ ᐃᓱᒪᒋᕙᔅᓯ ᑐᒃᓯᐅᑎᕙᔅᓯᓗ. ᖃᐅᔨᒪᒋᑦᑎ ᖃᐅᔨᒪᔪᖓ ᐊᒃᓱᕈᕐᔪᐊᕐᓂᕐᓂᒃ ᐅᖁᒪᐃᑦᑐᓂᒡᓗ, ᐊᒃᓱᕈᕐᓇᕐᓂᒃ ᐊᒡᕕᐊᕈᑎᓂᒡᓗ, ᐊᑐᖅᑕᐅᔪᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᓇᓂᓕᒫᖅ ᑕᕝᕙᓂ ᒐᕙᒪᖃᑎᒌᓂ. ᐅᖃᖅᑕᒃᑲ ᑕᕝᕙᓂ ᒪᒥᐊᓐᓂᕐᒧᑦ ᐅᐸᒃᓯᒪᓂᕐᓂᓐᓂ ᑐᕌᖅᑐᑦ ᑕᒪᒃᑮᓕᒫᓄᑦ ᓄᓇᖃᖅᑳᖅᓯᒪᔪᓄᑦ ᓄᓇᓕᖕᓄᑦ ᐃᓄᖕᓄᓪᓗ. ᐃᕿᑕᐃᓐᓇᕆᕙᔅᓯ ᐅᖓᓪᓗᓯ.

ᑕᕝᕙᓂ ᓯᕗᓪᓕᖅᐹᒥ ᐱᒋᐊᕈᑎᓐᓂ ᑕᕝᕙᓂ ᓇᒧᙵᐅᓂᓐᓂ, ᐱᕕᓕᐅᕈᒪᓚᐅᕋᒪ ᐃᖅᑲᐅᒪᓂᕐᓄᑦ. ᑕᕝᕙᓂ, ᐅᓪᓗᒥ ᑕᕝᕙᓃᖃᑎᒋᕙᔅᓯ ᐃᖅᑲᕐᓗᒋᑦ ᕿᒪᒃᑕᑦᑎᓐᓂ ᖃᓄᐃᓚᐅᖅᑐᑦ, ᓂᕕᐅᖃᑎᒋᓗᓯ, ᓂᐊᖁᕗᑦ ᐅᑯᓗᒋᑦ ᓂᐱᖃᖏᑦᑐᒥ ᑐᒃᓯᐊᕐᓗᑕᓗ ᓵᖏᓐᓂ ᐃᓗᕖᑦ. ᐱᕕᒋᔾᔪᑎᒋᓚᐅᕐᓚᕗᑦ ᑖᒃᑯᐊ ᓂᐱᖃᖏᓐᓃᑦ ᐃᑲᔫᑎᒋᓗᒋᑦ ᐃᓗᒦᖁᓪᓗᒋᑦ ᐋᓐᓂᐊᕐᓂᕗᑦ. ᓂᐱᖃᖏᓐᓂᖅ. ᑐᒃᓯᐊᕐᓂᕐᓗ. ᓵᖓᓂ ᐱᐅᖏᑦᑐᕐᔪᐊᑉ, ᑐᒃᓯᐊᖅᐳᒍᑦ ᐊᑕᓂᕐᒧᑦ ᐱᐅᓂᕐᓄᑦ, ᓵᖓᓂ ᑐᖂᑉ, ᑐᒃᓯᐊᖅᐳᒍᑦ ᐃᓅᓯᐅᑉ ᒎᑎᐊᓄᑦ.  ᐊᑕᓂᕗᑦ ᔩᓱᓯ ᑯᕋᐃᔅᑑᓯ ᐃᓗᕕᖅᑕᐅᓚᐅᖅᑐᖅ, ᐃᓗᕕᐅᖅᑰᔨᓪᓗᓂ ᖃᓄᐃᖁᔭᐅᔪᓕᒫᓄᑦ ᐊᑐᖅᑕᐅᔪᒪᔪᓕᒫᓄᓪᓗ, ᕿᒪᐃᓪᓗᓂ ᓄᒫᓱᖕᓂᑐᐊᕐᒥᒃ, ᐋᓐᓂᐊᕐᓂᕐᒥᒃ ᓴᐱᓕᕐᓂᕐᒥᒡᓗ, ᓴᓇᓪᓗᓂᐅᒡᓗ ᐃᓅᒃᑲᓐᓂᕐᕕᖕᒧᑦ ᐆᒻᒪᒃᑲᓐᓂᕐᓂᕐᒧᓪᓗ, ᐱᒋᐊᕐᓂᐅᓪᓗᓂ ᕿᒪᒃᑕᑦᑎᓐᓂ ᖃᓄᐃᑦᑐᓄᑦ ᓄᑖᒥ ᐃᓅᓯᕐᒥ ᑭᒃᑯᓕᒫᓄᓪᓗ ᐱᑦᑎᐊᓕᕐᓂᕐᓄᑦ. ᓇᖕᒥᓂᖅ ᖃᓄᐃᓐᓇᓱᒃᑕᕗᑦ ᒥᑭᓗᐊᕐᒪᑕ ᒪᒥᓐᓂᕐᓄᑦ ᐱᑦᑎᐊᓕᕐᓂᕐᓄᓪᓗ: ᐱᔭᕆᐊᖃᕋᑦᑕ ᒎᑎᐅᑉ ᓂᑲᒍᓱᖕᓂᖓᓂᒃ. ᐱᖃᕆᐊᖃᕋᑦᑕ ᓂᐱᑭᑦᑐᒥᒃ  ᓴᙱᔪᐊᓗᖕᒥᒡᓗ ᓄᑭᒥᒃ ᐊᓂᕐᓂᕐᔪᒃ ᐃᔾᔪᕐᓇᐃᑦᑐᕐᒥᑦ, ᓂᑲᒍᓱᒃᑐᒥᒃ ᓇᒡᓕᖕᓂᕐᒥᒃ ᓴᐃᒻᒪᖅᓴᐃᔨᒥᑦ. ᑕᐃᒪᐃᑎᓐᓂᐊᖅᐸᐃᑦ ᓂᕆᐅᒋᓛᕆᔭᕗᑦ ᐆᒻᒪᑎᑦᑎᓐᓂ. ᑐᕌᖅᑎᓪᓚᒋᑦ ᑐᑎᔭᕗᑦ ᐱᔪᓐᓇᖅᑎᓪᓗᑎᒍᓪᓗ ᓯᕗᒧᐊᖃᑎᒌᒡᓗᑕ ᓇᒧᙵᐅᓂᑦᑎᓐᓂ.