ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐊᑐᐊᒐᕐᒧᑦ ᐋᖅᑭᑦᓱᖅᓯᒪᔾᔪᑎ: ᐊᑦᑕᕐᓇᔾᔭᐃᖅᓯᒪᓂᕐᒧᑦ, ᐅᐊᑦᓯᔨᐅᓂᕐᒧᑦ, ᐊᒻᒪᓗ ᓴᐳᔾᔨᓯᒪᓂᕐᒧᑦ ᑎᑎᕋᖅᓯᒪᔪᑦ

ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ, ᑕᐃᒪᐃᒻᒪᑦ ᑲᓇᑕᓕᒫᒥᑦ, ᐊᑦᑕᕐᓇᔾᔭᐃᖅᓯᒪᓂᖅ, ᐅᐊᑦᓯᔨᐅᓂᕐᒧᑦ ᐊᒻᒪᓗ ᓴᐳᔾᔨᓯᒪᓂᕐᒧᑦ ᐱᒻᒪᕆᐅᖃᑕᐅᔪᑦ ᐋᓐᓂᐊᖃᖅᑕᐃᓕᔪᓄᑦ ᓄᓇᓕᓄᑦ, ᓴᙱᔪᓄᑦ ᑮᓇᐅᔾᔭᑦᓴᐅᑎᑦᓴᓄᑦ, ᐊᒻᒪᓗ ᒪᑭᒪᑦᓯᐊᖅᑐᒧᑦ ᐊᕙᑎᒧᑦ. ᑖᓐᓇ ᑎᑎᕋᖅᓯᒪᔪᖅ ᑖᑦᓱᒧᖓ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐊᑐᐊᒐᕐᒧᑦ ᐋᖅᑭᑦᓱᖅᓯᒪᔾᔪᑎ ᐋᖅᑭᑦᓱᐃᓲᖅ ᑐᕌᖅᑕᐅᓇᓱᐊᖅᑐᓂᑦ ᐊᒻᒪᓗ ᖃᓄᐃᓕᐅᕈᑎᑦᓴᓂᑦ ᑲᓇᑕᐅᑉ ᒐᕙᒪᒃᑯᖏᑦ ᑲᔪᓯᑎᓛᖅᑕᖏᓐᓂᒃ ᑎᑭᓪᓗᒍ 2030 ᐃᓚᒋᔭᐅᓪᓗᓂ ᐊᖏᖅᓯᒪᓂᕐᒥᓄᑦ ᐊᑦᑕᕐᓇᔾᔭᐃᖅᓯᒪᓂᕐᒧᑦ, ᐅᐊᑦᓯᔨᐅᓂᕐᒧᑦ, ᐊᒻᒪᓗ ᓴᐳᔾᔭᐅᓯᒪᑦᓯᐊᖅᑐᒧᑦ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ, ᐊᒻᒪᓗ ᑲᔪᓰᓐᓇᖅᑐᒥ ᑕᑯᑦᓴᐅᑎᑦᓯᓂᕐᒥᑦ ᑲᓇᑕᐅᑉ ᓴᐳᔾᔨᓂᕆᔭᖓᓂ ᓄᓇᖁᑎᑦᑎᓐᓂᒃ ᐊᒻᒪᓗ ᐃᒪᖁᑎᑦᑎᓐᓂᒃ.

ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᒐᕙᒪᐃᑦ ᐊᒻᒪᓗ ᓄᓇᓖᑦ ᑐᙵᕕᒋᔭᐅᔪᑦ ᐅᐊᑦᓯᔨᐅᓂᕐᒧᑦ ᓄᓇᒋᔭᐅᔪᒥ. ᑲᑐᔾᔨᖃᑎᒌᓐᓂᖅ, ᐃᑲᔪᖅᑎᒌᓐᓂᖅ ᐊᒻᒪᓗ ᓯᕗᓕᖅᑎᐅᖃᑎᒌᓐᓂᖅ ᐱᒻᒪᕆᐅᖃᑕᐅᔪᑦ ᓴᖅᑭᔮᖅᑎᑦᓯᓂᕐᒥᑦ ᐅᐊᑦᓯᔨᐅᓂᕐᒧᑦ ᐊᔾᔨᐅᙱᑦᑐᒥᑦ, ᐱᔭᕆᐊᑐᔪᒥᑦ ᐊᒻᒪᓗ ᐊᖏᔪᒥᑦ ᐃᓂᒋᔭᐅᔪᒥᑦ. ᑲᑐᔾᔨᖃᑎᒌᓐᓂᒃᑯᑦ ᑕᑎᒋᔭᐅᔪᓂᒃ ᓄᓇᕐᔪᐊᓕᒫᒥ ᑕᐱᕆᔭᐅᔪᓂᒃ ᐊᒻᒪᓗ ᖁᑦᓯᓐᓂᐅᔪᓕᒫᓂᑦ ᒐᕙᒪᒥᑦ, ᐃᓚᒋᓪᓗᓂᒋᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᑦ, ᑲᑐᔾᔨᖃᑎᒌᖏᑦ ᐊᒻᒪᓗ ᒐᕙᒪᖏᑦ, ᑲᓇᑕ ᑲᔪᓯᓂᐊᖅᑐᖅ ᓴᐳᔾᔨᓯᒥᓂᕐᒥᑦ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ ᐃᓄᖁᑎᒋᔭᐅᔪᓂᒃ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ, ᒫᓐᓇᐅᔪᖅ ᐊᒻᒪᓗ ᓯᕗᓂᑦᓴᒧᑦ.

ᓂᕈᐊᕆᑦ ᐅᖃᐅᓯᐅᔪᒥᒃ

ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᐅᐊᑦᓯᔨᐅᓂᕐᒧᑦ ᐊᕙᑎᖓ

ᐊᖏᓪᓕᕙᓪᓕᐊᔪᖅ ᓄᓇᕐᔪᐊᓕᒫᒥ ᐱᓕᕆᐊᖃᕈᒪᓂᖏᓐᓂᒃ ᐊᒻᒪᓗ ᓵᓚᖃᕋᓱᐊᕐᓂᖏᓐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᓄᓇᖁᑎᒋᔭᐅᔪᓂ ᐊᒻᒪᓗ ᓄᓇᖁᑎᒋᔭᐅᙱᑦᑐᓂᒃ ᐆᑦᑐᕋᖅᑎᓂᒃ ᐱᓕᕆᐊᖃᖃᑕᐅᒍᒪᔪᓂᒃ ᓄᓇᒋᔭᐅᔪᓂ ᓄᓇᒥᙶᖅᑐᓂᒃ ᐃᑲᔫᑎᑦᓴᓂᑦ ᐊᒻᒪᓗ ᐅᐸᓗᖓᐃᔭᓂᕐᒧᑦ ᖃᓄᐃᓕᖓᓂᕆᔭᖏᓐᓂᒃ. ᑕᐃᒪᐃᓕᖓᓕᖅᑐᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ, ᓯᕗᒧᐊᕈᑕᐅᔪᓪᓗ ᖃᕋᓴᐅᔭᓕᕆᔾᔪᑎᓄᑦ, ᐊᑐᐃᓐᓇᐅᑎᑦᓯᓂᖅᓴᐅᓕᖅᑎᑦᓯᑎᓪᓗᒋᑦ ᓄᓇᒋᔭᐅᔪᓂ ᐱᔭᕆᐊᑭᓐᓂᖅᓴᐅᔪᒥ. ᑲᓇᑕᐅᑉ ᐅᑭᐅᖅᑕᖅᑐᖓ ᑕᐃᒪᐃᓕᖓᔪᑐᖃᐅᑎᓪᓗᒍ — ᐊᒻᒪᓗ ᑕᐃᒪᐃᓕᖓᐃᓐᓇᖅᑎᓪᓗᒍ — ᓄᓇᒋᔭᐅᓪᓗᓂ ᑐᙵᑦᓯᐊᖅᑐᒥᑦ ᐊᒻᒪᓗ ᓴᐃᓕᓇᖅᑐᒥ, ᐊᒥᓱᕈᖅᐸᓪᓕᐊᓂᖏᑦ ᓵᓚᖃᕋᓱᐊᖅᑐᑦ ᐊᒻᒪᓗ ᐊᑐᐃᓐᓇᖃᕐᕕᐅᓂᖅᓴᐅᓂᕐᒥᑦ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ ᐊᑦᓱᕈᕈᑕᐅᔪᓂᒃ ᓴᖅᑮᓕᖅᑐᖅ ᑲᓇᑕ ᐱᕙᒌᔭᖅᓯᒪᔭᕆᐊᓕᒃ ᐱᓕᕆᐊᖃᕐᓂᕐᒧᑦ.

ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᒻᒪᓗ ᐊᑐᐃᓐᓇᖃᕐᑯᐅᓂᖅᓴᐅᓂᕐᒥᑦ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᓄᓇᒋᔭᐅᔪᓂ

ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᖏᔪᐊᓗᒻᒥ ᐊᑦᑐᐃᓂᖃᖅᓯᒪᓕᖅᑐᖅ ᐃᓅᓯᕆᔭᐅᔪᓂᑦ ᐊᒻᒪᓗ ᖃᓄᐃᙱᑦᓯᐊᕐᓂᖏᓐᓂᒃ ᐅᐊᓐᓇᖓᓂᕐᒥᐅᑕᓄᑦ. ᖃᓄᐃᕐᔪᐊᕐᓃᑦ ᓯᓚ ᐱᔾᔪᑎᒋᓪᓗᒍ, ᓲᕐᓗ ᐱᖅᓯᖅᑐᒻᒪᕆᐅᑎᓪᓗᒍ, ᓇᐹᖅᑐᐃᑦ ᐃᑯᐊᓪᓚᓐᓂᖏᑦ, ᐊᒻᒪᓗ ᖄᒥᓯᒪᓃᑦ ᓴᖅᑭᓂᖅᓴᐅᖃᑦᑕᓕᖅᑐᑦ ᐊᑦᓱᕈᕐᓂᖅᓴᐅᓪᓗᑎᓗ. ᑖᒃᑯᐊ ᖃᓄᐃᕐᔪᐊᕐᓃᑦ ᐃᕐᖐᓐᓇᖅ ᐅᓗᕆᐊᓵᕐᓂᐅᑐᐃᓐᓇᖏᑦᑐᑦ ᐃᓅᓯᕆᔭᐅᔪᓄᑦ ᐊᒻᒪᓗ ᐱᖁᑎᒋᔭᐅᔪᓄᑦ ᐅᐊᓐᓇᖓᓂᕐᒥᐅᑕᓄᑦ, ᑭᓯᐊᓂ ᐊᑦᑐᐃᓂᖃᕈᓐᓇᕐᒥᔪᑦ ᐅᐊᑦᓯᔭᐅᓂᖏᓐᓄᑦ ᓄᓇᓕᐅᔪᓂ ᓱᕋᐃᓂᒃᑯᑦ ᐱᒻᒪᕆᐅᒋᔭᐅᔪᓂᒃ ᐃᖏᕐᕋᔪᓕᕆᓂᕐᒧᑦ ᐊᒻᒪᓗ ᑐᓴᐅᒪᔾᔪᑎᓕᕆᓂᕐᒧᑦ ᑲᓲᒪᓂᐅᔪᓂᒃ ᐅᐊᓐᓇᖓᓂᕐᒥᐅᑕᓄᑦ ᐊᑐᖅᑕᐅᖃᑦᑕᖅᑐᓄᑦ. ᐊᓯᖏᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᑦᑐᐃᓂᐅᔪᑦ, ᐃᓚᒋᓪᓗᓂᐅᒃ ᓇᓚᐅᑦᑖᕐᓇᕈᓐᓃᖅᐸᓪᓕᐊᑐᐃᓐᓇᖅᑐᖅ ᓯᓚᐅᑉ ᖃᓄᐃᓐᓂᖓᓄᑦ, ᓄᓇᐅᑉ ᖁᐊᖑᓂᖓ ᒪᕐᖑᖅᐸᓪᓕᐊᓂᖓ, ᐊᒻᒪᓗ ᑕᕆᐅᑉ ᓯᑯᐊ ᐊᓯᔾᔨᖅᐸᓪᓕᐊᓂᖓ, ᐊᑦᑐᐃᓂᖃᕈᓐᓇᖅᑐᖅ ᓂᕿᑦᓴᖃᑦᓯᐊᕐᓂᕐᒥᑦ, ᐃᖏᕐᕋᔪᓕᕆᓂᖅ ᐊᒻᒪᓗ ᓅᖃᑦᑕᕐᓂᐅᔪᖅ ᐊᑦᓱᕈᕐᓇᕐᓂᖅᓴᐅᓕᕐᓗᓂ, ᐊᒻᒪᓗ ᐅᓗᕆᐊᓇᖅᑐᒦᑎᑦᓯᓗᓂ ᖃᓄᐃᓐᓂᖏᓐᓄᑦ ᐊᒻᒪᓗ ᐊᐅᓚᓂᖏᓐᓄᑦ ᐊᑦᑕᕐᓇᑦᑐᓂᑦ ᐆᒪᔪᖃᕐᕕᐅᔪᓂᑦ.

ᐅᖓᓯᑦᑐᒦᓐᓂᖏᑦ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᓄᓇᓕᐅᔪᑦ ᐊᑦᓱᕈᕐᓇᕈᑕᐅᒻᒥᔪᖅ ᑖᒃᑯᓄᖓ ᐱᕐᔪᐊᕆᔭᐅᔪᓄᑦ ᓄᓇᓖᑦ ᐊᑐᖅᐸᑦᑕᖏᓐᓂᒃ ᐊᐅᓚᔪᓐᓇᖁᓪᓗᒋᑦ (CI) ᐊᒻᒪᓗ ᑐᐊᕕᕐᓇᖅᑐᒥᑦ ᐊᐅᓚᑦᓯᓂᕐᒥᑦ (EM) ᐃᓱᒪᒋᔭᐅᔭᕆᐊᓖᑦ, ᓱᒃᑲᓕᒋᐊᖅᑐᑦᓴᐅᒐᔭᖅᑐᑦ ᐱᔾᔪᑎᖃᕐᓗᑎᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᓯᑰᑉ ᐊᐅᑉᐸᓪᓕᐊᓂᖓ ᐱᔾᔪᑕᐅᓕᕈᓐᓇᖅᑐᖅ ᐊᒥᓱᕈᕆᐊᕐᓂᖏᓐᓂᒃ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᐱᔭᐅᔭᕆᐊᓕᓐᓂᒃ ᐅᐊᓐᓇᖓᓂ. ᑕᐃᒪᐃᑎᓪᓗᒍ, ᓇᐅᑦᑎᖅᓱᕐᓂᕆᔭᖓᓂ ᐊᔪᙱᓐᓂᐅᔪᑦ ᓯᑰᑉ ᖃᓄᐃᑦᑑᓂᖓᓄᑦ ᐊᒻᒪᓗ ᐱᖃᓗᔭᕐᓂᒃ ᑲᔪᓯᑎᑕᐅᒋᐊᖃᕐᓂᐊᖅᑐᑦ ᐃᑲᔪᖅᓱᓂᕐᒧᑦ ᐃᒫᓂ ᐃᖏᕐᕋᓂᐅᕙᑦᑐᒥᑦ ᐅᐊᓐᓇᖓᓂ ᐃᒪᖁᑎᖏᓐᓂᒃ ᐊᒻᒪᓗ ᐱᑕᖃᓗᐊᖅᑕᐃᓕᒪᑎᑦᓯᓂᕐᒥᑦ ᑐᐊᕕᕐᓇᖅᑐᒥᑦ ᐊᐅᓚᑦᓯᓂᕐᒥᑦ ᐱᓕᕆᐊᖃᕐᓂᕐᒧᑦ ᑐᑦᓯᕋᐅᑕᐅᔪᓂᒃ ᐱᑕᖃᓗᐊᖅᑕᐃᓕᒪᑎᑦᓯᓂᕐᒥᑦ ᐊᒻᒪᓗ ᑕᐃᒪᐃᑎᑦᓯᑦᑕᐃᓕᒪᓂᒃᑯᑦ. ᐱᕐᔪᐊᕆᔭᐅᔪᓄᑦ ᓄᓇᓖᑦ ᐊᑐᖅᐸᑦᑕᖏᓐᓂᒃ ᐊᐅᓚᔪᓐᓇᖁᓪᓗᒋᑦ ᐱᔭᐅᔭᕆᐊᓖᑦ ᐃᓱᒪᑦᓴᖅᓯᐅᕆᐊᖃᕐᓂᐊᖅᑐᑦ ᐊᓯᔾᔨᖅᐸᓪᓕᐊᔪᒧᑦ ᖃᓄᐃᑦᑑᓂᖏᓐᓄᑦ ᐊᒻᒪᓗ ᐊᕙᑎᖓᓄᑦ ᖃᐅᔨᒪᑦᓯᐊᕆᐊᕐᓂᕐᒥᑦ ᐊᑐᑦᓯᐊᖏᓐᓇᕋᓗᐊᕐᒪᖔᑦᑕ ᐱᒻᒪᕆᐅᒋᔭᐅᔪᓂᒃ ᐱᔨᑦᓯᕋᐅᑎᓂᒃ ᐊᒻᒪᓗ ᐊᔪᙱᓐᓂᐅᔪᓂᒃ. ᐱᓗᐊᙳᐊᖅᑐᒥ, ᐊᑦᓱᕈᖅᑐᖅ ᐱᕐᔪᐊᕆᔭᐅᔪᓄᑦ ᓄᓇᓖᑦ ᐊᑐᖅᐸᑦᑕᖏᓐᓂᒃ ᐊᐅᓚᔪᓐᓇᖁᓪᓗᒋᑦ ᐱᔭᐅᔭᕆᐊᓕᒃ ᐃᑲᔪᖅᓱᓂᕐᒧᑦ ᑐᓴᐅᒪᔪᓕᕆᓂᕐᒧᑦ, ᑐᐊᕕᕐᓇᖅᑐᒥᑦ ᐊᐅᓚᑦᓯᓂᕐᒥᑦ ᐊᒻᒪᓗ ᐅᓇᑕᖅᑐᑦᓴᒃᑯᑦ ᐊᔪᙱᓐᓂᕆᔭᖏᑦ, ᐊᒻᒪᓗ ᐊᑦᑕᕐᓇᔾᔭᐃᖅᓯᒪᓂᒃᑯᑦ ᐃᖏᕐᕋᔪᓕᕆᓂᕐᒥᑦ ᓄᓇᒋᔭᐅᔪᓂ.

ᐅᑭᐅᖅᑕᖅᑐᒥ ᐃᒫᓂ ᐃᖏᕐᕋᓂᐅᕙᑦᑐᑦ

ᐊᕐᕌᒍᑕᒫᑦ, ᐅᒥᐊᕐᔪᐊᑦ ᐊᒥᓲᓂᖅᓴᑦ, ᐃᓚᒋᓪᓗᓂᒋᑦ ᒐᕙᒪᒃᑯᑦ ᖃᐅᔨᓴᕐᓂᕐᒧᑦ ᐅᒥᐊᕐᔪᐊᖏᑦ ᐊᒻᒪᓗ ᓂᐅᕐᕈᑎᖃᕐᓂᕐᒧᑦ ᐅᓯᖃᑦᑕᖅᑐᑦ ᐅᒥᐊᕐᔪᐊᑦ, ᐃᖏᕐᕋᖃᑦᑕᖅᑐᑦ ᐅᐊᓐᓇᖓᓂ ᐃᒪᐅᔪᓂ. 2017-ᒥ, ᐅᖓᑖᓂ 190 ᐅᒥᐊᕐᔪᐊᑦ ᐅᓂᒃᑳᓕᐅᓚᐅᖅᑐᑦ 385-ᓂᒃ ᐃᖏᕐᕋᓂᕋᐃᓪᓗᑎᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ, 22 ᐳᓴᓐᑎᒥᒃ ᐊᒥᓱᕈᕆᐊᖅᑐᑦ ᑕᐃᒪᙵᓂ 2016-ᒥ.

ᐳᓚᕋᖅᑐᓕᕆᓂᕐᒧᑦ ᐅᒥᐊᕐᔪᐊᑦ ᑕᑯᔭᐅᒐᔪᓲᖑᒻᒥᔪᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ. 2016-ᒥ, ᐅᐊᓐᓇᖓᓂᕐᒥᐅᑦ ᑕᑯᓚᐅᖅᑐᑦ ᓯᕗᓪᓕᖅᐹᒥᑦ ᓄᑖᖑᔪᒥᑦ, 1000-ᓂᒃ ᐃᓄᖃᕈᓐᓇᖅᑐᒥᒃ, ᑕᕆᐅᑉ ᐊᑭᐊᓂ ᑐᙵᕕᖃᖅᑐᒥᑦ ᑲᔾᔭᐅᓴᕆᐊᖅᑐᓄᑦ ᐅᒥᐊᕐᔪᐊᕐᒥᑦ ᑕᐃᑰᓅᓚᐅᖅᑐᖅ ᑕᓪᓕᕈᑎᐅᑉ ᐊᖅᑯᑎᖓᒍᑦ.

ᐆᓇᖅᓯᕙᓪᓕᐊᓂᖓ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᒪᓂᒪᑎᑦᓯᒐᓗᐊᖅᑎᓪᓗᒍ ᑮᓇᐅᔾᔭᓴᕐᓂᕐᒧᑦ ᐱᕕᑦᓴᖃᕐᓂᐅᔪᓂᒃ, ᓇᑦᓴᒍᓐᓇᕋᔭᖅᑐᓂᒃ ᐱᔭᐅᔭᕆᐊᖃᓪᓚᕆᑦᑐᓂᒃ ᐃᓅᓯᕐᒧᑦ ᑮᓇᐅᔾᔭᓴᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ, ᐃᖅᑲᓇᐃᔭᕐᓂᕐᒧᑦ ᐊᒻᒪᓗ ᓄᓇᓖᑦ ᐊᑐᖅᐸᑦᑕᖏᓐᓂᒃ ᐊᐅᓚᔪᓐᓇᖁᓪᓗᒋᑦ ᑮᓇᐅᔭᖃᖅᑎᑦᓯᓂᕐᒧᑦ ᐊᒥᒐᕆᔭᐅᔪᓂᒃ ᓄᓇᒋᔭᐅᔪᓂ, ᖃᓄᐃᓕᐅᕐᓂᖅᓴᐅᓂᖏᑦ ᓱᕋᐃᑐᐃᓐᓇᕆᐊᓕᒃ ᐆᒪᔪᖃᕐᕕᐅᔪᓂᒃ ᐅᓗᕆᐊᓇᖅᑐᒦᓕᖅᑎᑦᓯᒃᑲᓐᓂᑐᐃᓐᓇᕆᐊᖃᕆᓪᓗᓂ ᑐᕌᖓᔪᓂᒃ ᐊᐅᓚᔾᔭᕐᓂᕆᔭᖏᓐᓄᑦ ᐃᓄᐃᑦ ᐊᒻᒪᓗ ᓱᓇᒃᑯᑖᑦ, ᐱᓕᕆᐊᖃᕈᒪᓂᖏᑦ ᑕᕆᐅᑉ ᐊᑭᐊᓂ ᓄᓇᖁᑎᒋᔭᐅᔪᓂ ᐊᒻᒪᓗ ᓄᓇᖁᑎᒋᔭᐅᔪᓂᙶᖏᑦᑐᓂᒃ ᐆᑦᑕᕋᖅᑎᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᐊᕕᑦᑐᖅᓯᒪᔪᓂ ᐅᑭᐅᖅᑕᖅᑐᒥ, ᐊᒻᒪᓗ ᐃᓄᓐᓄᑦ ᐊᐅᓚᑕᐅᔪᓂᑦ ᖃᓄᐃᕐᔪᐊᕐᓂᐅᔪᓂᑦ. ᐊᔪᕐᓇᙱᑦᑐᖅ ᑕᐅᑐᙳᐊᕐᓗᓂ, ᓲᕐᓗ, ᖃᓄᖅ ᐃᒻᒥᓂ ᐱᔪᒥᑦ ᐅᑭᐅᖅᑕᖅᑐᒥ ᐃᓄᓐᓄᑦ ᐊᐅᓚᑕᐅᔪᓂᑦ ᖃᓄᐃᕐᔪᐊᕐᓂᐅᔪᑦ ᐅᑭᐅᖅᑕᖅᑐᒥ ᓄᓇᒋᔭᐅᔪᓂᑦ ᐊᑦᓱᕈᖅᑎᑦᓯᒐᔭᕐᒪᖔᖅ ᐊᔪᙱᓐᓂᕆᔭᐅᔪᓂᒃ ᖁᑦᓯᓐᓂᐅᔪᓕᒫᓂᑦ ᒐᕙᒪᒃᑯᓐᓂ, ᓄᓇᓕᓐᓂᓗ, ᐃᑲᔪᖅᓱᓂᕐᒧᑦ ᐊᑦᑐᖅᑕᐅᓯᒪᔪᓂᑦ ᐃᓄᓐᓂᒃ ᐊᒻᒪᓗ ᓱᕋᐃᓗᐊᖅᑕᐃᓕᒪᑎᑦᓯᓂᕐᒥᑦ ᐊᑦᑐᖅᑕᐅᖃᓯᐅᑎᔪᓂᒃ ᐅᒪᔪᓂᒃ, ᓄᓇᓖᑦ ᐊᑐᖅᐸᑦᑕᖏᓐᓂᒃ ᐊᐅᓚᔪᓐᓇᖁᓪᓗᒋᑦ, ᐊᒻᒪᓗ ᐆᒪᔪᖃᕐᕕᐅᔪᓂᒃ.

ᐱᕈᖅᐸᓪᓕᐊᓂᖓ ᓄᓇᕐᔪᐊᓕᒫᒥ ᐱᓕᕆᐊᖃᕈᒪᓂᖏᓐᓂᒃ ᐅᑭᐅᖅᑕᖅᑐᒥ

ᑲᓇᑕ ᐃᕐᖐᓐᓇᖅ ᐅᓗᕆᐊᓵᕐᓂᐅᔪᓂᒃ ᑕᑯᙱᒃᑲᓗᐊᖅᑎᓪᓗᒋᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ, ᓄᓇᒋᔭᖓᑕ ᓴᖅᑭᔮᖅᑐᑦ ᐊᕙᑎᖓᓂ ᐊᓯᔾᔨᕐᓂᐅᔪᑦ, ᓄᓇᕐᔪᐊᑉ ᐅᑭᐅᖅᑕᖅᑐᖓ ᐅᐊᓐᓇᖓᓂ ᐅᐸᓗᖓᐃᔭᕐᓂᒃᑯᑦ ᓄᓇᕐᔪᐊᓕᒫᒥ ᐱᒻᒪᕆᐅᒋᔭᐅᓕᖅᑐᖅ, ᑕᒪᒃᑮ ᐅᑭᐅᖅᑕᖅᑐᒥ ᐊᒻᒪᓗ ᐅᑭᐅᖅᑕᖅᑐᒥᐅᑕᐅᙱᑦᑐᓂᑦ ᓄᓇᖁᑎᒋᔭᐅᔪᓂ ᓴᖅᑮᓯᒪᓪᓗᑎ ᐊᔾᔨᒌᙱᑦᑐᓂ ᑮᓇᐅᔾᔭᓴᕐᓂᕐᒧᑦ ᐊᒻᒪᓗ ᐅᓇᑕᖅᑐᑦᓴᓄᑦ ᐱᓕᕆᔪᒪᓪᓗᑎ ᓄᓇᒋᔭᐅᔪᓂ. ᐅᑭᐅᖅᑕᖅᑐᖅ ᐊᑐᐃᓐᓇᐅᓂᖅᓴᐅᓕᖅᑎᓪᓗᒍ, ᑖᒃᑯᐊ ᓄᓇᖁᑎᒋᔭᐅᔪᑦ ᐱᓕᕆᐊᖃᕈᒪᔪᑦ ᖃᐅᔨᓴᕐᓂᕐᒥᑦ, ᐃᖏᕐᕋᓗᑎ, ᐊᒻᒪᓗ ᐃᓚᐅᓂᖅᓴᐅᓗᑎ ᑕᐅᖅᓰᖃᑎᖃᕐᓂᕐᒥᑦ ᓄᓇᖁᑎᒋᔭᐅᔪᓂ. ᓄᓇᕐᔪᐊᓕᒫᒥ ᐱᓕᕆᐊᖃᕈᒪᓂᖏᓐᓄᑦ ᐊᒻᒪᓗ ᐊᑦᓱᕈᕐᓂᖏᓐᓄᑦ ᐅᑭᐅᖅᑕᖅᑐᒥ, ᑲᔪᓰᓐᓇᖅᑐᒥ ᐅᐊᑦᓯᔨᐅᓂᕐᒧᑦ ᐊᒻᒪᓗ ᓴᐳᔾᔨᓯᒪᓂᕐᒧᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐱᑕᖃᕆᐊᓕᒃ ᐊᑑᑎᖃᑦᓯᐊᖅᑐᓂᒃ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ ᐋᖅᑭᑦᓱᖅᓯᒪᔾᔪᑎᓂᒃ, ᑲᓇᑕᒥ ᓴᐳᔾᔨᓯᒪᓂᕐᒥᑦ, ᐊᒻᒪᓗ ᕿᒫᑎᑦᓯᓂᕐᒥᑦ.

ᐱᓗᐊᙳᐊᖅᑐᒥ, ᐊᑐᐃᓐᓇᖃᕐᕕᐅᓂᖅᓴᐅᓂᕐᒥᑦ ᐅᑭᐅᖅᑕᖅᑐᒥ ᐱᕚᓪᓕᕈᑕᐅᑐᐃᓐᓇᕆᐊᓕᒃ ᑕᕆᐅᑉ ᐊᑭᐊᓂᙶᖅᑐᓂᒃ ᐱᑕᖃᕐᓂᖅᓴᐅᓕᕐᓗᓂ ᑲᓇᑕᐅᑉ ᐅᑭᐅᖅᑕᖅᑐᖓᑕ ᐃᒪᖁᑎᖏᓐᓂ. ᑕᐃᒪᐃᓕᖓᑎᓪᓗᒍ, ᑲᓇᑕ ᐊᖏᖅᓯᒪᐃᓐᓇᖅᑐᖅ ᐱᓕᒻᒪᑦᓴᕐᓂᕐᒥᑦ ᓴᐳᔾᔨᓯᒪᓂᕆᔭᖓᓂ, ᐃᓚᒋᓪᓗᓂᒋᑦ ᐊᔾᔨᒌᙱᑦᑐᑦ ᐃᒫᓂ ᐊᖅᑯᑎᐅᔪᓂᒃ ᑕᐃᔭᐅᒐᔪᓲᖅ ᑕᓪᓕᕈᑎᐅᑉ ᐊᖅᑯᑎᖓᓂ.

ᐊᔾᔨᐸᓗᖓᓂ, ᑲᓇᑕᐅᑉ ᐅᑭᐅᖅᑕᖅᑐᖓ ᐊᒻᒪᓗ ᓄᓇᒥᙶᖅᑐᑦ ᐃᑲᔫᑎᑦᓴᑦ ᐱᓕᕆᐊᖑᔪᒪᔪᑦ ᑕᕆᐅᑉ ᐊᑭᐊᓂ ᓄᓇᖁᑎᒋᔭᐅᔪᓂ ᐊᒻᒪᓗ ᐱᓕᕆᕝᕕᐅᔪᓂ. ᑕᕆᐅᑉ ᐊᑭᐊᓂ ᑮᓇᐅᔭᖃᖅᑎᑦᓯᓂᕐᒧᑦ, ᖃᐅᔨᓴᕐᓂᖅ, ᐊᒻᒪᓗ ᖃᐅᔨᓴᖅᑐᓕᕆᓂᖅ ᐱᐅᓯᕚᓪᓕᖅᑎᑦᓯᒍᓐᓇᖅᑐᑦ ᐃᓅᓯᕆᔭᐅᔪᓂᒃ ᐅᐊᓐᓇᖓᓂᕐᒥᐅᑕᓄᑦ. ᑭᓯᐊᓂ, ᑖᒃᑯᐊ ᐃᓚᖏᑦ ᑮᓇᐅᔭᖃᖅᑎᑦᓯᓂᕐᒧᑦ ᐊᒻᒪᓗ ᑐᕌᖓᖃᓯᐅᑎᔪᑦ ᑮᓇᐅᔾᔭᓴᕐᓂᕐᒧᑦ ᖃᓄᐃᓕᐅᕈᑏᑦ ᓯᕗᒧᐊᖅᑎᑦᓯᒐᓱᐊᑐᐃᓐᓇᕆᐊᓖᑦ ᐱᔭᐅᔪᒪᔪᓂᑦ ᐊᑭᕋᕈᑕᐅᔪᓄᑦ ᑲᓇᑕᒦᑦᑐᓄᑦ. ᐃᓕᓴᖅᓯᓂᕐᒥᑦ ᑮᓇᐅᔾᔭᓴᕐᓂᕐᒧᑦ ᐱᕈᖅᐸᓪᓕᐊᓂᖏᑦ ᐊᒻᒪᓗ ᑮᓇᐅᔭᖃᖅᑎᑦᓯᓂᕐᒧᑦ ᐅᑭᐅᖅᑕᖅᑐᒥ ᐃᑲᔪᖅᓱᖅᑐᖅ ᐃᖅᑲᓇᐃᔮᑦᓯᐊᕙᓐᓂᒃ, ᐋᓐᓂᐊᖃᙱᑦᑐᓂᒃ ᐃᓄᓐᓂᒃ ᐊᒻᒪᓗ ᓴᙱᔪᓂᒃ ᓄᓇᓕᐅᔪᓂᒃ, ᐅᐊᑦᓯᔨᐅᓂᕐᒧᑦ ᐅᓗᕆᐊᓇᕈᑎᑕᖃᕐᒥᔪᖅ ᑐᕌᖓᖃᓯᐅᑎᔪᓂᒃ ᑖᒃᑯᓂᖓ ᑮᓇᐅᔭᖃᖅᑎᑦᓯᓂᐅᔪᓂᒃ ᐊᑦᑐᐃᓂᖃᕈᓐᓇᖅᑐᓂᒃ ᐅᐊᓐᓇᖓᓂᕐᒥᐅᑉ ᖃᓄᐃᙱᑦᓯᐊᕐᓂᕆᔭᖏᓐᓂᒃ. ᑲᓇᑕ ᑲᔪᓯᓂᐊᖅᑐᖅ ᓇᓕᒧᒌᓕᖅᑎᑦᓯᓂᕐᒥᑦ ᐱᔭᐅᔭᕆᐊᓕᓐᓂᒃ ᑮᓇᐅᔾᔭᓴᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᖃᐅᔨᒪᑦᓯᐊᕆᐊᓯᓐᓈᑦ ᐅᐊᑦᓯᔨᐅᓂᕐᒧᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᑲᔪᓯᑎᑕᐅᑦᓯᐊᕐᓗᓂ.

ᓄᓇᕐᔪᐊᑉ ᐅᑭᐅᖅᑕᖅᑐᖓ ᑕᐃᒪᐃᒋᐊᓕᒃ ᐊᒻᒪᓗ ᑕᐃᒪᐃᓪᓗᐊᖅᑐᖅ ᑲᔪᓰᓐᓇᖅᑐᒥ ᐱᕚᓪᓕᕈᑎᑖᕐᓗᓂ ᐃᓕᖅᑯᓯᕆᔭᐅᔪᒥᑦ ᓄᓇᕐᔪᐊᓕᒫᒥ ᐃᑲᔪᖅᑎᒌᓐᓂᕐᒧᑦ, ᑕᒪᓐᓇ ᐃᑲᔪᖅᑎᒌᓐᓂᖅ ᑐᕌᖓᓕᕈᑕᐅᒋᐊᖃᙱᑦᑐᖅ ᒪᓕᑦᑎᑦᓯᓂᕐᒧᑦ ᐱᓕᕆᐊᖃᕈᒪᓂᖅᓴᐅᓕᖅᑎᓪᓗᒋᑦ ᐊᒻᒪᓗ ᓵᓚᖃᕋᓱᐊᖅᑎᓪᓗᒋᑦ ᑕᒪᒃᑮᓐᓂ ᐅᑭᐅᖅᑕᖅᑐᒥ ᐊᒻᒪᓗ ᐅᑭᐅᖅᑕᖅᑐᒥᐅᑕᐅᙱᑦᑐᓂᑦ ᓄᓇᖁᑎᒋᔭᐅᔪᓂ ᑕᐅᑐᑦᑐᓂᑦ ᓄᓇᒋᔭᐅᔪᓂ ᒐᕙᒪᓕᕆᓂᕐᒧᑦ, ᑮᓇᐅᔾᔭᓴᕐᓂᕐᒧᑦ, ᖃᐅᔨᓴᖅᑐᓕᕆᓂᕐᒧᑦ, ᐊᒻᒪᓗ ᐅᐸᓗᖓᐃᔭᓂᕐᒧᑦ ᐊᒻᒪᓗ ᐅᓇᑕᖅᑐᑦᓴᓄᑦ ᐊᑐᖅᑕᐅᒍᓐᓇᕐᓂᖓᓂ. ᐃᓛᓐᓂᒃᑯᑦ, ᓄᓇᖁᑎᒋᔭᐅᔪᓂ ᐱᓕᕆᐊᖃᕈᒪᔪᓂᑦ ᐅᑭᐅᖅᑕᖅᑐᒥ ᐊᑐᖃᑦᑕᖅᑐᑦ ᐊᒥᓱᓂᑦ ᐅᓇᑕᖅᑐᑦᓴᓂᑦ ᐊᔪᙱᓐᓂᐅᔪᓂᒃ ᐊᒻᒪᓗ ᐊᓯᖏᓐᓂᒃ ᓄᓇᖁᑎᒋᔭᐅᔪᓂ ᐊᐅᓚᑕᐅᔪᓂᒃ ᐱᖁᑎᓂᑦ ᓄᐊᑦᓯᑎᓪᓗᒋᑦ ᐊᔪᙱᓐᓂᕐᔪᐊᓂᒃ ᐊᒻᒪᓗ ᐋᖅᑭᑦᓯᒪᒐᓱᐊᖅᑎᓪᓗᒋᑦ ᐊᑐᐃᓐᓇᖃᕐᕕᐅᓂᕐᒥᑦ ᐅᕝᕙᓘᓐᓃᑦ ᐊᐅᓚᑦᓯᓂᕐᒥᑦ ᐃᑉᐱᒋᓴᐅᔭᕋᐃᑦᑐᓂᒃ ᐃᓂᓂ, ᓄᓇᓖᑦ ᐊᑐᖅᐸᑦᑕᖏᓐᓂᒃ ᐊᐅᓚᔪᓐᓇᖁᓪᓗᒋᑦ, ᐊᒻᒪᓗ ᐅᐸᓗᖓᐃᔭᕐᓂᕐᒧᑦ ᐃᑲᔫᑎᑦᓴᓂᑦ — ᑕᑯᑦᓴᐅᑐᐃᓐᓇᕆᐊᓖᑦ ᐱᕙᓪᓕᐊᕈᑕᐅᓪᓗᑎ ᖃᓄᐃᓕᐅᕈᑕᐅᓪᓗᑎ. ᖄᒃᑲᓐᓂᐊᒍᑦ, ᓱᒃᑲᓕᔪᒥ ᐊᓯᔾᔨᕐᓂᐅᔪᑦ ᐅᓇᑕᖅᑐᑦᓴᓂᑦ ᐊᒻᒪᓗ ᐅᐸᓗᖓᐃᔭᕐᓂᕐᒧᑦ ᖃᕋᓴᐅᔭᓕᕆᔾᔪᑎᓄᑦ ᐃᓚᒋᓪᓗᓂᐅᒃ ᑎᒍᒥᐊᒐᓄᑦ ᐊᐅᓚᑕᐅᔪᓄᑦ ᐱᓕᕆᔾᔪᑎᓂ, ᓵᓚᖃᕋᓱᐊᕐᓂᐅᔪᓪᓗ ᓄᑖᓂᒃ ᐊᔾᔨᒌᙱᑦᑐᓂᑦ ᓲᕐᓗ ᕿᓚᒻᒥ, ᖃᕋᓴᐅᔭᑎᒍᑦ ᐃᓕᓴᖅᓯᔪᓐᓇᖅᓯᓂᕐᒥᑦ, ᐊᒻᒪᓗ ᐃᑭᐊᖅᑭᕕᒃᑯᑦ, ᐊᑦᓱᐊᓗᒃ ᐊᑦᑐᐃᓂᖃᕐᓂᐊᖅᑐᑦ ᖃᓄᖅ ᓄᓇᖁᑎᒋᔭᐅᔪᑦ ᑲᔪᓯᑎᑦᓯᕙᒻᒪᖔᑦ ᐱᓕᕆᐊᕆᔪᒪᔭᒥᓂᒃ, ᐊᔪᙱᓐᓂᖃᓕᖅᓱᑎᓪᓗ ᐱᓕᕆᑎᑦᓯᓂᕐᒥᑦ ᐅᓇᑕᖅᑐᑦᓴᓂᑦ ᐅᑭᐅᖅᑕᖅᑐᒥ ᐊᒻᒪᓗ ᓄᐊᔅ ᐊᒥᐊᓕᒐᒥ. ᐅᖓᓯᑦᑐᒨᖓᔪᑦ ᑐᕌᖅᑕᐅᓇᓱᐊᖅᑐᓂᑦ ᐃᓚᖏᓐᓄᑦ ᑖᒃᑯᓄᖓ ᓄᓇᖁᑎᒋᔭᐅᔪᓂ ᑐᑭᓯᓇᓗᐊᙱᑦᑐᑦ, ᐊᒻᒪᓗ ᐱᓕᕆᐊᖃᕈᒪᓂᖏᑦ ᑐᑭᓕᕇᙱᑐᐃᓐᓇᕆᐊᓖᑦ ᐅᕙᒍᑦ ᐱᖏᓐᓄᑦ.

ᑲᓇᑕᐅᑉ ᐱᓕᕆᐊᖃᕈᒪᓂᖓ ᑲᔪᓯᑎᑦᓯᓂᕐᒥᑦ ᐊᑯᓂᐊᓗᒃ ᓴᐃᓕᓇᖅᑐᒥ ᐊᒻᒪᓗ ᑐᙵᑦᓯᐊᖅᑐᒥᑦ ᓄᓇᒋᔭᐅᔪᓂ. ᑲᓇᑕ ᒪᑐᐃᖓᔪᖅ ᐃᑲᔪᖅᑎᒌᓐᓂᕐᒥᑦ ᐊᓯᖏᓐᓂᒃ ᓄᓇᖁᑎᒋᔭᐅᔪᓂ ᐱᔾᔪᑎᒋᓪᓗᒍ ᐅᑭᐅᖅᑕᖅᑐᖅ, ᐅᐊᑦᓯᔨᐅᓂᕐᒧᑦ ᓯᕗᓪᓕᐅᑎᔭᐅᒍᒪᔪᖅ ᓴᐳᔾᔨᓯᒪᐃᓐᓇᕐᓗᑕ ᐅᐊᓐᓇᖓᓂᕐᒥᐅᑕᓂᑦ ᐊᒻᒪᓗ ᐊᖏᓂᖅᓴᒥᑦ ᑲᓇᑕᒥ ᐱᓕᕆᐊᖃᖁᒪᓂᑦᑎᓐᓂᒃ ᓵᓚᖃᕋᓱᐊᖅᑐᓂᑦ ᐱᓕᕆᐊᖃᕈᒪᔪᓂᑦ.

ᐊᑕᐅᑦᓯᒃᑯᑦ, ᑖᒃᑯᐊ ᐱᕕᑦᓴᖃᕐᓂᐅᔪᓂᒃ, ᐊᑦᓱᕈᕈᑕᐅᔪᓂᒃ, ᓵᓚᖃᕈᓱᐊᕐᓃᓪᓗ, ᐊᒻᒪᓗ ᐅᓗᕆᐊᓇᕈᑎᑦ ᓴᖅᑭᑕᐅᔪᑦ ᐊᑐᐃᓐᓇᐅᓂᖅᓴᐅᔪᒥᑦ ᐅᑭᐅᖅᑕᖅᑐᒥ ᓴᖅᑭᔮᖅᑐᖃᕐᓂᖅᓴᐅᒋᐊᓕᒃ ᐅᐊᑦᓯᔨᐅᓂᕐᒧᑦ ᑲᑐᔾᔨᖃᑎᒌᖑᔪᓂ, ᓴᙱᓂᖅᓴᐅᓕᖅᑎᓪᓗᒋᑦ ᑐᐊᕕᕐᓇᖅᑐᒥᑦ ᐊᐅᓚᑦᓯᓂᕐᒥᑦ, ᐊᑑᑎᖃᖅᑐᓂᒃ ᐅᓇᑕᖅᑐᑦᓴᓂᑦ ᐊᔪᙱᓐᓂᖃᕐᓗᑎ, ᐊᒻᒪᓗ ᐱᐅᓯᕚᓪᓕᖅᑎᑕᐅᓗᓂ ᖃᓄᐃᓕᖓᓕᕈᑕᐅᔪᓂᑦ ᐅᔾᔨᕈᓱᓕᖅᑎᑦᓯᓂᕐᒥᑦ. ᑎᑭᐅᒪᓂᕐᒧᑦ ᑖᒃᑯᓂᖓ ᑐᑦᓯᕋᐅᑕᐅᔪᓂᑦ ᑲᑐᔾᔨᖃᑎᒌᓐᓂᒃᑯᑦ ᐱᓕᕆᐊᖃᕆᐊᓖᑦ ᖁᑦᓯᓐᓂᐅᔪᓕᒫᓂᑦ ᒐᕙᒪᒃᑯᓐᓂ, ᐅᐊᓐᓇᖓᓂᕐᒥᐅᑕᓄᓪᓗ, ᐃᓚᒋᓪᓗᓂᐅᒃ ᓄᓇᖃᖅᑳᖅᓯᒪᔪᑦ, ᐃᑲᔪᖅᑎᒌᓐᓂᖃᕐᓗᑎᒃ ᓇᒻᒥᓂᖃᖅᑎᐅᔪᓂᑦ ᑕᐃᒪᐃᒋᐊᖃᖅᑎᓪᓗᒍ ᖃᐅᔨᒪᑦᓯᐊᕆᐊᕐᓂᕐᒥᑦ ᓄᓇᒋᔭᐅᔪᑦ ᐆᒪᑦᓯᐊᕆᒍᓐᓇᕐᒪᖔᖅ ᐊᒻᒪᓗ ᑲᔪᓰᓐᓇᖅᑐᒥ ᐃᓂᒋᔭᐅᓗᓂ ᓴᐃᓕᓇᖅᑐᒥ ᐊᒻᒪᓗ ᐃᑲᔪᖅᑎᒌᓐᓂᕐᒥᑦ.

ᑐᕌᒐᑦᓴᖅ: ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᐊᒻᒪᓗ ᐃᓄᖁᑎᖏᑦ ᐊᑦᑕᕐᓇᔾᔭᐃᖅᓯᒪᓗᑎ, ᐅᐊᑦᓯᔭᐅᑦᓯᐊᕐᓗᑎ, ᐊᒻᒪᓗ ᓴᐳᔾᔭᐅᓯᒪᑦᓯᐊᕐᓗᑎ

ᐊᑕᐅᓯᖅ ᐱᓪᓗᐊᑕᕆᔭᐅᔪᖅ ᑐᕌᖅᑕᐅᓇᓱᐊᖅᑐᓂᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓴᐳᔾᔨᓯᒪᓂᕐᒥᑦ ᐊᑦᑕᕐᓇᔾᔭᐃᖅᓯᒪᓂᕐᒥᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ ᐅᐊᓐᓇᖓᓂᕐᒥᐅᑕᓄᑦ ᐊᒻᒪᓗ ᓴᐳᔾᔨᓗᒋᑦ ᐊᔪᙱᓐᓂᕆᔭᖏᓐᓂᒃ ᓴᐳᔾᔨᓯᒪᓂᕐᒧᑦ ᑕᒪᒃᑮᓐᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᓄᐊᔅ ᐊᒥᐊᓕᒐᒥ ᒫᓐᓇᐅᔪᖅ ᐊᒻᒪᓗ ᓯᕗᓂᑦᓴᒧᑦ. ᑖᑦᓱᒥᖓ ᑐᕌᒐᑦᓴᒥᑦ ᑎᑭᐅᒪᓂᐊᕐᓗᓂ ᑲᓇᑕᐅᑉ ᒐᕙᒪᒃᑯᖏᑦ ᑲᔪᓯᓂᐊᖅᑐᑦ ᓯᕗᒧᐊᖅᑎᑦᓯᓂᕐᒥᑦ ᑖᒃᑯᓂᖓ ᑐᕌᖅᑕᐅᓇᓱᐊᖅᑐᓂᑦ:

ᑖᓐᓇ ᐱᓕᕆᔾᔪᓯᖅ ᐱᔭᐅᔭᕆᐊᓕᒃ ᐅᐊᑦᓯᑦᓯᐊᕐᓂᕐᒧᑦ ᑲᓇᑕᐅᑉ ᐊᖏᓂᖅᓴᒃᑯᑦ ᐱᓕᕆᐊᕆᔪᒪᔭᖏᓐᓂᒃ ᓄᓇᒋᔭᐅᔪᓂ, ᐊᒻᒪᓗ ᓴᐳᔾᔨᓂᕐᒥᑦ ᐃᓄᓐᓂᒃ ᐊᒻᒪᓗ ᓄᓇᓕᐅᔪᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᖏᕐᕋᖃᕐᓂᕋᐃᔪᓄᑦ.

ᐱᓕᕆᐊᖑᒍᒪᔪᖅ 1: ᓴᙱᓂᖅᓴᐅᓕᖅᑎᓪᓗᒋᑦ ᑲᓇᑕᐅᑉ ᐃᑲᔪᖅᑎᒌᓐᓂᖏᑦ ᐊᒻᒪᓗ ᐱᓕᕆᖃᑎᒌᓐᓂᖏᑦ ᑲᓇᑕᒥ ᐊᒻᒪᓗ ᓄᓇᕐᔪᐊᓕᒫᒥ ᑲᑐᔾᔨᖃᑎᒋᔭᐅᔪᓂᒃ ᐊᑦᑕᕐᓇᔾᔭᐃᖅᓯᒪᓂᕐᒧᑦ, ᐅᐊᑦᓯᔨᐅᓂᕐᒧᑦ ᐊᒻᒪᓗ ᓴᐳᔾᔨᓯᒪᓂᕐᒧᑦ ᐃᓱᒫᓘᑕᐅᔪᓄᑦ

ᐱᔭᕆᐊᑐᓂᖓ ᐅᑭᐅᖅᑕᖅᑐᒥ ᐅᐊᑦᓯᔨᐅᓂᕐᒧᑦ ᐊᕙᑎᖓ ᐃᓕᓯᕗᖅ ᐱᓕᕆᖃᑎᒌᓂᕐᒧᑦ ᖁᑦᓯᓐᓂᐅᔪᓕᒫᓂᑦ ᒐᕙᒪᓂ, ᓄᓇᓕᓐᓂ ᐊᒻᒪᓗ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ ᐊᒻᒪᓗ ᐃᓄᖏᓐᓂ, ᐊᒻᒪᓗ ᑕᑎᒋᔭᐅᔪᓐᓇᖅᑐᓂ ᓄᓇᕐᔪᐊᓕᒫᒥ ᑲᑐᔾᔨᖃᑎᒋᔭᐅᔪᓂᒃ. ᐊᙴᒪᑎᓂᕐᒥᑦ ᐊᓯᔾᔨᖅᐸᓪᓕᐊᔪᒥᑦ ᐊᑦᑕᕐᓇᔾᔭᐃᖅᓯᒪᓂᕐᒧᑦ, ᐅᐊᑦᓯᔨᐅᓂᕐᒧᑦ ᐊᒻᒪᓗ ᓴᐳᔾᔨᓯᒪᓂᕐᒧᑦ ᐊᑦᓱᕈᕈᑕᐅᔪᓂᒃ ᐅᑭᐅᖅᑕᖅᑐᒥ ᐊᒻᒪᓗ ᐃᓄᖁᑎᖏᓐᓄᑦ ᐱᕙᓪᓕᐊᑎᑦᓯᒃᑲᓐᓂᕆᐊᓖᑦ ᐱᓕᕆᖃᑎᒌᓐᓂᕆᕙᑦᑕᑦᑎᓐᓂᒃ.

ᑲᓇᑕᒥ ᑲᑐᔾᔨᖃᑎᒋᔭᐅᔪᑦ

ᓯᕗᒻᒧᕆᐊᒃᑲᓐᓂᕐᓗᒍ ᐊᔪᙱᓐᓂᕆᔭᑦᑎᓐᓂ ᐊᐅᓚᑦᓯᓂᕐᒧᑦ ᐊᒻᒪᓗ ᐱᓕᕆᐊᖃᕐᓂᕐᒧᑦ ᐊᔾᔨᐅᙱᑦᑐᒥᑦ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ ᐊᑦᓱᕈᕈᑕᐅᔪᓂᒃ ᐅᑭᐅᖅᑕᖅᑐᒥ, ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ ᑲᑐᔾᔨᖃᑎᒌᖑᔪᑦ ᖁᑦᓯᓐᓂᐅᔪᓕᒫᓂ ᑲᔪᓯᓂᖃᕐᓂᐊᖅᑐᑦ ᐱᓕᕆᖃᑎᒌᓗᑎᒃ ᓇᓗᓇᐃᖅᓯᓂᕐᒥᑦ ᑖᒃᑯᓂᖓᑦᓴᐃᓐᓇᖅ ᓯᕗᓪᓕᐅᔾᔭᐅᖁᔭᐅᔪᓂ, ᐊᑕᐅᑦᓯᒃᑰᖓᓗᓂ ᐸᕐᓇᐃᓂᖅ, ᐊᒻᒪᓗ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐊᐅᓚᑦᓯᖃᑎᒌᓐᓂᕆᔭᑦᑎᓐᓂ, ᐃᓚᒋᓪᓗᓂᐅᒃ ᐊᑕᐅᑦᓯᒃᑯᑦ ᓲᕐᓗ ᐅᑭᐅᖅᑕᖅᑐᒥ ᐅᐊᑦᓯᔨᐅᓂᕐᒧᑦ ᐱᓕᕆᖃᑎᒌᖑᔪᓂ.

ᐱᓕᕆᐊᑦᓴᖅ ᓇᓄᖅ (NANOOK) — ᑲᓇᑕᐅᒥ ᐃᓕᓴᕆᔭᐅᔪᖅ ᐅᑭᐅᖅᑕᖅᑐᒥ ᐊᐅᓚᑦᓯᓂᕐᒧᑦ — ᐊᑐᓕᖅᑎᑦᓯᒃᑲᓐᓂᖅᑐᖅ ᑲᓇᑕᐅᑉ ᐅᓇᑕᖅᑐᑦᓴᖏᓐᓂᒃ ᐱᓪᓗᐊᑕᕆᔭᐅᓪᓗᑎᒃ ᑲᑐᔾᔨᖃᑎᒋᔭᐅᓪᓗᑎᒃ ᐅᑭᐅᖅᑕᖅᑐᒥ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ. ᑕᐃᑰᓇ ᐱᓕᕆᐊᑦᓴᖅ ᓇᓄᖅ (NANOOK), ᑖᒃᑯᐊ ᑲᓇᑕᐅᑉ ᐅᓇᑕᖅᑐᑦᓴᖏᑦ ᐱᓕᒻᒪᑦᓴᐃᑎᑦᓯᓲᑦ, ᐱᕙᓪᓕᐊᑎᑦᓯᓲᑦ ᑲᑐᔾᔨᖃᑎᒌᓂᐅᔪᓂᒃ, ᐊᒻᒪᓗ ᐃᑲᔪᕐᓂᖃᓲᑦ ᐱᕙᒌᔭᐃᓂᕐᒥᑦ ᒐᕙᒪᑐᖃᒃᑯᓐᓂ, ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ, ᓄᓇᖃᖅᑳᖅᓯᒪᔪᓂ, ᐊᒻᒪᓗ ᓄᓇᓕᐅᔪᓂ ᑲᑐᔾᔨᖃᑎᒋᔭᐅᔪᓂᒃ, ᑖᒃᑯᐊᓗ ᓄᓇᕐᔪᐊᓕᒫᒥ ᑲᑐᔾᔨᖃᑎᒋᔭᐅᔪᓂᒃ. ᑲᓇᑕᐅᑉ ᐅᓇᑕᖅᑐᑦᓴᖏᑦ ᐱᓕᕆᕝᕕᖃᐅᕐᒥᔪᑦ ᐊᒥᓱᓂᑦ ᐃᓪᓗᐊᓗᓐᓂᒃ ᓄᓇᓕᓐᓂ ᐊᒻᒪᓗ ᒐᕙᒪᑐᖃᒃᑯᓐᓂ ᑲᑐᔾᔨᖃᑎᒋᔭᐅᔪᓂᒃ, ᐃᓚᒋᓪᓗᓂᐅᒃ ᐅᓪᓗᒥᓯᐅᑎᓪᓗᕆᒃ ᓂᓪᓚᓱᑦᑐᒥᑦ ᓯᓚᓕᕆᓂᕐᒧᑦ ᐱᓕᒻᒪᑦᓴᐃᕕᒻᒥ ᖃᐅᓱᐃᑦᑐᖅ, ᓄᓇᕗᒻᒥ, ᐊᒻᒪᓗ ᓄᓇᒥᙶᖅᓯᒪᔪᓕᕆᔨᒃᑯᑦ ᑲᓇᑕᒥ ᐅᑭᐅᖅᑕᖅᑐᒥ ᓄᓇᕐᔪᐊᑉ ᐃᑭᐊᖓᓂ ᐱᓕᕆᐊᑦᓴᖓᓂ. ᓯᕗᒧᐊᖅᐸᓪᓕᐊᓂᕐᒧᑦ, ᑲᓇᑕᐅᑉ ᐅᓇᑕᖅᑐᑦᓴᖏᑦ ᑲᔪᓯᓚᖓᔪᑦ ᐊᑐᕐᓗᑎᒃ ᐱᓕᕆᐊᑦᓴᒥᑦ ᓇᓄᖅ (NANOOK) ᐊᒻᒪᓗ ᐊᑐᖅᑕᐅᖃᓯᐅᑎᔪᓂᒃ ᐱᓕᕆᕝᕕᓐᓂᒃ ᑲᑐᔾᔨᖃᑎᒌᓐᓂᒃᑯᑦ ᐱᓕᕆᔾᔪᓯᖃᕐᓗᑎᒃ ᑲᒪᒋᔭᖃᕐᓂᕐᒥᑦ ᐅᑭᐅᖅᑕᖅᑐᒥ ᐊᑦᑕᕐᓇᔾᔭᐃᖅᓯᒪᓂᕐᒥᑦ, ᐅᐊᑦᓯᔨᐅᓂᕐᒧᑦ, ᐊᒻᒪᓗ ᓴᐳᔾᔨᓯᒪᓂᕐᒧᑦ ᐊᑦᓱᕈᕈᑕᐅᔪᓂᒃ.

ᑲᓇᑕᒥ ᐅᓇᑕᖅᑐᑦᓴᙳᐊᑦ

ᑲᓇᑕᒥ ᐅᓇᑕᖅᑐᑦᓴᙳᐊᑦ, ᐃᓚᒋᔭᐅᔪᑦ ᑲᓇᑕᐅᑉ ᐅᓇᑕᖅᑐᑦᓴᖏᓐᓄᑦ ᐱᓕᕆᔨᓄᑦ, ᑲᓇᑕᐅᑉ ᐅᓇᑕᖅᑐᑦᓴᖏᓐᓄᑦ "ᐃᔨᖁᑎᒋᔭᐅᔪᑦ ᐊᒻᒪᓗ ᓯᐅᑎᖁᑎᒋᔭᐅᔪᑦ" ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ. ᐱᓕᕆᐊᑦᓴᓪᓗᐊᑕᖓ ᐊᑐᐃᓐᓇᐅᑎᑦᓯᓂᕐᒥᑦ ᐅᓇᑕᖅᑐᑦᓴᑦ ᓴᖅᑭᔮᕐᓗᑎ ᐃᓄᒋᐊᓗᐊᙱᑦᑐᓂ ᐅᐊᓐᓇᖓᓂ, ᓯᔾᔭᖅᐸᓯᖓᓂ, ᐊᒻᒪᓗ ᐅᖓᓯᑦᑐᒦᑦᑐᓂ ᐃᓂᒋᔭᐅᔪᓂ ᑲᓇᑕᒥ ᐱᔨᑦᓯᕋᖅᑕᐅᙱᑦᑐᓄᑦ ᑲᓇᑕᐅᑉ ᐅᓇᑕᖅᑐᑦᓴᖏᓐᓄᑦ.

ᑲᓇᑕᐅᑉ ᐅᓇᑕᖅᑐᑦᓴᖏᑦ ᑲᔪᓯᓂᖃᕐᓂᐊᕐᒥᔪᑦ ᓴᙱᓂᖅᓴᐅᓕᖅᑎᑦᓯᓗᑎᒃ ᐃᓅᖃᑎᖃᕐᓂᖏᓐᓂᒃ ᓄᓇᖃᖅᑳᖅᓯᒪᔪᓂᑦ ᒐᕙᒪᐅᔪᓂ, ᑲᑐᔾᔨᖃᑎᒌᖑᔪᓂ ᐊᒻᒪᓗ ᐅᐊᓐᓇᖓᓂ ᓄᓇᓕᐅᔪᓂ, ᐊᒻᒪᓗ ᑲᔪᓯᓂᖃᕐᓂᐊᖅᑐᑦ ᐃᓚᐅᖃᑕᐅᓗᑎ ᓄᓇᓕᓐᓂ ᐃᓄᒋᐊᕐᓂᐅᔪᓂᑦ ᐱᖃᓯᐅᔾᔭᐅᖏᓐᓇᕐᓗᓂ ᐅᑭᐅᖅᑕᖅᑐᒥ ᐊᐅᓚᑦᓯᓂᕐᒧᑦ ᐊᒻᒪᓗ ᐱᓕᒻᒪᑦᓴᐃᓂᕐᒧᑦ. ᓲᕐᓗ, ᑲᓇᑕᐅᑉ ᐅᓇᑕᖅᑐᑦᓴᖏᑦ ᑲᔪᓯᓂᖃᕐᓂᐊᖅᑐᑦ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐱᓕᒻᒪᑦᓴᐃᓂᕐᒥᑦ ᐊᒻᒪᓗ ᐊᐅᓚᑦᓯᓂᕐᒧᑦ ᐊᑑᑎᖃᕐᓂᕆᔭᖓᓂ ᑲᓇᑕᐅᑉ ᐅᓇᑕᖅᑐᑦᓴᙳᐊᖏᓐᓄᑦ ᐃᑲᔪᕐᓂᖃᕐᓂᖅᓴᐅᓂᐊᕐᒪᑕ ᐊᒻᒪᓗ ᐱᓕᕆᐊᖃᕐᓗᑎ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ ᖃᓄᐃᓐᓂᐅᔪᓄᑦ, ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐱᓪᓗᐊᑕᕆᔭᐅᔪᓂ ᐅᔾᔨᕈᓱᓕᖅᑎᑦᓯᓂᕐᒥᑦ, ᐊᒻᒪᓗ ᓴᖅᑭᔮᖅᑎᑦᓯᓗᑎᒃ ᑲᓇᑕᐅᑉ ᓴᐳᔾᔨᓯᒪᓂᕆᔭᖓᓂ. ᑲᓇᑕᐅᑉ ᒐᕙᒪᒃᑯᖏᑦ ᐱᒻᒪᕆᐅᒍᓱᒻᒥᔪᑦ ᐃᓅᓱᑦᑐᓂ ᑲᓇᑕᐅᑉ ᐅᓇᑕᖅᑐᑦᓴᙳᐊᖏᑕ ᐱᓕᕆᐊᑦᓴᖓᓂ, ᐊᑐᐃᓐᓇᐅᑎᑦᓯᓲᖅ ᐱᕕᑦᓴᖃᕐᓂᐅᔪᓂᒃ ᐃᓅᓱᑦᑐᓄᑦ ᐅᖓᓯᑦᑐᒦᑦᑐᓄᑦ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᓄᓇᓕᐅᔪᓂ ᐱᕈᐃᓂᕐᒧᑦ ᐊᒻᒪᓗ ᐊᑐᖃᑎᒌᓐᓂᕐᒧᑦ ᐃᓕᖅᑯᓯᕐᒥᓄᑦ ᐊᒻᒪᓗ ᐊᓯᖏᓐᓂᒃ ᐃᓅᓯᕐᒨᖓᔪᓂ ᐊᔪᕈᓐᓃᖅᓴᐅᑎᓂᑦ ᐅᖓᓯᑦᑐᒦᑦᑐᓂᑦ ᐊᒻᒪᓗ ᐃᓄᑭᓐᓂᖅᓴᐅᔪᓂ ᓄᓇᓕᐅᔪᓂ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ, ᑲᓇᑕᓕᒫᒥᓪᓗ.

ᑕᐃᒪᐃᓐᓂᖓᓄᑦ, ᐃᖏᕐᕋᔪᓕᕆᔨᒃᑯᑦ ᑲᓇᑕᒥ, ᑲᓇᑕᒥ ᓯᑯᓯᐅᑎᓕᕆᔨᒃᑯᑦ, ᐊᕙᑎᓕᕆᔨᒃᑯᑦ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑲᓇᑕᒥ, ᐊᒻᒪᓗ ᑲᓇᑕᒥ ᐃᒫᓂ ᐃᖅᑲᙳᐊᓕᕆᔨᒃᑯᑦ ᐱᔨᑦᓯᕋᐅᑎᖓ ᐃᒪᕐᒥᐅᑕᓕᕆᔨᒃᑯᓐᓂ ᐱᓕᕆᖃᑎᖃᕐᓂᐊᖅᑐᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ, ᑲᓇᑕᐅᑉ ᓂᒋᐊᓂ ᐊᕕᑦᑐᖅᓯᒪᔪᖤ, ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᒐᕙᒪᒋᔭᐅᔪᓂ ᑲᑐᔾᔨᖃᑎᖃᕐᓂᕐᒧᑦ ᐊᐅᓚᑦᓯᖃᑎᒌᓐᓂᕐᒥᑦ ᐅᒥᐊᕐᔪᐊᓕᕆᓂᕐᒥᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ. ᐊᑕᐅᑦᓯᒃᑯᑦ, ᑲᑐᔾᔨᖃᑎᒌᖑᔪᑦ ᓇᓗᓇᐃᖅᓯᓂᐊᖅᑐᑦ ᐅᐊᓐᓇᖓᓂ ᐊᑦᑐᐃᓂᖃᓗᐊᙱᑦᑐᓂᑦ ᐅᒥᐊᕐᔪᐊᓕᕆᓂᕐᒥᑦ ᐊᖅᑯᑎᑦᓴᓂᑦ, ᐊᒻᒪᓗ ᐱᕙᓪᓕᐊᑎᑦᓯᓗᑎᒃ ᐊᐅᓚᑦᓯᓂᕐᒧᑦ ᐋᖅᑭᑦᓱᖅᓯᒪᔾᔪᑎᒥ ᓴᖅᑭᔮᖅᑎᑦᓯᓂᕐᒥᑦ ᐊᑦᑕᕐᓇᙱᓐᓂᖅᓴᐅᔪᒥᑦ ᐃᒫᓂ ᐃᖏᕐᕋᔪᓕᕆᓂᕐᒥᑦ ᐅᐊᓐᓇᖓᓂ ᐊᒻᒪᓗ ᖃᐅᔨᒪᑦᓯᐊᕆᐊᕐᓂᕐᒥᑦ ᒪᓕᑦᓯᐊᕐᓂᕐᒥᑦ ᐱᒻᒪᕆᐅᔪᓂ ᐱᔨᑦᓯᕋᐅᑎᓂ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᓄᓇᓕᐅᔪᓂ ᐃᑉᐱᒍᓱᑦᓯᐊᓯᓐᓈᑦ ᐊᕙᑎᒥ.

ᓄᓇᕐᔪᐊᓕᒫᒥ ᐃᑲᔪᖅᑎᒌᓐᓂᖅ

ᑕᐃᒫᑦᓴᐃᓐᓇᖅ ᑲᑐᔾᔨᖃᑎᒋᔭᐅᔪᓂᒃ ᑲᓇᑕᒥ ᐱᒻᒪᕆᐅᑎᓪᓗᒋᑦ ᖃᐅᔨᒪᑦᓯᐊᕆᐊᕐᓂᕐᒥᑦ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ, ᓇᓕᒧᑦᑐᒥ ᐱᒻᒪᕆᐅᒻᒥᔪᖅ ᐱᓕᕆᖃᑎᖃᕐᓂᕐᒥᑦ ᐊᓯᖏᓐᓂᒃ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᔪᓂᑦ ᐊᒻᒪᓗ ᓄᓇᕐᔪᐊᓕᒫᒥ ᑲᑐᔾᔨᖃᑎᒋᔭᐅᔪᓂᒃ ᐊᖏᓂᖅᓴᒥᑦ ᓄᓇᒋᔭᐅᔪᓂ. ᑕᐃᑰᓇ ᐅᑭᐅᖅᑕᖅᑐᒥ ᑲᑎᒪᔨᑦ ᑐᐊᕕᕐᓇᖅᑐᒥ ᑕᐃᒪᐃᑎᑦᓯᑦᑕᐃᓕᒪᓂᒃᑯᑦ, ᐱᕙᒌᔭᖅᓯᒪᓂᖅ, ᐊᒻᒪᓗ ᐱᓕᕆᐊᖃᕐᓂᕐᒧᑦ ᐱᓕᕆᖃᑎᒌᑦᑐᑦ, ᓲᕐᓗ, ᖃᑦᓯᒃᑭᐊ ᒐᕙᒪᑐᖃᒃᑯᓐᓂ ᐱᓕᕆᕝᕖᑦ ᑲᑐᔾᔨᖃᑎᖃᓲᑦ ᐊᓯᖏᓐᓂ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᔪᓂᑦ ᖃᓄᖅ ᐱᓕᕆᐊᖃᑦᓯᐊᕈᓐᓇᕐᒪᖔᑦ ᐃᒻᒥᓂ ᐅᕝᕙᓘᓐᓃᑦ ᐃᓄᓐᓄᑦ ᐊᐅᓚᑕᐅᔪᓂᑦ ᖃᓄᐃᕐᔪᐊᕐᓂᐅᔪᓂᑦ. ᐃᓚᒋᔭᐅᓪᓗᓂ ᐊᖏᕈᑎᒧᑦ ᐱᓕᕆᖃᑎᒌᓐᓂᕐᒧᑦ ᖃᖓᑕᔫᒃᑯᑦ ᐊᒻᒪᓗ ᐃᒫᓂ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᐅᑭᐅᖅᑕᖅᑐᒥ, ᑲᓇᑕ ᐱᓕᕆᖃᑎᖃᑦᓯᐊᕐᒥᔪᖅ ᐊᓯᖏᓐᓂᒃ 7-ᓂᒃ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᔪᓂᑦ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᖃᖓᑕᔫᒃᑯᑦ ᐊᒻᒪᓗ ᐃᒫᓂ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ. ᐃᓕᓴᖅᓯᓂᕐᒥᑦ ᑖᑦᓱᒥᖓᑦᓴᐃᓐᓇᖅ ᐊᑦᓱᕈᕈᑕᐅᔪᒥ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᐅᑭᐅᖅᑕᖅᑐᒥ, ᑖᓐᓇ ᐊᖏᕈᑎ, ᐊᑎᓕᐅᖅᑕᐅᔪᖅ 2011-ᒥ, ᐋᖅᑭᑦᓱᐃᓲᖅ ᓄᓇᕐᔪᐊᓕᒫᒥ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᑲᒪᒋᔭᖃᕐᓂᕐᒥᑦ ᐊᒻᒪᓗ ᐱᓕᕆᐊᖃᕐᓂᕐᒧᑦ ᐅᑭᐅᖅᑕᖅᑐᒥ, ᐋᖅᑭᑦᓱᐃᓲᖑᒋᓪᓗᑎ ᓇᐅᒃᑯᑦ ᑲᒪᒋᔭᖃᕆᐊᖃᕐᒪᖔᑦ ᐊᑐᓂ ᓄᓇᖁᑎᒋᔭᐅᔪᓂ. ᑖᓐᓇ ᐊᖏᕈᑎ ᐊᑕᐅᓯᐅᕗᖅ ᐊᒥᓱᓂᑦ ᑲᓇᑕ ᐊᑎᓕᐅᖅᓯᒪᔭᖏᓐᓂ, ᓴᖅᑭᔮᖅᑎᑦᓯᔪᖅ ᑲᔪᓰᓐᓇᖅᑐᒥ ᐱᒻᒪᕆᐅᓂᖓᓂ ᓄᓇᕐᔪᐊᓕᒫᒥ ᐃᑲᔪᖅᑎᒌᓐᓂᕐᒥᑦ ᐊᒻᒪᓗ ᐊᔪᙱᓐᓂᕆᔭᑦᑎᓐᓂ ᐱᓕᕆᐊᖃᑦᓯᐊᕐᓂᕐᒧᑦ ᖃᓄᐃᓐᓂᐅᔪᓄᑦ.

ᓴᓇᕙᓪᓕᐊᓂᕐᒥ ᑖᑦᓱᒥᖓ ᐱᒻᒪᕆᐅᔪᒥ ᓄᓇᕐᔪᐊᓕᒫᒥ ᐃᑲᔪᖅᑎᒌᓐᓂᕐᒥ, ᑲᓇᑕᒥ ᓯᑯᓯᐅᑎᓕᕆᔨᒃᑯᑦ ᐃᓚᐅᖃᑕᐅᑦᓯᐊᖅᑐᖅ ᐅᑭᐅᖅᑕᖅᑐᒥ ᓯᑯᓯᑎᓕᕆᓂᕐᒧᑦ ᑲᑎᖃᑦᑕᖅᑐᓄᑦ, ᐃᓛᒃᑰᖓᔪᖅ, ᑕᐃᒪᐃᓕᖓᑐᐃᓐᓇᖅᑐᖅ, ᐊᒻᒪᓗ ᐊᐅᓚᑕᐅᓪᓗᓂ ᑲᑐᔾᔨᖃᑎᒌᖑᔪᑦ ᐃᓚᖃᖅᓱᑎᒃ ᑭᒡᒐᖅᑐᐃᔨᓂ ᑕᒪᐃᓐᓂ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᔪᓂᑦ. ᑲᑎᖃᑦᑕᖅᑐᑦ ᑐᕌᖓᔪᖅ ᐊᑦᑕᕐᓇᔾᔭᐃᖅᓯᒪᓂᕐᒧᑦ, ᐅᐊᑦᓯᔨᐅᓂᕐᒧᑦ, ᐊᒻᒪᓗ ᐊᕙᑎᓕᕆᓂᕐᒧᑦ ᐱᓕᕆᐊᖃᕐᓂᕐᒧᑦ ᐃᒫᓂ ᖃᓄᐃᓕᐅᕐᓂᐅᔪᓄᑦ ᐅᑭᐅᖅᑕᖅᑐᒥ, ᐊᒻᒪᓗ ᐊᑐᐃᓐᓇᐅᑎᑦᓯᓂᕐᒥᑦ ᐃᓂᑦᓴᒥᑦ ᑐᑭᓯᒋᐊᕈᑎᑦᓴᓂᑦ ᑐᓴᐅᒪᖃᑎᒌᓐᓂᕐᒥᑦ ᐊᒻᒪᓗ ᑲᑐᔾᔨᖃᑎᒌᓂᒃᑯᑦ ᐱᓕᒻᒪᑦᓴᐃᓂᕐᒥᑦ ᐃᓱᒫᓘᑕᐅᔪᓄᑦ ᐃᓚᒋᓪᓗᓂᐅᒃ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᐊᒻᒪᓗ ᐊᕙᑎᓕᕆᓂᕐᒧᑦ ᐱᓕᕆᐊᖃᕐᓂᕐᒧᑦ. ᑕᕝᕘᓇ ᐊᔾᔨᐅᙱᑦᑐᒃᑯᑦ ᑲᑎᖃᑦᑕᖅᑐᓄᑦ, ᑲᓇᑕᒥ ᓯᑯᓯᐅᑎᓕᕆᔨᒃᑯᑦ ᑲᔪᓯᓂᐊᖅᑐᑦ ᐱᓕᕆᐊᖃᕐᓂᕐᒥᑦ ᐱᓕᕆᔾᔪᓯᑦᓯᐊᕙᐅᓛᖑᔪᓂᒃ ᐊᒻᒪᓗ ᑲᓇᑕᒥᐅᑦ ᐊᔪᙱᑦᑐᕐᔪᐊᓄᑦ ᐱᓕᕆᖃᑎᒋᔭᒥᓂ, ᐃᑲᔪᖅᓱᓯᓐᓈᑦ ᐊᖏᓂᖅᓴᒥ ᐊᕙᑎᓕᕆᓂᕐᒧᑦ ᓴᐳᔾᔨᓯᒪᓂᕐᒥᑦ ᐊᒻᒪᓗ ᒪᑭᒪᑎᑕᐅᑦᓯᐊᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᑐᕌᒐᑦᓴᐅᔪᓂᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ.

ᐅᑭᐅᖅᑕᖅᑐᖅ ᐊᖏᔫᓪᓗᓂ ᐊᓂᕐᓂᒥ ᐊᒻᒪᓗ ᐃᒫᓂ ᐱᓕᕆᔾᔪᓯᐅᑎᔪᑦ ᓄᐊᔅ ᐊᒥᐊᓕᒐᒥ, ᑲᓇᑕ ᑲᔪᓯᓂᐊᖅᑐᖅ ᐱᓕᕆᐊᖃᑦᓯᐊᕐᓂᕐᒥᑦ ᑲᑐᔾᔨᖃᑎᖃᕐᓗᑎ ᓄᐊᔅ ᐊᒥᐊᓕᒐᒥ ᖃᐅᔨᒪᑦᓯᐊᕆᐊᕐᓂᕐᒥᑦ ᐅᐊᑦᓯᔭᐅᑦᓯᐊᕋᓗᐊᕐᒪᖔᑦᑕ ᓄᐊᔅ ᐊᒥᐊᓕᒐᒥ ᐃᓂᓪᓚᖓᑦᓯᐊᕐᓗᑕ ᓴᖑᑎᑦᓯᓂᕐᒧᑦ ᐊᒻᒪᓗ ᓴᐳᔾᔨᓯᒪᓂᕐᒧᑦ ᐅᓗᕆᐊᓵᕐᓂᐅᔪᓂᒃ ᓄᓇᓕᕐᔪᐊᖑᔪᒧᑦ, ᐃᓚᒋᓪᓗᓂᐅᒃ ᐅᐊᓐᓇᖓᓐᓂᙶᖅᑐᓂᒃ. ᒪᕐᕉᓐᓄᑦ ᓄᓇᓕᕐᔪᐊᓄᑦ ᓄᐊᔅ ᐊᒥᐊᓕᒐ ᕿᓚᒻᒥ ᓴᐳᔾᔨᓯᒪᓂᕐᒧᑦ ᐱᓕᕆᔩᑦ (NORAD), ᐊᒻᒪᓗ ᓴᙱᔪᓂᒃ ᐃᓅᖃᑎᒌᓐᓂᖏᑦ ᑕᐃᑰᓇ ᐱᖓᓱᓄᑦ ᐱᓕᕆᔨᓄᑦ ᐋᖅᑭᑦᓱᖅᓯᒪᓂᖓ ᐃᓚᖃᖅᓱᓂ ᓄᐊᔅ ᐊᒥᐊᓕᒐ ᕿᓚᒻᒥ ᓴᐳᔾᔨᓯᒪᓂᕐᒧᑦ ᐱᓕᕆᔨᓂᑦ, ᑲᓇᑕᒥ ᑲᑐᔾᔨᖃᑎᒌᑦᑐᑦ ᐊᐅᓚᑦᓯᓂᕐᒧᑦ ᐱᓕᕆᔩᑦ, ᐊᒻᒪᓗ ᐊᒥᐊᓕᒐ ᐅᐊᓐᓇᖓᓂ ᐱᓕᕆᔩᑦ, ᑐᕌᖓᑦᓯᐊᖏᓐᓇᕆᐊᓖᑦ ᓄᓇᕐᔪᐊᕐᒥᑦ ᓴᐳᔾᔨᓯᒪᓂᕐᒧᑦ ᐅᓪᓗᒥᐅᔪᖅ. ᑲᓇᑕ ᐊᖏᖅᓯᒪᓂᐃᓐᓇᖅᑐᖅ ᓄᑖᙳᖅᑎᑦᓯᓂᕐᒥᑦ ᓄᐊᔅ ᐊᒥᐊᓕᒐ ᕿᓚᒻᒥ ᓴᐳᔾᔨᓯᒪᓂᕐᒧᑦ ᐱᓕᕆᔩᑦ (NORAD) ᑖᒃᑯᓂᖓ ᐊᒥᐊᓕᒐᓂ ᑎᑭᐅᒪᓂᕐᒧᑦ ᒫᓐᓇᐅᔪᖅ ᐊᒻᒪᓗ ᓯᕗᓂᑦᓴᒥᑦ ᐅᓗᕆᐊᓵᕐᓂᐅᔪᓂᒃ ᓄᐊᔅ ᐊᒥᐊᓕᒐᒧᑦ, ᑕᐃᒫᒃ ᓇᓗᓇᐃᖅᑕᐅᓯᒪᒻᒪᑦ ᑲᑐᔾᔨᖃᑎᒌᓐᓂᒃᑯᑦ ᐅᖃᐅᓯᐅᓪᓗᓂ ᐊᖓᔪᖅᑳᕐᔪᐊᖅ ᑖᓄᓪᑦ ᑐᕌᒻᑉᒧᑦ ᐊᒻᒪᓗ ᓯᕗᓕᖅᑎᕐᔪᐊᖅ ᔭᔅᑎᓐ ᑐᕉᑐᒧᑦ, ᑕᐃᑲᓂ ᕖᕝᕗᐊᓕ 2017-ᒥᑦ.

ᑲᓇᑕ ᐊᒻᒪᓗ ᐅᑭᐅᖅᑕᖅᑐᒥ ᑲᑐᔾᔨᖃᑎᒋᔭᐅᔪᑦ ᑖᒃᑯᓂᖓᑦᓴᐃᓐᓇᖅ ᐊᑦᓱᕈᕈᑕᐅᔪᓂᒃ ᐱᖃᖅᑐᑦ ᐅᑭᐅᖅᑕᖅᑐᒥ, ᐱᕕᑦᓴᖃᖅᑎᑦᓯᔪᖅ ᐋᖅᑭᑦᓱᐃᔾᔫᒥᓂᕐᒥᑦ ᐊᑐᓂ ᐊᑦᓱᕈᕐᓂᕆᔭᐅᔪᓂ ᐃᑲᔪᖅᓱᓂᕐᒥᑦ ᑖᑦᓱᒥᖓᑦᓴᐃᓐᓇᖅ ᐅᐊᑦᓯᔨᐅᓂᕐᒧᑦ. ᑕᐃᑰᓇ ᐱᓕᕆᐊᖃᓂᒃᑯᑦ ᓲᕐᓗ ᐅᑭᐅᖅᑕᖅᑐᒥ ᐅᐊᑦᓯᔨᐅᓂᕐᒧᑦ ᐱᓕᕆᔩᑦ ᑲᑎᒪᔨᖏᑎᒍᑦ, ᑲᓇᑕ ᑲᔪᓯᓂᐊᖅᑐᖅ ᐱᓕᕆᐊᖃᕐᓂᕐᒥᑦ ᐅᑭᐅᖅᑕᖅᑐᒥ ᐊᒻᒪᓗ ᐅᑭᐅᖅᑕᖅᑐᒥᐅᑕᐅᙱᑦᑐᓂᑦ ᑕᐱᕆᔭᐅᔪᓂᒃ ᐊᒻᒪᓗ ᑲᑐᔾᔨᖃᑎᒋᔭᐅᔪᓂᒃ ᑐᑭᓯᐅᒪᔾᔪᑎᑦᓴᓂᒃ ᑐᓴᐅᒪᖃᑎᒌᓐᓂᕐᒧᑦ, ᐱᐅᓯᕚᓪᓕᖅᑎᑦᓯᓂᕐᒥᑦ ᖃᓄᐃᓕᖓᓂᐅᔪᓂᒃ ᐅᔾᔨᕈᓱᓕᖅᑎᑦᓯᓂᕐᒥᑦ, ᐊᒻᒪᓗ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐊᐅᓚᑦᓯᓂᕐᒧᑦ ᐱᓕᕆᖃᑎᒌᓂᕐᒥᑦ ᐊᔾᔨᒌᙱᑦᑐᓄᑦ ᐅᑭᐅᖅᑕᖅᑐᒥ ᐊᒻᒪᓗ ᐊᕕᑦᑐᖅᓯᒪᔪᓂᑦ ᐃᓱᒫᓘᑕᐅᔪᓄᑦ.

ᑲᓇᑕ ᑲᔪᓯᓂᐊᕐᒥᔪᖅ ᐱᓕᕆᖃᑎᖃᕐᓗᓂ ᐊᒥᐊᓕᒐᓂ ᐊᒻᒪᓗ ᑕᓐᒫᒃᒥ — ᑲᓇᓐᓇᖓᓂ ᐊᒻᒪᓗ ᐱᖓᓐᓇᖓᓂ ᓴᓂᓪᓕᕗᑦ — ᐊᒻᒪᓗ ᖃᐅᔨᓇᓱᓪᓗᑕ ᐱᕕᑦᓴᖃᕐᓂᐅᔪᓂᒃ ᐱᓕᕆᖃᑎᖃᕐᓂᕐᒧᑦ ᓄᐊᔅ ᐊᒥᐊᓕᒐ ᐊᖏᕈᑎᓄᑦ ᑲᑐᔾᔨᖃᑎᒌᑦ (NATO) ᐃᓚᒋᔭᐅᔪᒥ ᓄᐊᕙᐃ ᖃᐅᔨᓴᕐᓂᕐᒧᑦ ᐊᒻᒪᓗ ᓇᐅᑦᑎᖅᓱᕐᓂᕐᒧᑦ ᐊᖏᓂᖅᓴᒥ ᐅᑭᐅᖅᑕᖅᑐᒥ ᓄᓇᖓᓂ. ᐃᒪᐃᓕᖓᔪᒥ, ᑎᑎᕋᖅᓯᒪᔪᖅ ᓴᙱᔪᒥ, ᐅᐊᑦᓯᔭᐅᔪᒥ, ᐃᓚᐅᓂᕐᒧᑦ: ᑲᓇᑕᐅᑉ ᓴᐳᔾᔨᓯᒪᓂᕐᒧᑦ ᐊᑐᐊᒐᖓ, ᑲᓇᑕ ᕿᓂᕐᓂᐊᖅᑐᖅ ᐱᕕᑦᓴᖃᕐᓂᐅᔪᓂᒃ ᐱᓕᕆᐊᖃᕐᓂᕐᒥᑦ ᑕᐱᕆᔭᐅᔪᓂᒃ ᐊᒻᒪᓗ ᑲᑐᔾᔨᖃᑎᒋᔭᐅᔪᓂᒃ, ᐃᓚᒋᓪᓗᓂᒋᑦ ᓄᐊᔅ ᐊᒥᐊᓕᒐ ᐊᖏᕈᑎᓄᑦ ᑲᑐᔾᔨᖃᑎᒌᑦ (NATO), ᐃᑲᔪᖅᓱᓂᕐᒥᑦ ᑖᑦᓱᒥᖓᑦᓴᐃᓐᓇᖅ ᐊᖏᖅᓯᒪᑎᓪᓗᑕ ᓴᐳᔾᔨᓯᒪᓂᕐᒧᑦ ᐅᑭᐅᖅᑕᖅᑐᒥ. ᐃᓚᒋᓪᓗᓂᐅᒃ ᑖᑦᓱᒧᖓ ᐊᖏᖅᓯᒪᓂᐅᔪᒧᑦ, ᑲᓇᑕᐅᑉ ᐅᓇᑕᖅᑐᑦᓴᖏᑦ ᐱᖃᑕᐅᓂᖅᓴᐅᓛᖅᑐᑦ ᐊᕕᑦᑐᖅᓯᒪᔪᓂ ᓄᓇᓕᕐᔪᐊᕐᒥᐅᖃᑎᒌᙱᑦᑐᓂᑦ ᐱᓕᒻᒪᑦᓴᐃᓂᕐᒥᑦ ᐊᒻᒪᓗ ᕿᓂᕐᓗᑎᒃ ᐱᕕᑦᓴᖃᕐᓂᐅᔪᓂᒃ ᐊᑐᓕᖅᑎᑦᓯᓂᕐᒥᑦ ᐱᓪᓗᐊᑕᕐᓂᒃ ᐅᑭᐅᖅᑕᖅᑐᒥ ᐊᒻᒪᓗ ᐅᑭᐅᖅᑕᖅᑐᒥᐅᑕᐅᙱᑦᑐᓂᑦ ᑕᐱᕆᔭᐅᔪᓂᒃ ᐊᒻᒪᓗ ᑲᑐᔾᔨᖃᑎᒋᔭᐅᔪᓂᒃ ᑲᑐᔾᔨᖃᑎᒌᓐᓂᒃᑯᑦ ᖃᓄᐃᓕᐅᕈᑕᐅᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ, ᐃᓚᒋᓪᓗᓂᐅᒃ ᐱᓕᕆᐊᑦᓴᖅ ᓇᓄᖅ (NANOOK). ᑲᓇᑕ ᑲᔪᓯᓂᐊᕐᒥᔪᖅ ᐱᕙᓪᓕᐊᑎᑦᓯᓂᕐᒥᑦ ᖃᐅᔨᓴᖅᑐᓕᕆᓂᕐᒧᑦ ᐊᒻᒪᓗ ᖃᕋᓴᐅᔭᓕᕆᔾᔪᑎᓂ ᑲᑐᔾᔨᖃᑎᖃᕐᓂᕐᒥᑦ ᑕᑎᒋᔭᐅᔪᓂᒃ ᑲᑐᔾᔨᖃᑎᒋᔭᐅᔪᓂᒃ ᐅᐊᑦᓯᔨᐅᓂᕐᒧᑦ ᐊᒻᒪᓗ ᓴᐳᔾᔨᓯᒪᓂᕐᒧᑦ.

ᐱᓕᕆᐊᖑᒍᒪᔪᖅ 2: ᓴᙱᓂᖅᓴᐅᓕᖅᑎᑦᓯᓂᕐᒥᑦ ᑲᓇᑕᐅᑉ ᐅᓇᑕᖅᑐᑦᓴᖏᑦ ᓴᖅᑭᔮᕐᓂᖏᓐᓂᒃ ᐅᑭᐅᖅᑕᖅᑐᒥ ᑕᐃᒪᐃᑎᑦᓯᑦᑕᐃᓕᒪᓗᑎᓗ ᐊᒻᒪᓗ ᐱᓕᕆᐊᖃᕐᓗᑎ ᐊᑦᑕᕐᓇᔾᔭᐃᖅᓯᒪᓂᕐᒥᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ ᖃᓄᐃᓐᓂᐅᔪᓄᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ

ᑲᓇᑕᐅᑉ ᐅᓇᑕᖅᑐᑦᓴᖏᑦ

ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᐊᖃᕙᓪᓕᐊᓕᕇᖅᑐᖅ ᐊᖏᓂᖅᓴᒥ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᓴᖅᑭᔮᖅᑐᒥ ᐃᑲᔪᖅᓱᕐᓂᕆᔭᖏᓐᓂᒃ ᐊᕕᑦᑐᖅᓯᒪᔪᓂ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ. ᑕᒪᓐᓇ ᐊᑦᓱᕈᕐᓂᐅᔪᖅ ᑕᐃᑲᓃᖅᑐᑦ ᑲᓇᑕᐅᑉ ᓴᐳᔾᔨᓯᒪᓂᕐᒧᑦ ᐊᑐᐊᒐᖓᓂ, ᓴᙱᔪᒥ, ᐅᐊᑦᓯᔭᐅᔪᒥ, ᐃᓚᐅᓂᕐᒧᑦ, ᐃᓕᓴᖅᓯᔪᒥᑦ ᐅᑭᐅᖅᑕᖅᑐᒥ ᓄᓇᒋᔭᐅᔪᓂ ᐱᒻᒪᕆᐅᖃᑕᐅᔪᖅ ᑲᓇᑕᒥ ᐅᐊᑦᓯᔨᐅᓂᕐᒧᑦ ᐊᒻᒪᓗ ᓴᐳᔾᔨᓯᒪᓂᕐᒧᑦ ᑲᓇᑕᒥ ᐊᒻᒪᓗ ᓄᐊᔅ ᐊᒥᐊᓕᒐᒥ. ᓴᙱᔪᒥ, ᐅᐊᑦᓯᔭᐅᔪᒥ, ᐃᓚᐅᓂᕐᒧᑦ ᑎᑭᐅᒪᓗᓂ ᐱᔭᐅᔭᕆᐊᓕᓐᓂ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᑲᓇᑕᐅᑉ ᐅᓇᑕᖅᑐᑦᓴᖏᓐᓂ ᓴᖅᑭᔮᕐᓂᕆᔭᖏᓐᓂ ᓄᓇᒋᔭᐅᔪᓂ ᐅᖓᓯᑦᑐᒧᑦ ᐊᔪᙱᓐᓂᖃᕐᓂᕐᒧᑦ ᑮᓇᐅᔭᖃᖅᑎᑦᓯᓂᕐᒧᑦ ᑖᒃᑯᐊ ᑲᓇᑕᐅᑉ ᐅᓇᑕᖅᑐᑦᓴᖏᑦ ᐊᐅᓚᒍᓐᓇᕐᓂᐊᕐᒪᑕ, ᑎᑭᐅᒪᓗᑎ, ᐊᒻᒪᓗ ᕿᒪᐃᓗᑎ ᓄᓇᒋᔭᐅᔪᓂ ᓴᐳᔾᔨᓂᕐᒧᑦ ᑲᓇᑕᒥ ᐱᒋᐊᖃᖅᑕᑦᑎᓐᓂ ᐊᒻᒪᓗ ᓴᐳᔾᔨᓯᒪᓂᕐᒧᑦ, ᐊᒻᒪᓗ ᑭᐅᑦᑎᐊᓂᖅᓴᐅᓂᕐᒧᑦ ᐱᔭᐅᔭᕆᐊᓕᓐᓂ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᓄᓇᓕᖓᓂᕐᒥᐅᑕᐅᔪᓄᑦ. ᓴᙱᔪᒥ, ᐅᐊᑦᓯᔭᐅᔪᒥ, ᐃᓚᐅᓂᕐᒧᑦ, ᐊᖏᖅᓯᒪᔪᑦ ᐊᒥᓱᓂ ᐱᓪᓗᐊᑕᕐᓂᒃ ᑮᓇᐅᔭᖃᖅᑎᑦᓯᓂᕐᒧᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ, ᐃᓚᒋᓪᓗᓂᐅᒃ ᐱᖓᓲᔪᖅᑐᑦ ᓯᑯᒦᒍᓐᓇᖅᑐᓂ ᓯᔾᔭᖅᐸᓯᒻᒥ ᓇᐅᑦᑎᖅᓱᕐᓂᕐᒧᑦ ᐅᒥᐊᕐᔪᐊᕐᓂ, ᐃᓚᒋᓪᓗᓂᐅᒃ ᑲᓇᑕᒥ ᐅᒥᐊᕐᔪᐊᓕᐅᕐᓂᕐᒧᑦ ᐅᐸᓗᖓᐃᔭᐅᑎᒥ, ᑎᓴᒪᓖᑦ ᑐᕌᖓᔪᑦ ᐅᑭᐅᖅᑕᖅᑐᒥ ᐊᕙᑎᖓᓄᑦ, ᐊᒻᒪᓗ ᕿᓚᒻᒥ ᖃᓄᐃᓕᖓᓂᐅᔪᓂ ᐅᔾᔨᕈᓱᓕᖅᑎᑦᓯᓂᕐᒥᑦ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐊᒻᒪᓗ ᐱᐅᓯᕚᓪᓕᖅᑎᑦᓯᓂᕐᒥᑦ ᑐᓴᐅᒪᖃᑎᒋᒍᑎᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ ᓄᓇᒋᔭᐅᔪᓂ. ᑖᒃᑯᐊ ᐱᒋᐊᕈᑎᑦᓴᑦ ᐊᒻᒪᓗ ᑮᓇᐅᔭᖃᖅᑎᑦᓯᓂᕐᒧᑦ ᒥᑭᔫᓪᓗᑎ ᐆᑦᑑᑎᐅᔪᑦ ᐊᔾᔨᒌᙱᑦᑐᓄᑦ ᖃᓄᐃᓕᐅᕈᑕᐅᔪᓄᑦ ᑲᓇᑕᐅᑉ ᐅᓇᑕᖅᑐᑦᓴᖏᓐᓄᑦ ᓴᐳᔾᔨᓂᕐᒥᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ. ᐃᓗᓕᖃᐅᑦᑎᐊᕐᓗᓂ ᑕᒪᐃᓐᓂᒃ ᑲᓇᑕᐅᑉ ᐅᓇᑕᖅᑐᑦᓴᖏᑦ ᖃᓄᐃᓕᐅᖅᑕᖏᑦ ᐅᑭᐅᖅᑕᖅᑐᒥ ᑕᐃᑲᓂ ᑕᑯᔭᐅᔪᓐᓇᖅᑐᑦ ᑲᓇᑕᐅᑉ ᓴᐳᔾᔨᓯᒪᓂᕐᒧᑦ ᐊᑐᐊᒐᖓᓂ ᓴᙱᔪᒥ, ᐅᐊᑦᓯᔭᐅᔪᒥ, ᐃᓚᐅᓂᕐᒧᑦ.

ᓱᖏᐅᑎᓂᕐᒥᑦ ᐊᓯᔾᔨᖅᐸᓪᓕᐊᔪᒧᑦ ᐅᐊᑦᓯᔨᐅᓂᕐᒧᑦ ᐊᕙᑎᒥ ᐊᒥᓱᓄᑦ ᐊᑦᓱᕉᑕᐅᒋᐊᖃᕐᓂᐊᖅᑐᖅ. ᐊᐅᓚᑦᓯᓂᕐᒧᑦ ᖁᑦᓯᓐᓂᕆᔭᖓᓂ, ᑲᓇᑕᐅᑉ ᐅᓇᑕᖅᑐᑦᓴᖏᑦ ᑲᔪᓯᓂᐊᖅᑐᖅ ᐱᕈᐃᓂᕐᒧᑦ ᐊᒻᒪᓗ ᑲᔪᓯᑎᑦᓯᓂᕐᒧᑦ ᐊᔪᙱᓐᓂᕆᔭᖓᓂ ᐱᓕᕆᐊᖃᓂᕐᒧᑦ ᐅᑭᐅᖅᑕᖅᑐᒥ ᐃᑲᔪᖅᓱᖅᑕᐅᓂᒃᑯᑦ ᐊᕐᕌᒍᑕᒫᑦ ᐊᐅᓚᑦᓯᓂᐅᔪᓂᒃ ᐊᒻᒪᓗ ᐱᓕᒻᒪᑦᓴᐅᑎᓂᒃ, ᐃᓚᒋᓗᓂᐅᒃ ᓄᑖᒥᑦ ᐱᓕᕆᔾᔪᓯᒃᑯᑦ ᑖᑦᓱᒧᖓ ᐱᓕᕆᐊᑦᓴᖅ ᓇᓄᖅ (NANOOK) ᐃᓚᖃᓲᖅ ᐊᔾᔨᒌᙱᑦᑐᓂᑦ ᖃᓄᐃᓕᐅᕈᑎᑦᓴᓂᑦ ᐊᕐᕌᒍᓕᒫ ᐃᓗᐊᓂ. ᑕᒪᓐᓇ ᖃᐅᔨᒪᑦᓯᐊᕆᐊᕈᑕᐅᓂᐊᖅᑐᖅ ᑲᓇᑕᐅᑉ ᐅᓇᑕᖅᑐᑦᓴᖏᑦ ᓴᖅᑭᔮᖅᑎᑦᓯᓂᖅᓴᐅᔪᓐᓇᕐᓗᑎ ᐅᑭᐅᖅᑕᖅᑐᒥ, ᐃᑲᔪᖅᓱᕐᓗᑎ ᒐᕙᒪᓕᒫᓂ ᑲᑐᔾᔨᖃᑎᒋᖃᕐᓂᕐᒥᑦ ᑲᔪᓯᑎᑦᓯᓂᕐᒥᑦ ᐱᓇᓱᐊᖅᑕᒥᓂ ᐅᑭᐅᖅᑕᖅᑐᒥ, ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐊᔪᙱᓐᓂᕆᔭᑦᑎᓐᓂ ᐱᓕᕆᐊᖃᕐᓂᕐᒥᑦ ᖃᓄᐃᓐᓂᐅᔪᕐᔪᐊᓄᑦ, ᐊᒻᒪᓗ ᑲᑐᔾᔨᖃᑎᖃᕐᓂᖅᓴᐅᓗᑕ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥ ᑕᐱᕆᔭᐅᔪᓂᒃ ᐊᒻᒪᓗ ᑲᑐᔾᔨᖃᑎᒋᔭᐅᔪᓂᒃ.

ᐱᓕᕆᐊᖃᕐᓂᕐᒥᑦ ᐅᖓᓯᑦᑐᒧᑦ ᐸᕐᓇᐃᓂᕐᒥᑦ ᖃᐅᔨᒪᑦᓯᐊᕆᐊᕐᓂᕐᒥᑦ ᓈᒻᒪᑦᑐᓂ ᐱᕙᓪᓕᐊᑎᑦᓯᓂᕐᒥᑦ ᐅᑭᐅᖅᑕᖅᑐᒥ ᐊᑦᑕᕐᓇᔾᔭᐃᖅᓯᒪᓂᕐᒥᑦ, ᐅᐊᑦᓯᔨᐅᓂᕐᒧᑦ, ᐊᒻᒪᓗ ᓴᐳᔾᔨᓯᒪᓂᕐᒧᑦ ᐊᔪᙱᓐᓂᖃᕐᓂᕐᒥ ᐊᒻᒪᓗ ᓄᓇᓖᑦ ᐊᑐᖅᐸᑦᑕᖏᓐᓂᒃ ᐊᐅᓚᔪᓐᓇᖁᓪᓗᒋᑦ, ᑲᔪᓯᑎᑦᓯᒍᓐᓇᓚᖓᔪᒍᑦ ᐃᖏᕐᕋᑦᓯᐊᖅᑐᒥ ᐊᒻᒪᓗ ᐊᑑᑎᖃᑦᓯᐊᖅᑐᒥ ᐊᔪᙱᓐᓂᖃᕐᓂᕐᒥᑦ ᐱᓕᕆᐊᖃᕐᓂᕐᒧᑦ ᖃᓄᐃᓐᓂᐅᔪᓄᑦ ᐅᑭᐅᖅᑕᖅᑐᒥ ᓴᐳᔾᔨᓂᕐᒥᓪᓗ ᐊᒻᒪᓗ ᒪᑭᒪᑎᑦᓯᓂᕐᒥᑦ ᑲᓇᑕᒥ ᐊᒻᒪᓗ ᓄᓇᓕᕐᔪᐊᒥ ᓴᐳᔾᔨᓯᒪᓂᕐᒧᑦ ᓯᕗᓂᑦᓴᒧᑦ.

ᑲᓇᑕᒥ ᓯᑯᓯᐅᑎᓕᕆᔨᒃᑯᑦ

ᑲᓇᑕᒥ ᓯᑯᓯᐅᑎᓕᕆᔨᒃᑯᑦ ᑖᒃᑯᐊᑐᐊᖑᒐᔪᓲᑦ ᒐᕙᒪᑐᖃᒃᑯᓐᓂ ᓴᖅᑭᔮᖅᑐᑦ ᐊᒥᓱᓂᑦ ᐃᓂᒋᔭᐅᔪᓂ ᐅᑭᐅᖅᑕᖅᑐᒥ ᐊᔪᙱᓐᓂᖃᕆᐊᓖᑦ ᓴᐳᔾᔨᓂᕐᒥᑦ ᑲᓇᑕᐅᑉ ᐊᑐᕈᒪᔭᖏᓐᓂᒃ ᓄᓇᒋᔭᐅᔪᓂ. ᑕᐃᑰᓇ ᐅᐸᓗᖓᐃᔭᖅᓯᒪᓂᒃᑯᑦ ᐃᑲᔫᑎᑦᓴᓄᑦ ᐊᒻᒪᓗ ᐱᖁᑎᒋᔭᐅᔪᓄᑦ, ᑐᕌᖅᑕᐅᓇᓱᐊᖅᑐᑦ ᑮᓇᐅᔭᖃᖅᑎᑦᓯᓂᕐᒧᑦ ᓄᓇᓖᑦ ᐊᑐᖅᐸᑦᑕᖏᓐᓂᒃ ᐊᐅᓚᔪᓐᓇᖁᓪᓗᒋᑦ ᐊᒻᒪᓗ ᐊᑐᓕᖅᑎᑦᓯᓂᕐᒥᑦ ᖁᕝᕙᓯᑦᑐᒥ ᐅᒥᐊᕐᔪᐊᕐᓄᑦ ᖃᕋᓴᐅᔭᓕᕆᔾᔪᑎᓂ, ᑲᓇᑕᒥ ᓯᑯᓯᐅᑎᓕᕆᔨᒃᑯᑦ ᓴᙱᓂᖅᓴᐅᓕᖅᑎᑦᓯᔪᑦ ᐊᔪᙱᓐᓂᕆᔭᖓᓂ ᐃᑲᔪᖅᓱᓂᕐᒥᑦ ᑲᓇᑕᒥ ᐊᑦᑕᕐᓇᔾᔭᐃᖅᓯᒪᓂᕐᒧᑦ, ᐅᐊᑦᓯᔨᐅᓂᕐᒧᑦ, ᐊᒻᒪᓗ ᐊᕙᑎᓕᕆᓂᕐᒧᑦ, ᐊᒻᒪᓗ ᑮᓇᐅᔾᔭᓴᕐᓂᕐᒧᑦ ᐱᔭᐅᒍᒪᔪᓂ ᐅᐊᓐᓇᖓᓂ ᐃᒪᖏᓐᓂ. ᑲᓇᑕᒥ ᓯᑯᓯᐅᑎᓕᕆᔨᒃᑯᑦ ᐊᑐᐃᓐᓇᐅᑎᑦᓯᔭᕇᓲᑦ ᓯᑯᒦᒍᓐᓇᖅᑐᓂ ᑐᙵᕕᓐᓂ ᐃᑲᔪᖅᓱᓂᕐᒧᑦ ᐱᓕᕆᐊᖑᔪᓂᑦ ᐃᒫᓂ ᐊᑦᑕᕐᓇᔾᔭᐃᖅᓯᒪᓂᕐᒧᑦ, ᐅᐊᑦᓯᔨᐅᓂᕐᒧᑦ, ᐊᒻᒪᓗ ᐊᕙᑎᓕᕆᓂᕐᒧᑦ ᐅᓗᕆᐊᓵᕐᓂᐅᔪᓂᒃ, ᐊᒻᒪᓗ ᑲᑐᔾᔨᖃᑎᖃᒐᔪᓲᑦ ᐊᓯᖏᓐᓂᒃ ᐱᓕᕆᕝᕕᓐᓂ, ᑐᑦᑕᕐᕕᓐᓂ, ᐊᒻᒪᓗ ᑲᑐᔾᔨᖃᑎᒌᖑᔪᓂ ᐱᓇᓱᐊᖅᑕᒥᓂ ᐱᓕᕆᐊᖃᖅᑎᓪᓗᒋᑦ. ᑕᐃᑰᓇ ᑲᓇᑕᐅᑉ ᒐᕙᒪᖓᑕ ᑕᕆᐅᕐᔪᐊᓂ ᓴᐳᔾᔨᓯᒪᓂᕐᒧᑦ ᐸᕐᓇᐅᑎᒃᑯᑦ, ᑲᓇᑕᒥ ᓯᑯᓯᐅᑎᓕᕆᔨᒃᑯᑦ ᐅᖓᕙᕆᐊᖅᓯᒪᔪᑦ ᓯᑯᐃᑎᑦᓯᖃᑦᑕᕐᓂᕆᔭᖓᓂ ᐅᑭᐅᖅᑕᖅᑐᒥ ᖃᐅᔨᒪᑦᓯᐊᕆᐊᕐᓂᕐᒥᑦ ᐊᑦᑕᕐᓇᙱᑦᑐᒥ ᐃᒫᓂ ᐅᒥᐊᕐᔪᐊᓕᕆᓂᕐᒥᑦ ᐊᒻᒪᓗ ᓴᖅᑭᔮᖅᑎᑦᓯᓂᕐᒥᑦ ᑮᓇᐅᔾᔭᓴᕐᓂᕐᒧᑦ ᐱᕈᖅᐹᓪᓕᓂᕐᒥᑦ. ᐃᓚᒋᔭᐅᓪᓗᓂ ᐊᑦᓱᕈᕈᑕᐅᔪᒧᑦ, ᓯᑯᓕᕆᔨᒃᑯᑦ ᓂᐅᕕᖅᓯᒪᔪᑦ ᐱᖓᓱᓂᑦ ᐊᑐᑲᐃᓐᓇᕐᓂᐊᖅᑐᓂᒃ ᐊᑯᓐᓈᕿᔪᓂᑦ ᓯᑯᒥ ᓱᕋᐃᓲᓂᒃ, ᐊᐅᓚᑕᐅᒍᓐᓇᓛᖅᑐᑦ 2020–21-ᒥ, ᖄᒃᑲᓐᓂᐊᒍᑦ ᐅᒥᐊᕐᔪᐊᑦ ᓴᓇᔭᐅᓛᖅᑐᑦ ᐊᑖᒍ ᑲᓇᑕᒥ ᐅᒥᐊᕐᔪᐊᓕᐅᕐᓂᕐᒧᑦ ᐅᐸᓗᖓᐃᔭᐅᑎᒃᑯᑦ.

ᐃᖏᕐᕋᔪᓕᕆᔨᒃᑯᑦ ᑲᓇᑕᒥ

ᐃᖏᕐᕋᔪᓕᕆᔨᒃᑯᑦ ᑲᓇᑕᒥ ᐱᒻᒪᕆᐅᔪᒥ ᐱᓕᕆᐊᑦᓴᓖᑦ ᐅᑭᐅᖅᑕᖅᑐᒥ ᑕᐃᑰ ᑲᓇᑕᒥ ᖃᖓᑕᔫᒃᑯᑦ ᓇᐅᑦᑎᖅᓱᕐᓂᕐᒧᑦ ᐱᓕᕆᐊᑦᓴᖓᒍᑦ, ᐊᒻᒪᓗ ᐱᓪᓗᐊᑕᐅᓪᓗᓂ ᐃᑲᔪᕐᓂᖃᖅᑐᑦ ᓴᐳᔾᔨᓂᕐᒥᑦ ᑲᓇᑕᐅᑉ ᐱᒍᒪᔭᖏᓐᓂ ᓄᓇᒋᔭᐅᔪᓂ. ᑮᓇᐅᔭᖃᖅᑎᑦᓯᓂᕐᒧᑦ ᓄᑖᓂ ᓄᓇᓖᑦ ᐊᑐᖅᐸᑦᑕᖏᓐᓂᒃ ᐊᐅᓚᔪᓐᓇᖁᓪᓗᒋᑦ ᐅᑭᐅᖅᑕᖅᑐᒥ (ᓄᑖᒥ ᐅᑭᐅᖅᑕᖅᑐᒥ ᖃᖓᑕᔫᒃᑯᕕᒻᒥ ᐊᒻᒪᓗ ᑐᔪᕐᒥᕕᑦᓴᓂᑦ), ᐃᖏᕐᕋᔪᓕᕆᔨᒃᑯᑦ ᑲᓇᑕᒥ ᑲᔪᓯᓂᐊᖅᑐᑦ ᐃᑲᔪᖅᓱᓂᕐᒥᑦ ᑲᓇᑕᒥ ᐊᑦᑕᕐᓇᔾᔭᐃᖅᓯᒪᓂᕐᒧᑦ, ᐅᐊᑦᓯᔨᐅᓂᕐᒧᑦ, ᐊᒻᒪᓗ ᐊᕙᑎᓕᕆᓂᕐᒧᑦ, ᐊᒻᒪᓗ ᑮᓇᐅᔾᔭᓴᕐᓂᕐᒧᑦ ᐱᔭᐅᒍᒪᔪᓂ ᐅᐊᓐᓇᖓᓂ ᐃᒪᖏᓐᓂ. ᐃᖏᕐᕋᔪᓕᕆᔨᒃᑯᑦ ᑲᓇᑕᒥ ᒫᓐᓇᐅᔪᖅ ᐊᑐᐃᓐᓇᐅᑎᑦᓯᓲᑦ ᖃᖓᑕᔫᓂ ᓇᐅᑦᑎᖅᓱᕐᓂᕐᒧᑦ ᐅᒥᐊᕐᔪᐊᓕᕆᓂᕐᒥᑦ ᖃᓄᐃᓕᐅᕐᓂᔪᓂ, ᓯᑰᑉ ᖃᓄᐃᑦᑑᓂᖓᓄᑦ ᐊᒻᒪᓗ ᐃᒫᓂ ᐅᐊᑦᓯᔨᐅᓂᕐᒧᑦ, ᐃᓚᒋᓪᓗᓂᐅᒃ ᐊᕙᑎᓕᕆᓂᕐᒧᑦ ᐅᓗᕆᐊᓵᕐᓂᐅᔪᓂᒃ. ᐃᖏᕐᕋᔪᓕᕆᔨᒃᑯᑦ ᑲᓇᑕᒥ ᑐᓴᐅᒪᑎᑦᓯᓲᖑᒻᒥᔪᑦ ᐊᓯᖏᓐᓂᒃ ᐱᓕᕆᕝᕕᓐᓂ, ᑐᑦᑕᕐᕕᓐᓂ, ᐊᒻᒪᓗ ᑲᑐᔾᔨᖃᑎᒌᖑᔪᓂ ᐱᓇᓱᐊᖅᑕᒥᓂ ᐱᓕᕆᐊᖃᖅᑎᓪᓗᒋᑦ.

ᐃᖏᕐᕋᔪᓕᕆᔨᒃᑯᑦ ᑲᓇᑕᒥ ᑲᔪᓯᔪᑦ ᐱᓕᕆᐊᖃᕐᓂᕐᒥᑦ ᑎᒍᒥᐊᖅᑕᐅᔪᒃᑯᑦ ᐊᐅᓚᑎᑦᓯᓂᕐᒥᑦ ᖃᖓᑕᓲᒥ ᐱᓕᕆᔾᔪᓯᕐᒥ (RPAS) ᐱᓕᕆᐊᒥᑦ ᐱᐅᓯᕚᓪᓕᖅᑎᑦᓯᓂᕐᒥᑦ ᖃᖓᑕᔫᒃᑯᑦ ᐃᒪᒃᑯᑦ ᓇᐅᑦᑎᖅᓱᕐᓂᕆᔭᖓᓂ ᐊᒻᒪᓗ ᐊᓯᖏᓐᓂ ᐊᔪᙱᑕᒥᓂ. ᑖᒃᑯᐊ ᑎᒍᒥᐊᖅᑕᐅᔪᒃᑯᑦ ᐊᐅᓚᑎᑦᓯᓂᕐᒥᑦ ᖃᖓᑕᓲᒥ ᐱᓕᕆᔾᔪᓯᕐᒥ (RPAS) ᓂᕆᐅᒋᔭᐅᔪᑦ ᐃᑲᔪᖃᑕᐅᓂᐊᕐᓂᖏᓐᓂ ᐊᖁᑎᖃᖅᑐᓂ ᖃᖓᑕᔫᓂ ᓇᐅᑦᑎᖅᓱᕇᖅᑐᓂ ᐅᑭᐅᖅᑕᖅᑐᒥ.

ᐅᑭᐅᖅᑕᖅᑐᒥ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ

ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ (SAR) ᐅᑭᐅᖅᑕᖅᑐᒥ ᐊᑦᓱᕈᕐᓇᖅᑐᖅ ᐊᒻᒪᓗ ᐱᔭᕆᐊᑐᓪᓗᓂ ᖃᓄᐃᓕᐅᕐᓂᖅ ᐊᒥᓱᓂᑦ ᐊᔾᔨᒌᙱᑦᑐᓂᑦ ᐊᔪᙱᓐᓂᖃᕆᐊᓖᑦ ᐊᒻᒪᓗ ᑲᑐᔾᔨᖃᑎᒋᔭᐅᔪᓂᒃ ᐱᓕᕆᖃᑎᒌᓗᑎᒃ ᐊᓐᓇᐅᒪᑦᓯᓂᕐᒥᑦ ᐃᓅᓯᕐᓂᒃ.

  • ᖃᖓᑕᔫᒃᑯᑦ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᑲᔪᓯᑎᑕᐅᓲᖅ ᑖᒃᑯᓄᖓ ᕈᐃᔪᓪ ᑲᓇᑕᒥ ᐅᓇᑕᖅᑐᑦᓴᒃᑯᑦ ᖃᖓᑕᔫᓕᕆᔨᖏᑦ, ᐃᑲᔪᖅᑕᐅᓪᓗᑎ ᐃᓄᓐᓄᑦ ᖃᖓᑕᔫᒃᑯᑦ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᑲᑐᔾᔨᖃᑎᒌᖑᔪᓂ, ᑲᓇᑕᒥ ᐊᑭᓕᖅᓱᖅᑕᐅᒐᑎ ᑲᑐᔾᔨᖃᑎᒌᖑᔪᑦ ᐊᑐᐃᓐᓇᐅᑎᑦᓯᓲᑦ ᓇᒻᒥᓂᕆᔭᐅᔪᓂ ᖃᖓᑕᔫᓂ ᐊᒻᒪᓗ ᐱᓕᒻᒪᑦᓴᖅᓯᒪᔪᓂ ᖃᖓᑕᔫᓕᕆᔨᓂ. ᖄᒃᑲᓐᓂᐊᒍᑦ, ᑲᓇᑕᐅᑉ ᐅᓇᑕᖅᑐᑦᓴᖏᑦ ᐱᔭᑦᓴᖃᖅᑐᑦ ᐊᑑᑎᖃᑦᓯᐊᖅᑐᒃᑯᑦ ᐊᐅᓚᑦᓯᓂᕐᒥᑦ ᐋᖅᑭᑦᓱᖅᓯᒪᔪᒥᑦ ᖃᖓᑕᔫᒃᑯᑦ ᐊᒻᒪᓗ ᐃᒫᓂ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᑕᐃᑰᓇ ᑲᑐᔾᔨᖃᑎᒌᓐᓂᒃᑯᑦ ᐊᓐᓇᐅᒪᑦᓯᓂᕐᒧᑦ ᐋᖅᑭᑦᓱᐃᔩᑦ ᑐᑦᑕᕐᕕᖏᓐᓂᒃ. ᑭᖑᓪᓕᖅᐹᒥ, ᑲᓇᑕᐅᑉ ᐅᓇᑕᖅᑐᑦᓴᖏᑦ ᐊᑐᐃᓐᓇᐅᑎᑦᓯᓲᖑᒻᒥᔪᑦ ᐊᒻᒪᓗ ᐊᐅᓚᑦᓯᓲᑦ ᖃᖓᑕᔫᒃᑯᑦ ᐱᓕᕆᐊᖃᕐᓂᕐᒧᑦ ᐃᒫᓂ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ.
  • ᐱᔾᔪᑎᖓ ᑲᔪᓰᓐᓇᖅᑐᒥ ᓇᐅᑦᑎᖅᓱᕐᓂᕆᔭᖓᓂ ᐅᑭᐅᖅᑕᖅᑐᒥ ᐊᒻᒪᓗ ᓴᖅᑭᔮᕐᓂᖏᑦ ᓄᓇᒋᔭᐅᔪᓂ, ᐃᖏᕐᕋᔪᓕᕆᔨᒃᑯᑦ ᑲᓇᑕᒥ ᐱᓪᓗᐊᑕᕐᓂᒃ ᐱᓕᕆᐊᑦᓴᖃᖃᑕᐅᔪᑦ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ. ᓇᐅᑦᑎᖅᓱᕐᓂᕐᒧᑦ ᖃᖓᑕᔫᖓᑦ ᓯᕗᓪᓕᖅᐹᖑᒐᔪᓲᖅ ᐱᓕᕆᐊᖃᕐᓂᕐᒧᑦ ᖃᓄᐃᓐᓂᐅᔪᓄᑦ.
  • ᐃᒫᓂ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᑲᒪᒋᔭᐅᔪᖅ ᑲᓇᑕᒥ ᓯᑯᓯᐅᑎᓕᕆᔨᒃᑯᓐᓄ, ᐊᒻᒪᓗ ᐃᑲᔪᖅᓱᖅᑕᐅᔪᖅ ᑲᓇᑕᒥ ᓯᑯᓯᐅᑎᓕᕆᔨᒃᑯᑦ ᐱᓕᕆᔨᖏᓐᓄᑦ, ᐊᑭᓕᖅᓱᖅᑕᐅᒐᑎ ᑲᑐᔾᔨᖃᑎᒌᖑᔪᑦ 200 ᐅᖓᑖᓂ ᐃᓚᒋᔭᖃᖅᑐᑦ ᐊᒻᒪᓗ 25-ᓂᒃ ᐃᒥᐊᕐᔪᐊᖃᖅᓱᑎ.
  • ᓄᓇᒥ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᑲᑐᔾᔨᖃᑎᒋᔭᐅᔪᖅ ᑖᒃᑯᓄᖓ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ ᐊᒻᒪᓗ ᑲᓇᑕᐅᑉ ᓂᒋᐊᓂ ᐊᕕᑦᑐᖅᓯᒪᔪᓂ ᒐᕙᒪᒋᔭᐅᔪᓂ ᐊᒻᒪᓗ ᑐᑦᑕᕐᕕᓐᓂ, ᐊᒻᒪᓗ ᒐᕙᒪᑐᖃᒃᑯᓐᓂ. ᑲᒪᒋᔭᐅᒐᔪᓐᓂᖅᓴᐅᓲᖅ ᓄᓇᒋᔭᐅᔪᓂ ᐸᓖᓯᒃᑯᓐᓂ, ᐃᓚᖃᕈᓐᓇᖅᓱᓂ ᑲᑐᔾᔨᖃᑎᖃᕐᓗᑎ ᕈᐃᔪᓪ ᑲᓇᑕᒥ ᐅᓇᑕᖅᑐᑦᓴᒃᑯᑦ ᖃᖓᑕᔫᓕᕆᔨᖏᓐᓂ ᐅᕝᕙᓘᓐᓃᑦ ᑲᓇᑕᒥ ᐅᓇᑕᖅᑐᑦᓴᙳᐊᓂ ᑕᐃᑲᙵᑦ ᑲᓇᑕᐅᑉ ᐅᓇᑕᖅᑐᑦᓴᖏᓐᓂ.
  • ᐃᓄᓖᒪᓄᑦ ᐊᑦᑕᕐᓇᔾᔭᐃᖅᓯᒪᓂᖅ ᑲᓇᑕᒥ ᓯᕗᓕᖅᑎᐅᔪᑦ ᐱᕙᓪᓕᐊᑎᑦᓯᓂᕐᒥᑦ ᐅᐸᓗᖓᐃᔭᕐᓂᕐᒧᑦ ᐊᑐᐊᒐᕐᒥ ᐋᖅᑦᓱᖅᓯᒪᔾᔪᑎᒥ ᑲᓇᑕᐅᑉ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᓄᓇᓕᖓᓄᑦ ᖃᐅᔨᒪᑦᓯᐊᕆᐊᕐᓂᕐᒥᑦ ᐃᓚᓕᐅᑎᓯᒪᓗᑎᒃ ᐊᐅᓚᑦᓯᓂᕐᒧᑦ ᓄᓇᒋᔭᐅᔪᓕᒫᓂ ᑲᓇᑕᒥ, ᐃᓚᒋᓪᓗᓂᐅᒃ ᐅᑭᐅᖅᑕᖅᑐᒥ.

ᓯᕗᒧᐊᖅᑎᑦᓯᓂᕐᒥᑦ ᐅᑭᐅᖅᑕᖅᑐᒥ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ

ᑲᓇᑕᒥ ᓯᑯᓯᐅᑎᓕᕆᔨᒃᑯᑦ ᐊᖏᓪᓕᒋᐊᖅᑎᕆᔪᖅ ᐃᒫᓂ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᐊᔪᙱᓐᓂᕆᔭᒥᓂ ᐅᐊᓐᓇᖓᓂ ᑲᑐᔾᔨᖃᑎᒋᖃᕐᓂᒃᑯᑦ ᓄᓇᖃᖅᑳᖅᓯᒪᔪᓂ ᓄᓇᓕᐅᔪᓂ. ᑕᐃᑰᓇ ᑕᕆᐅᕐᔪᐊᓂ ᓴᐳᔾᔨᓯᒪᓂᕐᒧᑦ ᐸᕐᓇᐅᑎᒃᑯᑦ, ᐊᖏᓪᓕᒋᐊᖅᑎᑦᓯᔪᖅ ᐅᑭᐅᖅᑕᖅᑐᒥ ᑲᓇᑕᒥ ᓯᑯᓯᐅᑎᓕᕆᔨᒃᑯᑦ ᐱᓕᕆᔨᖏᓐᓂ ᐊᒻᒪᓗ ᐅᖓᕙᕆᐊᖅᓯᔪᖅ ᓄᓇᖃᖅᑳᖅᓯᒪᔪᓄᑦ ᓄᓇᓕᓐᓂ ᐅᒥᐊᖅᑐᕐᓂᕐᒧᑦ ᐊᑭᓕᖅᓱᖅᑕᐅᒐᓂ ᐆᑦᑐᕋᕐᓂᕐᒧᑦ ᐱᓕᕆᐊᑦᓴᖓᓂ. ᑖᒃᑯᐊ ᐊᑐᖅᑕᐅᔪᑦ ᐊᑐᖃᓯᐅᑎᓂᐊᖅᑐᑦ ᒫᓐᓇᒫᖑᓚᐊᖅᑐᒥ ᓴᖅᑭᑎᑕᐅᓂᖓᓄᑦ ᓯᕗᓕᖅᐹᒥ ᐅᑭᐅᖅᑕᖅᑐᒥ ᓯᔾᔭᒥ ᐊᓐᓇᐅᒪᑦᓯᓂᕐᒧᑦ ᐅᒥᐊᒃᑯᕕᒻᒥ ᑲᖏᖅᖠᓂᕐᒥ, ᐱᕕᖃᖅᑎᑦᓯᓚᖓᔪᖅ ᑲᓇᑕᒥ ᓯᑯᓯᐅᑎᓕᕆᔨᒃᑯᑦ ᐊᑑᑎᖃᕐᓂᖅᓴᐅᔪᒃᑯᑦ ᐱᓕᕆᐊᖃᕈᓐᓇᕐᓂᐊᖅᑐᑦ ᐃᒫᓂ ᑐᐊᕕᕐᓇᕆᔭᐅᔪᓂ. ᑭᖑᓪᓕᖅᐹᒥ, ᑕᐃᑰᓇ ᓄᓇᓕᓐᓂ ᐅᒥᐊᕐᓄᑦ ᐱᓕᕆᐊᑦᓴᒃᑯᑦ, ᐃᖃᓗᒃᑑᑦᓯᐊᖅ, ᑲᖏᖅᖠᓂᖅ, ᐅᖅᓱᖅᑑᖅ, ᐊᒻᒪᓗ ᐅᓗᒃᕼᐊᒃᑐᖅ ᑮᓇᐅᔭᖅᑖᓛᖅᑐᑦ ᓂᐅᕕᕐᓂᕐᒧᑦ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᐅᒥᐊᕐᓄᑦ ᐊᒻᒪᓗ ᓱᓇᒃᑯᑖᓄᑦ. ᑲᓇᑕᒥ ᓯᑯᓯᐅᑎᓕᕆᔨᒃᑯᑦ ᑲᔪᓯᓂᐊᖅᑐᖅ ᐅᓗᕆᐊᓇᕐᓂᕐᒧᑦ ᖃᐅᔨᓴᕐᓂᕐᒥᑦ ᓯᔾᔭᖅᐸᓯᐅᔪᓂ ᐅᑭᐅᖅᑕᖅᑐᒥ ᓄᓇᓕᐅᔪᓂ ᖃᐅᔨᒪᑦᓯᐊᕆᐊᕐᓂᕐᒥᑦ ᐃᒫᓂ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᐱᔭᐅᔭᕆᐊᓖᑦ ᑎᑭᐅᒪᔭᐅᓗᑎ, ᒫᓐᓇᐅᔪᖅ ᐊᒻᒪᓗ ᓯᕗᓂᑦᓴᒧᑦ.

ᐃᑲᔪᖅᓱᓂᒃᑯᑦ ᐊᑕᐅᓯᕐᒥᑦ ᐱᓪᓗᐊᑕᖓᓂ ᐱᔭᑦᓴᖓᓂ, ᑲᓇᑕᐅᑉ ᐅᓇᑕᖅᑐᑦᓴᖏᑦ ᑮᓇᐅᔭᖃᖅᑎᑦᓯᔪᑦ ᐃᓇᖏᖅᓯᓂᕐᒥᑦ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᖃᖓᑕᔫᕐᒥᑦ ᓴᙱᓂᖅᓴᐅᓕᖅᑎᑦᓯᓚᖓᔪᒥᑦ ᕈᐃᔪᓪ ᑲᓇᑕᒥ ᐅᓇᑕᖅᑐᑦᓴᒃᑯᑦ ᖃᖓᑕᔫᓕᕆᔨᖏᑦ ᐊᔪᙱᓐᓂᕆᔭᖓᓂ ᐱᓕᕆᐊᖃᕐᓂᕐᒧᑦ ᐱᒻᒪᕆᐅᔪᒥ ᖃᖓᑕᔫᒃᑯᑦ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ, ᑲᑐᔾᔨᖃᑎᖃᕐᓗᑎ ᐃᓄᓐᓂᒃ ᑲᑐᔾᔨᖃᑎᒋᔭᐅᔪᓂᒃ. ᑲᓇᑕᐅᑉ ᐅᓇᑕᖅᑐᑦᓴᖏᑦ ᑲᔪᓯᓂᖃᕐᒥᔪᖅ ᐱᕈᖅᑎᑦᓯᓂᕐᒥᑦ ᐊᔪᙱᓐᓂᕆᔭᖓᓂ ᐱᓕᕆᐊᖃᕈᓐᓇᕐᓂᕐᒥᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐊᐅᓚᑦᓯᓂᒃᑯᑦ ᐊᒻᒪᓗ ᐱᓕᒻᒪᑦᓴᐃᓂᒃᑯᑦ, ᐃᓚᒋᓪᓗᓂᐅᒃ ᐋᖅᑭᒋᐊᖅᓯᓂᕐᒥᑦ ᐊᒻᒪᓗ ᐱᓕᒻᒪᑦᓴᐃᓂᕐᒥᑦ ᑖᑦᓱᒥᖓ ᐱᓕᒻᒪᑦᓴᐃᓂᕐᒥᑦ READY SOTERIA, ᐱᓕᕆᐊᖃᓲᖅ ᐆᑦᑐᕋᙳᐊᕐᓂᐅᔪᒥᑦ ᐱᕐᔪᐊᒥ ᖃᖓᑕᔫᒃᑯᑦ ᖃᓄᐃᕐᔪᐊᕐᓂᐅᔪᒥ. ᓂᐅᕕᕐᓂᒃᑯᑦ ᐊᒥᓱᓂᑦ ᐅᑭᐅᖅᑕᖅᑐᒥ ᐊᒻᒪᓗ ᓯᔾᔭᖁᑎᒋᔭᐅᔪᓂ ᖃᐅᔨᓴᖅᑎᐅᓂᐊᖅᑐᓄᑦ ᐅᒥᐊᕐᔪᐊᓂ, ᕈᐃᔪᓪ ᑲᓇᑕᐅᑉ ᓇᐃᕕᖓ ᐋᖅᑭᑦᓱᖅᓯᒪᑦᓯᐊᓚᖓᔪᑦ ᐃᑲᔪᖅᓱᓂᕐᒧᑦ ᑲᑐᔾᔨᖃᑎᒋᔭᐅᔪᓂᒃ, ᐃᓚᒋᓪᓗᓂᐅᒃ ᑖᒃᑯᐊ ᑲᓇᑕᒥ ᓯᑯᓯᐅᑎᓕᕆᔨᒃᑯᑦ, ᑲᒪᒋᔭᖃᕐᓂᕐᒧᑦ ᐅᑭᐅᖅᑕᖅᑐᒥ ᖃᓄᐃᓕᐅᕈᑕᐅᔪᓂ.

ᑭᖑᓪᓕᖅᐹᒥ, ᐃᓕᓴᖅᓯᓂᕐᒥᑦ ᑐᑭᓯᐅᒪᓂᖃᑦᓯᐊᕐᓂᖅᓴᐅᓂᕐᒥᑦ ᖃᓄᐃᓕᐅᕐᓂᐅᔪᓂ ᐅᑭᐅᖅᑕᖅᑐᒥ ᐱᒻᒪᕆᐅᔪᖅ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᐊᔪᙱᓐᓂᐅᔪᓄᑦ, ᐃᓄᓕᒫᓄᑦ ᐊᑦᑕᕐᓇᔾᔭᐃᖅᓯᒪᓂᖅ ᑲᓇᑕᒥ ᑲᔪᓯᓂᐊᖅᑐᖅ ᐱᓕᕆᖃᑎᖃᕐᓗᑎᒃ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ ᑲᑐᔾᔨᖃᑎᒋᔭᐅᔪᓂᒃ, ᐃᓚᒋᓪᓗᓂᐅᒃ ᐅᐊᓐᓇᖓᓂ ᓄᓇᓕᐅᔪᓂ ᐊᒻᒪᓗ ᐃᓄᓐᓂ, ᑲᔪᖏᖅᓴᐃᓂᕐᒧᑦ ᐊᑐᖁᔨᓗᑎᒃ ᐊᑕᐅᓯᕐᒥ ᓇᒦᓐᓂᖓᓄᑦ ᓱᖅᑯᐃᖅᓯᔾᔪᑎᓂ ᐊᒻᒪᓗ ᖃᕋᓴᐅᔭᓕᕆᔾᔪᑎᓂ ᖃᐅᔨᒪᑦᓯᐊᕆᐊᕐᓂᕐᒥᑦ ᐱᓕᕆᔨᐅᔪᑦ ᑎᑭᕝᕕᐅᔪᓐᓇᕐᓗᑎ ᑐᐊᕕᕐᓇᖅᑐᒧᑦ ᓇᓗᓇᐃᖅᓯᔾᔪᑎᓂ ᐊᑕᐅᓯᕐᒥ ᑲᓲᒪᖃᑎᒌᒍᑎᒥ.

ᑭᓪᓕᒋᔭᐅᔪᓂᒃ ᐅᐊᑦᓯᔨᐅᓂᕐᒧᑦ

ᐱᒻᒪᕆᐅᖃᑕᐅᒻᒥᔪᖅ ᑲᒪᒋᔭᖃᕐᓂᕐᒥᑦ ᐊᓯᔾᔨᖅᐸᓪᓕᐊᔪᒥ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ ᐱᓪᓚᑦᑖᖅᑐᓂ ᐅᑭᐅᖅᑕᖅᑐᒥ ᖃᐅᔨᒪᑦᓯᐊᕆᐊᕐᓂᕐᒥᑦ ᐱᓕᕆᓂᕆᔭᖏᑦ ᐅᐊᓐᓇᖓᓂ ᑭᓪᓕᒋᔭᐅᔪᓂ ᐊᒻᒪᓗ ᑲᒪᒋᔭᖃᕐᓗᑎ ᐃᖏᕐᕋᑦᑎᐊᕆᐊᖃᕐᓂᕐᒥᑦ. ᑕᕝᕗᖓ ᑎᑭᓪᓗᒍ, ᑲᓇᑕᒥ ᑭᓪᓕᒋᔭᐅᔪᓄᑦ ᐱᔨᑦᓯᕋᖅᑎᒃᑯᑦ ᑐᑦᑕᕐᕕᖓ (CBSA) ᐃᖏᕐᕋᑎᑦᑎᓛᖅᑐᑦ ᐆᑦᑐᕋᐅᑎᓂ ᐱᓕᕆᐊᑦᓴᓂᑦ ᐅᑭᐅᖅᑕᖅᑐᒥ, ᐃᓚᒋᓪᓗᓂᐅᒃ ᓇᒻᒥᓂᕆᔭᐅᔪᑦ ᐅᒥᐊᕐᔪᐊᕐᓄᑦ ᖃᐅᔨᓴᖅᑕᐅᒋᐊᖃᕐᓂᖏᓐᓂᒃ, ᐃᑲᔪᖅᓱᓂᕐᒧᑦ ᖃᐅᔨᓴᖅᑕᐅᒋᐊᖃᕐᓂᖏᓐᓄᑦ ᐱᓕᕆᔾᔪᓯᖓᓂ ᐃᓚᖏᓐᓄᑦ ᓂᐅᕈᑎᖃᕐᓂᕐᒨᖏᑦᑐᖅ ᑲᔾᔭᐅᓴᕆᐊᖅᑐᓄᑦ ᐅᒥᐊᕐᔪᐊᓄᑦ ᑲᓇᑕᒧᑦ ᐃᓯᕈᒪᔪᓄᑦ ᑲᓇᓐᓇᖓᓂ ᓄᓇᒋᔭᐅᔪᓂ ᐅᑭᐅᖅᑕᖅᑐᒥ. ᓴᖅᑮᓛᖅᑐᖅ ᐅᑭᐅᖅᑕᖅᑐᒥ ᐅᒥᐊᕐᔪᐊᓕᕆᓂᕐᒥᑦ ᐅᐊᔭᒨᖅᑐᓄᑦ ᓂᐅᕐᕈᑎᖃᕐᓂᕐᒧᑦ ᖃᐅᔨᓴᖅᑕᐅᒋᐊᖃᕐᓂᖓᓄᑦ ᐆᑦᑐᕋᐅᑎᒥ, ᐊᓯᐊᒍᖔᖅ ᖃᐅᔨᓴᖅᑕᐅᒋᐊᖃᕐᓂᕐᒧᑦ ᐱᓕᕆᔾᔪᓯᐅᔪᖅ ᓂᐅᕐᕈᑎᖃᕆᐊᖅᑐᖅᑐᓄᑦ ᐅᒥᐊᕐᔪᐊᕐᓄᑦ.

ᑲᓇᑕ ᓯᕗᒧᐊᓕᖅᑎᑦᓯᑎᓪᓗᒍ ᑭᓪᓕᒋᔭᐅᔪᓂ ᐊᐅᓚᑦᓯᓂᕐᒥᑦ ᐊᒻᒪᓗ ᑭᓪᓕᒋᔭᐅᔪᓂ ᑲᒪᑦᓯᐊᓂᕐᒥᑦ, ᑖᒃᑯᐊ ᑲᓇᑕᒥ ᑭᓪᓕᒋᔭᐅᔪᓄᑦ ᐱᔨᑦᓯᕋᖅᑎᒃᑯᑦ ᑐᑦᑕᕐᕕᖓ ᐱᓕᕆᖃᑎᖃᕐᓂᐊᖅᑐᖅ ᐊᔾᔨᒌᙱᑦᑐᓂ ᑲᑐᔾᔨᖃᑎᒋᔭᐅᔪᓂᒃ ᐋᖅᑭᑦᓱᐃᖃᑎᒌᓗᑎᒃ ᐊᒻᒪᓗ ᐊᑐᓕᖅᑎᑦᓯᖃᑎᒌᓗᑎᒃ ᑭᖑᕙᖓᖏᑦᑐᒥ, ᑐᕌᖓᑦᓯᐊᖅᑐᓂ ᐊᒻᒪᓗ ᒪᑭᒪᑦᓯᐊᖅᑐᒧᑦ ᐱᔨᑦᓯᕋᐅᑎᓂ ᐅᓄᕐᓂᖅᓴᓂ ᐃᓂᒋᔭᐅᔪᓂ ᐱᔨᑦᓯᕋᕐᓂᕐᒧᑦ (ᓲᕐᓗ ᐃᑎᔪᒥ ᑐᓚᑦᑕᕐᕕᓂ, ᖃᖓᑕᓲᒃᑯᕕᓂ, ᐃᒫᓂ ᐅᒥᐊᕐᔪᐊᓄᑦ ᐊᖅᑯᓵᕐᕕᐅᕙᑦᑐᓄᑦ) ᐅᓗᕆᐊᓇᖅᑐᒻᒪᕆᒻᒥ ᐊᕙᑎᒥ. ᑖᒃᑯᐊ ᑲᓇᑕᒥ ᑭᓪᓕᒋᔭᐅᔪᓄᑦ ᐱᔨᑦᓯᕋᖅᑎᒃᑯᑦ ᑐᑦᑕᕐᕕᖓ ᐱᔭᑦᓴᖃᕋᓗᐊᖅᑎᓪᓗᒋᑦ ᐊᐅᓚᑦᓯᓂᕐᒥᑦ ᑭᓪᓕᒋᔭᐅᔪᓂᒃ ᐅᐊᑦᓯᔨᐅᓂᕐᒧᑦ ᓇᓗᓇᐃᖅᓯᒪᔪᓂ ᑐᓚᑦᑕᕐᕕᓐᓂ ᐃᓯᖅᑕᐅᔪᓂ, ᑖᒃᑯᐊ ᐸᓖᓯᒃᑯᑦ (RCMP) ᐱᔭᑦᓴᖃᖅᑐᑦ ᐅᐊᑦᓯᔨᐅᓂᕐᒧᑦ ᑲᓇᑕᐅᑉ ᑭᓪᓕᒋᔭᖏᓐᓂᒃ ᑕᐃᒃᑯᓄᖓ ᑐᓚᑦᑕᕐᕕᓐᓄᑦ ᐊᒻᒪᓗ ᑎᒃᑯᐊᖅᑕᐅᓯᒪᔪᑦ ᑎᒥᒋᔭᐅᓪᓗᑎ ᐊᑐᓕᖅᑎᑦᓯᓂᕐᒥᑦ ᐃᓯᖅᑐᓄᑦ ᐊᒻᒪᓗ ᖃᐅᔨᓴᕆᐊᖃᕐᓂᕐᒧᑦ ᒪᓕᒐᕐᓂᒃ ᐅᐊᓐᓇᖓᓂ ᐱᓕᕆᔨᓂᑦ ᐱᑕᖃᙱᑎᓪᓗᒍ.

ᐱᓕᕆᐊᖑᒍᒪᔪᖅ 3: ᓴᙱᓂᖅᓴᐅᓕᖅᑎᓪᓗᒋᑦ ᑲᓇᑕᐅᑉ ᐱᓪᓗᐊᑕᐅᔪᓂᑦ ᐅᔾᔨᕈᓱᓕᖅᑎᑦᓯᓂᕐᒥᑦ, ᓇᐅᑦᑎᖅᓱᕐᓂᕐᒧᑦ, ᐊᒻᒪᓗ ᐊᐅᓚᑦᓯᓂᕐᒧᑦ ᐊᔪᙱᓐᓂᐅᔪᓂᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ

ᓴᓇᔭᐅᓯᒪᔪᖅ ᐅᖓᑖᓂ 162,000 ᑭᓛᒥᑕᓂᒃ ᓯᔾᔭᓂ, ᐊᒻᒪᓗ 75 ᐳᓴᓐᑎᒥ ᑲᓇᑕᒥ ᑕᒪᐃᓐᓂ ᓯᔾᔭᖁᑎᒋᔭᐅᓪᓗᓂ ᐊᒻᒪᓗ 40 ᐳᓴᓐᑎᒥ ᑲᓇᑕᐅᑉ ᓄᓇᖁᑎᖓᓂ, ᑲᓇᑕᐅᑉ ᐅᑭᐅᖅᑕᖅᑐᖓ ᐊᔾᔨᐅᙱᑦᑐᓂ ᐊᑦᓱᕈᕈᑕᐅᔪᓂᒃ ᐱᑕᖃᖅᑐᖅ ᓴᓇᓂᕐᒧᑦ ᐊᒻᒪᓗ ᑲᒪᑦᓯᐊᓂᕐᒧᑦ ᖃᓄᐃᓕᖓᓂᐅᔪᓂᑦ ᐊᖏᔪᒥ ᓄᓇᒋᔭᐅᔪᒥ. ᐊᔪᙱᓐᓂᕆᔭᕗᑦ ᐱᓕᕆᐊᖃᕈᓐᓇᕐᓂᕐᒥᑦ ᓄᓇᒋᔭᐅᔪᓂ ᐊᑦᓱᕈᕈᑕᐅᔪᓂᒃ, ᐊᑐᐃᓐᓇᐅᑎᑦᓯᓂᕐᒥᑦ ᐅᐊᑦᓯᔨᐅᓂᕐᒧᑦ, ᐊᒻᒪᓗ ᐊᑐᑦᓯᐊᖅᑎᑦᓯᓂᕐᒥᑦ ᒪᓕᒋᐊᖃᕐᓂᕐᒥᑦ ᒪᓕᒐᖁᑎᑦᑎᓐᓂ ᐊᒻᒪᓗ ᒪᓕᑦᑕᐅᔭᕆᐊᓕᓐᓂ ᐱᔾᔪᑎᖃᕐᔪᐊᖅᑐᖅ ᐊᔪᙱᓐᓂᕆᔭᑦᑎᓐᓂ ᑕᒪᓐᓇ ᑲᑎᑎᑦᓯᐊᕐᓗ, ᐊᒥᒐᕆᔭᐅᔪᑦ ᐃᓅᓯᕐᒧᑦ ᐅᓗᕆᐊᓵᕐᓂᖃᕈᓐᓇᕐᓂᖓᓂ. ᓲᕐᓗ, ᐃᒫᓂ ᐊᒻᒪᓗ ᐃᑳᖃᑦᑕᕐᓂᖅ ᑭᓪᓕᒋᔭᐅᔪᓂ ᐃᖏᕐᕋᔪᓄᑦ ᓴᖅᑮᓲᖅ ᓄᑖᓂᑦ ᐊᑦᓱᕈᕈᑕᐅᔪᓂᒃ ᑭᓪᓕᒋᔭᐅᔪᓂ ᑲᒪᑦᓯᐊᓂᕐᒧᑦ ᐊᒻᒪᓗ ᐊᑑᑎᖃᑦᓯᐊᖅᑐᒥᑦ ᐅᒥᐊᕐᔪᐊᓂ ᖃᐅᔨᒪᑦᓯᐊᕆᐊᕐᓂᕐᒥᑦ. ᑕᐃᒪᐃᓐᓂᖓᓄᑦ ᐱᒻᒪᕆᐅᕗᖅ ᐱᓕᕆᕝᕕᓄᑦ, ᑐᑦᑕᕐᕕᓄᑦ, ᓄᓇᓕᓐᓄᑦ ᐊᒻᒪᓗ ᐊᓯᖏᓐᓄᑦ ᐱᓕᕆᖃᑎᒌᑦᓯᐊᕐᓗᑎ ᓴᖅᑮᓂᕐᒥᑦ ᓴᙱᔪᒥ ᐅᔾᔨᕈᓱᓐᓂᕐᒥ ᓄᐊᑦᓯᓂᒃᑯᑦ ᐊᒻᒪᓗ ᐊᑕᐅᑦᓯᒃᑰᖅᑎᑦᓯᓂᕐᒥᑦ ᑐᑭᓯᒋᐊᕈᑎᑦᓴᓂᑦ ᐊᒥᓱᓂᙶᖅᑐᓂᒃ.

ᑲᒪᒋᔭᖃᕐᓂᕐᒥᑦ ᐱᒻᒪᕆᐅᔪᓂ ᐊᒥᒐᕆᔭᐅᔪᓂ ᖃᓄᐃᓕᖓᓂᐅᔪᓂ ᐅᔾᔨᕈᓱᓕᖅᑎᑦᓯᓂᕐᒥᑦ ᐊᖏᓂᖓᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ, ᐊᒻᒪᓗ ᖃᐅᔨᒪᑦᓯᐊᕆᐊᕐᓂᕐᒥᑦ ᐱᔨᑦᓯᕋᕐᓂᕐᒧᑦ ᖁᑦᓯᓐᓂᖏᑦ ᓇᓕᒧᒌᒐᓗᐊᕐᒪᖔᑦᑕ ᐱᕈᖅᐸᓪᓕᐊᔪᓂ ᐱᒍᒪᓂᐅᔪᓂ, ᐱᒻᒪᕆᐅᓂᐊᕐᒥᔪᖅ ᐃᑲᔪᖅᓱᓂᕐᒧᑦ ᐱᓕᕆᐊᕆᔭᐅᔪᓂ ᐃᓱᒪᓕᐅᕆᓂᕐᒧᑦ ᐊᒻᒪᓗ ᐅᐸᓗᖓᐃᔭᕐᓂᕐᒧᑦ ᐸᕐᓇᐃᓂᕐᒥ ᓄᓇᒋᔭᐅᔪᓂ. ᐱᓗᐊᙳᐊᖅᑐᒥ, ᐊᒥᓱᑦ ᐊᑦᑕᕐᓇᔾᔭᐃᖅᓯᒪᓂᕐᒧᑦ, ᐅᐊᑦᓯᔨᐅᓂᕐᒧᑦ ᐊᒻᒪᓗ ᓴᐳᔾᔨᓯᒪᓂᕐᒧᑦ ᐊᑦᓱᕈᕈᑕᐅᔪᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᑐᕌᖓᔪᑦ ᓯᓚᒥ, ᐃᒫᓂ, ᓯᑯᒥ, ᐊᒻᒪᓗ ᓯᓚᓕᕆᓂᕐᒧᑦ ᑐᑭᓯᒋᐊᕈᑎᑦᓴᓂᑦ, ᑐᓴᐅᒪᑎᑦᓯᓂᕐᒧᑦ ᐊᒻᒪᓗ ᖁᐊᖅᓵᕐᓇᕐᓂᖓᓄᑦ ᐱᔨᑦᓯᕋᕐᓂᕐᒧᑦ ᐃᑲᔪᕐᓂᕐᒧᑦ ᐱᑕᖃᓗᐊᖅᑕᐃᓕᒪᑎᑦᓯᓂᕐᒥᑦ ᐊᐅᓚᑦᓯᓂᕐᒧᑦ ᐅᓗᕆᐊᓇᖅᑐᓂᑦ.

ᐃᒫᓂ ᐅᐊᑦᓯᔨᐅᓂᕐᒧᑦ ᐊᐅᓚᑦᓯᓂᕐᒥᑦ ᑐᑦᑕᕐᕖᑦ

ᐃᒫᓂ ᐅᐊᑦᓯᔨᐅᓂᕐᒧᑦ ᐊᐅᓚᑦᓯᓂᕐᒥᑦ ᑐᑦᑕᕐᕖᑦ ᐊᑐᐃᓐᓇᐅᑎᑦᓯᓲᑦ ᑲᓇᑕᒥ ᐃᒫᓂ ᐅᐊᑦᓯᔨᐅᓂᕐᒧᑦ ᐊᔪᙱᓐᓂᖃᕐᓂᕐᒥᑦ ᓇᓗᓇᐃᖅᓯᓂᒃᑯᑦ, ᖃᐅᔨᓴᕐᓂᒃᑯᑦ, ᐊᒻᒪᓗ ᐅᓂᒃᑳᓕᐅᕐᓂᕐᒥᑦ ᐃᒫᓂ ᖃᓄᐃᓕᐅᕐᓂᐅᔪᓂ, ᐃᓚᒋᓪᓗᓂᐅᒃ ᐅᑭᐅᖅᑕᖅᑐᒥ, ᐅᓗᕆᐊᓇᕈᑕᐅᑐᐃᓐᓇᕆᐊᓕᓐᓂ ᓄᓇᒋᔭᐅᓂᖓᓄᑦ, ᐊᑦᑕᕐᓇᔾᔭᐃᖅᓯᒪᓂᕐᒧᑦ, ᐊᒻᒪᓗ ᐅᐊᑦᓯᔨᐅᓂᕐᒧᑦ ᑲᓇᑕᒥ ᐊᒻᒪᓗ ᑲᓇᑕᒥᐅᑕᐅᔪᓂ. ᐃᓚᖃᖅᓱᓂ ᐊᒥᓱᓂ ᒐᕙᒪᑐᖃᒃᑯᓐᓂ ᐱᓕᕆᕝᕕᖏᓐᓂ ᐊᒻᒪᓗ ᑐᑦᑕᕐᕕᖏᓐᓂ ᐱᔭᑦᓴᖃᖅᑐᓂ ᐃᒫᓂ ᐅᐊᑦᓯᔨᐅᓂᕐᒧᑦ, ᐃᒫᓂ ᐅᐊᑦᓯᔨᐅᓂᕐᒧᑦ ᐊᐅᓚᑦᓯᓂᕐᒧᑦ ᑐᑦᑕᕐᕕᖏᑦ ᐱᔪᓐᓇᖅᑎᑦᓯᓲᑦ ᑲᑐᔾᔨᖃᑎᒋᔭᐅᔪᓂᒃ ᐱᓕᕆᖃᑎᒌᓗᑎ, ᑐᓴᐅᒪᖃᑎᒌᓗᑎ ᖃᐅᔨᒪᓂᕐᒧᑦ ᐊᒻᒪᓗ ᓇᐅᑦᑎᖅᓱᕐᓂᕐᒧᑦ ᑐᑭᓯᒋᐊᕈᑎᑦᓴᓂᑦ, ᐊᒻᒪᓗ ᐃᑲᔪᖅᓱᕐᓗᑎ ᐋᖅᑭᑦᓱᖅᓯᒪᔪᒥ ᐱᓕᕆᐊᖃᕐᓂᕐᒥ.

ᐊᒥᓱᑦ ᒐᕙᒪᑐᖃᒃᑯᓐᓂ ᑲᑐᔾᔨᖃᑎᒋᔭᐅᔪᑦ, ᐃᓚᒋᓪᓗᓂᐅᒃ ᑲᓇᑕᒥ ᓴᐳᔾᔨᓯᒪᓂᕐᒧᑦ ᐱᓕᕆᔾᕕᔾᔪᐊᖓ ᐊᒻᒪᓗ ᑲᓇᑕᐅᑉ ᐅᓇᑕᖅᑐᑦᓴᖏᑦ, ᐃᒪᕐᒥᐅᑕᓕᕆᔨᒃᑯᑦ ᐊᒻᒪᓗ ᑲᓇᑕᒥ ᓯᑯᓯᐅᑎᓕᕆᔨᒃᑯᑦ, ᐃᖏᕐᕋᔪᓕᕆᔨᒃᑯᑦ ᑲᓇᑕᒥ, ᐸᓖᓯᒃᑯᑦ, ᑲᓇᑕᒥ ᑭᓪᓕᒋᔭᐅᔪᓄᑦ ᐱᔨᑦᓯᕋᖅᑎᒃᑯᑦ ᑐᑦᑕᕐᕕᖓ, ᐊᕙᑎᓕᕆᔨᒃᑯᑦ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑲᓇᑕᒥ ᐊᒻᒪᓗ ᓄᓇᒥᙶᖅᓯᒪᔪᓕᕆᔨᒃᑯᑦ ᑲᓇᑕᒥ ᐊᑐᐃᓐᓇᐅᑎᑦᓯᓲᑦ ᓄᓇᓖᑦ ᐊᑐᖅᐸᑦᑕᖏᓐᓂᒃ ᐊᐅᓚᔪᓐᓇᖁᓪᓗᒋᑦ ᐊᒻᒪᓗ ᐱᓕᕆᖃᑎᒌᓲᑦ ᓇᐅᑦᑎᖅᓱᕐᓂᕐᒥᑦ ᖃᓄᐃᓕᐅᕐᓂᐅᔪᓂ ᐅᑭᐅᖅᑕᖅᑐᒥ, ᐃᓚᒋᓪᓗᓂᐅᒃ ᑕᐃᑰᓇ ᐃᒫᓂ ᐅᐊᑦᓯᔨᐅᓂᕐᒧᑦ ᐊᐅᓚᑦᓯᓂᕐᒥᑦ ᑐᑦᑕᕐᕕᐅᔪᓂ. ᑖᒃᑯᐊ ᑐᑦᑕᕐᕖᑦ ᐱᒻᒪᕆᐅᖃᑕᐅᔪᑦ ᑲᓇᑕᐅᑉ ᐃᒫᓂ ᖃᐅᔨᓴᕐᓂᕆᔭᖓᓂ ᐊᒻᒪᓗ ᐅᐊᑦᓯᔨᐅᓂᕐᒧᑦ ᓇᑉᐸᖅᑎᑕᐅᓯᒪᔪᓂ ᐊᒻᒪᓗ ᐃᑲᔪᕐᓂᖅᓱᓂ ᒐᕙᒪᓕᒫᒥ ᐱᓕᕆᔾᔪᓯᐅᔪᒥ ᐃᒫᓂ ᐅᔾᔨᕈᓱᓕᖅᑎᑦᓯᓂᕐᒥᑦ. ᑖᒃᑯᐊ ᑐᑦᑕᕐᕖᑦ ᓇᐃᑦᑎᖅᓱᓲᑦ, ᖃᐅᔨᓲᑦ, ᐊᒻᒪᓗ ᖃᐅᔨᓴᖃᑦᑕᖅᑐᑦ ᐅᒥᐊᕐᔪᐊᑦ ᐃᖏᕐᕋᓂᖏᓐᓂ ᐊᒻᒪᓗ ᓇᓗᓇᐃᖅᓯᓲᑦ ᐅᐊᑦᓯᔨᐅᓂᕐᒧᑦ ᑐᕌᖓᔪᓂ ᖃᓄᐃᓐᓂᐅᔪᓂ ᐱᓕᕆᐊᖑᔭᐊᓕᓐᓂᒃ ᑲᓇᑕᐅᑉ ᒐᕙᒪᒃᑯᖏᓐᓄ. ᑲᔪᓯᓂᖃᑦᓯᐊᕐᓂᐊᕐᒥᔪᒍᑦ, ᑲᑐᔾᔨᖃᑎᖃᕐᓗᑕ ᓄᓇᖃᖅᑳᖅᓯᒪᔪᓂ ᒐᕙᒪᓂ, ᐱᓕᕆᕝᕕᓂ, ᐊᒻᒪᓗ ᑲᑐᔾᔨᖃᑎᒌᖑᔪᓂ, ᐃᓚᐅᑎᑦᓯᒃᑲᓐᓂᓂᕐᒥᑦ ᐅᐊᓐᓇᖓᓂ ᐊᒻᒪᓗ ᓄᓇᖃᖅᑳᖅᓯᒪᔪᓂ ᓄᓇᓕᖏᓐᓂ ᐃᒫᓂ ᐊᐅᓚᑦᓯᔨᐅᖃᑕᐅᓂᕐᒥ. ᑕᒪᓐᓇ ᑲᑐᔾᔨᖃᑎᒌᓐᓂᖅ ᓴᙱᓂᖅᓴᐅᓕᖅᑎᑦᓯᓚᖓᔪᖅ ᖃᐅᔨᒪᓂᕆᔭᑦᑎᓐᓂ ᐅᒥᐊᕐᔪᐊᑦ ᖃᓄᐃᓕᐅᖅᑕᖏᓐᓂ ᐃᓂᒋᔭᐅᔪᓂ ᐃᓕᖅᑯᓯᕐᒧᑦ ᐊᒻᒪᓗ ᐊᕙᑎᓕᕆᓂᕐᒧᑦ ᐱᒻᒪᕆᐅᒋᔭᐅᔪᓂ, ᐃᓂᒋᔭᐅᔪᓂᓪᓗ ᐱᕐᔪᐊᕆᔭᐅᔪᓂ ᑲᓇᑕᒥ ᐅᐊᑦᓯᔨᐅᓂᕐᒧᑦ.

ᐃᓕᓴᖅᓯᓂᕐᒥᑦ ᐱᑕᖃᕆᐊᖃᕐᓂᖓᓂ ᓴᖅᑮᓂᕐᒥ ᑐᑭᓯᐅᒪᓂᖃᕐᓂᖅᓴᐅᓂᕐᒥ ᓄᓇᒋᔭᐅᔪᓂ, ᑲᓇᑕᐅᑉ ᒐᕙᒪᒃᑯᖏᑦ ᑲᑎᖅᓱᐃᓂᐊᖅᑐᖅ ᐊᔪᙱᓐᓂᐅᔪᓂ ᐊᖏᓂᖅᓴᓂ ᐱᖁᑎᓂ, ᓲᕐᓗ ᖃᖓᑦᑕᖅᑎᑕᐅᓯᒪᔪᓂ, ᐃᑲᔪᕐᓂᕐᒥᑦ ᐊᑐᐃᓐᓇᐅᑎᑦᓯᓂᕐᒥᑦ ᐅᐊᑦᓯᔨᐅᓂᕐᒧᑦ ᐱᔨᑦᓯᕋᖅᑎᓂ ᐊᒻᒪᓗ ᐃᓱᒪᓕᐅᖅᑎᓂ ᑐᑭᓯᐅᒪᓂᖃᑦᓯᐊᖅᑐᓂ ᐊᐅᓚᑦᓯᓂᕐᒧᑦ ᐊᕙᑎᐅᔪᒥ.

ᓇᐅᑦᑎᖅᓱᑦᓯᐊᕐᓂᕐᒥᑦ ᐊᒻᒪᓗ ᐊᐅᓚᑦᑎᑦᓯᐊᕐᓂᕐᒥᑦ ᑕᒪᐃᓐᓂ ᑲᓇᑕᐅᑉ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ ᐊᒻᒪᓗ ᐱᓕᕆᔾᔪᓯᕐᓂ, ᑲᓇᑕ ᐱᓕᕆᐊᖃᖅᓯᒪᔪᖅ ᐅᔾᔨᕈᓱᓕᖅᑎᑦᓯᒃᑲᓐᓂᓂᕐᒥᑦ ᖃᖓᑕᔫᒃᑯᑦ ᐃᖏᕐᕋᓂᐅᔪᓂ ᑎᑭᑉᐸᓪᓕᐊᔪᓂ ᐊᒻᒪᓗ ᐊᐅᓚᔪᓂ ᑲᓇᑕᐅᑉ ᐊᓂᕐᓂᖁᑎᖓᓂ ᐅᑭᐅᖅᑕᖅᑐᒥ, ᐃᓚᒋᓪᓗᓂᐅᒃ ᐊᖏᓪᓕᒋᐊᖅᑎᑦᓯᓂᕐᒥᑦ ᑲᓇᑕᐅᑉ ᖃᖓᑕᔫᒃᑯᑦ ᓴᐳᔾᔨᓯᒪᓂᕐᒧᑦ ᓇᓗᓇᐃᒃᑯᑕᖓᑕ ᐃᓂᖓᓂ (CADIZ) ᑲᒪᓂᕐᒧᑦ ᑕᒪᐃᓐᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ ᓄᓇᒋᔭᖓᓂ ᐊᒻᒪᓗ ᑎᑭᑉᐸᓪᓕᐊᔪᓂ. ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐊᔪᙱᓐᓂᕆᔭᑦᑎᓐᓂᒃ ᐃᑲᔪᖅᓱᓂᕐᒧᑦ ᓄᓇᕐᔪᐊᕐᒥᑦ ᓴᐳᔾᔨᓯᒪᓂᕐᒧᑦ ᑲᑐᔾᔨᖃᑎᖃᕐᓂᕐᒥᑦ ᐊᒥᐊᓕᒐᓂ, ᐃᓚᒋᓪᓗᓂᐅᒃ ᓄᑖᙳᖅᑎᑦᓯᓂᕐᒥᑦ ᑖᒃᑯᓂᖓ ᓄᐊᔅ ᐊᒥᐊᓕᒐ ᕿᓚᒻᒥ ᓴᐳᔾᔨᓯᒪᓂᕐᒧᑦ ᐱᓕᕆᔩᑦ (NORAD) ᐊᒻᒪᓗ ᓄᑖᙳᖅᑎᑦᓯᓂᕐᒥᑦ ᐅᐊᓐᓇᖓᓂ ᓈᓚᕝᕕᓐᓂᒃ, ᐱᒻᒪᕆᐅᓂᐊᖅᑐᖅ ᑲᔪᓰᓐᓇᖅᑐᒥᑦ ᐊᔪᙱᓐᓂᕆᔭᑦᑎᓐᓂᒃ ᖃᐅᔨᑎᑕᐅᓂᕐᒧᑦ ᐊᒻᒪᓗ ᑐᑭᓯᐅᒪᓂᕐᒧᑦ ᐅᓗᕆᐊᓵᕐᓂᐅᔪᓂᒃ ᓄᐊᔅ ᐊᒥᐊᓕᒐᒧᑦ, ᐊᒻᒪᓗ ᐃᓱᒪᑦᓴᖅᓯᐅᕐᓂᕐᒥᖅ ᐱᓕᕆᐊᖃᕋᔭᕐᒪᖔᑦᑕ ᖃᓄᕐᓗ ᐱᓕᕆᐊᖃᕋᔭᕐᒪᖔᑦᑕ.

ᑕᐃᒫᒃ ᓇᓗᓇᐃᖅᑕᐅᓯᒪᒻᒪ ᓴᙱᔪᒥ, ᐅᐊᑦᓯᔭᐅᔪᒥ, ᐃᓚᐅᓂᕐᒧᑦ, ᑖᒃᑯᐊ ᑲᓇᑕᐅᑉ ᐅᓇᑕᖅᑐᑦᓴᖏᑦ ᓴᙱᓂᖅᓴᐅᓕᖅᑎᑦᓯᓚᖓᔪᑦ ᐊᔪᙱᓐᓂᕆᔭᖓᓂ ᓇᐅᑦᑎᖅᓱᕐᓂᕐᒧᑦ ᖃᓄᐃᓕᐅᕐᓂᐅᔪᓂ ᐅᑭᐅᖅᑕᖅᑐᒥ ᐱᑖᕐᓗᑎ ᐊᒥᓱᓂ ᓄᑖᓂ ᑕᕆᐅᕐᒥ, ᓄᓇᒥ, ᐊᓂᕐᓂᒥ, ᐊᒻᒪᓗ ᕿᓚᒻᒥ ᐊᔪᙱᓐᓂᐅᔪᓂ, ᐊᑐᓕᖃᓯᐅᑎᓗᒋᓗ "ᐱᓕᕆᔾᔪᓯᕐᓂ ᐱᓕᕆᔾᔪᓯᕐᓄᑦ" ᐱᓕᕆᓂᖃᕐᓗᑎ ᐅᑭᐅᖅᑕᖅᑐᒥ ᓇᐅᑦᑎᖅᓱᕐᓂᕐᒧᑦ. ᕈᐃᔪᓪ ᑲᓇᑕᒥ ᐅᓇᑕᖅᑐᑦᓴᒃᑯᑦ ᖃᖓᑕᔫᓕᕆᔨᖏᑦ ᐱᑖᕆᐊᖃᖅᑐᑦ 88-ᓂᒃ ᓱᒃᑲᓕᓂᖅᓴᓂᒃ ᐅᓇᑕᕐᓂᕐᒧᑦ ᖃᖓᑕᔫᓂᒃ ᑲᓇᑕᐅᑉ ᓴᐳᔾᔨᓯᒪᓂᕆᔭᖓᓄᑦ ᐊᒻᒪᓗ ᑎᑭᐅᒪᓂᕐᒧᑦ ᑲᓇᑕᐅᑉ ᐊᖏᖅᓯᒪᓂᕆᔭᖏᓐᓂᒃ ᓄᐊᔅ ᐊᒥᐊᓕᒐ ᕿᓚᒻᒥ ᓴᐳᔾᔨᓯᒪᓂᕐᒧᑦ ᐱᓕᕆᔨᓄᑦ (NORAD) ᐊᒻᒪᓗ ᓄᐊᔅ ᐊᒥᐊᓕᒐ ᐊᖏᕈᑎᓄᑦ ᑲᑐᔾᔨᖃᑎᒌᑦ (NATO). ᑲᓇᑕ ᑲᔪᓯᓂᖃᕐᓂᐊᕐᒥᔪᖅ ᐱᓕᕆᖃᑎᖃᑦᓯᐊᕐᓗᑎᒃ ᑖᒃᑯᓂᖓ ᓄᐊᔅ ᐊᒥᐊᓕᒐ ᕿᓚᒻᒥ ᓴᐳᔾᔨᓯᒪᓂᕐᒧᑦ ᐱᓕᕆᔩᑦ (NORAD) ᖃᐅᔨᒪᑦᓯᐊᕆᐊᕐᓂᕐᒥᑦ ᐊᔪᙱᓐᓂᖃᕋᓗᐊᕐᒪᖔᑦ ᐊᒻᒪᓗ ᐱᓕᕆᔾᔪᑎᓂ, ᐃᓚᒋᓪᓗᓂᐅᒃ ᑎᓕᓯᓂᕐᒧᑦ ᐊᒻᒪᓗ ᐊᐅᓚᑦᓯᓂᕐᒧᑦ, ᑲᔪᓰᓐᓇᖅᑐᒥ ᕿᓚᒻᒥ ᐊᒻᒪᓗ ᐃᒫᓂ ᐅᔾᔨᕈᓱᓕᖅᑎᑦᓯᓂᕐᒥᑦ ᕿᓚᒻᒥᓗ ᐊᐅᓚᑦᓯᓂᕐᒥᑦ. ᓄᑖᖑᔪᑦ ᐃᓂᒋᔭᐅᔪᑦ ᐅᓗᕆᐊᓵᕐᓂᐅᑐᐃᓐᓇᕆᐊᓕᓐᓂᒃ ᓇᓗᓇᐃᖅᑕᐅᔪᓂ — ᐃᓚᒋᓪᓗᓂᐅᒃ ᐱᕙᓪᓕᐊᑎᑦᓯᓂᕐᒥᑦ ᖃᕋᓴᐅᔭᓕᕆᔾᔪᑎᓂ ᓲᕐᓗ ᑎᒍᒥᐊᒐᕐᓄᑦ ᐊᐅᓚᑕᐅᔪᓄᑦ ᖃᖓᑦᑕᖅᑎᑕᐅᓲᓂ ᐱᓕᕆᔾᔪᓯᕐᓂ ᐊᒻᒪᓗ ᓴᖅᑭᑎᑕᐅᓂᖏᓐᓂ ᓄᑖᖑᔪᑦ ᕿᓚᒻᒥ ᐊᒻᒪᓗ ᖃᕋᓴᐅᔭᑎᒍᑦ ᐊᔪᙱᓐᓂᐅᔪᓂ — ᐱᖁᑎᑖᕆᐊᖃᓂᕐᒥᑦ ᓲᕐᓗ ᐃᓇᖏᖅᑕᐅᓂᖓ ᓴᖅᑭᑕᐅᓛᖅᑐᒧᑦ RADARSAT ᐅᓪᓗᕆᐊᓄᑦ ᐃᖏᕐᕋᑎᑦᑎᓂᕐᒧᑦ ᐱᓕᕆᔾᔪᑎᖓ ᓴᙱᓂᖅᓴᐅᓕᖅᑎᑦᓯᓚᖓᔪᖅ ᐊᒻᒪᓗ ᐱᐅᓯᕚᓪᓕᖅᑎᑦᓯᓗᓂ ᓇᐅᑦᑎᖅᓱᕐᓂᕐᒧᑦ ᐊᒻᒪᓗ ᓇᐅᑦᑎᖅᓱᕐᓂᕆᔭᖓᓂ, ᐃᓚᒋᓪᓗᓂᐅᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᓄᓇᒋᔭᐅᔪᓂ. ᑲᓇᑕᐅᑉ ᐅᓇᑕᖅᑐᑦᓴᖏᑦ ᓴᖅᑮᓛᕐᒥᔪᑦ ᐊᒥᓱᓂᑦ ᐅᑭᐅᖅᑕᖅᑐᒥ ᓯᔾᔭᖁᑎᖏᓐᓂ ᓇᐅᑦᑎᖅᓱᕐᓂᕐᒧᑦ ᐅᒥᐊᕐᔪᐊᓂ, ᐊᑐᐃᓐᓇᐅᑎᑦᓯᔪᑦ ᐅᓇᑕᖅᑐᑦᓯᐅᑎᓕᒃ, ᐃᒫᓂ ᓇᐅᑦᑎᖅᓱᕐᓂᕐᒧᑦ ᑲᓇᑕᐅᑉ ᐃᒪᖏᓐᓂ ᐅᑭᐅᖅᑕᖅᑐᒥ.

ᖁᕝᕙᓯᑦᑐᒥ ᖃᐅᔨᓴᕐᓂᕐᒧᑦ ᐊᒻᒪᓗ ᐱᕙᓪᓕᐊᑎᑦᓯᓂᕐᒥᑦ, ᐃᓚᒋᓪᓗᓂᐅᒃ ᑕᐃᑰᓇ ᑕᒪᐃᓐᓄᑦ ᖃᓄᐃᓕᖓᓂᐅᔪᓂᑦ ᐅᔾᔨᕈᓱᓕᖅᑎᑦᓯᓂᕐᒧᑦ ᖃᐅᔨᓴᖅᑐᓕᕆᓂᕐᒧᑦ ᐊᒻᒪᓗ ᖃᕋᓴᐅᔭᓕᕆᔾᔪᑎᓄᑦ (S&T) ᐱᓕᕆᐊᑦᓴᒃᑯᑦ, ᐊᒻᒪᓗ ᑖᓐᓇ ᓄᑖᖑᔪᓂ ᓴᐳᔾᔨᓯᒪᓂᕐᒧᑦ ᐱᓕᕆᔨᒻᒪᕆᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ (IDEaS) ᐱᓕᕆᐊᑦᓴᒃᑯᑦ, ᐃᑲᔪᕐᓂᖃᒋᐊᓪᓚᓐᓂᐊᖅᑐᖅ ᑎᑭᐅᒪᓂᕐᒧᑦ ᑲᓇᑕᐅᑉ ᐅᓇᑕᖅᑐᑦᓴᖏᑦ ᐱᒋᐊᖃᖅᑕᖏᓐᓂᒃ ᓄᑖᖤ ᓇᐅᑦᑎᖅᓱᕐᓂᕐᒧᑦ ᐊᒻᒪᓗ ᑐᓴᒪᐅᔪᓕᕆᓂᕐᒧᑦ ᐋᖅᑭᒋᐊᕈᑎᑦᓴᓂᑦ ᐋᖅᑭᐅᒪᔪᓂ ᐊᑦᓱᕈᕐᓇᖅᑐᒧᑦ ᐅᑭᐅᖅᑕᖅᑐᒥ ᐊᕙᑎᖓᓄᑦ. ᐊᑦᑕᕐᓇᖅᔭᐃᖅᓯᒪᑎᑦᓯᓂᕐᒥᑦ ᑮᓇᐅᔭᖃᖅᑎᑦᓯᓂᕐᒧᑦ ᑖᒃᑯᓄᖓ ᐊᑐᕆᐊᖃᓪᓚᕆᑦᑐᓄᑦ ᐅᓪᓗᒥᓯᐅᑎᓂᒃ ᑐᙵᓇᙱᑦᑐᓂᒃ ᑕᕆᐅᑉ ᐊᑭᐊᓂ ᖃᓄᐃᓕᐅᕐᓂᐅᔪᓂᒃ ᓲᕐᓗ ᑎᓪᓕᖃᑦᑕᕐᓂᕐᒧᑦ ᐊᒻᒪᓗ ᓱᕋᑦᓯᓂᕐᒧᑦ ᓯᕗᓪᓕᐅᔾᔭᐅᔪᒪᔪᖅ ᑲᓇᑕᒧᑦ.

ᐱᓕᕆᐊᖑᒍᒪᔪᖅ 4: ᐊᑐᓕᖅᑎᑦᓯᓂᕐᒥᑦ ᑲᓇᑕᐅᑉ ᒪᓕᒐᖓᓂ ᐊᒻᒪᓗ ᐊᑐᖅᑕᐅᔭᕆᐊᓕᓐᓂᒃ ᐋᖅᑭᑦᓱᖅᓯᒪᔾᔪᑎᖏᓐᓂᒃ

ᐃᖏᕐᕋᔪᓕᕆᓂᖅ ᑲᓇᑕᐅᑉ ᐅᑭᐅᖅᑕᖅᑐᖓᑕ ᐃᒪᖏᓐᓂ ᒪᓕᒋᐊᓕᒃ ᐊᖏᔪᓂ ᒪᓕᒐᕐᓂᒃ ᐊᒻᒪᓗ ᒪᓕᑦᑕᐅᔭᕆᐊᓕᓐᓂᒃ ᐋᖅᑭᑦᓱᖅᓯᒪᔾᔪᑎᓂᒃ ᑐᕌᖓᔪᓂᑦ ᓴᐳᔾᔨᓂᕐᒥᑦ ᑕᒪᒃᑮᓐᓂ ᐃᓄᓐᓂᒃ ᐊᒻᒪᓗ ᐊᕙᑎᒥ. ᐃᒫᓂ ᐃᖏᕐᕋᖃᑦᑕᖅᑐᑦ ᐊᒥᓱᕈᕆᐊᕐᓂᖏᓐᓄᑦ ᐅᑭᐅᖅᑕᖅᑐᒥ, ᖃᐅᔨᒪᑦᓯᐊᕆᐊᕐᓂᕐᒥᑦ ᓈᒻᒪᑦᑐᓂ ᒪᓕᒋᐊᖃᕐᓂᕐᒥᑦ ᐅᒥᐊᕐᔪᐊᓂ ᐃᖏᕐᕋᔪᓂ ᐅᕝᕙᓘᓐᓃᑦ ᐊᐅᓚᔪᓂ ᐃᒪᖁᑎᑦᑎᓐᓂ ᓯᕗᓪᓕᐅᔾᔭᐅᕙᓪᓕᐊᑐᐃᓐᓇᖅᑐᖅ ᑲᓇᑕᒥ. ᑕᐃᒪᐃᓕᖓᑎᓪᓗᒍ, ᐊᒥᓱᑦ ᒪᓕᒐᓕᕆᓂᕐᒧᑦ ᐋᖅᑭᓯᒪᔾᔪᑏᑦ ᐊᐅᓚᑦᓯᓲᑦ ᐅᒥᐊᕐᔪᐊᓕᕆᓂᕐᒥᑦ, ᐃᓚᒋᓪᓗᓂᐅᒃ: ᐃᒫᓂ ᐃᖏᕐᕋᔪᓕᕆᓂᕐᒧᑦ ᐅᐊᑦᓯᔨᐅᓂᕐᒧᑦ ᐱᖁᔭᖓ; ᑲᓇᑕᒥ ᐅᒥᐊᕐᔪᐊᓕᕆᓂᕐᒥᑦ ᐱᖁᔭᖓ, 2001; ᐃᒫᓂ ᓵᑕᐅᔪᓐᓇᕐᓂᕐᒧᑦ ᐱᖁᔭᖓ; ᐊᒻᒪᓗ ᐅᑭᐅᖅᑕᖅᑐᒥ ᐃᒪᖁᑎᓂ ᓱᕈᐃᑦᑕᐃᓕᒪᑎᑦᓯᓂᕐᒧᑦ ᐱᖁᔭᖓ. ᐱᖓᓱᑦ ᐊᑐᐃᓐᓇᐅᑎᑦᓯᓲᑦ ᐊᔾᔨᒌᙱᑦᑐᓂ ᑲᒪᒋᔭᖃᕐᓂᕐᒥᑦ ᐅᓗᕆᐊᓇᕈᑕᐅᔪᓂ ᑐᕌᖓᔪᓂ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ ᓄᓇᒋᔭᐅᔪᓂ. ᐱᒻᒪᕆᐅᖃᑕᐅᒻᒥᔪᖅ ᐱᕙᓪᓕᐊᑎᑦᓯᓂᕐᒥᑦ ᑖᓐᓇᐅᔪᖅ 2017-ᒥ ᓴᖅᑭᕐᖓᐅᑕᐅᓂᖓ ᑖᓐᓇ ᐅᑭᐅᖅᑕᖅᑐᒥ ᐅᒥᐊᕐᔪᐊᓕᕆᓂᕐᒥᑦ ᐊᑦᑕᕐᓇᔾᔭᐃᖅᓯᒪᓂᕐᒥ ᐊᒻᒪᓗ ᓱᕈᐃᑦᑕᐃᓕᒪᑎᑦᓯᓂᕐᒥᑦ ᒪᓕᒋᐊᓕᓐᓂ ᑲᒪᒋᔭᖃᓲᑦ ᐅᒥᐊᕐᔪᐊᕐᓂ ᐊᑦᑕᕐᓇᔾᔭᐃᖅᓯᒪᓂᕐᒥ ᐊᒻᒪᓗ ᓱᕈᐃᑦᑕᐃᓕᒪᑎᑦᓯᓂᕐᒥᑦ, ᐊᑐᖃᐅᓯᑎᓂᕐᒥ ᐅᑭᐅᖅᑕᖅᑐᒥ ᒪᓕᒐᕐᒥ, ᐊᒻᒪᓗ ᑭᒡᒐᖅᑐᐃᓗᑎ ᐊᓯᔾᔨᕈᑕᐅᓂᖅᐹᖑᔪᒥ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐅᒥᐊᕐᔪᐊᓕᕆᓂᕐᒥᑦ ᐊᕐᕌᒍᓂ ᖁᓕᓂ. ᐊᐅᓚᑦᓯᓂᕐᒧᑦ ᐊᕙᑎᖓ ᐊᓯᔾᔨᖅᐸᓪᓕᐊᑎᓪᓗᒍ, ᑲᓇᑕᐅᑉ ᒐᕙᒪᒃᑯᖏᑦ ᐊᑐᓕᖅᑎᑦᓰᓐᓇᕐᓂᐊᖅᑐᑦ ᒪᓕᒐᑦᑎᓐᓂ ᐊᒻᒪᓗ ᒪᓕᒋᐊᓕᓐᓂ ᖃᐅᔨᒪᑦᓯᐊᕆᐊᕐᓂᕐᒥᑦ ᐊᑦᑕᕐᓇᙱᑦᑐᒥ, ᐅᐊᑦᓯᔭᐅᑦᓯᐊᖅᑐᒥ, ᐊᒻᒪᓗ ᐊᕙᑎᒨᖓᑦᓯᐊᖅᑐᒥ ᐅᒥᐊᕐᔪᐊᕐᓂ ᐊᐅᓚᓂᖃᕐᓗᑎ, ᐊᒻᒪᓗ ᓄᖅᑲᖅᑎᑦᓯᓂᕐᒥᑦ ᐊᑦᑕᕐᓇᖅᑐᓂᒃ ᐅᒥᐊᕐᔪᐊᕐᓂ ᐊᐅᓚᑎᑕᐅᑦᑕᐃᓕᒪᓗᑎ ᐅᑭᐅᖅᑕᖅᑐᒥ.

ᖄᒃᑲᓐᓂᐊᒍᑦ, ᐅᐊᓐᓇᖓᓂ ᑲᓇᑕᒥ ᐅᒥᐊᕐᔪᐊᑦ ᐃᖏᕐᕋᓂᖏᓐᓄᑦ ᐱᔨᑦᓯᕋᕐᓂᖅ ᐃᓂᒋᔭᐅᔪᒥ ᒪᓕᒋᐊᓖᑦ (NORDREG) ᐃᑲᔪᓲᖅ ᖃᐅᔨᓴᕐᓂᕐᒧᑦ ᐅᒥᐊᕐᔪᐊᓂ ᐊᐅᓚᔪᓂ ᑲᓇᑕᐅᑉ ᐃᒪᖁᑎᖏᓐᓂ ᖃᐅᔨᒪᑦᓯᐊᕆᐊᕐᓂᕐᒥᑦ ᐊᑦᑕᕐᓇᙱᑦᑐᓂ ᐊᒻᒪᓗ ᐊᑑᑎᖃᑦᓯᐊᖅᑐᒥ ᐃᖏᕐᕋᖁᓪᓗᒋᑦ ᐊᒻᒪᓗ ᓴᐳᔾᔨᓯᒪᖁᓪᓗᒋᑦ ᐃᒪᐅᑉ ᐊᕙᑎᖓᓂ. ᐊᖏᓪᓕᕙᓪᓕᐊᑎᓪᓗᒍ ᐳᓚᕋᖅᑐᓕᕆᓂᖅ ᐊᒻᒪᓗ ᑲᔾᔭᐅᓴᕆᐊᖅᐸᑦᑐᑦ ᐅᒥᐊᕐᔪᐊᒃᑯᑦ ᓄᓇᒋᔭᐅᔪᓂ, ᐃᓚᒋᓪᓗᓂᐅᒃ ᓄᖅᑲᖅᑕᕐᕕᐅᑐᐃᓐᓇᕆᐊᓖᑦ ᐅᐊᓐᓇᖓᓂ ᓄᓇᓕᐅᔪᓂ, ᐃᖏᕐᕋᔪᓕᕆᔨᒃᑯᑦ ᑲᓇᑕᒥ ᑲᔪᓯᓂᐊᖅᑐᑦ ᐱᓕᕆᖃᑎᖃᕐᓗᑎ ᐅᑭᐅᖅᑕᖅᑐᒥ ᓄᓇᓕᐅᔪᓂ ᐃᒫᓂ ᓄᓇᓖᑦ ᐊᑐᖅᐸᑦᑕᖏᓐᓂᒃ ᐊᐅᓚᔪᓐᓇᖁᓪᓗᒋᑦ ᒪᓕᑦᑎᐊᖅᓯᒪᖁᓪᓗᒋᑦ ᐃᒫᓂ ᐃᖏᕐᕋᔪᓕᕆᓂᕐᒧᑦ ᐅᐊᑦᓯᔨᐅᓂᕐᒧᑦ ᐱᖁᔭᖓᓂ ᐊᓯᖏᓐᓂᓪᓗ ᒪᓕᒋᐊᓕᓐᓂ. ᑲᓇᑕᐅᑉ ᒐᕙᒪᒃᑯᖏᑦ ᖃᐅᔨᒪᑦᓯᐊᕆᐊᕐᓂᐊᖅᑐᑦ ᒪᓕᒐᖅᐳᑦ ᐊᒻᒪᓗ ᒪᓕᑦᑕᐅᔭᕆᐊᓖᑦ ᐋᖅᑭᑦᓱᖅᓯᒪᔾᔪᑎᖏᑦ ᑐᕌᖓᐃᓐᓇᕐᓗᑎᒃ ᐱᓪᓚᑦᑖᖅᑐᓄᑦ ᐊᒥᓱᕈᕆᐊᖅᑎᓪᓗᒋᑦ ᐅᑭᐅᖅᑕᖅᑐᒥ ᐃᖏᕐᕋᓂᐅᔪᑦ, ᐊᒻᒪᓗ ᐊᑦᑐᐃᓂᖃᑐᐃᓐᓇᕆᐊᖃᕐᓂᖏᓐᓂᒃ ᓄᓇᒋᔭᐅᔫᑉ ᐃᓄᖏᓐᓄᑦ ᐊᒻᒪᓗ ᓄᓇᓕᖏᓐᓄᑦ.

ᐊᑐᖅᑐᑦ ᒪᓕᒐᑦ ᐊᒻᒪᓗ ᒪᓕᒋᐊᓖᑦ ᐱᓪᓗᐊᑕᐅᒻᒥᔪᑦ ᖃᐅᔨᒪᑦᓯᐊᕆᐊᕐᓂᕐᒥᑦ ᑕᕆᐅᑉ ᐊᑭᐊᓂ ᑮᓇᐅᔭᖃᖅᑎᑦᓯᓂᕐᒧᑦ ᐅᑭᐅᖅᑕᖅᑐᒥ ᐱᕚᓪᓕᕈᑕᐅᓗᓂ ᐅᐊᓐᓇᖓᓂᕐᒥᐅᑕᓄᑦ ᐊᒻᒪᓗ ᐅᓗᕆᐊᓵᕐᓂᐅᖏᓪᓗᓂ ᑲᓇᑕᒥ ᐅᐊᑦᓯᔨᐅᓂᕐᒧᑦ. ᑖᓐᓇ ᒪᓕᒐᖅᑎᒍᑦ ᐊᒻᒪᓗ ᒪᓕᑦᑕᐅᔭᕆᐊᓕᒃ ᐋᖅᑭᑦᓱᖅᓯᒪᔾᔪᑎ ᐃᑲᔪᖅᓱᖅᑐᖅ ᑮᓇᐅᔾᔭᓴᕐᓂᕐᒧᑦ ᐱᕈᖅᐹᓪᓕᓂᕐᒥᑦ ᐊᒻᒪᓗ ᑮᓇᐅᔭᖃᖅᑎᑦᓯᒃᑲᓐᓂᓂᕐᒥᑦ ᓄᓇᒋᔭᐅᔪᓂ, ᖃᐅᔨᒪᑦᓯᐊᕆᐊᓯᓐᓈᑦ ᑕᕆᐅᑉ ᐊᑭᐊᓂ ᑮᓇᐅᔭᖃᖅᑎᑦᓯᓂᕐᒧᑦ ᖃᓄᐃᓕᐅᕐᓂᖅ ᐅᑭᐅᖅᑕᖅᑐᒥ ᒪᓕᑦᓯᐊᕐᓗᓂ ᑲᓇᑕᒥ ᐅᐊᑦᓯᔨᐅᓂᕐᒧᑦ. ᕿᓂᖅᑎᓪᓗᑕ ᐱᕙᓪᓕᐊᑎᑦᓯᓂᕐᒥᑦ ᐱᔭᐅᔭᕆᐊᖃᓪᓚᕆᑦᑐᓂ ᓄᓇᓖᑦ ᐊᑐᖅᐸᑦᑕᖏᓐᓂᒃ ᐊᐅᓚᔪᓐᓇᖁᓪᓗᒋᑦ ᐅᑭᐅᖅᑕᖅᑐᒥ, ᐅᓗᕆᐊᓇᕈᑏᑦ ᐊᒻᒪᓗ ᐱᕕᑦᓴᖃᕐᓂᐅᔪᑦ ᑕᕆᐅᑉ ᐊᑭᐊᓂ ᖃᓄᐃᓕᐅᕈᑕᐅᔪᓂ ᐅᐸᓗᖓᐃᔭᖅᓯᒪᓂᒃᑯᑦ ᐱᒻᒪᕆᐅᒋᔭᐅᔪᒃᑯᑦ ᐃᓱᒪᒋᔭᐅᑦᓯᐊᕆᐊᖃᕐᓂᐊᖅᑐᑦ ᐊᒻᒪᓗ ᓇᓕᒧᒌᓕᖅᑎᑕᐅᓗᑎ. ᖃᐅᔨᒪᓂᕐᒥᑦ ᐊᑦᑕᕐᓇᙱᑦᑐᒥ ᐊᒻᒪᓗ ᒪᑭᒪᑦᓯᐊᖅᑐᒧᑦ ᓄᓇᓖᑦ ᐱᑕᖃᙱᑦᑐᓂ ᓱᕋᑦᑎᕆᑐᐃᓐᓇᕆᐊᓕᓐᓂ ᓯᓚᑖᓂᙶᖅᑐᓂᒃ ᐅᕝᕙᓘᓐᓃᑦ ᐃᓕᖅᑯᓯᕆᔭᐅᔪᓂ ᑐᙵᕕᐅᔪᑦ ᐆᒪᑦᓯᐊᕆᑦᑐᓄᑦ ᐅᐊᓐᓇᖓᓂ ᑮᓇᐅᔾᔭᓂᕐᒧᑦ, ᑲᓇᑕᐅᑉ ᒐᕙᒪᒃᑯᖏᑦ ᓴᙱᓂᖅᓴᐅᓕᖅᑎᑦᓯᓂᐊᕐᒥᔪᑦ ᓴᐳᔾᔨᓯᒪᓂᕐᒥᑦ ᐊᑦᑐᖅᑕᐅᓴᕋᐃᑦᑐᓂ ᐃᓂᒋᔭᐅᔪᓂ ᐊᒻᒪᓗ ᓄᓇᓖᑦ ᐊᑐᖅᐸᑦᑕᖏᓐᓂᒃ ᐊᐅᓚᔪᓐᓇᖁᓪᓗᒋᑦ, ᑖᒃᑯᐊᓗ ᖃᕋᓴᐅᔭᓕᕆᔾᔪᑏᑦ ᑲᓇᑕᐅᑉ ᐅᓇᑕᖅᑐᑦᓴᖏᑦ ᐊᒻᒪᓗ ᐊᓯᖏᓐᓄᑦ ᒐᕙᒪᑐᖃᒃᑯᓐᓂ ᐅᐊᑦᓯᔨᐅᓂᕐᒧᑦ ᐱᔨᑦᓯᕋᖅᑐᓄᑦ ᐊᑐᖅᑕᐅᖃᑦᑕᖅᑐᓄᑦ.

ᐱᓕᕆᐊᖑᒍᒪᔪᖅ 5: ᐊᖏᓪᓕᒋᐊᖅᑕᐅᓗᑎᒃ ᐃᓅᖃᑎᒌᓕᒫᑦ ᑐᐊᕕᕐᓇᖅᑐᒥᑦ ᐊᐅᓚᑦᓯᓂᕐᒥᑦ ᐊᔪᙱᓐᓂᐅᔪᓂᑦ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᓄᓇᓕᐅᔪᓂ

ᐱᓪᓗᐊᑕᕐᓂᒃ ᐃᓚᒋᔭᐅᔪᖅ ᐅᑭᐅᖅᑕᖅᑐᒥ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ ᓇᑉᐸᖅᑎᑕᐅᓯᒪᔪᑦ ᐊᑐᖃᓯᐅᑎᓂᕐᒥᑦ ᑲᓇᑕᒥ ᑐᐊᕕᕐᓇᖅᑐᒥᑦ ᐊᐅᓚᑦᓯᓂᕐᒥᑦ ᐅᐸᓗᖓᐃᔭᐅᑎᒥ, ᓴᖅᑭᑕᐅᓯᒪᔪᖅ ᒐᕙᒪᑐᖃᒃᑯᓐᓂ, ᑲᓇᑕᐅᑉ ᓂᒋᐊᓂ ᐊᕕᑦᑐᖅᓯᒪᔪᓂ, ᐊᒻᒪᓗ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ ᐊᑦᓱᕈᕆᔭᐅᔪᓂ ᓴᖅᑮᓂᕐᒥ ᐱᓕᕆᔾᔪᑕᐅᖃᓯᐅᑎᒍᓐᓇᖅᑐᓂ ᑐᐊᕕᕐᓇᖅᑐᒥᑦ ᐊᐅᓚᑦᓯᓂᕐᒥᑦ. ᐃᓕᓴᖅᓯᓂᕐᒥᑦ ᑐᐊᕕᕐᓇᖅᑐᓕᕆᓂᕐᒧᑦ ᐱᔭᐅᔭᕆᐊᓖᑦ ᐊᓯᔾᔩᓐᓇᐅᔭᕐᒪᑕ, ᑲᑐᔾᔨᖃᑎᒌᒋᐊᓖᑦ ᓇᐅᒃᑯᓕᒫᑦ ᐃᓅᖃᑎᒌᖑᔪᓂᒃ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᓄᓇᓕᓐᓂ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐊᓂᒍᐃᔪᓐᓇᕐᓂᕐᒥᑦ. ᐃᓚᒋᔭᐅᓪᓗᓂ ᑲᔪᓰᓐᓇᖅᑐᒥ ᐊᑦᓱᕈᕐᓂᕐᒥᑦ ᐱᐅᓯᕚᓪᓕᖅᑎᑦᓯᓂᕐᒥᑦ ᖃᓄᖅ ᑕᐃᒪᐃᑎᑦᓯᑦᑕᐃᓕᒪᓲᖑᒻᒪᖔᑦᑕ, ᒥᑭᓪᓕᒋᐊᖅᑎᑦᓯᓲᖑᒻᒪᖔᑦᑕ, ᐱᕙᒌᔭᓲᖑᒻᒪᖔᑦᑕ, ᐱᓕᕆᐊᖃᓲᖑᒻᒪᖔᑦᑕ, ᐊᓂᒍᐃᓲᖑᒻᒪᖔᑕᓗ ᑐᐊᕕᕐᓇᖅᑐᓂ, ᑲᑐᔾᔨᖃᑎᒋᔭᐅᔪᑦ ᐱᓕᕆᐊᖃᖅᑐᑦ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᒐᕙᒪᑐᖃᒃᑯᑦ-ᑲᓇᑕᐅᑉ ᓂᒋᐊᓂ ᐊᕕᑦᑐᖅᓯᒪᔪᓂ-ᐅᑭᐅᖅᑕᖅᑐᒥ ᐊᑦᑐᖅᓯᒪᔪᓂ ᑐᐊᕕᕐᓇᖅᑐᒥᑦ ᐊᐅᓚᑦᓯᓂᕐᒥᑦ ᒐᕙᒪᓕᕆᓂᕐᒥᑦ ᐊᒻᒪᓗ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐃᓚᐅᓂᕆᔭᖏᑦ ᓄᓇᖃᖅᑳᖅᓯᒪᔪᑦ ᑭᒡᒐᖅᑐᐃᔨᖏᑦ ᑕᕝᕙᓂ ᐱᓕᕆᐊᖑᔪᒥ.

ᐱᓕᕆᐊᖑᒍᒪᔪᖅ 6: ᐃᑲᔪᖅᓱᕐᓗᑎ ᓄᓇᓕᓐᓂ ᐊᑦᑕᕐᓇᔾᔭᐃᖅᓯᒪᓂᕐᒥᑦ ᐊᑑᑎᖃᑦᓯᐊᖅᑐᒃᑯᑦ ᐊᒻᒪᓗ ᐃᓕᖅᑯᓯᕐᒧᑦ ᓈᒻᒪᒋᔭᐅᔪᒥᑦ ᐱᕋᔭᑦᑕᐃᓕᒪᑎᑦᓯᓂᕐᒧᑦ ᐱᒋᐊᕈᑎᑦᓴᓄᑦ ᐊᒻᒪᓗ ᐸᓖᓯᓕᕆᓂᕐᒧᑦ ᐱᔨᑦᓯᕋᕐᓂᕐᒧᑦ

ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᓄᓇᓖᑦ ᑲᔪᓯᑎᓪᓗᒋᑦ ᐊᑦᓱᕈᕈᑕᐅᔪᓂᒃ ᖃᑦᓯᓂᖅᓴᐅᓕᖅᑎᑦᓯᔪᓂ ᐱᕋᔭᓐᓂᖅᓴᐅᓂᕐᒧᑦ, ᐃᓕᖅᑯᓯᕐᒥ ᐃᑉᐱᒍᓱᑦᓯᐊᖅᑐᒥ ᐱᕋᔭᑦᑕᐃᓕᒪᑎᑦᓯᓂᕐᒧᑦ ᐱᓕᕆᐊᑦᓴᓂᑦ ᐊᒻᒪᓗ ᓄᓇᓕᒻᒥ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐸᕐᓇᐃᓂᕐᒧᑦ ᐱᒋᐊᕈᑎᑦᓴᑦ ᐱᒻᒪᕆᐅᔪᑦ. ᑕᐃᑰᓇ ᓄᓇᖃᖅᑳᖅᓯᒪᔪᓄᑦ ᓄᓇᓕᒻᒥ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐸᕐᓇᐃᓂᕐᒧᑦ ᐱᒋᐊᕈᑎᑦᓴᒃᑯᑦ, ᐃᓄᓕᒫᓄᑦ ᐊᑦᑕᕐᓇᔾᔭᐃᖅᓯᒪᓂᖅ ᑲᓇᑕᒥ ᐃᑲᔪᖅᓱᐃᓐᓇᕐᓂᐊᖅᑐᑦ ᓄᓇᖃᖅᑳᖅᓯᒪᔪᓂ ᐊᒻᒪᓗ ᐅᐊᓐᓇᖓ ᓄᓇᓕᐅᔪᓂ ᐱᕙᓪᓕᐊᑎᑦᓯᓗᑎ ᓄᓇᓕᒻᒥ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐸᕐᓇᐅᑎᓂ ᑲᒪᒋᔭᖃᖅᑐᓂᑦ ᐃᓱᒫᓘᑕᐅᔪᓂ ᓇᓗᓇᐃᖅᑕᐅᔪᓂ ᓄᓇᓕᒻᒧ, ᐃᒻᒥᓄᑦ ᑐᕌᖓᓪᓗᑎᒃ ᐊᑦᑐᖅᑕᐅᓴᕋᐃᓐᓂᖏᓐᓄᑦ ᐊᒻᒪᓗ ᖃᓄᐃᓕᖓᓂᕆᔭᖏᓐᓄᑦ. ᖄᒃᑲᓐᓂᐊᒍᑦ, ᑲᓇᑕᒥ ᐱᕋᔭᑦᑕᐃᓕᒪᑎᑦᓯᓂᕐᒧᑦ ᐅᐸᓗᖓᐃᔭᐅᑎᖓ ᑲᔪᓯᓂᐊᖅᑐᖅ ᐱᓕᕆᐊᖃᕐᓂᕐᒥᑦ ᐃᓕᖅᑯᓯᕐᒧᑦ ᐃᑉᐱᒍᓱᑦᓯᐊᖅᑐᓂ ᐱᕋᔭᑦᑕᐃᓕᒪᑎᑦᓯᓂᕐᒧᑦ ᐱᓕᕆᐊᑦᓴᓂᑦ ᐊᒻᒪᓗ ᐃᑲᔪᖅᓱᕐᓗᑎ ᐱᒋᐊᕈᑎᑦᓴᓂᑦ ᑕᐃᒪᐃᑎᑦᓯᑦᑕᐃᓕᒪᓂᒃᑯᑦ ᐊᒻᒪᓗ ᐱᕋᔭᙱᔾᔫᒥᔪᖃᕐᓗᓂ ᓄᓇᖃᖅᑳᖅᓯᒪᔪᑦ ᐊᒻᒪᓗ ᐅᐊᓐᓇᖓᓂ ᓄᓇᓕᐅᔪᓂ. ᑮᓇᐅᔭᖃᖅᑎᑕᐅᓇᖅᑐᒃᑯᑦ ᐱᓕᕆᐊᑦᓴᑎᒍᑦ ᓲᕐᓗ ᐅᐊᓐᓇᖓᓂ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᐱᕋᔭᑦᑕᐃᓕᒪᑎᑦᓯᓂᕐᒧᑦ ᑮᓇᐅᔭᑦ ᐊᒻᒪᓗ ᐱᕋᔭᑦᑕᐃᓕᒪᑎᑦᓯᓂᕐᒧᑦ ᖃᓄᐃᓕᐅᕆᐊᕐᓂᕐᒧᑦ ᑮᓇᐅᔭᑦ, ᑲᓇᑕᐅᑉ ᒐᕙᒪᒃᑯᖏᑦ ᑲᔪᓯᓂᐊᖅᑐᑦ ᐱᓕᕆᖃᑎᖃᕐᓗᑎᒃ ᑲᑐᔾᔨᖃᑎᒋᔭᐅᔪᓂᒃ ᐃᑲᔪᖅᓱᓂᕐᒧᑦ ᐊᒻᒪᓗ ᓴᖅᑭᔮᖅᑎᑦᓯᓂᕐᒥᑦ ᐊᑦᑕᕐᓇᙱᑦᑐᓂ, ᓴᙱᔪᓂ, ᐊᒻᒪᓗ ᐊᓂᒍᐃᔪᓐᓇᖅᑐᓂ ᓄᓇᓕᐅᔪᓂ. ᑖᓐᓇ ᖁᑭᐅᑎᓄᑦ ᐊᒻᒪᓗ ᐱᕋᔭᐅᖃᑎᒌᖑᔪᓄᑦ ᐋᓐᓂᖅᓯᕆᓂᕐᒧᑦ ᖃᓄᐃᓕᐅᕆᐊᕐᓂᕐᒧᑦ ᑮᓇᐅᔭᑦ ᓴᖅᑭᑕᐅᓚᐅᕐᒥᔪᖅ ᐃᓕᓴᖅᓯᓂᒃᑯᑦ ᑲᓇᑕᐅᑉ ᓂᒋᐊᓂ ᐊᕕᑦᑐᖅᓯᒪᔪᓂ ᐊᒻᒪᓗ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ — ᐱᓕᕆᖃᑎᒌᑦᓯᐊᕐᓗᑎ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᓄᓇᓕᖏᓐᓂ — ᐃᓂᓪᓚᖓᑦᓯᐊᖅᑐᑦ ᓇᓗᓇᐃᖅᓯᓂᕐᒥᑦ ᐊᑦᓱᕉᑎᒋᓂᖅᐹᕆᔭᖏᓐᓂᒃ ᐃᓱᒫᓘᑕᐅᔪᓂ ᑐᕌᖓᔪᓂ ᖁᑭᐅᑎᓄᑦ ᐊᒻᒪᓗ ᐱᕋᔭᐅᖃᑎᒌᖑᔪᓄᑦ ᐋᓐᓂᖅᓯᕆᓂᕐᒥᑦ ᐊᒻᒪᓗ ᐋᖅᑭᑦᓱᐃᓗᑎᒃ ᐱᒋᐊᕈᑎᑦᓴᓂᑦ ᑲᒪᒋᔭᐅᓂᐊᕐᒪᑕ. ᑕᐃᒪᐃᓐᓂᖓᓄᑦ, ᑖᒃᑯᐊ ᑮᓇᐅᔭᑦ ᐱᕕᖃᖅᑎᑦᑎᓲᑦ ᓄᓇᖃᕐᕕᐅᔪᓂ ᐃᓱᒪᖅᓱᕐᓗᑎ ᐊᑐᕈᓐᓇᕐᓗᑎ ᑖᒃᑯᓂᖓ ᐃᑲᔫᑎᑦᓴᓂᑦ ᐊᔾᔨᒌᙱᑦᑐᓄᑦ ᐊᑐᓕᖅᑎᑦᓯᓂᕐᒥᑦ ᐊᒻᒪᓗ ᑕᐃᒪᐃᑎᑦᓯᑦᑕᐃᓕᒪᓂᒃᑯᑦ ᑐᕌᖓᔪᓂ ᖃᓄᐃᓕᐅᕈᑎᓂ, ᐃᓚᒋᓪᓗᓂᐅᒃ ᓈᒻᒪᒋᔭᖓᓂ ᐱᒋᐊᕈᑎᑦᓴᓂᑦ ᑐᕌᖓᓕᕈᑕᐅᔪᓂᒃ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᐱᓪᓚᑦᑖᖅᑐᓄᑦ.

ᐸᓖᓯᒃᑯᑦ (RCMP) ᐱᓪᓗᐊᑕᕐᓂᒃ ᐱᔭᑦᓴᖃᕐᒥᔪᑦ ᐅᐊᑦᓯᖃᓯᐅᑎᓂᕐᒥᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᑐᐃᓐᓇᐅᑎᑦᓯᓂᕐᒥᑦ ᐸᓖᓯᐅᓂᕐᒧᑦ ᐱᔨᑦᓯᕋᐅᑎᓂᒃ. ᐊᒥᓱᕈᖅᐸᓪᓕᐊᔪᑦ ᓄᓇᕐᔪᐊᓕᒫᒥ ᐱᓕᕆᐊᖃᕈᒪᓂᖏᑦ ᐊᒻᒪᓗ ᖃᓄᐃᓕᐅᕐᓂᖏᑦ ᐅᑭᐅᖅᑕᖅᑐᒥ ᑐᕌᖓᓕᕈᑕᐅᑐᐃᓐᓇᕆᐊᓕᒃ ᐊᒥᓱᕈᖅᐸᓪᓕᐊᓗᑎᒃ ᐋᖅᑭᑦᓱᖅᓯᒪᔪᒃᑯᑦ ᐱᕋᔭᖃᑦᑕᕐᓂᕐᒥᑦ, ᓅᒐᔪᖃᑦᑕᕐᓂᕐᒥᑦ, ᐃᓄᓐᓂᒃ ᑎᓪᓕᖃᑦᑕᕐᓂᕐᒥᑦ, ᐊᒻᒪᓗ ᑲᓇᑕᒥ ᐅᐊᑦᓯᔨᐅᓂᕐᒧᑦ ᐅᓗᕆᐊᓵᕐᓂᐅᔪᓂᒃ. ᐱᓕᕆᐊᖃᕐᓂᕐᒧᑦ ᐃᑲᔪᓐᓂᕐᒧᑦ, ᑕᐃᑰᓇ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ ᐸᓖᓯᒃᑯᑦ ᐱᔨᑦᓯᕋᕐᓂᕐᒧᑦ ᐊᖏᕈᑎᒃᑯᑦ, ᐃᓄᒋᐊᑦᑐᓂ ᐸᓖᓯᓂ (RCMP) ᐱᑕᖃᖅᑐᖅ ᐅᐊᓐᓇᖓᓂ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ ᐃᑲᔪᕐᓂᕐᒧᑦ ᓴᐳᔾᔨᓂᕐᒥᑦ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᓄᓇᓕᖏᓐᓂ ᐊᒻᒪᓗ ᖃᐅᔨᒪᑦᓯᐊᕆᐊᕐᓂᕐᒥᑦ ᐊᑦᑕᕐᓇᔾᔭᐃᖅᓯᒪᓂᕐᒥᑦ ᐅᐊᓐᓇᖓᓂᕐᒥᐅᑕᓄᑦ. ᐸᓖᓯᒃᑯᑦ (RCMP) ᓴᖅᑭᔮᕐᓂᖏᑦ ᐅᑭᐅᖅᑕᖅᑐᒥ ᐃᓚᖃᖅᑐᖅ 61-ᓂᒃ ᐸᓖᓯᓕᕆᕝᕕᓂᑦ ᐊᒻᒪᓗ ᐱᖓᓱᓂᑦ ᐊᕕᑦᑐᖅᓯᒪᔪᓂᑦ ᐊᖓᔪᖅᑳᖃᕐᕕᓐᓂᒃ. ᑳᓐᑐᕌᖃᖅᑎᑕᐅᓪᓗᑎ ᐸᓖᓯᐅᓂᕐᒧᑦ ᐱᔨᑦᓯᕋᖅᓱᑎ, ᐸᓖᓯᒃᑯᑦ (RCMP) ᐱᒻᒪᕆᐅᔪᒥ ᐱᓕᕆᐊᑦᓴᖃᖅᑐᑦ ᐊᑐᐃᓐᓇᐅᑎᑦᓯᓂᕐᒥᑦ ᓯᕗᓪᓕᖅᐹᖑᓪᓗᑎ ᐱᓕᕆᐊᖃᕐᓂᕐᒧᑦ ᐃᓄᓐᓄᑦ ᑐᐊᕕᕐᓇᖅᑐᓂᒃ ᐊᒻᒪᓗ ᑲᓇᑕᒥ ᐅᐊᑦᓯᔨᐅᓂᕐᒧᑦ ᐅᓗᕆᐊᓵᕐᓂᐅᔪᓂᒃ.

ᓂᐅᕐᕈᑎᖃᕐᓂᕐᒧᑦ ᓴᖅᑭᑦᑐᖃᕐᓂᖅᓴᐅᓕᖅᑎᓪᓗᒍ, ᓲᕐᓗ ᐃᖃᓗᓐᓂ ᐃᑎᔪᒥ ᑐᓚᑦᑕᕐᕕᖓᓂ, ᐊᒻᒪᓗ ᐃᓄᐃᑦ ᓄᓇᒋᔭᐅᔪᓃᓐᓂᖅᓴᐅᓕᖅᑎᓪᓗᒋᑦ, ᐱᒍᒪᓃᑦ ᐱᔭᐅᒋᐊᖃᙱᑦᑐᓄᑦ ᓱᓇᒃᑯᑖᓄᑦ ᐱᒍᒪᓂᖅᓴᐅᓕᕐᓂᐊᖅᑐᑦᓴᐅᔪᑦ. ᑮᓇᐅᔾᔭᓂᖅᓴᐅᒍᓐᓇᕐᓂᕐᒥᑦ ᐋᖓᔮᕐᓇᖅᑐᓄᑦ ᐅᑭᐅᖅᑕᖅᑐᒥ, ᑕᑯᖃᓯᐅᑎᓗᒍ ᖃᓪᓗᓈᓂ ᑲᓇᑕᐅᑉ ᓂᒋᐊᓂ ᐊᕕᑦᑐᖅᓯᒪᔪᓂ, ᐱᕋᔭᕐᓂᕐᒧᑦ ᑲᓲᒪᑎᑦᓯᓯᒪᓕᖅᑐᖅ. ᐸᓖᓯᒃᑯᑦ (RCMP) ᓯᕗᓪᓕᐅᑎᓪᓗᐊᑕᖅᑕᖓ ᐅᐊᓐᓇᖓᓂ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ ᑲᔪᓯᑎᑦᓯᓗᑎᒃ ᐊᑦᑕᕐᓇᙱᑦᑐᓂ ᐊᒻᒪᓗ ᐅᐊᑦᓯᔭᐅᑦᓯᐊᖅᑐᓂ ᓄᓇᓕᓐᓂ. ᐸᓖᓯᒃᑯᑦ (RCMP) ᐱᖅᑯᓯᑐᖃᒃᑯᑦ ᐱᓱᖃᑦᑕᖅᑐᑦ ᐸᓖᓯᐅᓂᕐᒧᑦ, ᑐᕌᒐᖃᖅᓯᓐᓈᑦ ᐱᓕᕆᐊᖃᕐᓂᕐᒥᑦ ᐱᐅᓂᖅᐹᒃᑯᑦ ᐱᔨᑦᓯᕋᕐᓂᕐᒥᑦ, ᐃᓚᖃᖅᓱᓂ ᐱᕙᓪᓕᐊᑎᑦᓯᓂᕐᒥᑦ ᓄᓇᓕᓐᓂ ᐊᔪᙱᓐᓂᐅᔪᓂ ᐱᕋᔭᑦᑕᐃᓕᒪᑎᑦᓯᓂᕐᒧᑦ ᐃᓅᓯᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᐱᒋᐊᕈᑎᑦᓴᒃᑯᑦ ᐊᒻᒪᓗ ᐱᕋᔭᕋᔭᖅᑐᓂᒃ ᓇᓗᓇᐃᖅᓯᓂᕐᒧᑦ ᓄᐊᑦᓯᓂᕐᒥᑦ. ᐱᕋᔭᕋᔭᖅᑐᓂᒃ ᓇᓗᓇᐃᖅᓯᓂᖅ ᐱᔨᑦᓯᕋᓲᖅ ᐃᑲᔪᕐᓂᕐᒥᑦ ᐸᓖᓯᒃᑯᓐᓂ (RCMP) ᑕᐃᒪᐃᑎᑦᓯᑦᑕᐃᓕᒪᓂᕐᒥᑦ, ᓴᖑᑎᑦᓯᓂᕐᒥᑦ, ᐊᒻᒪᓗ ᖃᐅᔨᓂᕐᒥ ᐱᕋᔭᕐᓂᐅᔪᓂ ᐅᓗᕆᐊᓵᕐᓂᐅᑐᐃᓐᓇᕆᐊᓕᓐᓂ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐅᐊᑦᓯᔨᐅᓂᕐᒧᑦ ᑲᓇᑕᒧᑦ.

ᐅᓪᓗᖓᓂ ᐋᖅᑭᒋᐊᖅᑕᐅᔪᖅ:
sasasas