ᐅᑭᐅᖅᑕᖅᑐᒥ ᐊᑐᐊᒐᖅ ᐊᕙᓗᒃᓴᖓᑕ ᑲᑎᒪᔪᓂᑦ ᐅᓂᒃᑳᖓ: ᒪᒃᑯᒃᑐᑦ ᐅᖃᒪᔭᐅᑎᖃᕐᓂᕐᒧᑦ ᑲᑎᒪᓂᕆᔭᕐᔫᔮᖅᑕᖏᑦ, ᕕᕗᐊᕆ 14 - 21, 2018

ᐊᑕᖏᖅᓯᒪᓪᓗᒋᑦ ᐅᑭᐅᖅᑕᖅᑐᕐᒥ ᓇᑉᐸᕆᐊᓕᑦ ᐱᑕᖃᕆᐊᓖᑦ

ᐅᖃᐅᓯᐅᓗᑎᒃ ᓇᑉᐸᕆᐊᓕᑦ

• ᑐᓴᐅᒪᖃᑦᑕᐅᑎᓂᕐᒧᑦ ᓇᑉᐸᕆᐊᓕᑦ ᐱᑕᖃᕆᐊᓖᑦ, ᐱᓗᐊᖅᑐᒥ ᑕᕝᕙᐅᖏᓐᓇᕐᓂᐊᕐᓗᓂ, ᐊᑭᑐᓗᐊᙱᓪᓗᓂ ᐃᑭᐊᖅᑭᕕᒃᑰᕈᑎᖃᕈᓐᓇᕐᓂᖅ, ᐅᓄᖅᑐᓄᑦ ᑲᑎᒪᖃᑕᐅᔪᓄᑦ ᐱᒻᒪᕆᐅᓂᕋᖅᑕᐅᓚᐅᖅᐳᖅ, ᐊᒡᓛᑦ ᐃᓱᒪᒋᔭᖃᖅᐸᓵᖅᖢᑎᒃ ᐃᑭᐊᖅᑭᕕᒃᑰᕈᓐᓇᐅᑎᖃᕐᓂᖅ ᐃᓚᒋᔭᐅᖃᑕᐅᔭᕆᐊᒃᓴᖓᓂᒃ ᐃᓅᓂᐊᕐᓗᓂ ᐱᑕᖃᕆᐊᖃᓪᓚᕆᒃᑑᔪᖅ ᓄᓇᕐᔪᐊᕐᒥᐅᓪᓗ ᐃᓄᖏᓐᓄᑦ ᐱᔪᓐᓇᐅᑎᒋᔭᐅᓪᓗᓂ.
• ᑲᑎᒪᖃᑕᐅᔪᑦ ᓇᓗᓇᐃᖅᓯᓚᐅᖅᐳᑦ ᑐᓴᐅᒪᖃᑦᑕᐅᑕᐅᔪᓐᓇᖅᑐᑦ ᖃᖓᑦᑕᖅᑎᑕᐅᓯᒪᔪᒃᑰᖅᑑᑕᐅᓂᖏᓐᓂᒃ ᑕᒪᓐᓇᓗ ᐊᑭᑐᒐᔪᒃᖢᓂ ᐊᑐᖅᑕᐅᒃᓴᐅᖏᓐᓇᖅᐸᒐᓂᓗ.
• ᖃᓲᒪᖃᑎᖃᕈᓐᓇᕐᓂᖅ ᐊᑐᖅᑕᐅᔭᕆᐊᖃᓪᓚᕆᒃᐳᖅ ᐃᓅᓯᖃᖃᑎᒌᖕᓂᐅᑉ ᐱᕙᓪᓕᖅᐸᓪᓕᐊᔾᔪᑎᒃᓴᓪᓗ ᐱᕈᖅᐸᓪᓕᐊᓂᖏᓐᓄᑦ ᐊᒻᒪ ᖃᓄᐃᙱᑦᑎᐊᖅᑑᓂᖏᓐᓂ ᓄᓇᓕᖕᒥᐅᑦ ᑎᑭᖅᑲᒐᒃᓴᐅᑦᑎᐊᙱᑦᑐᑦ ᐱᔨᑦᑎᖅᑕᐅᔪᓐᓇᖅᑎᑦᑎᓂᒃᑯᑦ ᐃᑭᐊᖅᑭᕕᒃᑯᑦ-ᐋᓐᓂᐊᕐᓂᓕᕆᓂᖅ, ᐃᑭᐊᖅᑭᕕᒃᑯᑦ-ᐃᓕᓐᓂᐊᕐᓂᖅ, ᐊᒻᒪ ᐃᑭᐊᖅᑭᕕᒃᑯᑦ-ᐃᓱᒪ ᐱᓪᓗᒍ ᐅᖃᖃᑎᖃᕐᓂᖅ. ᑭᓯᐊᓂ, ᑲᑎᒪᖃᑕᐅᔪᑦ ᐃᓚᖏᑦ ᐊᑑᑎᖃᑦᑎᐊᖃᓗᐊᖅᑎᓪᓗᒋᑦ "ᐃᑭᐊᖅᑭᕕᒃᑯᑦ-ᐱᔨᑦᑎᖅᑕᐅᓃᑦ" ᐃᓇᖐᓯᒪᔾᔪᑎᑦᑎᐊᕙᐅᓛᖑᙱᒻᒪᑕ ᐃᓄᖕᓄᑦ ᐱᔨᑦᑎᖅᑕᐅᓂᕐᒥᒃ.
• ᑲᑎᒪᖃᑕᐅᔪᑦ ᐃᓚᖏᑦ ᐅᖃᓚᐅᖅᐳᑦ ᒐᕙᒪᐃᑦ ᐊᑐᐊᒐᕆᔭᐅᔪᒃᓴᓕᐅᖅᓯᖃᑦᑕᓪᓗᐊᕐᒪᑕ ᑐᓴᐅᒪᖃᑦᑕᐅᑎᓕᕐᓂᕐᒧᑦ ᑮᓇᔭᐅᔾᔭᒃᓴᐅᑎᓖᑦ ᐊᓯᖏᑎᒍᓪᓘᓐᓃᑦ ᐊᐅᓚᑦᑎᔾᔪᓯᕐᓗᑎᒃ ᐊᑭᒋᔭᑦ ᐱᔨᑦᑎᕋᕈᓯᕆᔭᐅᕙᒃᑐᓪᓗ ᐅᑭᐅᖅᑕᖅᑐᕐᒥ ᖃᓪᓗᓈᑦ ᓄᓇᖏᓐᓃᑦᑐᓄᑦ ᓇᓗᒧᓲᑎᓂᖃᖁᓪᓗᒋᑦ.

ᐃᖏᕐᕋᔪᓕᕆᓂᕐᒧᑦ ᓇᑉᐸᕆᐊᓕᑦ ᐱᑕᖃᕆᐊᓖᑦ

• ᑲᑎᒪᖃᑕᐅᔪᑦ ᐅᓂᒃᑳᑲᑕᒍᑎᖃᓚᐅᖅᐳᑦ ᐊᒃᓱᕈᕐᓇᕈᑎᓂᒃ ᐱᔾᔪᑕᐅᓪᓗᓂ ᐱᑕᖃᙱᓗᐊᕐᓂᖓᓗ ᐊᑭᑐᓗᐊᕐᓂᖓᓗ ᐃᖏᕐᕋᔭᕋᕐᓂᐅᑉ ᐱᔾᔪᑕᐅᓪᓗᓂ ᐃᖏᕐᕋᔪᓕᕆᓂᕐᒧᑦ ᓇᑉᐸᕆᐊᓕᑦ ᐱᑕᖃᕆᐊᓖᑦ ᓈᒻᒫᓂᙱᓐᓂᖏᓐᓄᑦ ᑲᓇᑕᐅᑉ ᐅᑭᐅᖅᑕᖅᑐᐊᓂ.
• ᐊᑭᑐᓗᐊᙱᑦᑐᒥᒃ ᐊᑐᒐᒃᓴᐅᓂᖅᓴᐅᔪᒥᒡᓗ ᐃᖏᕐᕋᔪᓐᓇᐅᑎᖃᕐᓂᖅ, ᐃᓚᒋᔭᐅᓪᓗᓂ ᐱᕕᖃᕐᓂᕐᒧᑦ ᐊᖅᑯᑎᒃᑯᑦ ᓇᑉᐸᕆᐊᓕᑦ ᐱᑕᖃᕆᐊᓖᑦ ᐊᑭᑭᓐᓂᖅᓴᓂᒡᓗ ᖃᖓᑕᔪᓐᓇᕈᑎᖃᕐᓂᖅ ᐊᑑᑎᖃᓪᓚᕆᒃᑲᔭᖅᐳᖅ ᐃᓄᖕᓄᑦ ᑲᑎᑦᑕᖃᑎᒌᒃᑕᕐᓂᕐᒧᑦ ᐱᖁᑎᓪᓗ ᑎᑭᑎᑕᐅᓂᖏᑕ ᐊᑭᑭᓐᓂᖅᓴᐅᓂᖏᓐᓄᑦ.
• ᑮᓇᐅᔭᖃᖅᑎᑦᑎᓂᖅ ᐅᒥᐊᖃᕐᕕᐅᔪᓐᓇᖅᑐᓄᑦ – ᐃᓚᒋᓪᓗᒋᒃ ᑰᒡᔪᐊᕐᒥ ᐃᑎᔪᕐᒥ ᑭᓴᕐᕕᒃ ᐊᒻᒪ ᑐᒃᑑᔭᖅᑑᕐᒥ ᑭᓴᕐᕕᒃ – ᐱᒻᒪᕆᐅᓂᖃᖅᐳᖅ ᒪᑭᒪᔾᔪᑎᒃᓴᓂᒃ ᐱᕈᖅᐹᓪᓕᐅᑕᐅᔪᓐᓇᕐᓂᖓᓄᑦ, ᑲᓲᒪᖃᑎᒌᒍᓐᓇᐅᑕᐅᔪᓐᓇᕐᓂᕐᒧᑦ ᐊᒻᒪ ᓴᐳᒻᒦᔾᔪᑕᐅᔪᓐᓇᖅᖢᓂ ᓄᓇᖃᖅᑎᐅᓂᕐᒧᑦ.

ᓄᓇᒥ ᐆᒻᒪᖅᑯᑎᓕᐅᕈᑎᑦ

• ᑲᑎᒪᖃᑕᐅᔪᑦ ᖁᕕᐊᑦᑕᐅᑎᖃᖅᓯᒪᓚᐅᖅᐳᑦ ᓄᓇᒥᐅᑕᓄᑦ ᓄᑖᓂᒃ ᐱᓕᕆᔾᔪᑕᐅᓕᖅᑐᑎᒍᑦ ᐊᑐᖅᓯᓂᒃᑯᑦ ᓴᓇᔭᖃᐅᓯᖃᕆᐊᒃᓴᖅ, ᐃᓚᒋᔭᐅᓪᓗᑎᒃ ᓯᕿᓂᖅ ᐊᓄᕆᓗ ᑲᓇᑕᐅᑉ ᐅᑭᐅᖅᑕᖅᑐᐊᓂ ᐊᒻᒪ ᐊᑐᖅᓯᙱᑦᑐᓐᓇᕐᓂᖏᓐᓄᑦ ᐅᖅᓱᐊᓗᖕᒥᒃ.
• ᑲᓇᑕ ᒪᓕᓪᓗᐊᖅᐳᖅ ᐃᓕᓇᕐᓂᕆᔭᐅᔪᓂᒃ ᐊᓯᖏᑦ ᐅᑭᐅᖅᑕᖅᑐᖃᖅᑐᑦ ᓄᓇᐃᑦ, ᐃᓚᒋᔭᐅᓪᓗᑎᒃ ᓯᑖᓐᑎᓂᕕᐊᒥ ᓄᓇᖏᓐᓂ ᐱᔾᔪᑎᒋᓪᓗᒋᑦ ᓴᓇᔭᖃᐅᓯᖃᕐᓂᖏᓐᓄᑎ ᐊᑐᖅᓯᓂᕐᒥᒃ, ᓯᕿᓂᖅ, ᐊᓄᕆ ᐊᒻᒪ ᐅᖅᓱᐊᓘᓇᑎᒃ ᐃᑯᐊᓚᑎᑕᒃᓴᐅᔪᑦ

ᐃᒡᓗᖃᕐᓂᕐᒧᑦ, ᐋᓐᓂᐊᕐᓂᕐᒧᓪᓗ ᑲᒪᒋᔭᐅᓂᖅ ᐊᒻᒪᓗ ᐊᓯᖏᑦ ᐃᓅᓯᓕᕆᓂᕐᒥ ᓇᑉᐸᕆᐊᓕᑦ

• ᐃᓅᓯᖃᑦᑎᐊᕐᓂᕐᒧᑦ ᓇᑉᐸᕆᐊᓕᑦ ᐱᑕᖃᕆᐊᓖᑦ ᓇᑉᐸᕆᐊᓕᖁᑎᒋᔭᐅᓚᐅᖅᐳᖅ ᐅᓄᖅᑐᓄᑦ ᑲᑎᒪᖃᑕᐅᔪᓄᑦ, ᐃᓚᒋᔭᐅᓪᓗᑎᒃ ᐊᑭᑐᓗᐊᙱᑦᑐᓂᒃ ᐃᒡᓗᖃᕈᓐᓇᕐᓂᖅ ᐋᓐᓂᐊᕐᓂᕐᒧᓪᓗ ᑲᒪᒋᔭᐅᓂᖅ.
• ᐅᔾᔨᕐᕕᒋᑦᑎᐊᕋᓗᐊᖅᖢᓂᔾᔪᒃ ᐊᒃᓱᕈᕐᓇᕈᑎᒋᔭᑦ ᑎᑭᑕᐅᒡᒐᕐᓇᖅᑐᓄᑦ, ᐃᓄᑭᑦᑑᔪᓄᓪᓗ, ᑲᑎᒪᖃᑕᐅᔪᑦ ᐃᓱᒫᓗᒍᑎᖃᕐᓂᕋᕈᑎᖃᓚᐅᖅᐳᑦ ᑲᒪᒋᔭᐅᖃᑦᑕᕈᓐᓇᙱᓐᓂᕐᒥᒃ ᐋᓐᓂᐊᑐᐃᓐᓇᕆᔭᐅᙱᑦᑐᓄᑦ.
• ᐃᓄᖃᓐᖏᑦᑐᒥ ᐅᖓᓯᒃᑐᒥᑦ ᑕᑯᓐᓇᐅᑎᒃᑯᑦ ᐋᓐᓂᐊᕐᓂᓕᕆᔭᐅᓂᖅ ᐊᒻᒪ ᐃᑭᐊᖅᑭᕕᒃᑯᑦ-ᐋᓐᓂᐊᕐᓂᓕᕆᔭᐅᓂᖅ ᓇᓗᓇᐃᖅᑕᐅᓚᐅᖅᐳᑦ ᐊᑐᖅᑕᐅᔪᓐᓇᕋᔭᕆᐊᒃᓴᖏᓐᓂᒃ ᐋᓐᓂᐊᕐᓂᓕᕆᑦᑎᐊᕈᓐᓇᐅᑕᐅᔪᓐᓇᖅᐳᑦ ᐱᔨᑦᑎᕈᑕᐅᔪᓐᓇᕐᓗᑎᒡᓗ – ᑭᓯᐊᓂ ᑕᐃᒪᐃᑦᑐᓐᓇᕋᔭᖅᐳᖅ ᐊᑐᐃᓐᓇᐅᖏᓐᓇᕈᓐᓇᖅᑐᒥᒃ ᐊᑭᑐᓗᐊᙱᑦᑐᒥᒃ ᐃᑭᐊᖅᑭᕕᒃᑰᕈᓐᓇᐅᑎᑕᖃᕋᔭᖅᐸᑦ.
• ᖃᓄᐃᓕᐅᒃᑲᓐᓂᕆᑕᐅᔪᓐᓇᕋᔭᖅᑐᑦ ᐅᖃᒪᔭᐅᑕᐅᓚᐅᖅᑐᑦ ᐃᓚᖃᖅᐳᑦ ᐱᓕᕆᐊᒃᓴᐃᑦ ᐱᔪᒥᓵᕆᔾᔪᑎᓪᓗ ᓘᒃᑖᑦ ᐃᖏᕐᕋᔭᕋᖃᑦᑕᕈᓐᓇᖅᓯᖁᓪᓗᒋᑦ ᑎᑭᐅᑎᕝᕕᒋᒡᒐᕐᓇᖅᑐᓄᑦ, ᐅᑭᐅᖅᑕᖅᑐᕐᒥ ᓄᓇᓕᖕᓄᑦ ᐊᒻᒪ ᐊᑐᖅᑕᐅᔪᒃᓴᓂᒃ ᑮᓇᐅᔭᓕᖅᓯᓂᖅ.
• ᐊᕕᒃᑐᖅᓯᒪᕝᕕᖕᓂ ᑲᑎᑦᑕᕐᕕᖃᕐᓂᖅ ᐃᓱᒪᒃᓴᖅᓯᐅᕈᑎᒋᔭᐅᓚᐅᕆᕗᑦ ᐋᖅᑭᒍᑕᐅᕚᓪᓕᕈᓐᓇᕋᔭᕆᐊᒃᓴᖏᓐᓂᒃ – ᐃᓅᓯᖃᖃᑎᒌᒍᓯᕐᒧᑦ ᓇᑉᐸᕆᐊᓕᑦ ᐱᑕᖃᕆᐊᓖᑦ ᐱᑕᖃᖅᑎᑕᐅᓇᔭᖅᐸᑕ ᐊᕕᒃᑐᖅᓯᒪᕝᕕᖕᓂ ᓄᓇᓕᖕᓂᐅᙱᖔᖅᑐᖅ – ᐊᒃᓱᕈᕐᓇᕈᑏᑦ ᐊᑐᖅᓯᔪᒪᔭᖃᕐᓂᕐᒧᑦ ᐱᑕᖃᕈᓐᓃᖅᐹᓪᓕᕋᔭᖅᐳᑦ.

ᐱᒻᒪᕆᐅᓂᖓ ᐱᓕᕆᖃᑎᒌᖕᓃᑦ

• ᒐᕙᒪᐅᔪᑦ ᑎᒍᒥᐊᖅᑎᓪᓗᐊᑕᐅᓪᓗᐊᕋᓗᐊᖅᑎᓪᓗᒋᑦ ᐱᔨᑦᑎᕋᐅᑎᒋᔭᐅᓲᑦ ᑭᒃᑯᑐᐃᓐᓇᕐᓄᑦ ᐱᔭᐅᔪᓐᓇᕐᓂᖏᓐᓂᒃ, ᓄᓇᖃᖅᑎᑐᐃᓐᓇᐃᑦ ᑲᒪᔨᐅᓕᖅᐸᖕᒪᑕ ᐊᐅᓚᑦᑎᔨᐅᓕᖅᖢᑎᒡᓗ.
• ᐱᓕᕆᖃᑎᒌᖕᓃᑦ ᐱᕕᖃᕈᑕᐅᔪᓐᓇᖅᐳᖅ ᑮᓇᐅᔭᓕᖅᓯᒪᓂᕆᔭᖅ ᓇᑉᐸᕆᐊᓕᑦ ᐱᑕᖃᕆᐊᖕᓄᑦ ᐊᖅᑯᑎᒋᔭᐅᓗᑎᒃ ᓄᓇᖃᖅᑳᖅᑐᑦ ᑎᒥᒋᔭᖏᑦ ᓄᓇᓕᖁᑎᒋᔭᖏᓪᓗ, ᐱᕕᖃᕈᓐᓇᖅᑎᑦᑎᓂᒃᑯᑦ ᓄᓇᖃᖅᑎᐅᔪᓂᒃ ᐊᒻᒪ ᑭᓱᑦ ᑮᓇᐅᔭᑎᒍᑦ ᐊᑐᖅᑎᑦᑎᕝᕕᐅᓪᓗᐊᕐᒪᖔᑕ ᐃᓱᒪᓕᐅᕈᑕᐅᔭᕆᐊᖃᖅᐳᑦ ᓄᓇᓕᖕᓂ.
• ᓄᓇᓕᖕᓂ ᑲᑎᒪᔩᑦ ᓇᖕᒥᓂᖅ ᑲᒪᒋᔭᖃᕈᓐᓇᖅᐳᑦ ᒥᐊᓂᕆᔭᖃᕐᓗᑎᒡᓘᓐᓃᑦ ᐱᔨᑦᑎᕋᐅᑎᓂᒃ ᐃᓚᒋᔭᐅᓪᓗᑎᒃ ᐊᓄᕆᒧᑦ ᓯᕿᓂᕐᒧᓪᓗ ᐆᒻᒪᖅᑯᑎᖃᕐᓂᖅ, ᐱᕈᖅᓰᓂᖅ (ᑲᑎᒪᔨᖃᕐᓂᒃᑯᑦ ᓂᕿᓕᕆᔨᓂᒃ), ᐃᑭᐊᖅᑭᕕᒃᑯᓪᓗ.

"ᓄᓇᓕᖕᓂ ᖃᓄᐃᙱᑦᑎᐊᕐᓂᖅ ᑐᑭᖃᖅᐳᖅ ᐅᒃᐱᕆᔭᑦᑎᓐᓂᒃ ᐊᑐᖅᑕᐅᑎᑦᑎᖔᕋᓱᙱᓪᓗᑕ ᑭᓯᐊᓂᓕ ᑕᕝᐅᕌᓂᒃᑐᓂᒃ ᖁᕝᕙᐃᒋᐊᒃᑲᓐᓂᕋᓱᒡᓗᑕ."

ᑕᒪᒃᑭᖅᓯᒪᑦᑎᐊᖅᑐᓂᒃ ᐅᑭᐅᖅᑕᖅᑐᒥ ᓇᑉᐸᕆᐊᓕᑦ

ᓄᓇᖃᖅᑎᐅᔪᓂᒃ ᐱᔪᓐᓇᖅᓯᑎᑦᑎᓂᖅ ᐅᑭᐅᖅᑕᖅᑑᓪᓗ ᓇᖕᒥᓂᖅ ᐊᐅᓚᓐᓂᕆᔭᖓ

• ᐱᒻᒪᕆᐅᓂᕆᔭᖅ ᓄᓇᓕᖕᓂ ᐃᓱᒪᓕᐅᕆᔨᐅᔪᓐᓇᕐᓂᖅ ᓇᐅᒃᑯᑐᐃᓐᓇᖅ ᐅᑭᐅᖅᑕᖅᑑᑉ ᓯᕗᓂᕆᔭᖓᓄᑦ ᐊᒃᓱᕈᕆᔭᐅᓪᓗᓂ ᓂᓪᓕᐅᑕᐅᖃᑦᑕᓚᐅᖅᐳᖅ ᑲᑎᒪᖃᑕᐅᔪᓄᑦ: "ᐱᕈᖅᐸᓪᓕᐊᑎᑦᑎᖃᑎᒌᖕᓂᖃᕆᐊᖃᖅᐳᒍᑦ ᓄᓇᓕᖕᓂ".
• ᐅᓂᒃᑲᐅᓯᖃᖃᑦᑕᓚᐅᕆᕗᓪᓗ ᐊᑐᖅᑕᐅᕙᒃᓯᒪᔪᓂᒃ. ᑲᑎᒪᖃᑕᐅᔪᑦ ᐃᓚᖓᑦᑕ ᐊᑖᑖ, ᓂᒡᓕᓇᖅᑑᓯᕝᕕᓕᒃ ᓄᓇᓯᐅᑎᓂᒃ ᐱᓇᓱᐊᕈᓰᖕᓄᑦ ᒪᕐᕈᖕᓄᑦ ᐃᖏᕐᕋᔾᔪᑎᒋᕙᒃᑖ ᐃᓄᕕᖕᒥᑦ ᐳᕆᑎᔅ ᑲᓚᒻᐱᐊᒧᑦ ᐱᕈᖅᑐᕕᓂᖅᑕᐅᑎᒋᓪᓗᒍ ᐅᖅᑯᑎᔭᒃᓴᕐᒥᓂᒃ: "ᐳᕆᑎᔅ ᑲᓚᒻᐱᐊᒥ ᐱᕈᓰᔨᓂᑦᑎᐊᒻᒪᕆᒃ ᓂᐅᕕᖅᐸᖕᒥᔪᖅ ᐆᒻᒪᐅᑦᑎᐊᖅᑐᓂᒃ ᓄᓇᒥᙶᑲᐅᑎᒋᔪᓂᒃ. ᐱᕕᖃᕈᓐᓇᕋᑦᑕᓖᓛᒃ ᐊᖅᑯᑎᑕᖃᕐᓂᖓᓄᑦ".

ᓂᖃᐃᓪᓕᐅᙱᓐᓂᖅ ᓄᓇᓕᖕᓂᙶᖅᑐᓪᓗ ᓂᕿᑦ

• ᑲᑎᒪᖃᑕᐅᔪᑦ ᓇᓗᓇᐃᖅᓯᓚᐅᖅᐳᑦ ᐊᒃᓱᕈᕐᓇᕈᑎᑕᖃᕐᓂᖓᓂᒃ ᐱᔾᔪᑎᒋᓪᓗᒍ ᐱᔭᖃᕈᓐᓇᕆᐊᒃᓴᖅ ᐆᒻᒪᐅᔪᓂᒃ, ᐊᑭᑐᓗᐊᙱᑦᑐᓂᒃ, ᓂᕿᑦᑎᐊᕙᐅᔪᓂᒃ ᓇᓂᑐᐃᓐᓇᖅ ᑲᓇᑕᐅᑉ ᐅᑭᐅᖅᑕᖅᑐᐊᓂ.

"ᐱᕕᖃᓕᕈᓐᓇᖅᑎᑕᐅᓂᖅ ᓇᖕᒥᓂᖁᑎᖃᕆᐊᒃᓴᖅ ᓂᕿᒋᔭᑦᑎᓐᓄᑦ ᐊᑑᑎᖃᕐᓂᖅᓴᐅᓇᔭᖅᐳᖅ ᑮᓇᐅᔭᑦ ᓂᐅᕕᖅᑎᒃᑯᓐᓄᐊᖅᑕᐅᙱᖔᕐᓗᑎᒃ ᐊᑭᑭᒡᓕᒋᐊᖅᑎᑦᑎᔾᔪᑎᒃᓴᐅᓇᓱᒡᓗᑎᒃ. ᓱᓕ $100ᑖᓚᑐᖅᐳᖅ 12ᓂᒃ ᐃᒪᖅᑖᕋᓱᒃᖢᓂ… ᐃᓛᓐᓂᑦ ᓇᓖᕌᕆᐊᖃᖅᐸᒃᐳᑎᑦ ᓂᕿᒃᓴᖅᓯᓇᓱᖕᓂᐊᕐᒪᖔᖅᐱᑦ ᐃᒡᓗᒃᓴᓂᒐᓱᒃᓯᒪᓂᐊᕐᒪᖔᖅᐱᓪᓘᓐᓃᑦ – ᑕᒪᓐᓇ ᐊᒃᖢᐃᑦᑐᕐᒥᐅᑕᐅᓪᓗᓂ ᓈᒻᒪᙱᑦᑐᖅ."

• ᐊᑭᑐᓗᐊᖅᑐᑦ ᐱᑕᖃᕈᓐᓇᙱᓗᐊᖅᑐᓪᓗ ᐃᓅᓴᖃᑦᑎᐊᙱᓕᕈᑕᐅᔪᓐᓇᖅᐳᑦ ᐊᓯᖏᑎᒍᓪᓗ ᓴᖅᑭᑦᑐᓐᓇᕆᓪᓗᓂ ᓂᖃᐃᓪᓕᐅᕐᓂᖅ.
• ᐃᑲᔪᖅᓱᖅᑕᐅᓂᖏᑦ ᐆᒧᖓ ᓄᓇᓕᖕᓂ ᐱᕈᖅᓰᓂᖅ ᐋᖅᑭᒍᑎᒃᓴᑦ – ᐃᒐᓛᖃᐅᖅᑐᒥ ᐱᕈᖅᓰᓂᖅ ᐅᕝᕙᓘᓐᓃᑦ ᓂᒡᓚᓱᒃᑎᓪᓗᒍ ᐃᓯᖅᓯᒪᑎᑦᑎᓗᓂ ᐱᕈᖅᓰᓂᖅ – ᓄᓇᖃᖅᑎᐅᔪᓂᒃ ᐃᑲᔪᖅᓯᕚᓪᓕᕐᓂᖃᕈᓐᓇᖅᐳᖅ ᐱᕈᓰᔪᓐᓇᖅᓯᖁᓪᓗᒋᑦ ᓰᕐᓇᖅᑐᓂᒃ ᐱᕈᖅᑐᕕᓂᖅᑑᒪᔭᒃᓴᓂᒡᓗ.
• ᑲᑎᒪᖃᑕᐅᔪᑦ ᓇᓗᓇᐃᖅᓯᓚᐅᖅᐳᑦ ᐱᔪᓐᓇᐅᑎᖃᕐᒪᑕ ᐅᑭᐅᖅᑕᖅᑐᕐᒥᐅᑦ – ᐱᓗᐊᖅᑐᒥ ᓄᓇᖃᖅᑳᖅᑑᔪᑦ – ᐃᓱᒪᖅᓲᑎᖃᕈᓐᓇᖁᓪᓗᒋᑦ ᓂᕆᔭᕐᒥᖕᓂᒃ, ᓂᕿᓪᓚᑦᑖᖑᒐᓗᐊᖅᐸᑕ ᓂᐅᕕᐊᖑᒃᐸᑕᓘᓐᓃᑦ.
• ᓂᕿᒋᔭᐅᕙᒃᑐᑐᖃᐃᑦ ᐊᒻᒪ ᑕᐅᖅᓰᖃᑎᒌᒃᑕᕐᓂᖅ ᓄᓇᓖᑦ ᐊᓯᖏᓐᓄᑦ, ᐊᖑᓇᓱᒃᑎᓂᒃ ᑮᓇᐅᔾᔭᒃᓴᖅᑎᑦᑎᓂᒃᑯᓪᓘᓐᓃᑦ, ᐃᓄᖕᓄᑦ ᑲᑎᑉᐹᓪᓕᐅᑕᐅᔪᓐᓇᖅᐳᖅ

"ᐱᔪᓐᓇᐅᑎᓪᓗᐊᑕᖃᕆᐊᖃᖅᐳᒍᑦ ᓂᖃᐃᓪᓕᐅᙱᓐᓂᕐᒧᑦ ᐃᒡᓗᒃᓴᖃᕐᓂᕐᒧᓪᓗ …ᑐᓴᐅᒪᖃᑦᑕᐅᑎᓂᖅᑕᖃᙱᖔᕐᓗᓂ ᖃᓪᓗᓈᑦ ᓄᓈᓐᓂᑦ ᐅᑭᐅᖅᑕᖅᑐᕐᒧᑦ, ᐊᑲᐅᓂᖅᓴᒥᒃ ᑐᓴᐅᒪᖃᑦᑕᐅᑎᔾᔪᓯᖃᕆᐊᖃᖅᐳᒍᑦ ᒫᓐᓇ ᐊᑐᖅᑕᖅ ᓈᒻᒪᙱᒻᒪᑦ. ᐅᕙᑦᑎᓐᓂᒃ ᓈᓚᖕᓂᖅ ᖃᓄᕐᓗ ᐃᓅᓯᖃᕈᒪᖕᒪᖔᑦᑕ ᐱᒻᒪᕆᐅᖕᒪᑦ."

ᖃᓄᐃᙱᑦᑎᐊᕐᓂᖅ

• ᖃᓄᐃᙱᑦᑎᐊᕐᓂᖅ ᐊᑕᓪᓚᕆᒃᐳᖅ ᐃᓕᓐᓂᐊᖅᓯᒪᓂᕐᒧᑦ ᐃᖅᑲᓇᐃᔮᖃᕐᓂᕐᒧᓪᓗ, ᐱᔾᔪᑎᒃᓴᖃᕐᓇᕐᒪᑦ, ᐱᔨᑦᑎᖅᑕᐅᔾᔪᑎᓪᓗᐊᑕᓂᒡᓗ ᐱᕕᒋᔭᖃᕐᓇᖅᖢᓂ – ᐅᔾᔨᕐᓇᓗᐊᖅᖢᑎᒃ ᐃᒡᓗᖃᕐᓂᖅ ᐋᓐᓂᐊᕐᓂᓕᕆᔭᐅᔪᓐᓇᕐᓂᕐᓗ ᑕᒪᑯᐊ ᓯᕗᓂᖔᖓᓂ ᐅᖃᒪᔭᐅᑕᐅᒌᖅᓯᒪᔪᑦ.
• ᑲᑎᒪᖃᑕᐅᔪᑦ ᐃᓱᒫᓗᒋᔭᖃᕐᔪᐊᕐᓂᕋᓚᐅᖅᐳᑦ ᐃᓅᓯᕐᒥᖕᓂᒃ ᑭᐱᓯᒪᕙᒃᑐᑦ ᖃᔅᓯᐅᓂᖏᓐᓂᒃ ᓇᓂᑐᐃᓐᓇᖅ ᐅᑭᐅᖅᑕᖅᑐᕐᒥ.

ᓴᖏᔫᓂᖅ, ᑲᔪᓯᑏᓐᓇᒐᒃᓴᐃᑦ ᐊᒻᒪᓗ ᐊᔾᔨᒋᖏᑑᑕᐅᓂᖏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕐᕕᒃᓴᐃ

"ᒫᓂ, ᓇᖕᒥᓂᕆᔭᖅ 50ᓄᑦ ᐃᖅᑲᓇᐃᔮᖅᑖᕈᑕᐅᔪᓐᓇᖅᐸᑦ ᐊᒃᑐᓯᒪᔪᕐᔪᐊᕌᓘᔪᓐᓇᖅᐳᖅ ᐃᓅᓯᖃᕐᓂᕆᔭᕐᒧᑦ – ᐊᑑᑎᖃᒻᒪᕆᒍᓐᓇᖅᐳᖅ"

ᓄᓇᓖᑦ ᒪᑭᒪᔾᔪᑎᖏᑦ; ᐋᖅᑭᒋᐊᕈᓯᕈᓐᓇᖅᖢᓂ ᒪᑭᒪᔾᔪᑎ

• ᓯᕗᓂᒃᓴᖃᑦᑎᐊᕈᓐᓇᕈᓱᓚᐅᖅᐳᑦ ᐅᑭᐅᖅᑕᖅᑐᕐᒥ ᐃᓅᓯᐅᔪᑦ ᐃᓚᖏᓐᓄᑦ ᐊᒃᓱᕈᕐᓇᕈᐅᔪᖁᑎᒋᔭᐅᔪᑦ ᐃᓱᒪᒋᔭᐅᓪᓗᐊᕐᒪᑕ ᐱᕕᖃᕐᓇᖅᑑᔭᕆᐊᒃᓴᖏᓐᓂᒃ ᐋᖅᑭᒋᐊᕈᓯᕐᓂᕐᒧᑦ ᐱᕈᖅᐸᓪᓕᐊᓂᕐᒧᓪᓗ. ᐋᖅᑭᒋᐊᕈᓯᖃᑦᑕᕐᓂᖅ ᑐᙵᓂᐅᕗᖅ ᓈᒻᒪᒃᓯᑎᑦᑎᓂᐊᕐᓗᓂ ᐅᑭᐅᖅᑕᖅᑐᕐᒥ ᐊᒃᓱᕈᕐᓇᕈᑕᐅᒋᔭᐅᔪᓄᑦ ᐱᔾᔪᑎᒋᓪᓗᒋᑦ ᒪᑯᐊ ᓂᕿᒃᓴᓕᐅᖃᑦᑕᕐᓂᖅ, ᐃᒡᓗᑦ, ᐃᖏᕐᕋᔪᓕᕆᓂᖅ, ᕿᓂᕐᓂᖅ ᐊᓐᓇᒃᑐᐃᓂᕐᓗ ᐊᓯᖏᓪᓗ. ᐆᒃᑑᑎᒋᓪᓗᒍ, ᓯᕿᓂᖃᑦᑎᐊᖃᑦᑕᙱᓐᓂ ᓂᒡᓚᓱᒃᑐᐊᓘᖃᑦᑕᕐᓂᕐᓗ ᐋᖅᑭᒋᐊᕈᓯᖅᓯᔪᓐᓇᕈᑕᐅᕗᖅ ᐱᕉᖅᓰᖃᑦᑕᕐᓂᕐᒧᑦ ᓂᕿᒃᓴᓂᒃ ᐊᒻᒪ ᑲᔪᓯᓂᖃᐃᓐᓇᕈᓐᓇᖅᑐᓂᒃ ᑎᑭᐅᑎᒡᒐᕐᓇᖅᑐᒥ ᐃᓅᓂᖅ.
• ᑲᑎᒪᖃᑕᐅᔪᑦ ᓇᓗᓇᐃᖅᓯᓚᐅᖅᐳᑦ ᐱᒻᒪᕆᐅᓂᖏᓐᓂ ᓇᑉᐸᕆᐊᓕᑦ ᐱᑕᖃᕆᐊᓖᑦ ᓄᓇᓕᖕᓂ ᑲᑎᑦᑕᕐᕖᑦ ᐊᒻᒪ ᒪᑭᒪᔾᔪᑎᓄᑦ ᐊᑐᐊᒐᐃᑦ ᐅᐱᒍᓱᖕᓂᖃᖅᑐᑦ ᓄᓇᓕᐅᑉ ᐃᓕᖅᑯᓯᕆᔭᖏᓐᓂᒃ ᖃᓄᐃᓕᖓᓪᓚᑦᑖᕐᓂᕆᔭᖏᓐᓂᒡᓗ.

"ᐊᑕᐅᓰᓐᓇᑯᓗᖕᒥᒃ ᑭᓱᓕᐅᕐᕕᒃᑕᓕᒃ ᔫᑳᓐᒥ, ᒥᑭᑦᑐᒥᒃ ᐊᓪᓚᒡᕕᒃᑕᖃᕈᓐᓇᖅᑐᖅ ᓇᖕᒥᓂᕆᔭᖅ ᐊᖏᓗᐊᙱᑉᐸᑦ, ᑲᑎᒪᕝᕕᒃᑕᖃᕐᓗᓂ, ᓴᓇᙳᐊᕐᕕᒃᑕᖃᕐᓗᓂ ᐊᓯᖏᓐᓂᒡᓘᓐᓃᑦ ᖃᓄᐃᓕᐅᓯᑐᖃᕐᓂᒃ ᖃᓄᐃᓕᐅᕐᕕᒃᑕᖃᕐᓗᓂ ᑭᓯᐊᓂ ᐅᓗᕆᐊᓇᕐᓂᖃᕋᓂ ᐊᓂᖅᑎᕆᑦᑎᐊᕐᓇᕐᓗᓂᓗ ᓴᓇᕐᕈᑎᑕᖃᑦᑎᐊᕐᓗᓂᓗ … ᐱᓚᒡᕕᒃᑕᖃᕐᓗᓂ ᓂᖅᖥᕿᕝᕕᒃᑕᖃᕐᓂᕐᓗ ᐱᒻᒪᕆᐅᕗᖅ ᐊᖑᓇᓱᒃᑎᓄᑦ ᑭᓯᐊᓂ ᓂᖅᖥᕿᕝᕕᒃᑕᖃᙱᒻᒪ ᓄᓇᖅᑲᑎᒌᓄᑦ. ᑭᓇᑐᐃᓐᓇᖅ ᓂᖅᖥᕿᔪᓐᓇᙱᒃᑯᓂ ᓴᓗᒪᑦᑎᐊᖅᑐᒥ ᐅᐃᓂᐱᒡᒧᑦ ᐊᐅᓪᓚᖅᑎᑕᐅᔭᕆᐊᖃᖅᐳᑦ ᓂᕿᑦ ᐴᖅᑲᖅᑕᐅᑦᑎᐊᕐᓂᐊᕐᒪᑕᓗ ᓂᐅᕐᕈᑎᒃᓴᐅᓂᐊᕐᓗᑎᒃ ᐅᑎᖅᑎᑕᐅᖅᑳᕋᑎᒃ. ᐊᑐᐊᒐᐃᑦ ᐅᕙᑦᑎᓐᓂᒃ ᐃᑲᔪᖅᓯᙱᑦᑎᐊᕐᒪᑕ ᓄᓇᖁᑎᒋᔭᑦᑎᓐᓄᓪᓗ ᐱᒻᒪᑐᐃᓂᖃᑦᑎᐊᕈᓐᓇᕋᑕ."

ᐊᕕᒃᓯᒪᕝᕕᒋᔭᖃᕐᓂᖅ ᓴᖅᑭᒃᑲᓐᓂᖅᐸᓪᓕᐊᕙᙱᑦᑐᓂᒃ ᐊᑐᖅᑕᐅᔪᒃᓴᓂᒃ ᐲᔭᐃᓂᖅ

• ᐅᖃᐅᓯᐅᑎᓪᓗᒍ ᓴᖅᑭᒃᑲᓐᓂᖅᐹᓪᓕᐊᕙᙱᑦᑐᑦ ᐊᑐᖅᑕᐅᔪᒃᓴᑦ ᐲᔭᖅᑕᐅᓂᖏᑦ ᐃᓚᒋᓪᓗᒋᑦ ᐅᔭᕋᖕᓂᐊᕐᓂᖅ ᐅᖅᓱᐊᓗᖕᓂᐊᕐᓂᕐᓗ ᐊᔾᔨᒌᙱᑦᑐᓂᒃ ᐃᓱᒪᒋᔭᖃᕐᕕᐅᓚᐅᖅᐳᖅ ᑲᑎᒪᖃᑕᐅᔪᓂᑦ.
• ᐃᓚᖏᑦ ᐃᓱᒪᓪᓗᑎᒃ ᕿᒪᕉᑎᕙᓪᓕᐊᓂᖅᑕᖃᓪᓗᐊᕐᓂᖓᓂᒃ ᐲᔭᓂᐅᔪᒥᙶᖅᑐᒥᒃ ᒪᑭᒪᔾᔪᓯᖅᓯᒪᓂᕐᒥᒃ, ᐅᔾᔨᕈᓱᒃᖢᑎᒃ ᖃᑯᒍᙳᖅᓯᒪᓕᖅᐸᑦ ᑲᔪᓯᑏᓐᓇᒐᒃᓴᐅᙱᓐᓂᖓᓂᒃ, ᐊᕙᑎᒋᔭᕐᒧᓪᓗ ᓱᕋᒻᒪᒍᑕᐅᕚᓪᓕᕐᓇᕐᓂᖃᖅᖢᓂ ᓯᓚᒧᓪᓗ ᐊᓯᔾᔨᕈᑕᐅᕚᓪᓕᐅᑕᐅᓗᓂ.
• ᐊᓯᖏᓪᓕ ᐃᓱᒪᓪᓗᑎᒃ ᓴᖅᑭᒃᑲᓐᓂᖅᐸᓪᓕᐊᕙᙱᑦᑐᓂᒃ ᐊᑐᖅᑕᐅᔪᒃᓴᓂᑦ ᐱᕕᒃᓴᖅᑕᖃᕐᓂᓕᒫᖓᓂᒃ ᐊᑐᖅᑕᐅᓪᓗᐊᕐᓂᖓᓂᒃ ᐱᒡᒐᕐᓇᕐᓂᖃᙱᑦᑐᒥᒃ ᒪᑭᒪᔾᔪᑎᖃᕈᓐᓇᕈᒪᒧᑦ, ᑭᓯᐊᓂ ᐸᕐᓇᒃᑕᐅᓯᒪᓂᖃᑦᑎᐊᕆᐊᖃᖅᐳᖅ ᐃᒃᐱᒋᔭᐅᓯᒪᓗᑎᒃ ᓄᓇᖃᖅᑎᐅᔪᑦ ᐃᓱᒪᖅᓱᕈᓐᓇᕐᓂᕆᔭᖓᓂᒃ ᐊᒻᒪ ᐊᕙᑎᒋᔭᐅᑉ ᐱᒻᒪᑐᒃᑕᐅᓂᒃᓴᖓᓄᑦ.
• ᐅᔾᔨᕆᔭᐅᓚᐅᖅᐳᖅ ᐃᖅᑲᓇᐃᔮᑦ ᐊᑐᖅᑕᐅᔪᒃᓴᓕᕆᓃᑦ ᐊᑭᑐᔪᐊᓘᖕᒪᑕ – ᐃᓚᒋᔭᐅᓪᓗᑎᒃ ᓴᓇᕝᕕᖕᓂ ᐱᔨᑲᑖᑦ, ᐊᓕᓚᔫᑎᑖᖅᓯᒪᔪᑦ, ᓱᓪᓗᓕᓕᐅᖅᑎᑦ, ᐊᓯᖏᓪᓗ – ᑕᒪᑐᒪᙶᖅᑐᓪᓗ ᐊᑑᑎᒃᑲᓐᓃᑦ ᐊᑭᑐᑦᑎᐊᖅᑐᓂᒃ ᐃᖅᑲᓇᐃᔮᖅᑖᕈᑕᐅᔪᓐᓇᕆᓪᓗᑎᒃ.

"ᐱᑕᖃᐃᓐᓇᖅᑎᑦᑎᓂᖅ ᐱᒻᒪᕆᐅᓂᖅᐹᖑᕗᖅ…ᐊᐅᓪᓚᖃᑦᑕᕈᒻᒪᐅᒍᕕᑦ ᐊᖑᓇᓱᒋᐊᕐᓗᑎᑦ, ᐊᕐᕌᒎᑉ ᐃᓚᐃᓐᓇᖓᓂ ᐃᖅᑲᓇᐃᔮᑦ ᐱᕕᖃᕈᓐᓇᖅᑎᑦᑎᕙᒃᐳᑦ ᐃᖅᑲᓇᐃᔭᙱᓕᕌᖓᒥᒃ ᐊᖑᓇᓱᒍᔾᔨᖃᑦᑕᕈᓐᓇᖅᑎᑦᑎᓂᕐᒥᒃ ᐃᓚᔮᒥᖕᓂᒃ ᓂᕿᒃᓴᖅᓯᔪᓐᓇᕋᔭᕋᒥᒃ."

ᐱᕙᓪᓕᖅᐸᓪᓕᐊᑎᑦᑎᓂᖅ ᓄᓇᓕᖕᓂ ᐱᔪᓐᓇᕐᓂᕆᔭᕐᓂᒃ ᖃᐅᔨᒪᓕᑕᐅᓕᕐᓂᕐᒥᒡᓗ

• ᑲᑎᒪᖃᑕᐅᔪᑦ ᓇᓗᓇᐃᖅᓯᓚᐅᖅᐳᑦ ᐱᕙᓪᓕᖅᐸᓪᓕᐊᑎᑦᑎᓂᖅᑕᖃᕆᐊᖃᕐᓂᖓᓂᒃ ᓄᓇᓕᖕᓂ ᐱᔪᓐᓇᕐᓂᕆᔭᕐᓂᒃ ᓴᓇᔭᖃᕆᐊᒃᓴᖅ ᒥᐊᓂᕆᔭᖃᕈᓐᓇᕆᐊᒃᓴᕐᓗ ᐆᒻᒪᖅᑯᑎᑕᐅᓯᕝᕕᖕᓂᒃ ᑕᒪᒃᑯᓄᖓᓗ ᐊᑕᔪᑦ ᓇᑉᐸᕆᐊᓕᑦ ᐱᑕᖃᕆᐊᓖᑦ. ᐊᒡᒐᖕᒧᑦ ᓴᓇᔪᓐᓇᕐᓂᖃᕐᓗᓂ ᐊᔪᕈᓐᓃᖅᓴᕐᕖᑦ ᐃᓚᒋᔭᐅᔭᕆᐊᖃᖅᐳᑦ ᐃᓕᓐᓂᐊᕐᓂᕆᔭᐅᕙᒃᑐᓄᑦ.

"ᐅᓄᖅᑐᐊᓗᖕᓂᒃ ᑎᑭᑦᑐᖃᖃᑦᑕᖅᑐᖅ ᖃᓪᓗᓈᓂᙶᖅᑐᓂᒃ ᐅᑭᐅᖅᑕᖅᑐᕐᒧᑦ ᐃᖅᑲᓇᐃᔭᕆᐊᖅᑐᓂᒃ. ᐃᓱᒪᒋᔭᕋ ᐃᓕᓐᓂᐊᕐᓂᖅ ᐱᒻᒪᕆᐅᔪᖅ, ᐱᓕᕆᐊᖃᕐᕕᒃᓴᐃᑦ ᐃᓚᖏᓐᓄᑦ ᐃᓕᓐᓂᐊᖅᓯᒪᔪᖅᑕᖃᙱᓐᓂᖓᓄᑦ ᑕᒪᒃᑯᐊ ᐃᓐᓄᒃᑕᐅᔪᓐᓇᖅᐸᙱᓚᑦ. ᐃᓕᓐᓂᐊᕐᓂᖅ ᐱᓕᒻᒪᒃᓴᕐᓂᕐᓗ ᐅᑭᐅᖅᑕᖅᑐᕐᒥᐅᓄᑦ ᐊᒃᓱᕉᑎᒋᓐᓇᖅᐳᖅ ᐃᓚᐅᖃᑕᐅᔪᓐᓇᖁᓪᓗᒋᑦ ᐅᑭᐅᖅᑕᖅᑑᑉ ᐱᕙᓪᓕᖅᐸᓪᓕᐊᓂᖓᓄᑦ."

ᐅᑭᐅᖅᑕᖅᑐᕐᒥ ᐳᓚᕋᕐᓂᖅ

• ᑲᑎᒪᖃᑕᐅᔪᑦ ᐅᖃᒪᔭᐅᑎᖃᓚᐅᖅᐳᑦ ᐱᕈᖅᐸᓪᓕᐊᓂᖃᕈᓐᓇᕐᓂᖓ ᐃᓕᖅᑯᓯᕆᔭᕐᒥᒃ ᐃᒃᐱᒋᔭᖃᑦᑎᐊᕐᓂᕐᒥᒃ ᐅᑭᐅᖅᑕᖅᑐᕐᒧᑦ ᐳᓚᕋᕐᓂᖅᑕᖃᕐᓂᖓᓂᒃ, ᐱᓗᐊᖅᑐᒥᒃ ᓯᑯ ᐊᐅᒃᐸᓪᓕᐊᓂᖓᓄᑦ ᐅᒥᐊᕐᔪᐊᒃᑯᑦ ᓄᓇᓖᑦ ᑎᑭᑕᐅᒡᒐᙱᓐᓂᖅᓴᐅᓕᕋᔭᕐᓂᖏᓐᓄᑦ
• ᑲᑎᒪᖃᑕᐅᔪᑦ ᐃᑲᔪᖅᓱᐃᓂᖃᓚᐅᖅᐳᑦ ᐳᓚᕋᕐᓂᖅᑕᖃᕋᔭᖅᐸᑦ ᐃᓕᑦᑎᕚᓪᓕᕈᑕᐅᔪᓐᓇᖅᑐᒥᒃ ᐅᑭᐅᖅᑕᖅᑐᕐᒥᐅᓂᒃ ᐃᓕᖅᑯᓯᕆᔭᖏᓐᓂᒡᓗ, ᑲᔪᓰᓐᓇᕈᓐᓇᖅᓯᓐᓈᖅᑑᓗᓂ ᒪᑭᒪᔾᔪᓯᕈᑎᒃᓴᐅᓗᓂ.

"ᐃᓱᒪᒋᔭᕋᓕ ᐊᖑᓇᓱᖕᓂᕐᒥᒃ ᐃᓱᒪᒋᔭᖃᙱᖔᕐᓗᑎᒃ ᐃᓱᒪᒋᔭᖃᖔᓪᓗᐊᖅᐳᑦ ᐃᓐᓇᕐᓂᒃ, ᐊᖅᓴᕐᓂᕐᓂᒃ, ᐊᒻᒪ ᓄᓇᖃᖅᑳᖅᑐᑦ ᐃᓕᖅᑯᓯᕆᔭᖏᓐᓂᒃ ᐳᓚᕋᕐᓂᒃᑯᑦ ᖃᐅᔨᔭᐅᔪᒃᓴᓂᒃ."

ᐅᑭᐅᖅᑕᖅᑐᕐᒥ ᖃᐅᔨᓴᕐᓂ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᖏᑦ

"ᓄᓇᑦᓯᐊᕐᒥ ᓄᓇᓕᐊᓛᖑᔪᒥᑦ ᐊᓂᒍᐃᓯᒪᓂᕋᖅᑕᐅᔪᓐᓇᖅᐳᑎᑦ ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᕐᓂᕆᔭᕐᒥᒃ, ᑭᓯᐊᓂ ᐃᓕᓐᓂᐊᖅᓯᒪᓂᕆᔭᑦ ᓇᓕᒧᒃᓲᑎᓯᒪᙱᓚᖅ ᑲᓇᑕᒥᐅᑕᐅᖃᑎᒋᔭᕐᓄᑦ. ᐊᕐᕌᒍᓪᓗᐊᕐᒥᒃ ᐃᓕᓐᓂᐊᒃᑲᓐᓂᕆᐊᖃᕋᔭᖅᐳᑎᑦ ᐊᑭᓕᖅᓱᖅᑕᕐᓂᒃ. ᑕᒪᓐᓇ ᑭᖑᕙᓯᒍᑎᕐᔪᐊᖑᕗᖅ. ᓯᓚᑦᑐᖅᓴᕐᕕᒡᔪᐊᖃᙱᓚᒍᑦ ᐃᓕᓐᓂᐊᕐᕕᒋᔪᓐᓇᖅᑕᑦᑎᓂᒃ. ᖃᐅᔨᓴᖅᑎᑕᖃᕈᓐᓇᙱᓚᕐᓗ ᐅᑭᐅᖅᑕᖅᑐᕐᒥᙶᖅᑐᓂᒃ ᑕᒪᒃᑯᓂᖓ ᐃᓕᓐᓂᐊᕐᕕᐅᔪᓐᓇᕋᔭᖅᑐᓂᒃ ᖃᐅᔨᓴᖅᑎᐅᔪᒃᓴᓂᒃ."

ᐃᓕᓐᓂᐊᕐᓂᐅᑉ ᑐᙵᓂᑦᑎᐊᕙᐅᓂᖓ

• ᐃᓕᓐᓂᐊᕐᓂᖅ ᐱᒻᒪᕆᐅᕗᖅ ᐅᑭᐅᖅᑕᖅᑐᕐᒥᐅᓄᑦ ᓇᐅᒃᑯᑐᐃᓐᓇᑦᑎᐊᖅ ᐃᓅᓯᕐᒥᖕᓂ – ᑕᒪᓐᓇ ᐱᓗᐊᙳᐊᖅᐳᖅ ᒪᒃᑯᒃᑐᓄᑦ. ᐱᔭᒃᑕᓪᓗᐊᑕᕆᔭᐅᕗᖅ ᒐᕙᒪᓄᑦ ᖁᕝᕕᓯᖕᓂᖃᑦᑎᐊᖅᑐᒥᒃ ᑲᓇᑕᒥᐅᓗᒃᑖᑦ ᐃᓕᓐᓂᐊᕐᓂᖃᕈᓐᓇᖁᓪᓗᒋᑦ.
• ᐃᑭᐊᖅᑭᕕᒃᑯᑦ-ᐃᓕᓐᓂᐊᕐᓂᖅ ᐅᑭᐅᖅᑕᖅᑐᕐᒥ ᐃᓕᓐᓂᐊᕐᓂᕐᒧᑦ ᐃᓚᑰᓂᕆᔭᐅᔪᓂᒃ ᐃᓕᓐᓂᐊᕈᑕᐅᔪᓐᓇᕋᓗᐊᖅᐳᑦ, ᑭᓯᐊᓂ ᑎᐅᑭᒻᒪᑎᔪᓐᓇᙱᓚᑦ ᐃᓕᓐᓂᐊᕆᐊᖃᑦᑕᓪᓚᑦᑖᕐᓂᕐᒧᑦ.

"ᐅᑭᐅᖅᑕᖅᑐᕐᒥ ᐅᓄᖅᑐᐊᓗᖕᓂᒃ ᓄᓇᖃᖅᑳᑑᔪᖁᑎᖃᖅᑐᒍᑦ. ᐃᓕᓐᓂᐊᕐᓂᖅ ᐊᑕᐅᑦᑎᒃᑰᖃᑎᖃᖅᓯᒪᙱᓚᖅ ᖃᓄᐃᓕᐅᕈᓯᑐᖃᕐᓂᒃ (ᐅᓂᒃᑳᖅᑐᐊᕐᓂᖅ) ᓯᕗᒧᒃᐹᓪᓕᖅᑎᑦᑕᕆᐊᖃᕋᑦᑎᒍᑦ ᑕᒪᒃᑯᐊ ᐃᓗᐊᕆᔭᐅᔪᑎᒍᑦ ᐃᓕᑦᑎᕙᓪᓕᐊᔾᔪᑎᒋᔭᐅᔪᒥᒋᔭᖅᑎᒍᓪᓗ."

ᖃᐅᔨᒪᓂᑐᖃᐅᐃᑉ ᐱᒻᒪᕆᐅᓂᖓ

• ᑲᑎᒪᖃᑕᐅᔪᑦ ᓇᓗᓇᐃᖅᓯᓚᐅᖅᐳᑦ ᖃᐅᔨᒪᓂᑐᖃᕐᓂᕆᔭᕐᒥᒎᖅ ᖃᐅᔨᑎᑕᐅᕙᓪᓕᐊᙱᑦᑕᕆᐊᒃᓴᖅ, ᑕᒪᓐᓇᓗ ᖃᐅᔨᒪᓂᖃᙱᓗᐊᕐᓂᖅ ᐊᔪᙱᓐᓂᖃᙱᓗᐊᕐᓂᕐᓗ ᐃᓅᔪᓐᓃᕈᑕᐅᑦᑕᓕᖅᐳᖅ ᐊᖑᓇᓱᒃᑎᓄᑦ. ᐱᓕᕆᐊᒃᓴᖅᑕᖃᓪᓛᕌᕐᔪᒃᐸᒃᑑᒐᓗᐊᖅ ᒪᒃᑯᒃᑐᑦ ᖃᓄᐃᓕᐅᖃᑎᖃᖅᑎᑕᐅᓪᓗᑎᒃ ᐃᓐᓇᕐᒥᒃ ᖃᐅᔨᒪᓂᑐᖃᕆᔭᐅᔪᒥᒃ ᖃᐅᔨᕚᓪᓕᖁᓪᓗᒋᖏᑦ. ᒐᕙᒪᒃᑯᑦ ᑕᒪᒃᑯᓂᖓ ᐱᓕᕆᐊᒃᓴᕐᓂᒃ ᐃᑲᔪᖅᓱᐃᖃᑦᑕᕈᓐᓇᖅᐳᑦ.

"ᖃᐅᔨᒪᓂᑐᖃᕆᔭᐅᔪᑦ ᐱᒻᒪᕆᐅᑎᑕᐅᑎᒋᖁᔭᒃᑲ ᖃᓪᓗᓈᓂᙶᖅᑐᑦ ᖃᐅᔨᓴᕐᓂᕆᕙᒃᑕᖏᑎᑐᑦ."

ᐃᓕᓐᓂᐊᕐᕕᐊᓘᑉ ᐅᖓᑖᓂ ᐃᓕᓐᓂᐊᕐᓂᖅ ᖃᐅᔨᓴᕐᓂᕐᓗ

• ᐋᖅᑭᒃᑕᐅᔪᖃᕆᐊᖃᖅᐳᖅ ᐃᓕᓐᓂᐊᕐᕕᐊᓘᑉ ᐅᖓᑖᓂ ᐃᓕᓐᓂᐊᕐᕕᖕᒥᒃ ᐅᑭᐅᖅᑕᖅᑐᕐᒥ ᐅᑭᐅᖅᑕᖅᑐᕐᒥᐅᑦ ᐊᐅᓪᓚᑯᑖᒃᑐᐊᓘᖃᑦᑕᕈᓐᓃᖁᓪᓗᒋᑦ ᑲᓇᑕᒥᐅᖑᖃᑎᒥᖕᓄᑦ ᓇᓕᒧᒃᓲᑎᔪᒥᒃ ᐃᓕᓐᓂᐊᕐᓂᖃᓕᖁᓪᓗᒋᑦ.
• ᓯᓚᑦᑐᖅᓴᕐᕕᒡᔪᐊᓗᒃᑖᑦ ᐃᓕᓐᓂᐊᒃᓴᖅᑕᖃᖅᑎᑦᑎᓪᓗᐊᖅᐳᑦ ᐅᑭᐅᖅᑕᖅᑐᕐᒥ ᖃᐅᔨᓴᕐᓂᒧᑦ ᑐᕌᖓᓂᖃᖅᑐᓂᒃ ᖃᐅᔨᒪᓂᖅᑕᖃᓕᖅᐹᓪᓕᖅᑎᑦᑎᓇᓱᒧᑐᐃᓐᓇᐅᙱᑦᑐᖅ ᑭᓯᐊᓂᓗ ᐅᓄᕐᓂᖅᓴᑦ ᖃᐅᔨᕚᓪᓕᖁᓪᓗᒋᑦ ᐅᑭᐅᖅᑕᖅᑐᕐᒧᑦ ᐃᓱᒪᓇᖅᑑᑎᒋᔭᐅᔪᓂᒃ.
• ᐃᓕᑉᐸᓪᓕᐊᔭᖃᕐᓂᕐᒧᑦ ᖃᐅᔨᓴᕐᓂᕐᒧᑦ ᑮᓇᐅᔭᖅᑕᖃᓪᓗᐊᖅᐳᖅ ᐅᑭᐅᖅᑕᖅᑐᕐᒥ ᖃᐅᔨᓴᓂᓕᕆᔾᔪᓯᕆᔭᖅ ᖃᐅᔨᒪᓂᑐᖃᕐᓂᕆᔭᕐᓗ ᐃᓕᓐᓂᐊᕈᑕᐅᓗᑎᒃ. ᑮᓇᐅᔭᖅᑖᕆᑎᑕᑦ ᐃᓗᓕᖃᕈᓐᓇᕋᔭᖅᐳᑦ ᒪᒃᑯᒃᑐᓂᒃ ᐱᓕᕆᖃᑎᖃᕐᓂᕐᒥᒃ ᓱᓕ ᒪᒃᑯᓱᖓᕐᓂᖏᓐᓂ ᐱᔪᒥᒍᓱᓕᖅᑎᑕᐅᓇᓱᒡᓗᑎᒃ ᖃᐅᔨᓴᖅᑎᐅᓂᕐᒥᒃ ᖃᐅᔨᓴᕐᓂᐅᔪᕐᓗ ᑲᔪᓯᑏᓐᓇᕈᓐᓇᖁᓪᓗᒍ.

"ᐱᐅᓗᐊᕋᔭᖅᑐᖅ ᐱᑕᖃᕋᔭᖅᐸᑦ ᐅᑭᐅᖅᑕᖅᑑᑉ ᓯᓚᑦᑐᖅᓴᕐᕕᒡᔪᐊᖓᓂᒃ. ᐅᑭᐅᖅᑕᖅᑑᑉ ᓯᓚᑖᓂᙶᖅᑐᑦ ᐃᓱᒻᒪᒃᐹᓪᓕᖅᑎᑕᐅᓇᔭᕐᒪᑖ ᓯᓚᑦᑐᖅᓴᕐᕕᒡᔪᐊᑉ ᓇᓃᓐᓂᕆᔭᖓᓂᑦ, ᓄᓇᖃᖅᑳᖅᑐᑦ ᐃᓕᖅᑯᓯᖓᓐᓂᑦ ᐊᒻᒪ ᖃᐅᔨᒪᓂᕆᔭᖏᓐᓂᑦ."

ᓄᓇᓕᖕᓂ ᖃᐅᔨᓴᕐᓂᖃᕐᓂᖅ ᓄᓇᓖᓪᓗ ᑲᑎᖅᓱᖅᑕᖏᑦ

• ᑲᑎᒪᖃᑕᐅᔪᑦ ᐅᖃᒪᔭᐅᑎᖃᓚᐅᖅᐳᑦ ᐱᕕᒃᓴᖅᑕᖃᖃᑦᑕᕈᓐᓇᕐᓂᖓᓂᒃ ᐃᓚᐅᑎᑦᑎᔭᕆᐊᒃᓴᖅ ᓄᓇᖃᖅᑎᐅᔪᓂᒃ ᑲᑎᖅᓱᐃᔪᖃᖅᑎᓪᓗᒍ ᖃᐅᔨᓴᕐᓂᕆᔨᕐᓂᑦ ᖃᐅᔨᔭᕐᓂᒃ ᐊᒻᒪ ᐃᑲᔪᖅᓱᖅᑕᐅᓂᖏᓐᓂᒃ "ᐃᓄᑐᐃᓐᓇᐃᑦ ᖃᐅᔨᓴᖅᑎᐅᔪᑦ".
• ᑲᑎᒪᖃᑕᐅᔪᑦ ᐅᓂᒃᑲᐅᓯᖃᑲᑕᓚᐅᖅᐳᑦ ᐊᔾᔨᐅᔪᕆᔭᓂᒡᓗ ᖃᐅᔨᔭᐅᑎᑦᑎᓪᓗᑎᒃ ᐃᓄᑐᐃᓐᓇᐃᑦ ᖃᐅᔨᓴᖅᑎᐅᑎᓪᓗᒋᑦ ᒪᑯᐊ ᐃᓚᖏᔭᐅᓪᓗᑎᒃ:
  • ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᖅᑎᑦ ᓄᓇᕕᖕᒥ ᑲᑎᖅᓱᐃᑲᑕᓚᐅᕐᓂᖏᓐᓂᒃ ᓄᓇᒨᓕᖓᔪᓂᒃ ᖃᐅᔨᓴᕈᑎᒋᔭᐅᔪᓂᒃ, ᐃᓚᒋᔭᐅᓪᓗᑎᒃ ᐱᕈᖅᑐᓂᒃ ᓰᕐᓇᕐᓂᐅᔪᓂᒃ ᓇᐃᓴᐃᓂᖅ, ᐆᒃᑐᕋᖅᓯᑲᑕᖕᓂᖅ ᐊᐳᑎᐅᑉ ᐃᔾᔪᓂᕆᔭᖓᓂᒃ ᐊᒻᒪ ᓄᓇᓕᒃᑎᒃ ᓄᓇᙳᐊᓕᐅᖅᖢᒍ.
  • ᐱᓕᕆᐊᒃᓴᕆᔭᐅᓚᐅᑲᓚᐅᖅᑐᖅ George River, ᓄᓇᖃᖅᑎᐅᔪᑦ ᐃᒪᕐᒥᒃ ᖃᐅᔨᓴᖅᑕᖃᑲᑕᓚᐅᕐᓂᖏᑦ ᖃᐅᔨᓇᓱᒃᖢᑎᒃ ᐆᒃᑐᕋᖅᓯᓂᐅᑉ ᑭᒡᓕᒃᓴᕆᓇᔭᖅᑕᖓᓂᒃ – ᖃᐅᔨᒪᓂᑐᖃᕆᔭᕐᓂᒡᓗ ᖃᐅᔨᔭᖃᕈᓐᓇᖅᓯᓚᐅᕆᓪᓗᑎᒃ ᐊᐱᖅᓱᖃᑦᑕᕐᓂᒃᑯᑦ ᐃᓐᓇᕐᓂᒃ ᑕᒪᓐᓇᓗ ᐃᓚᒋᓕᐅᑎᑎᖦᖢᒍ ᓄᓇᒋᔭᕐᒥᖕᓅᖓᔪᓂᒃ ᖃᐅᔨᓯᒪᔭᖃᕈᑎᒋᔭᕐᓄᑦ ᑐᖅᑯᖅᑕᐅᓯᒪᔪᓂᒃ
  • ᐃᑲᔪᖅᓱᖅᑕᐅᔪᒪᓂᖅ ᓄᓇᖃᖅᑳᖅᑐᓂᑦ – ᐃᓐᓇᕐᓂᑦ ᐱᓗᐊᖅᑐᒥᒃ – ᐃᓚᐅᑎᑦᑎᓂᒃᑯᑦ ᖁᓕᒥᒎᓕᒃᑯᑦ ᓈᓴᐃᓂᖅᑕᖃᖅᑎᓪᓗᒍ
• ᐃᓚᐅᖃᑕᐅᓂᕆᔭᖅ ᓄᓇᖃᖅᑳᑑᔪᓄᑦ ᑐᑭᖃᑦᑎᐊᓪᓘᓪᓗᐊᖅᐳᖅ, ᐃᓚᒋᔭᐅᓪᓗᑎᒃ ᖃᐅᔨᔭᐅᕙᓪᓕᐊᔪᓂᒃ ᑲᑎᖅᓱᐃᓂᖅ ᐊᒻᒪ ᑲᑎᖅᓱᖅᑕᑦ ᑐᑭᓯᓇᖅᓯᑎᑕᐅᓗᑎᒃ – ᑕᒪᒃᑯᐊ ᐃᓅᓯᖏᓐᓄᑦ ᑲᑎᙵᓂᖃᕋᔪᖕᒪᑕ.
• ᐱᒻᒪᕆᐅᕗᖅ ᐃᓚᐅᖃᑕᐅᑎᑦᑎᔭᕆᐊᒃᓴᖅ ᐱᔪᒥᒍᓱᓕᖅᑎᑦᑎᔭᕆᐊᒃᓴᕐᓗ ᐅᑭᐅᖅᑕᖅᑐᕐᒥᐅᓂᒃ ᓱᓕ ᒪᒃᑯᒃᑎᓪᓗᒋᑦ: "ᐃᒪᓐᓇᐅᙱᒻᒪᑦ, ᐅᓪᓗᐃᑦ ᐃᓚᖓᓐᓂᒃ ᖃᐅᔨᑳᓪᓚᒃᑲᖕᓂ ᖃᐅᔨᓴᕈᒪᓕᖅᖢᒍᓗ … ᐱᒻᒪᕆᐅᕗᖅ ᖃᐅᔨᓴᖅᑎᑦ ᐅᑭᐅᖅᑕᖅᑐᕐᒥ ᐱᓕᕆᔪᑦ ᐃᓚᐅᖃᑕᐅᑎᑦᑎᓇᔭᖅᐸᑕ ᐅᑭᐅᑭᓐᓂᖅᓴᓂᒃ".

"ᐊᑐᖅᓯᓂᖃᕐᓂᒃᑯᑦ ᐃᓕᓐᓂᐊᕐᓂᖅ ᓱᓐᓂᐅᑎᓯᒪᓂᖃᖅᑰᔨᕗᖅ ᐱᓕᒻᒪᒃᓴᐃᓂᕐᒥᒃ ᓯᕗᓕᖅᑎᒃᓴᐅᓇᔭᖅᑐᓂᒃ ᒪᒃᑯᒃᑐᓂᒃ ᖃᑯᒍᙳᖅᓯᒪᓕᖅᐸᑦ ᒐᕙᒪᐅᔪᓄᑦ ᓯᕗᓕᖅᑎᐅᔪᓐᓇᓛᕐᒪᑕ."

ᐊᑐᖅᓯᖃᑎᒌᖕᓂᖅᑕᖃᖃᑦᑕᖅᑎᑦᑎᓇᓱᖕᓂᖅ ᐃᓚᑰᓂᓂᓕᖕᓂᒡᓗ ᑲᑎᑦᑐᓐᓇᖅᓯᑎᑦᑎᓂᖅ

• ᑲᑎᒪᖃᑕᐅᔪᑦ ᐅᑭᐅᖅᑕᖅᑐᕐᒦᑦᑐᑦ ᖃᓪᓗᓈᓪᓗ ᓄᓈᓃᑦᑐᑦ ᐅᔾᔨᕆᔭᖃᓚᐅᖅᐳᑦ ᐱᒻᒪᕆᐅᓂᖓᓂᒃ ᐊᑐᖅᓯᖃᑎᒌᖃᑦᑕᕐᓂᐅᕐᒥᒃ ᑲᓇᑕᒥᐅᑕᐅᖃᑎᒌᓪᓗ ᑲᑎᖃᑦᑕᕐᓂᖓ ᑐᓴᕐᕕᒋᖃᑦᑕᐅᑎᔪᓐᓇᕈᒪᒧᑦ ᐃᓕᕝᕕᒋᖃᑦᑕᐅᑎᔪᓐᓇᕈᒪᒧᓪᓗ.

"Iᒪᒃᑯᒃᑐᓄᑦ ᑲᑎᑦᑕᕐᓂᖅᑕᖃᕐᓂᖅᓴᐅᕙᒃᐸᑦ ᐊᓯᖏᓐᓂᑦ ᓄᓇᓕᖕᓂᙶᖅᑐᓂᑦ ᖃᐅᔨᒪᙱᓗᐊᕐᓂᖅᑕᖃᕈᓐᓃᖅᐹᓪᓕᕋᔭᖅᐳᖅ ᑲᑎᙵᓂᖅᓴᐅᓂᖅᑕᖃᓕᕐᓗᓂᓗ."

• ᐅᔾᔨᕆᔭᐅᓚᐅᕐᒪᑦ ᖃᓪᓗᓈᓪᓗ ᓄᓈᓃᑦᑐᑦ ᐅᑭᐅᖅᑕᖅᑑᑉ ᒥᒃᓵᓄᑦ ᓇᓗᔪᓪᓛᓘᒋᐊᒃᓴᖏᓐᓂᒃ ᐃᓕᓐᓂᐊᖅᑎᑕᐅᕙᙱᓗᐊᒧᑦ ᖃᐅᔨᔭᖃᖅᑎᑕᐅᕙᙱᓗᐊᒧᓪᓗ ᓱᓕ ᐅᑭᐅᑭᑎᓪᓗᒋᑦ.

"ᐱᒻᒪᕆᐅᕗᖅ ᐃᖅᑲᒍᓱᑦᑎᐊᖏᓐᓇᕆᐊᒃᓴᖅ [ᐆᒪᔪᕐᑦ] ᓴᓇᔭᖃᕐᓂᐊᕌᖓᒥᓗ ᐸᕐᓇᐅᑎᒋᖃᓯᐅᔾᔭᐅᓯᒪᕙᒡᓗᑎᒃ."

ᓴᐳᓐᓂᐊᖅᑕᐅᓂᖓ ᐊᕙᑎ ᐊᒻᒪᓗ ᓴᐳᓐᓂᐊᖅᑕᐅᓂᖏᑦ ᐅᑭᐅᖅᑕᖅᑐᒥ ᐊᔾᔨᒌᖏᑦᑑᑏᑦ ᐆᒪᔪᐃᑦ

ᓯᓚᐅᑉ ᐊᓯᔾᔨᖅᐸᓪᓕᐊᓂᕆᔭᖓ

• ᐅᓄᖅᑐᑦ ᑲᑎᒪᖃᑕᐅᔪᑦ ᐃᓱᒪᒋᔭᖃᖅᐳᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᕆᔭᖓ ᐃᓚᒋᔭᐅᖃᑕᐅᒋᖓᒃᓴᖓᓂᒃ ᑕᒪᐃᓐᓄᑦ ᐊᒃᑐᐃᓯᒪᓂᖃᖅᑐᓄᑦ ᓯᕗᓂᕆᔭᕐᒥᓃᑦᑐᓄᑦ.
• ᓯᓚᐅᑉ ᐊᓯᔾᔨᖅᐸᓪᓕᐊᓂᕆᔭᖓᑕ ᐊᒃᑐᐃᓯᒪᓂᕆᔭᖏᑦ ᐊᕗᖔᓘᖓᕗᑦ. ᐆᒃᑑᑎᑦ ᑲᑎᒪᖃᑕᐅᔪᓂᑦ ᓇᓗᓇᐃᖅᑕᐅᔪᑦ ᐃᓚᖃᖅᐳ:
  • ᓯᓚᐅᑉ ᐊᓯᔾᔨᖅᐸᓪᓕᐊᓂᕆᔭᖓᑕ ᐊᒃᑐᐃᓯᒪᓂᖃᕐᓂᖓ ᓴᓇᔭᐅᓯᒪᔪᓄᑦ (ᓲᕐᓗ ᐃᒡᓗᑦ, ᐅᑭᐅᒃᑯᑦ ᐊᖅᑯᓯᐊᖑᕙᒃᑐᑦ, ᐊᓯᖏᓪᓗ)
  • ᐅᒥᐊᕐᔪᐊᒃᑰᖃᑦᑕᕈᓐᓇᕐᓂᖅᓴᐅᓂᕆᔭᐅᑐᐃᓐᓇᕆᐊᖃᕐᓂᖅ ᓯᑯᖃᕈᓐᓃᖅᐸᓪᓕᐊᓂᖓᓄᑦ ᑕᒪᑐᒪᓗ ᐊᒃᑐᐃᓯᒪᓂᖃᑐᐃᓐᓇᕆᐊᖃᕐᓂᖓ ᐃᖃᓗᒐᓱᖕᓂᕐᒧᑦ ᐃᒪᕐᒥᐅᑦᑕᓄᓪᓗ
  • ᐊᑦᑕᕐᓇᕐᓂᖃᕐᓂᖅᓴᐅᓕᑐᐃᓐᓇᕆᐊᖃᕐᓂᕆᔭᑦ ᖃᓄᐃᓕᐅᖃᑦᑕᕈᓯᖃᕐᓂᕆᔭᕐᓄᑦ ᓲᕐᓗ ᐊᖑᓇᓱᖕᓂᒃ (ᐆᒃᑑᑦ ᐊᖑᓇᓱᒋᐊᖅᓯᒪᔭᕆᐊᒃᓴᖅ ᐅᓗᕆᐊᓇᖅᓯᓗᓂ ᓯᑰᑉ ᓵᓗᐊᕐᓂᖓᓄᑦ)
  • ᓯᒡᔭᖅ ᓄᖑᑉᐸᓪᓕᐊᔪᖅ ᓄᓇᓖᑦ ᖃᓂᒋᔭᖏᓐᓂ ᑕᕆᐅᖅ ᐃᒪᖅᑯᖅᑐᓯᕙᓪᓕᐊᓂᖓᓄᑦ
• ᑲᑎᒪᖃᑕᐅᔪᑦ ᐃᓱᒫᓘᑎᖃᓚᐅᕆᕗᑦ ᓄᓇᐅᑉ ᐃᓗᐊᑕ ᐊᐅᒃᐸᓪᓕᐊᓂᖓᓄᑦ ᐳᓪᓚᕐᓘᑎᒥᒃ ᒪᑏᓐ ᐊᓂᐊᔪᖃᕋᔭᕆᐊᒃᓴᖓ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐊᒃᑐᐃᓂᖃᖅᓯᒪᔾᔪᑕᐅᒋᐊᒃᑲᓐᓂᕐᒥᓗᓂ.

"ᐊᕙᑎᒋᔭᖅ ᐅᑭᐅᖅᑕᖅᑐᕐᒥ ᐊᓯᔾᔨᖅᐸᓪᓕᐊᕌᓚᓴᕐᓂᖅᓴᓪᓛᓘᔪᖅ ᖃᓪᓗᓈᑦ ᓄᓈᓂᕐᒥᐅᖓᓂᑦ. ᓄᓇᑐᖃᕆᔭᕋ ᑕᓯᖃᓚᐅᕋᓗᐊᖅᐳᖅ ᐱᑕᖃᕈᓐᓃᑦᑎᐊᓚᐅᖅᑐᒥᒃ ᐊᑖ ᐊᐅᖕᓂᑯᐊᓄᑦ."

ᐱᐅᖅᓱᐊᕐᓂᖅ ᐆᒪᓂᓖᓪᓗ ᐊᔾᔨᒌᙱᑦᑐᑦ

• ᑲᑎᒪᖃᑕᐅᔪᑦ ᐃᓱᒪᒋᔭᖃᓚᐅᖅᐳᑦ ᐊᔾᔨᐅᙱᑦᑑᓪᓗᓂ ᓇᔪᒐᖃᕐᕕᐅᔪᖅ ᐊᔾᔨᒌᙱᑦᑑᑕᐅᔪᓪᓗ ᓇᔪᖅᓯᔪᑦ ᐅᑭᐅᖅᑕᖅᑐᕐᒥ ᐱᕐᔪᐊᒻᒪᕆᐊᓘᔭᕆᐊᒃᓴᖓᓂᒃ
• ᐱᕈᖅᐸᓪᓕᐊᑎᑦᑎᓂᐅᑉ ᐊᒃᑐᐃᓯᒪᓂᕆᔭᖓ, ᐱᓗᐊᖅᑐᒥ ᓴᖅᑭᒃᑲᓐᓂᕈᓐᓇᙱᑦᑐᑦ ᐲᔭᖅᑕᐅᓂᕆᔭᖏᑦ ᐃᓱᒫᓘᑎᒋᔭᐅᓚᐅᕐᒪᑦ ᐅᓄᖅᑐᓄᑦ ᑲᑎᒪᖃᑕᐅᔪᓄᑦ
• ᐊᒃᑐᖅᑕᐅᓯᒪᓂᖏᑦ ᐆᒪᔪᑦ ᐃᓅᓯᖃᐅᓯᑐᖃᕐᒧᑦ ᐊᑐᖅᑕᐅᕙᒃᑐᑦ – ᐃᓚᒋᓪᓗᒋᑦ ᑐᒃᑐᑦ ᐅᒥᖕᒪᓪᓗ– ᐅᖃᐅᓯᐅᑯᑖᓚᐅᖅᐳᑦ, ᐃᓱᒫᓘᑕᐅᓪᓗᐊᑕᖅᖢᓂ ᐅᓄᕈᓐᓃᖅᐸᓪᓕᐊᓂᖏᑦ ᐃᓅᓯᖃᐅᓯᑐᖃᕐᒥᒃ ᓱᕋᒻᒪᐃᔪᓐᓇᕐᒪᑦ ᓂᖃᐅᓪᓕᐅᕐᓇᐅᕈᑕᐅᕚᓪᓕᒃᑲᓐᓂᕐᓗᓂᓗ.
• ᐊᕙᑎᒋᔭᑉ ᒥᒃᓵᓄᑦ ᐊᑐᐊᒐᖅᑕᖃᕆᐊᖃᖅᐳᖅ ᐊᕙᑎᐅᔪᖅ ᓴᓗᒪᑦᑎᐊᖏᓐᓇᖁᓪᓗᒍᑦ ᓂᕿᒃᓴᕆᔭᐅᕙᒃᑐᓪᓗ ᓱᕈᖅᓯᒪᓕᖁᓇᒋᑦ.
• ᕿᖁᒪᐃᓐᓇᐅᔭᖅᑑᑉ ᐊᐅᒃᐸᓪᓕᐊᓂᖓ ᐊᓂᐊᕐᓂᖓᓗ ᒪᑏᓐ ᐊᒃᑐᐃᓯᒪᓇᔭᖅᐳᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓇᑉᐸᕆᐊᓕᓄᑦ ᐱᑕᖃᕆᐊᓕᖕᓄᓪᓗ, ᑭᓯᐊᓂᓕᑦᑕᐅᖅ ᐃᓱᒪᒋᔭᐅᖃᐅᓯᔾᔭᐅᔭᕆᐊᖃᕆᕗᑦ ᐆᒪᔪᑦ ᐊᔾᔨᒌᙱᑦᑐᑦ ᐊᔾᔨᒌᙱᑦᑐᓪᓗ ᓇᔪᒐᖃᕐᕕᐅᕙᒃᑐᑦ
• ᐊᓯᖏᓐᓄᑐᑦ ᐅᖃᐅᓯᐅᔪᓄᑦ, ᑲᑎᒪᖃᑕᐅᔪᑦ ᓇᓗᓇᐃᖅᓯᓚᐅᖅᐳᑦ ᐱᒻᒪᕆᐅᓂᖓᓂᒃ ᐅᖃᖃᑎᖃᖃᑦᑕᕐᓂᕐᒥᒃ ᓄᓇᖃᖅᑳᖅᑐᓂᒃ "ᑕᒪᑐᒪᓂ ᓄᓇᒦᓯᒪᓕᖅᑐᓂᒃ ᐊᕐᕌᒍᒐᓴᕐᔪᐊᒻᒪᕆᐊᓗᖕᓂᒃ ᓄᓇᒥᖕᓂᒡᓗ ᑕᐅᑐᒃᑕᖃᕐᓂᕆᔭᖓᑦ, ᖃᐅᔨᒪᓂᖃᕐᓂᕆᔭᖓᑦ, ᑲᒪᒋᔭᖃᐅᓯᖓᓪᓗ ᐱᕐᔪᐊᓗᓛᖑᓪᓗᓂ".

ᐅᑭᐅᖅᑕᖅᑐᖅ ᓄᓇᕐᔪᐊᕐᒧᑦ ᖃᓄᐃᓕᖓᔫᓂᕆᔭᖓ

ᖃᓄᐃᓕᐅᕐᓂᖃᖃᑎᖃᖃᑦᑕᕐᓂᖅ ᓄᓇᕐᔪᐊᕐᒥᐅᖑᖃᑎᒋᔭᕐᓂᒃ

"ᐱᓕᕆᖃᑎᖃᖃᑦᑕᕐᓂᒃᑯᑦ ᓄᓇᕐᔪᐊᕐᒥᐅᖑᖃᑎᑦᑎᓐᓂᒃ, ᓇᖕᒥᓂᖅ ᓄᓇᒋᔭᑦᑎᓐᓂᒃ ᐃᓕᖅᑯᓯᑦᑎᓐᓂᒡᓗ ᐱᒡᒐᕈᓐᓃᖅᐹᓪᓕᖅᑎᑦᑎᔪᓐᓇᖅᐳᒍᑦ."

• ᑲᑎᒪᖃᑕᐅᔪᑦ ᐊᒃᓱᕈᕆᔭᖃᕐᓂᕋᓚᐅᖅᐳᑦ ᐱᒻᒪᕆᐅᓂᖓᓂᒃ ᐱᓕᕆᖃᑎᖃᖃᑦᑕᕆᐊᒃᓴᖅ ᓄᓇᕐᔪᐊᕐᒥ ᐅᑭᐅᖅᑕᖅᑐᖃᖃᑎᒋᔭᕐᓂᒃ (ᐃᓚᒋᓪᓗᒋᑦ ᕋᓯᐊᒥᐅᑦ ᐊᒥᐊᓕᑲᒥᐅᓪᓗ) ᐊᓯᖏᓐᓂᒡᓗ ᐊᒃᑐᖅᑕᐅᓯᒪᓂᓕᖕᓂᒃ ᐊᒻᒪ ᐱᒻᒪᕆᐅᓂᕆᔭᐅᓂᖓᓂᒃ ᓄᓇᕐᔪᐊᑦ ᑲᑐᔾᔨᔪᑦ
• ᐅᔾᔨᕈᓱᖕᓂᖅᑕᖃᕐᓂᖅᓴᐅᔭᕆᐊᖃᕐᒪᑦ ᐃᓄᓖᒫᖑᔪᓂᒃ. ᒪᑭᒪᔾᔪᑎᒃᓴᕆᔭᐅᕙᒃᑐᑦ ᓇᑦᑎᕋᓱᒃᐸᖕᓂᖅ ᐱᔾᔪᑕᐅᓪᓗᓂ ᐃᓄᖕᓄᑦ ᐃᖕᒥᖕᓂᒃ ᐱᒪᔪᓐᓇᒋᑉᐹᓪᓕᐅᑎᒋᔭᐅᓯᒪᖕᒪᑦ.

"ᐃᓱᒫᓘᑎᒋᔭᒪ ᐃᓚᖓᑦ, ᐅᑭᐅᖅᑕᖅᑐᖅ ᑎᑭᑕᐅᒡᒐᕈᓐᓃᖅᐹᓪᓕᐊᑎᓪᓗᒍ ᐃᖏᕐᕋᔭᖕᓂᕆᔭᒃᑯᑦ, ᓄᓇᕐᔪᐊᕐᒧᑦ ᐃᓚᒋᔭᐅᓕᑐᐃᓐᓇᖁᓇᙱᑉᐳᑦ. ᐃᓂᖃᖅᑎᐅᖅᑰᔨᓂᖅ ᐱᖃᖅᑎᐅᖅᑰᔨᓂ ᐅᑭᐅᖅᑕᖅᑑᑉ ᓯᓚᑖᓄᐊᖁᓇᒋᑉᐳᖅ. ᐃᓚᒋᔭᐅᕗᖅ ᑲᔪᓰᓐᓇᕐᓂᖃᕐᓂᐊᖅᑐᒥᒃ ᐳᓚᕋᕐᓂᖅᑕᖃᕐᓂᖅ ᐅᑭᐅᖅᑕᖅᑐᕐᒥᒃ ᐱᒡᒐᙱᑦᑑᖏᓐᓇᖁᔨᓐᓇᖅᐳᖅ ᐃᓂᒋᔭᖃᖅᑎᐅᖏᓐᓇᕐᓗᓂ ᓄᓇᕐᔪᐊᕐᒥ, ᐃᓚᒋᔭᐅᓕᑐᐃᓐᓇᙱᓪᓗᓂ."

ᓄᓇᖃᖅᑎᐅᓂᖅ ᐅᑭᐅᖅᑕᖅᑑᓪᓗ ᑎᑭᑕᐅᒡᒐᙱᓐᓂᖅᓴᐅᕙᓪᓕᐊᓕᕐᓂᖓ

• ᐃᓕᒪᒋᔭᐅᕗᖅ ᑲᑎᒪᖃᑕᐅᔪᓄᑦ ᐅᑭᐅᖅᑕᖅᑐᖅ ᑎᑭᑕᐅᒡᒐᙱᓐᓂᖅᓴᐅᓕᕐᓂᐊᕆᐊᒃᓴᖓ – ᐅᐸᓗᕐᓂᖃᕆᐊᖃᕐᓇᖅᑰᔨᒋᔭᐅᓕᖅᐳᕐᓗ ᓄᓇᓖᑦ ᐅᑭᐅᖅᑕᖅᑐᕐᒦᑦᑐᑦ ᑲᓇᑕᓗ ᑕᒪᓐᓇ ᐊᑐᖅᑎᓐᓇᓱᓪᓗᐊᕆᐊᖃᕐᒪᖔᔾᔪᒃ.
• ᐱᒡᒐᕐᓂᖃᙱᓐᓂᖅᓴᒥᒃ ᐅᑭᐅᖅᑕᖅᑐᖃᕐᓂᖅ ᐊᒻᒪ ᐃᓱᒪᓯᐅᕐᕕᐅᔪᓐᓇᕐᓂᖅᓴᐅᒃᐸᑕ ᐊᖓᔪᖅᑳᖑᕕᖃᕐᓂᖅᓴᐅᒃᐸᑕᓗ ᓄᓇᕐᔪᐊᕐᒥᐅᖑᖃᑎᒌᑦ ᐅᑭᐅᖅᑕᖅᑐᕐᒧᑦ ᑲᑎᒪᔨᑦ, ᐊᑑᑎᖃᕈᓐᓇᕋᔭᖅᐳᖅ ᑲᓇᑕᐅᑉ ᐅᑭᐅᖅᑕᖅᑐᖓᓂᒃ ᓄᓇᖁᑎᖃᖅᑎᐅᓂᕐᒧᑦ ᐊᒻᒪ ᓴᙱᒃᑎᒋᐊᖅᑎᑦᑎᔪᓐᓇᕋᔭᕆᓪᓗᓂ ᐅᑭᐅᖅᑕᖅᑑᑉ ᒥᒃᓵᓄᑦ ᑕᐅᑐᒃᑕᖃᕐᓂᕐᒧᑦ ᐃᓱᒪᒋᔭᖃᕐᓂᕐᒧᓪᓗ.
• ᑲᑎᖦᖢᒋᒃ ᓯᑰᑉ ᐊᐅᒃᐸᓪᓕᐊᓂᕆᔭᖓ ᐊᒻᒪ ᐱᔪᒥᒋᔭᐅᓂᕆᔭᖏᑦ ᐃᑎᔪᕐᒥᐅᑕᑦ ᐊᑐᖅᑕᐅᔪᓐᓇᖅᑐᑦ ᐅᑭᐅᖅᑕᖅᑑᑉ ᓄᓇᖏᓐᓄᑦ ᐃᒪᖏᓐᓄᓪᓗ ᐱᒋᔭᐅᙱᑦᑑᑎᒋᔭᐅᓕᑐᐃᓐᓇᕆᐊᖃᖅᐳᑦ ᑲᓇᑕ ᓇᓗᓇᐃᖅᓯᑦᑎᐊᙱᑉᐸᑦ ᑭᒡᓕᒋᔭᖁᑎᒥᖕᓂᒡᓗ ᓄᓇᕐᔪᐊᕐᒥᐅᖑᖃᑎᒌᓄᑦ.