ᐅᑭᐅᖅᑕᖅᑐᒥ ᐊᑐᐊᒐᔅᓴᓄᑦ ᐱᓕᕆᐊᔅᓴᐃᑦ ᓄᓇᒋᔭᐅᔪᒥ ᑲᑎᒪᑎᓪᓗᒋᑦ: ᑰᒡᔪᐊᖅ, ᐅᒃᑐᐱᕆ 30-31, 2017

ᑕᒪᓐᓇ ᓇᐃᓈᖅᓯᒪᔪᑦ ᐅᓂᒃᑳᓕᐊᑦ ᐅᑭᐅᖅᑕᖅᑐᒥ ᐊᑐᐊᒐᔅᓴᓄᑦ ᐱᓕᕆᐊᔅᓴᐃᑦ ᓄᓇᒋᔭᐅᔪᒥ ᑲᑎᒪᑎᓪᓗᒋᑦ ᑰᒡᔪᐊᒥ, ᑯᐱ ᐅᒃᑐᐱᕆ 30-31, 2017-ᖑᑎᓪᓗᒍ.

ᑖᕙᑎ ᒪᒃᐃᒐᕐᒥᑦ

ᐃᓚᒋᔭᐅᔪᑦ

ᑭᒡᒐᖅᑐᐃᔩᑦ ᓄᓇᕕᒻᒥᑦ ᑲᑎᓚᐅᖅᑐᑦ ᐅᒃᑐᐱᕆ 30, 31, 2017−ᖑᑎᓪᓗᒍ, ᒪᑭᕕᒃ ᑯᐊᐳᕆᓴᓐᑯᓐᓂ ᑲᑎᒪᕝᕕᖓᓂ ᑯᒡᔪᐊᒥ ᐅᖃᖃᑎᒌᒃᑎᓪᓗᒋᑦ ᐅᑭᐅᖅᑕᖅᑐᒥ ᐊᑐᐊᒐᔅᓴᓄᑦ ᐱᓕᕆᐊᔅᓴᐅᔪᓄᑦ. ᐃᓚᒋᔭᐅᓚᐅᖅᑐᑦ ᑭᒡᒐᖅᑐᐃᔩᑦ ᒪᑭᕕᒃ ᑯᐊᐳᕆᓴᓐ, ᑲᑎᕕᒃ ᓄᓇᒋᔭᐅᔪᒥ ᒐᕙᒪᒃᑯᑦ, ᑲᑎᕕᒃ ᐃᓕᓴᕐᓂᓕᕆᓂᖅ, (ᐃᓕᓐᓂᐊᑐᓕᕆᔨᒃᑯᑦ ᓄᓇᕕᒻᒥ), ᓄᓇᕕᒃ ᓄᓇᒋᔭᐅᔪᒥ ᑲᑎᒪᔩᑦ ᐋᓐᓂᐊᖅᑕᐃᓕᒪᓂᕐᒧᑦ ᐊᒻᒪᓗ ᐃᓄᓕᕆᔨᖏᑦ, ᐊᕙᑕᖅ ᐃᓕᖅᑯᓯᓕᕆᔨᒃᑯᑦ, ᖃᕐᔪᐃᑦ ᒪᒃᑯᒃᑐᓕᕆᔨᒃᑯᑦ ᑲᑎᒪᔨᖏᑦ, ᓄᓇᕕᒃ ᓄᓇᓕᕆᓂᕐᒧᑦ ᑯᐊᐳᕆᓴᓐ ᑲᑐᔾᔨᖃᑎᒌᖏᑦ, ᑕᕐᕋᒥᐅᑉ ᓂᐱᖓᑦ ᑲᑐᔾᔨᖃᑎᒌᖏᑦ, ᓄᓇᕕᒃ ᐅᔭᕋᖕᓂᐊᕐᕕᓕᕆᔨᒃᑯᑦ ᑮᓇᐅᔭᓂᒃ ᐃᑲᔫᓯᐊᑦ, ᒐᕙᒪᑦ ᑯᐱᒃ ᐊᒻᒪᓗ ᐊᒥᓱᒃᑲᓐᓃᑦ ᒐᕙᒪᓕᕆᔨᕐᔪᐊᒃᑯᑦ ᐱᓕᕆᕝᕕᖏᓐᓂᑦ. ᑲᙳᓇᖅᑑᑎᒋᓗᒋᑦ ᐃᓚᒋᔭᐅᓚᐅᖅᑐᑦ, ᐊᑎᖏᑦ ᑎᑎᕋᖅᑕᐅᓯᒪᙱᑦᑐᑦ, ᑭᓯᐊᓂ ᐊᖏᖅᑕᐅᓯᒪᔪᑦ ᓇᓗᓇᐃᖅᑕᐅᓯᒪᔪᑦ.

ᐱᒻᒪᕆᐅᔪᑦ ᐊᒻᒪᓗ ᐅᖃᐅᓰᑦ ᐱᓕᕆᐊᔅᓴᒧᑦ

ᑕᒪᒃᑭᑎᒍᑦ ᐅᑭᐅᖅᑕᖅᑐᒥ ᓴᓇᕝᕖᑦ

ᐃᓅᖃᑎᒌᒃᑐᑦ ᓴᓇᕝᕖᑦ ᐊᒻᒪᓗ ᐃᓕᓐᓂᐊᕐᓂᖅ

  • ᐃᓚᒋᔭᐅᓚᐅᖅᑐᑦ ᓇᓗᓇᐃᔭᖅᓯᒪᔪᑦ ᐱᒻᒪᕆᐅᓂᖓᓄᑦ ᓴᓇᕝᕕᐅᔪᓄᑦ, ᐃᓚᒋᓗᒋᑦ ᐋᓐᓂᐊᕐᕖᑦ, ᐃᑲᔫᓯᐊᑦ ᐃᓪᓗᓕᕆᓂᕐᒧᑦ, ᓄᑕᖅᑲᓄᑦ ᐊᒻᒪᓗ ᒪᒃᑯᒃᑐᓄᑦ ᐱᔨᑦᑎᕋᐅᑎᔅᓴᓄᑦ (ᐃᓚᒋᓗᒋᑦ ᓄᑖᓂᒃ ᐱᕙᓪᓕᐊᔪᓐᓇᕐᓂᖅ ᐱᕙᓪᓕᐊᒍᓐᓇᖁᓪᓗᒋᑦ ᓄᑕᖅᑲᐃᑦ ᒥᐊᓂᕆᔭᐅᓗᑎᒃ ᓄᓇᒋᔭᐅᔪᒥ ᐊᐅᓪᓚᖅᑎᑕᐅᙱᖔᕐᓗᑎᒃ ᐊᓯᐊᓄᑦ ᓄᓇᓕᒻᒧᑦ).
  • ᐃᓚᒋᔭᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᐱᖃᕆᐊᖃᕐᓂᖏᑦ ᖁᑦᑎᓐᓂᖅᓴᒃᑯᑦ ᐃᓕᓐᓂᐊᕐᕕᔅᓴᓂᒃ ᐃᓱᐊᓈᕐᕕᔅᓴᓂᒃ, ᐃᓚᒋᓗᒋᑦ ᑕᐃᒪᐅᔪᓐᓇᖅᑐᒥᒃ ᓄᓇᕕᒻᒥ−ᑐᙵᕝᕕᒃ ᓯᓚᑦᑐᖅᓴᕐᕕᒻᒥᒃ ᐅᕝᕙᓘᓐᓃᑦ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᔅᓴᒥᒃ.
  • ᐱᑕᖃᕆᐊᖃᖅᑐᖅ ᐱᕚᓪᓕᖅᓯᒪᔪᓂᒃ ᖃᕋᓴᐅᔭᓕᕆᓂᕐᒧᑦ ᐊᒻᒪᓗ ᐅᐊᔭᒨᖅᑐᓂᒃ. ᒫᓐᓇᐅᔪᖅ ᖃᕋᓴᐅᔭᓕᕆᓂᖅ ᐱᕕᔅᓴᖃᙱᑦᑐᑦ ᖃᕋᓴᐅᔭᒃᑯᑦ ᐃᓕᓐᓂᐊᕈᓐᓇᕐᓂᕐᒧᑦ.
  • ᐱᕕᔅᓴᖃᙱᓗᐊᖅᑐᑦ ᐱᔨᑦᑎᕋᐅᑎᔅᓴᓂᒃ ᐊᒻᒪᓗ ᓴᓇᕝᕕᓂᒃ ᒪᒃᑯᒃᑐᓄᑦ ᑐᕌᖓᔪᓄᑦ ᐃᓱᐊᓈᕈᑎᔅᓴᖏᓐᓄᑦ.
  • ᐱᔪᒪᒐᓗᐊᖅᑐᑦ ᐱᕙᓪᓕᐊᓗᑎᒃ ᐊᔾᔨᒌᙱᑦᑐᒃᑯᑦ−ᐱᔾᔪᑎᖃᖅᑐᓂᒃ ᓄᓇᒋᔭᐅᔪᒥ ᓴᓇᕝᕕᓂᒃ, ᑭᓯᐊᓂ ᐱᕕᔅᓴᖃᙱᓗᐊᕐᓂᖏᑦ ᒐᕙᒪᒃᑯᓐᓂᑦ ᐃᑲᔫᓯᐊᓂᒃ ᑖᒃᑯᓄᖓ ᓄᑖᙳᑦᑎᑕᐅᔪᓐᓇᕐᓂᖏᑦ ᓴᓇᓯᒪᔪᓄᑦ ᐅᕝᕙᓗᓐᓃᑦ ᓄᖅᑲᖅᑎᑕᐅᓯᒪᔪᑦ ᐱᕙᓪᓕᐊᑕᐅᓯᒪᔪᓂᒃ.

ᓄᑖᓄᑦ ᐱᕙᓪᓕᐊᓂᖅ

  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐱᖃᕆᐊᖃᕐᓂᖏᑦ ᓄᑖᓂᒃ ᐱᕙᓪᓕᐊᓂᕐᒧᑦ ᓴᓇᓗᓂ ᓴᓇᕝᕕᔅᓴᓴᓂᒃ, ᐊᒻᒪᓗ ᐅᖃᐅᓯᖃᖅᑐᑎᒃ ᒐᕙᒪᒃᑯᑦ ᐋᖅᑭᒃᓯᒪᓂᖏᑦ ᐊᔪᕐᓇᙱᓐᓂᖅᓴᐅᔪᒃᑯᑦ ᐊᑑᑎᖃᓗᐊᙱᑦᑐᑦ ᓄᓇᓕᒻᒧᑦ ᐊᒻᒪᓗ ᓯᕗᓪᓕᐅᔭᕆᐊᖃᖅᑎᑕᐅᔪᓄᑦ.
  • ᐃᓚᒋᔭᐅᓚᐅᖅᑐᑦ ᐅᖃᓚᐅᖅᑐᑦ ᐱᔪᒪᓂᖏᑦ ᓄᓇᕕᒥᐅᑕᓄᑦ ᐱᕙᓪᓕᐊᓗᑎᒃ ᐃᒻᒥᒃᑯᑦ ᐅᐊᔭᒨᖅᑐᓂᒃ ᐱᕕᔅᓴᖃᖅᑎᑕᐅᙱᑦᑐᑦ ᕼᐊᐃᑐ−ᑯᐱᒃ (Hydro-Quebec)−ᑯᓐᓂᑦ ᓵᓚᒋᔭᐅᓪᓗᑎᒃ.
  • ᑭᒃᑯᑐᐃᓐᓇᐃᑦ−ᓇᒻᒥᓂᖃᖅᑐᑦ ᐃᑲᔪᖅᑎᒌᒃᑐᑦ ᐊᒻᒪᓗ ᐊᓯᖏᑦ ᓄᑖᓂᒃ ᐱᓇᓱᐊᖅᑐᑦ ᓴᓇᕝᕕᔅᓴᓄᑦ ᑮᓇᐅᔭᓂᒃ ᐃᑲᔫᑎᔅᓴᐃᑦ ᓄᑖᖑᙱᑦᑐᑦ ᓄᓇᕕᒥᐅᑕᓄᑦ.

ᐃᓕᖅᑯᓯᒃᑯᑦ ᓴᓇᕝᕕᒃ

  • ᐃᓕᖅᑯᓯᒃᑯᑦ ᓴᓇᕝᕕ ᓯᕗᓪᓕᐅᑎᑕᐅᓯᒪᔪᖅ. ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᒪᒧᑦ ᓅᑕᐅᔪᒪᓪᓗᑎᒃ ᐊᕙᑕᖅ ᐃᓕᖅᑯᓯᓕᕆᕝᕕᒃᑯᖏᑦ ᑲᑐᔾᔨᖃᑎᒌᖏᑦ ᐊᓪᓚᕝᕕᖏᑦ ᒪᓐᑐᕆᐊᒥᑦ ᓄᓇᕕᒻᒧᑦ.

ᑕᕆᐅᒥ ᓴᓇᕝᕖᑦ

  • ᐃᓚᒋᔭᐅᓚᐅᖅᑐᑦ ᐅᖃᓚᐅᖅᑐᑦ ᐱᕚᓪᓕᖅᓯᒪᔪᓂᒃ ᑐᓚᕝᕕᔅᓴᓂᒃ ᐅᒥᐊᕐᔪᐊᓄᑦ ᐊᒻᒪᓗ ᓯᑯᓂᒃ ᓯᖁᒥᑦᑎᓲᓂᒃ ᐅᒥᐊᕐᔪᓂᒃ ᐱᕚᓪᓕᖁᓪᓗᒋᑦ ᓄᓇᕕᐅᑉ ᓄᓇᖓᓄᑦ ᐅᒥᐊᕐᔪᐊᖅ ᑎᑭᖃᑦᑕᓕᖅᑎᓪᓗᒍ. ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐅᑭᐅᖅᑕᖅᑐᒥ ᓂᐅᕕᐊᔅᓴᐃᑦ ᑮᓇᐅᔭᓂᒃ ᐊᑭᓖᓂᖅᓴᐅᖃᑦᑕᕐᓂᖏᑦ ᑐᖅᑰᓯᕝᕕᒻᒧᑦ ᐅᒥᐊᕐᔪᐊᕐᓇᐅᙱᓕᖅᑎᓪᓗᒍ. ᐅᑭᐅᒧᑕᒫᑦ ᐊᑭᓖᙱᓐᓂᖅᓴᐅᓇᔭᖅᑐᑦ ᓂᐅᕕᖅᑎᓄᑦ.

ᓴᙱᔪᒥᒃ ᐅᑭᐅᖅᑕᖅᑐᒥ ᐃᓄᖏᑦ ᐊᒻᒪᓗ ᓄᓇᓖᑦ

ᑲᑎᖃᑎᒌᖕᓂᖅ ᐊᒻᒪᓗ ᐃᓅᖃᑎᒌᕙᓪᓕᐊᓂᖅ

  • ᐱᓕᕆᐊᕆᕙᓪᓕᐊᓂᖅ ᐅᖃᐅᔾᔪᖅᑕᐅᓯᒪᔪᒃᑯᑦ ᐅᐱᓐᓇᖅᑐᑦ ᐊᒻᒪᓗ ᑲᑎᕙᓪᓕᐊᓂᖅ ᑲᒥᓴᓐ (Truth and Reconciliation Commission)−ᑯᓐᓂᑦ ᐊᑑᑎᒋᔭᐅᒋᐊᖃᖅᑐᑦ ᐱᐊᓂᑦᑎᐊᖁᓪᓗᒍ ᑕᒪᓐᓇ.
  • ᑲᔪᓯᓂᖅ ᐊᐅᓚᑕᐅᔪᒧᑦ ᑕᕝᕙᐅᔪᖅ ᓱᓕ. ᐊᑕᐅᓯᖅ ᐃᓚᒋᔭᐅᓚᐅᖅᑐᖅ ᐃᑉᐱᒍᓱᓚᐅᖅᑐᖅ ᓄᓇᕕᒻᒥᐅᑕᐃᑦ ᐃᓄᖏᑦ ᐊᑲᐅᙱᑦᑐᒃᑯᑦ ᐃᑉᐱᒋᑎᑕᐅᓂᖏᓐᓄᑦ ᓄᓇᖃᖅᑳᖅᓯᒪᓂᒃᑯᑦ, ᐃᓚᖏᑦ ᐃᓐᓇᐃᑦ ᐃᓚᒋᓪᓗᒋᑦ. ᑖᓐᓇ ᐃᓚᒋᔭᐅᓚᐅᖅᑐᖅ ᐅᓂᒃᑳᓚᐅᖅᑐᖅ ᖃᓄᖅ ᑖᓐᓇ ᖃᓪᓗᓈᑦ ᒫᓂᕐᒥᐅᑕᙳᕆᐊᖅᑐᖅᓯᒪᓂᖏᓐᓂᙶᖅᑐᑦ ᐱᔪᓐᓇᐃᖅᑎᑦᑎᔪᓂᖓᓂᒃ ᐃᓚᒌᒍᓐᓇᕐᓂᒧᑦ ᒪᒃᑯᑐᒋᔭᐅᔪᓄᑦ ᓯᕗᓂᔅᓴᖏᓐᓄᑦ.

ᐃᓅᖃᑎᒌᒃᑐᓄᑦ ᐊᒃᓱᕈᕐᓇᖅᑐᑦ

  • ᓄᓇᓖᑦ ᐊᒃᓱᕈᖅᑐᑦ ᐱᕕᔅᓴᖃᙱᓗᐊᕐᓂᖏᓐᓄᑦ ᑐᐊᕕᕐᓇᖅᑐᖃᖅᑎᓪᓗᒍ ᓄᓇᒋᔭᐅᔪᒥ, ᐱᓗᐊᖅᑐᒥ ᓇᓗᓇᙱᑦᑐᒃᑯᑦ ᐃᒥᐊᓗᖃᑦᑕᖅᑐᓄᑦ ᐊᑲᐅᙱᓕᐅᕈᑕᐅᓯᒪᔪᑦ.
  • ᐃᒥᐊᓗᖃᑦᑕᖅᑐᓄᑦ−ᐃᓚᒌᑦᑐᑦ ᐊᒃᓱᕈᕐᓇᖅᑐᑦ ᐊᑲᐅᙱᑦᑐᒃᑯᑦ ᐱᕙᓪᓕᐊᓯᒪᔪᑦ ᐃᓄᐃᑦ ᓄᓇᖓᓂ, ᑕᑯᓗᒍ ᐊᓯᖏᓐᓂ ᓄᓇᓕᓐᓂ ᓄᓇᕕᒻᒥ. ᑕᒪᓐᓇ ᐱᕙᓪᓕᐊᔾᔪᑕᐅᔪᖅ ᐱᕋᔭᖕᓂᕐᒧᑦ ᓄᓇᕕᒥᐅᑕᓄᑦ ᐃᓄᖏᓐᓄᑦ ᐅᖃᖃᑎᒌᖕᓂᒃᑯᑦ ᐃᖅᑲᖅᑐᐃᔨᓕᕆᔨᒃᑯᓐᓄᑦ ᐋᖅᑭᒃᓯᒪᓂᖏᓐᓄᑦ ᐃᒥᐊᓗᖃᑦᑕᖅᑐᓄᑦ ᐱᑦᑎᐊᙱᑦᑐᓂᒃ.
  • ᐱᕋᔭᒃᓯᒪᔪᑦ ᑎᑎᕋᖅᑕᐅᓯᒪᔪᑦ ᐃᖅᑲᓇᐃᔮᔅᓴᖃᕈᓐᓇᙱᑦᑐᑦ.
  • ᐃᒻᒥᓃᖅᑐᑦ ᐅᓪᓗᑕᒫᑦ ᐃᓅᓯᕆᔭᐅᔪᑦ ᓄᓇᕕᒥᐅᑕᓄᑦ.
  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐃᓱᒫᓘᑎᒋᔭᒥᓐᓂᒃ ᐱᕕᔅᓴᖃᙱᓗᐊᕐᓂᖏᓐᓄᑦ ᐃᑲᔪᖅᑕᐅᓂᒃᑯᑦ ᒐᕙᒪᒃᑯᓐᓂᑦ ᓄᓇᒋᔭᐅᔪᒥ ᐊᖏᕐᕋᖃᕈᓐᓇᕐᓂᕐᒧᑦ ᐱᓕᕆᐊᔅᓴᓂᒃ.
  • ᐃᓚᒋᔭᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᐃᓄᐃᑦ ᓂᕿᒋᕙᒃᑕᖏᓐᓄᑦ ᐃᓄᐃᑦ ᐃᓕᖅᑯᓯᖏᓐᓂ, ᐊᒻᒪᓗ ᐊᑲᐅᙱᓕᐅᕈᑕᐅᔪᑦ ᐃᓄᐃᑦ ᓂᕿᖏᓐᓄᑦ ᐃᓚᖃᖅᑐᖅ ᐃᓅᑉ ᐃᓅᓯᖓᓄᑦ ᓄᓇᕕᒥᐅᑕᓄᑦ ᐃᓄᖏᓐᓄᑦ.
  • ᐃᓚᒋᔭᐅᓚᐅᖅᑐᑦ ᑐᒃᓯᕋᖅᑐᑦ ᐱᐊᓂᑦᑎᐊᕈᒪᓪᓗᑎᒃ ᐊᓯᕙᕐᓂᕐᒧᑦ ᐃᑲᔫᓯᐊᓂᒃ ᐱᓕᕆᐊᔅᓴᓄᑦ.

ᓴᙱᓂᖅᓴᒃᑯᑦ ᐅᖃᖃᑎᒌᖕᓂᒃᑯᑦ ᐊᒻᒪᓗ ᐊᑲᐅᓈᕐᓂᖅᓴᒃᑯᑦ ᐱᔪᒪᓂᖅ

  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐱᖃᕆᐊᖃᕐᓂᖏᑦ ᐅᖃᖃᑎᒌᒍᓐᓇᕐᓂᕐᒧᑦ ᒐᕙᒪᒃᑯᓐᓄᑦ ᑐᓴᖅᑎᑦᑎᓗᑎᒃ ᓯᓚᕐᔪᐊᒥ ᒐᕙᒪᐃᑦ ᐊᒃᓱᕈᕐᓇᕐᓂᖏᓐᓄᑦ ᐱᕙᓪᓕᐊᓯᒪᔪᑦ ᐱᔨᑦᑎᕋᐅᑎᔅᓴᓄᑦ ᐆᑦᑑᑎᒋᓗᒍ ᐋᓐᓂᐊᖅᑕᐃᓕᒪᓂᕐᒧᑦ.
  • ᐃᓚᒋᔭᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᐊᒃᓱᕈᕐᓇᖅᑑᖃᑦᑕᕐᓂᖏᑦ ᐱᕕᔅᓴᐅᔪᓐᓇᖅᑐᓂᒃ ᒐᕙᒪᕐᔪᐊᒃᑯᓐᓂᑦ ᑮᓇᐅᔭᓂᒃ ᐃᑲᔫᓯᐊᓂᒃ, ᐃᓚᒋᓗᒋᑦ ᐊᑲᐅᙱᑦᑐᒃᑯᑦ ᑐᒃᓯᕋᐅᑎᔅᓴᓂᒃ ᑎᑎᕋᕐᕕᔅᓴᓂᒃ ᒪᓕᒃᑕᐅᔭᕆᐊᖃᖅᑐᓂᒃ. ᐃᓚᒋᔭᐅᓚᐅᖅᑐᑦ ᐃᓱᒫᓘᑎᑕᖃᓚᐅᖅᑐᑦ ᑮᓇᐅᔭᐃᑦ ᐃᑲᔫᑎᔅᓴᐃᑦ ᓄᖑᑐᐃᓐᓇᖅᑐᑦ ᐱᓕᕆᐊᕆᔭᐅᑎᓪᓗᒋᑦ ᐊᔾᔨᒌᙱᑦᑐᒃᑯᑦ ᒐᕙᒪᒃᑯᓐᓄᑦ ᑐᓂᔭᐅᖅᑳᖅᑎᓐᓇᒋᑦ ᓄᓇᓕᓐᓄᑦ ᐱᖃᕆᐊᖃᖅᑕᕋᓗᐊᖏᓐᓄᑦ.
  • ᑕᒪᕐᒥᑲᓴᒃ ᓄᓇᕕᐅᑉ ᑲᑐᔾᔨᖃᑎᒌᖏᑦ ᑐᓂᔭᐅᓲᑦ ᑮᓇᐅᔭᓂᒃ ᐃᑲᔫᓯᐊᓂᒃ ᒐᕙᒪᕐᔪᐊᒃᑯᓐᓂᑦ ᐊᒻᒪᓗ ᓄᓇᓕᓐᓂᑦ ᒐᕙᒪᒃᑯᓐᓂᑦ, ᑭᓯᐊᓂ ᐊᒥᓲᙱᑦᑐᑦ ᐃᑲᔪᖅᑎᒌᑦ ᐅᖃᖃᑎᒌᔪᓐᓇᕐᓗᑎᒃ ᐊᒻᒪᓗ ᐋᖅᑭᒃᓯᕙᓪᓕᐊᓗᑎᒃ ᐊᒃᓱᕈᕐᓇᖅᑐᓂᒃ.

ᓇᓗᓇᐃᔭᐃᓂᖅ ᐱᕙᓪᓕᐊᓂᕐᒧᑦ ᐃᓐᓇᕐᓄᑦ ᐊᒻᒪᓗ ᒪᒃᑯᒃᑐᓄᑦ

  • ᐃᑲᔪᕐᓗᒋᑦ ᐅᑭᐅᖅᑕᖅᑐᒥᐅᑕᐃᑦ ᐃᓄᖏᑦ, ᓇᓗᓇᐃᔭᖅᓯᒪᔭᕆᐊᖃᖅᑐᑦ ᐃᑲᔫᓯᐊᓂᒃ ᐃᓕᑕᕐᓇᖅᑐᓂᒃ ᐱᔭᐅᔭᕆᐊᖃᖅᑐᓂᒃ, ᐆᑦᑑᑎᒋᓗᒍ ᒪᒃᑯᒃᑐᑦ ᐊᒻᒪᓗ ᐃᓇᐃᑦ.
  • ᐃᓚᒋᔭᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᐃᑲᔪᖅᑕᐅᔪᒪᓪᓗᑎᒃ ᐃᓐᓇᕐᓂᑦ. ᐃᓐᓇᐃᑦ ᒥᐊᓂᕇᓐᓇᓲᑦ ᓄᑕᖅᑲᓂᒃ ᐊᒻᒪᓗ ᐃᓚᒌᒃᑐᓂᒃ ᑲᑎᙵᑎᑦᑎᓲᑦ. ᐃᓐᓇᐃᑦ ᓇᓗᓇᐃᒃᑯᑕᕆᔭᐅᔪᑦ ᐃᓕᖅᑯᓯᕆᔭᐅᔪᒃᑯᑦ ᐃᓅᓯᒥ, ᐃᓚᒋᓗᒍ ᐊᓯᕙᕐᓂᕐᒧᑦ. ᑭᓯᐊᓂ, ᐃᓐᓇᐃᑦ ᓄᖑᕙᓪᓕᐊᓕᖅᑐᑦ. ᒥᑭᔪᒃᑯᑦ ᑭᒡᓕᖃᖅᑎᑕᐅᔪᒃᑯᑦ ᐃᑲᔫᓯᐊᖅᑖᓲᑦ ᒐᕙᒪᒃᑯᓐᓂᑦ, ᐊᒻᒪᓗ ᐃᓚᐃᓐᓇᒍᑦ ᐱᑦᑎᐊᖅᑕᐅᖃᑦᑕᙱᑦᑐᑦ ᐃᓐᓇᐃᑦ.

ᐃᓕᓐᓂᐊᕐᓂᖅ

  • ᓇᓗᓇᐃᖅᑕᐅᓯᒪᔪᖅ ᒥᐊᕆ ᓴᐃᒪᓐᒥᑦ ᐅᓂᒃᑳᓕᐊᖏᓐᓂᑦ, ᐃᓕᓐᓂᐊᕐᓂᖅ ᕿᑎᒋᔭᐅᔪᖅ ᑭᐅᔾᔪᑕᐅᖃᑦᑕᖅᑐᖅ ᐃᓅᖃᑎᒌᖕᓂᕐᒧᑦ ᐊᒃᓱᕈᕐᓇᖅᑐᓂᒃ. ᐃᓚᒋᔭᐅᓚᐅᖅᑐᑦ ᐅᖃᓚᐅᖅᑐᑦ ᒐᕙᒪᕐᔪᐊᒃᑯᑦ ᐊᖏᔪᒃᑯᑦ ᑕᐅᑦᑐᒍᒥᑕᐅᔪᑦ ᑖᔅᓱᒧᖓ ᐱᓕᕆᐊᔅᓴᕆᔭᐅᔪᒧᑦ ᐃᑲᔪᖅᑕᐅᓗᑎᒃ ᐃᓅᖃᑎᒌᒃᑐᓂᒃ ᐱᓕᕆᐊᔅᓴᖏᓐᓄᑦ, ᐊᔪᙱᔾᔪᑎᔅᓴᖏᓐᓄᑦ ᐊᒻᒪᓗ ᐃᓕᓐᓂᐊᖅᐸᓪᓕᐊᓕᓵᖅᑐᓄᑦ.

ᐅᖃᐅᓰᑦ ᐊᒻᒪᓗ ᐃᓕᖅᑯᓰᑦ

  • ᐃᓚᒋᔭᐅᓚᐅᖅᑐᑦ ᓇᓗᓇᐃᔭᖅᓯᒪᔪᑦ ᐃᓱᒫᓘᑎᒋᔭᐅᔪᓂᒃ ᓄᖑᑉᐸᓪᓕᐊᓂᖓ ᐃᓄᐃᑦ ᐅᖃᐅᓯᖏᓐᓂᒃ ᐊᒻᒪᓗ ᐃᓕᖅᑯᓯᖏᓐᓂᒃ ᓄᓇᒋᔭᐅᔪᒥ.
  • ᑲᓛᖦᖡᑦ ᐱᐊᓂᑦᑎᐊᖅᓯᒪᔪᑦ ᐱᕙᓪᓕᐊᓂᕐᒧᑦ ᓴᓇᙳᐊᕐᓂᕐᒧᑦ ᐊᒻᒪᓗ ᑐᓴᕐᓈᕈᑎᓄᑦ ᐃᓕᓐᓂᐊᕈᑎᔅᓴᖏᓐᓂᒃ, ᐃᑲᔫᑕᐅᓯᒪᔪᖅ ᐃᓄᐃᑦ ᐃᓕᖅᑯᓯᖏᓐᓄᑦ ᑲᓛᖦᖡᑦ ᓄᓇᖓᓂ.
  • ᐃᓚᒋᔭᐅᓚᐅᖅᑐᑦ ᓇᓗᓇᐃᔭᖅᓯᒪᔪᑦ ᐊᒃᓱᕈᕐᓇᖅᑐᓂᒃ ᓄᓇᕕᒥᐅᑕᓄᑦ ᐃᑲᔫᓯᐊᓂᒃ ᑮᓇᐅᔭᒃᑯᑦ ᐃᑲᔪᖅᑕᐅᒍᓐᓇᖁᓪᓗᒋᑦ ᐅᖃᐅᓯᖏᑎᒍᑦ ᐊᒻᒪᓗ ᐃᓕᖅᑯᓯᖏᑎᒍᑦ.
  • ᐃᓚᒋᔭᐅᓚᐅᖅᑐᑦ ᐅᖃᓚᐅᖅᑐᑦ ᐅᑎᖅᑎᒋᐊᕐᓗᒋᑦ ᐊᖏᔪᒃᑯᑦ ᐊᒥᓱᐃᑦ ᐃᓕᖅᑯᓯᕆᔭᐅᔪᑦ ᐱᖁᑎᖏᓐᓂᒃ ᐱᓯᒪᔭᐅᔪᑦ ᐊᒥᓱᓂᑦ ᑕᑯᕋᓐᓈᒐᖃᕐᕕᓐᓂ ᓯᓚᕐᔪᐊᒥ. ᐱᕕᔅᓴᖃᙱᓗᐊᕐᓂᖏᓐᓄᑦ ᐊᑐᐃᓐᓇᐅᔪᓐᓇᖅᑐᓂᒃ, ᓄᓇᕕᐅᑉ ᐃᓄᖏᑦ ᐱᕕᔅᓴᖃᙱᑦᑐᑦ ᓴᓇᒍᓐᓇᕐᓗᑎᒃ ᑐᖅᑰᓯᕝᕕᒥᒃ ᑖᒃᑯᓄᖓ ᐃᑦᑕᕐᓂᑕᐃᑦ ᐱᖁᑎᒋᔭᐅᔪᓂᒃ.

ᓴᙱᔪᒃᑯᑦ, ᐊᑲᐅᓈᖅᑐᒃᑯᑦ ᐊᒻᒪᓗ ᐊᒥᓱᒃᑯᑦ ᐃᑲᔪᖅᑎᒌᒃᑐᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑕᐅᕙᒃᑐᓂᒃ

ᐃᓄᐃᑦ ᐊᐅᓚᑦᑎᔩ ᓄᓇᒋᔭᐅᔪᒥ ᑮᓇᐅᔭᓕᐅᖅᑕᐅᔪᒃᑯᑦ

  • ᐃᓚᒋᔭᐅᓚᐅᖅᑐᑦ ᓇᓗᓇᐃᔭᓚᐅᖅᑐᑦ ᐊᒃᓱᕈᕐᓇᕐᓂᖓ ᐊᑲᐅᙱᓕᐅᕈᑕᐅᔪᓄᑦ ᓄᓇᑖᖅᓯᒪᔪᑦ ᐊᖏᕈᑕᐅᔪᒃᑯᑦ ᐊᑎᖏᓐᓂᒃ ᑐᓂᓯᔭᕌᖓᑕ ᖃᓪᓗᓈᑦ ᓄᓇᖓᓐᓄᑦ ᓇᒻᒥᓂᖃᖅᑐᓄᑦ ᐊᐅᓚᑎᑦᑎᐅᔪᑦ ᓄᓇᒋᔭᐅᔪᒧᑦ, ᓇᒻᒥᓂᓖᑦ ᐱᖃᕐᓂᕋᐃᓲᓂᖏᑦ "ᓄᓇᖃᖅᑳᖅᓯᒪᔪᑦ"/ᓄᓇᒋᔭᒥ ᓇᒻᒥᓂᖏᓐᓂ.
  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐱᒻᒪᕆᐅᓂᖓ ᐃᓄᐃᑦ ᐃᓚᒋᔭᐅᓗᑎᒃ ᑮᓇᐅᔭᓕᐅᕐᓂᕆᔭᐅᔪᒃᑯᑦ ᐱᕙᓪᓕᐊᓂᖅ ᓄᓇᕕᐅᑉ ᓄᓇᖓᓂ, ᐃᓚᒋᓗᒋᑦ ᐃᓄᐃᑦ ᐊᐅᓚᑎᑦᑎᓗᑎᒃ ᐅᔭᕋᖕᓂᐊᕐᕕᓄᑦ ᕿᒥᕐᕈᐊᖅᑐᓂᒃ ᐊᒻᒪᓗ ᐱᕙᓪᓕᐊᔪᓂᒃ.
  • ᐃᓚᒋᔭᐅᓚᐅᖅᑐᑦ ᐃᑉᐱᒋᔭᖃᓚᐅᖅᑐᑦ ᐊᒥᓲᒋᐊᒃᑲᓐᓂᕐᓗᒋᑦ ᐃᖅᑲᓇᐃᔮᔅᓴᐃᑦ ᓯᕗᓪᓕᐅᑎᑕᐅᓗᑎᒃ ᐃᓄᖕᓄᑦ.

ᑮᓇᐅᔭᓕᐅᕐᓂᕆᔭᐅᔪᑦ ᐱᖃᙱᓗᐊᕐᓂᖏᑦ

  • ᐃᓚᒋᔭᐅᓚᐅᖅᑐᑦ ᐃᓱᒫᓘᑎᖃᓚᐅᖅᑐᑦ ᑕᐃᒪᐅᑐᐃᓐᓇᕆᐊᖃᖅᑐᓂᒃ ᐅᑭᐅᖅᑕᖅᑐᒥ ᓄᓇᓂᙶᖅᑐᓂᒃ ᐊᐅᓪᓚᖅᑎᑕᐅᖃᑦᑕᕐᓂᖏᑦ ᐊᓯᐊᓄᑦ ᓄᓇᒧᑦ ᑮᓇᐅᔭᓕᐅᓗᐊᙱᓪᓗᑎᒃ ᐃᑲᔫᓯᐊᓂᒃ ᐅᑭᐅᖅᑕᖅᑐᒥᐅᑕᓄᑦ. ᑕᒪᒃᑯᐊ ᐊᔾᔨᒌᙱᑦᑐᑦ "ᑮᓇᐅᔭᓕᐅᕐᓂᕆᔭᐅᔪᑦ ᐱᖃᙱᓐᓂᖓ" ᐊᖏᓪᓕᑐᐃᓐᓇᖅᑐᑦ ᓇᒻᒥᓂᕆᔭᐅᔪᓄᑦ, ᑭᓯᐊᓂ ᑮᓇᐅᔭᓕᐅᖅᑕᐅᕙᒃᑐᓄᑦ ᐊᓯᖏᓐᓂ ᓄᓇᒋᔭᐅᔪᒥ ᐊᒻᒪᓗ ᓄᓇᖃᖅᑐᑦ ᐊᐅᓪᓛᕆᐊᖃᑦᑕᕐᓂᖏᑦ ᖃᓪᓗᓈᑦ ᓄᓇᖓᓄᑦ ᐋᓐᓂᐊᕐᕕᖏᓐᓄᑦ. ᐃᓚᖏᑦ ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᓄᓇᒋᔭᐅᔪᒥ ᐋᓐᓂᐊᕐᕖᑦ ᓄᓇᒋᔭᐅᔪᒦᓪᓗᑎᒃ ᐃᑲᔫᑎᖃᕋᔭᖅᑐᑦ ᐊᑐᐃᓐᓇᐅᔪᓐᓇᖅᑐᓂᒃ.
  • ᐃᓚᒋᔭᐅᓚᐅᖅᑐᑦ ᐅᖃᓚᐅᖅᑐᑦ ᑮᓇᐅᔭᓕᐅᕐᓂᕆᔭᐅᔪᑦ ᐱᖃᕈᓐᓃᕐᓂᖏᑦ ᐱᔾᔪᑕᐅᔪᖅ ᑭᒃᑯᑐᐃᓐᓇᓄᑦ ᐊᒻᒪᓗ ᓇᒻᒥᓂᖃᓄᖅᑐᓄᑦ, ᕿᓄᓪᓗᑎᒃ ᐋᖅᑭᒃᓯᒪᔪᓂᒃ ᐃᖏᕐᕋᐅᑎᔅᓴᓂᒃ ᐃᑳᔪᓯᐊᓂᒃ ᐱᓕᕆᐊᔅᓴᓄᑦ ᐆᑦᑑᑎᒋᓗᒍ ᓇᓪᓕᐅᒃᑯᒫᖁᑎᖃᙱᑦᑐᑦ ᐋᓐᓂᐊᖅᑕᐃᓕᒪᓂᕐᒧᑦ ᐃᑲᔫᓯᐊᓂᒃ ᐱᓕᕆᐊᔅᓴᓂᒃ ᐱᕚᓪᓕᕈᑕᐅᔪᑦ ᖃᓪᓗᓈᑦ ᓄᓇᖓᓂ ᐋᓐᓂᐊᖅᑕᐃᓕᒪᓂᕐᒧᑦ ᐱᔨᑦᑎᕋᐅᑎᔅᓴᓄᒃ ᐃᑲᔪᙱᖔᕐᓗᑎᒃ ᐱᕙᓪᓕᐊᓗᑎᒃ ᐋᓐᓂᐊᖅᑕᐃᓕᒪᓂᕐᒧᑦ ᐱᔨᑦᑎᕋᐅᑎᔅᓴᓄᑦ ᐅᑭᐅᖅᑕᖅᑐᒥ.

ᓴᓇᕝᕕᔅᓴᐃᑦ

  • ᐃᓚᒋᔭᐅᓚᐅᖅᑐᑦ ᓇᓗᓇᐃᔭᓚᐅᖅᑐᑦ ᖃᓄᖅ ᓄᓇᕕᒃ ᑕᑯᔪᓐᓇᕐᓂᖏᑦ ᐊᒥᓱᐃᑦ ᖃᓪᓗᓈᑦ ᓄᓇᖓᓐᓂᖔᖅᑐᓂᒃ ᐃᖅᑲᓇᐃᔮᕆᐊᖅᑐᖅᑐᑎᒃ ᓄᓇᒋᔭᐅᔪᒧᑦ ᐅᑭᐅᑦ ᖄᖏᖅᓯᒪᓕᖅᑐᓂᒃ ᐃᓕᓐᓂᐊᖅᓯᒪᔪᓄᑦ ᐊᒻᒪᓗ ᐊᔪᙱᔾᔪᑎᔅᓴᖏᓐᓄᑦ ᐱᔾᔪᑎᒋᓪᓗᒋᑦ ᐃᖅᑲᓇᐃᔮᔅᓴᓄᑦ, ᐊᒻᒪᓗ ᐅᖃᓚᐅᖅᑐᑦ ᓄᓇᕕᒥᐅᑕᐃᑦ ᐃᓄᖏᑦ ᐱᔪᓐᓇᖃᕐᕕᐅᔪᓐᓇᖁᓪᓗᒋᑦ ᑖᒃᑯᓄᖓ ᐃᖅᑲᓇᐃᔮᔅᓴᓄᑦ ᓇᒻᒥᓂᖅ ᓄᓇᒋᔭᖏᓐᓂ. ᐱᕚᓪᓕᖅᓯᒪᔪᒃᑯᑦ ᐃᑲᔪᖅᑕᐅᓂᖅ ᐃᓕᓐᓂᐊᕈᑎᔅᓴᓄᕐ ᐊᒻᒪᓗ ᐊᔪᙱᔾᔪᑎᔅᓴᓄᑦ ᐱᕙᓪᓕᐊᓂᖅ ᐱᕙᓪᓕᐊᔾᔪᑕᐅᔪᓐᓇᖅᑐᑦ ᑖᔅᓱᒧᖓ.
  • ᐃᓚᒋᔭᐅᓚᐅᖅᑐᑦ ᐃᑉᐱᒍᓱᓚᐅᖅᑐᑦ ᐱᔪᒪᔭᖏᓐᓄᑦ ᑕᑯᓗᑎᒃ ᐃᑲᔪᖅᑕᐅᓗᑎᒃ ᐃᓕᓐᓂᐊᖅᑎᑕᐅᔪᓐᓇᕐᓂᕐᒧᑦ ᐃᓱᐊᓈᕈᑎᔅᓴᓂᒃ ᒪᒃᑯᒃᑐᓄᑦ ᓇᒻᒥᓂᖃᖅᑐᓂᒃ ᓄᓇᒋᔭᐅᔪᒥᑦ.
  • ᐊᑕᐅᓯᖅ ᐃᓚᒋᔭᐅᓚᐅᖅᑐᖅ ᐅᖃᐅᓯᖃᓚᐅᖅᑐᖅ ᖃᓄᖅ ᐃᓄᐃᑦ ᐊᑦᓱᙱᖅᑕᐅᓯᒪᔪᑦ ᐅᑎᓲᑦ ᓄᓇᒋᔭᐅᔪᒧᑦ ᐃᓕᓐᓂᐊᖅᓯᒪᑦᑎᐊᖅᑐᑦ ᓴᓇᓂᕐᒧᑦ. ᐅᖃᖅᑎᓪᓗᒍ, "ᐃᓄᐃᑦ ᐊᔪᙱᑦᑐᑦ ᐱᓕᕆᓗᑎᒃ ᐊᒡᒐᒥᑎᒍᑦ. ᐊᑐᐃᓐᓇᐅᔪᓐᓇᖅᑕᕗᑦ ᐃᓱᐊᓈᕐᕕᔅᓴᐃᑦ ᐊᑦᓱᙱᕐᕕᒻᒧᐊᖅᑕᐅᖄᖅᑎᓐᓇᒋᑦ.

ᓄᑖᓂᒃ ᐃᓱᒪᔅᓴᖅᓯᐅᕐᓂᖅ

  • ᐅᑭᐅᖅᑕᖅᑐᒥᐅᑕᐃᑦ ᓂᐅᕖᓐᓇᖃᐃᓐᓇᓲᑦ ᐃᖏᕐᕋᕈᑎᔅᓴᖏᓐᓂᒃ ᐊᒻᒪᓗ ᐱᖁᑎᓂᒃ ᖃᓪᓗᓈᑦ ᓄᓇᖓᓐᓂᑦ ᐊᑲᐅᙱᑦᑐᑦ ᐅᑭᐅᖅᑕᖅᑑᑉ ᓯᓚᖓᓄᑦ. ᐱᕙᓪᓕᐊᓗᓂ ᓄᑖᓂᒃ ᓴᓇᕝᕕᓂᒃ ᓄᓇᒋᔭᐅᔪᒥ ᐱᐅᓂᖅᓴᐅᓇᔭᖅᑐᖅ ᓯᓚᕐᔪᐊᒥ ᓄᓇᒋᔭᐅᔪᓂᑦ ᓇᒻᒥᓂᖃᖅᑐᓄᑦ ᐱᕙᓪᓕᐊᓗᑎᒃ ᐊᒻᒪᓗ ᖃᐅᔨᓴᕐᓗᑎᒃ ᐅᑭᐅᖅᑕᖅᑐᒥ/ᐃᒃᑮᕐᓇᖅᑐᒥ ᐊᑐᖅᑕᐅᔪᓐᓇᖅᑐᓂᒃ.

ᐃᓱᒪᔅᓴᖅᓯᐅᕐᓂᖅ/ᐃᓕᖅᑯᓯᒃᑯᑦ ᓇᒻᒥᓂᖃᕐᓂᕐᒧᑦ ᐱᔪᓐᓇᐅᑏᑦ

  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐱᔪᒪᔭᖏᓐᓂᒃ ᑲᑎᖅᓱᐃᔪᓐᓇᕐᓂᖅ ᐃᓱᒪᔅᓴᖅᓯᐅᕈᓐᓇᕐᓂᖅ/ᐃᓕᖅᑯᓯᒃᑯᑦ ᓇᒻᒥᓂᖃᖅᑐᓂᒃ ᐱᔪᓐᓇᐅᑎᔅᓴᓂᒃ, ᐃᓄᖕᓄᑦ ᐃᑲᔫᑎᖃᕈᓐᓇᖅᑐᓂᒃ ᐊᑐᕐᓗᑎᒃ ᐃᓕᖅᑯᓯᖏᓐᓂᒃ ᓇᓗᓇᐃᒃᑯᑕᓂᒃ ᐆᑦᑑᑎᒋᓗᒍ ᐃᒡᓗ ᐊᒻᒪᓗ ᐃᓄᒃᓱᒃ.
  • ᐃᓚᒋᔭᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᐊᔾᔨᒌᙱᑦᑐᓂᒃ ᐃᓕᖅᑯᓯᒃᑯᑦ ᐊᑐᐃᓐᓇᐅᓲᖏᓐᓂᒃ ᐃᓄᐃᑦ ᐃᓕᖅᑯᓯᖏᓐᓂᑦ ᐃᑲᔪᖅᑕᐅᙱᓪᓗᑎᒃ ᖃᓄᑐᐃᓐᓇᖅ, ᐆᑦᑑᑎᒋᓗᒋᑦ, ᓱᓇᐅᙱᑦᑐᑦ, ᓴᓇᙳᐊᖅᑕᐅᓯᒪᔪᑦ ᐃᓄᕐᓱᐃᑦ ᓴᖅᑭᑎᑕᐅᔪᑦ ᐊᒻᒪᓗ ᓂᐅᕕᖅᑕᐅᓲᑦ ᑲᓇᑕᓕᒫᒥ.

ᐃᓕᖅᑯᓯᒃᑯᑦ ᐊᒻᒪᓗ ᐳᓛᖃᑦᑕᖅᑐᓄᑦ ᐃᓱᐊᓈᕐᕕᔅᓴᐃᑦ

  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᓄᓇᖃᖅᑳᖅᓯᒪᔪᑦ ᓴᓇᙳᐊᖅᑏᑦ ᐊᒻᒪᓗ ᓇᒻᒥᓂᖃᖅᑐᑦ ᐃᑲᔪᖅᑕᐅᔪᓐᓇᖅᑐᑦ ᐱᕚᓪᓕᖅᓯᒪᔪᒃᑯᑦ ᐱᔪᓐᓇᐅᑎᔅᓴᓂᒃ ᑕᐅᒃᓰᖃᑦᑕᕐᓂᕐᒧᑦ ᐊᒻᒪᓗ ᓯᓚᕐᔪᐊᒥ ᓂᐅᕕᐊᔅᓴᖃᕐᓂᒃᑯᑦ. ᐅᖃᐅᓯᕆᔭᐅᓚᐅᖅᑐᖅ, ᑭᓯᐊᓂ, ᐱᕕᔅᓴᖃᑦᑎᐊᙱᓐᓂᖓᓄᑦ ᑐᓴᒐᔅᓴᒃᑯᑦ ᓄᓇᒋᔭᐅᔪᒥᑦ ᓴᓇᙳᐊᖅᑎᓂᑦ ᐊᒻᒪᓗ ᓴᓇᔨᓄᑦ ᑐᓴᖅᑕᐅᓗᑎᒃ ᓯᓚᕐᔪᐊᒧᑦ ᓂᐅᕕᕐᕕᓐᓄᑦ.
  • ᐃᓄᐃᑦ ᐃᓕᖅᑯᓯᖏᑦ ᐊᒻᒪᓗ ᐅᐸᖃᑦᑕᖅᑐᑦ ᐊᑐᐃᓐᓇᐅᔪᓐᓇᖅᑐᑦ ᐱᕈᖅᐸᓪᓕᐊᓂᕐᒧᑦ, ᑭᓯᐊᓂ ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᒪᔪᑦ ᐊᒥᓲᓂᖏᓐᓄᑦ ᐅᐸᒃᓯᒪᔪᓄᑦ ᓄᓇᒋᔭᐅᔪᒧᑦ ᐊᑲᐅᓈᕆᐊᕈᓐᓇᕐᓗᒋᑦ.
  • ᓄᓇᕕᒻᒥ−ᑐᙵᕝᕕᒋᓗᒍ ᐃᓕᖅᑯᓯᓕᕆᕝᕕᒻᒥᒃ ᑕᑯᔭᐅᔪᒥᓇᖅᑐᖅ ᐅᐸᖃᑦᑕᖅᑐᓄᑦ, ᐊᒻᒪᓗ ᐅᖃᐅᓯᕆᒃᑲᓐᓕᕐᒋᑦ ᐃᑦᑕᕐᓂᑕᐃᑦ ᐱᖁᑏᑦ ᐅᑎᖅᑎᑕᐅᓗᑎᒃ ᓄᓇᕕᒻᒧᑦ ᓯᓚᕐᔪᐊᒥ ᑕᑯᒐᓐᓈᒐᖃᕐᕕᖏᓐᓃᑦᑐᓂᒃ.
  • ᐆᑦᑑᑎᒋᓗᒍ ᐃᓄᐃᑦ ᑏᖏᑦ ᐊᕙᑕᖅ ᐃᓕᖅᑯᓯᓕᕆᔨᒃᑯᓐᓂᒃ ᐊᒻᒪᓗ ᑕᑯᔅᓴᐅᔪᑦ ᑲᓇᑕᐅᑉ ᐃᓪᓗᖓᓂ ᔪᓇᐃᑎᑦ ᑭᖕᑕᒻᒥ ᓇᓗᓇᐃᔭᖁᔭᐅᓪᓗᑎᒃ ᖃᓄᖅ ᐃᓄᐃᑦ ᐃᓕᖅᑯᓯᖏᑦ ᐱᐊᓂᑦᑎᐊᕈᓐᓇᕐᓂᖏᑦ ᐊᑐᖅᑕᐅᓲᖏᑦ ᑕᑯᕋᓐᓈᖅᑎᑦᑎᓪᓗᑎᒃ ᑲᓇᑕᒥᑦ ᓯᓚᕐᔪᐊᒧᑦ.

ᐅᑭᐅᖅᑕᖅᑐᒥ ᓱᓇᒃᑯᑖᓂᒃ ᖃᐅᔨᓴᕐᓂᖅ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᑎᒍᑦ/ᓴᐳᒻᒥᓂᖅ ᐊᕙᑎᒧᑦ ᐊᒻᒪᓗ ᐱᓯᒪᑦᑎᓂᖅ ᐅᑭᐅᖅᑕᖅᑐᒥ ᐆᒪᔪᓄᑦ

ᐅᐊᔭᒨᖅᑐᑦ

  • ᒪᑭᕕᒃ ᑯᐊᐳᕆᔅᓴᓐᑯᑦ ᐊᒻᒪᓗ ᐊᓯᖏᑦ ᑲᑐᔾᔨᖃᑎᒌᖑᔪᑦ ᓄᓇᕕᐅᑉ ᓄᓇᖓᓂ ᐱᓕᒻᒪᒃᓴᖅᓯᒪᔪᑦ ᕿᒥᕐᕈᐊᓗᑎᒃ ᐊᑐᖅᑕᐅᔪᓐᓇᖅᑐᓂᒃ ᐅᖅᓱᐊᓗᒻᒧᑦ. ᐊᓯᙳᖅᐸᓪᓕᐊᓗᒋᑦ ᓄᓇᕕᐅᑉ ᓄᓇᖏᑦ ᐱᕈᖅᓯᐊᓂᒃ ᐊᑐᕐᓂᖅᓴᐅᓗᑎᒃ ᐱᓕᕆᖃᑎᒌᓪᓗᑎᒃ ᐊᔾᔨᒌᙱᑦᑐᒃᑯᑦ ᒐᕙᒪᓂᒃ ᓇᓗᓇᐃᖅᓯᓗᑎᒃ ᐱᔪᓐᓇᐅᑎᔅᓴᓄᑦ ᐋᖅᑭᒃᓯᒪᔪᓂᒃ ᐅᑭᐅᖅᑕᖅᑐᒧᑦ ᐊᕙᑎᖓᓄᑦ.
  • ᐃᓚᒋᔭᐅᓚᐅᖅᑐᑦ ᐅᖃᓚᐅᖅᑐᑦ ᐃᓱᐊᓈᕐᕕᔅᓴᖃᕐᓂᖓ ᓄᓇᕕᐅᑉ ᐃᓄᖏᓐᓄᑦ ᓂᐅᕕᐊᔅᓴᖃᕐᓗᑎᒃ ᐅᐊᔭᒨᖅᑐᓂᒃ ᕼᐊᐃᑐ−ᑯᐱᒃᒧᑦ.

ᐅᑭᐅᖅᑕᖅᑐᒥ ᓱᓇᒃᑯᑖᓂᒃ ᖃᐅᔨᓴᕐᓂᖅ ᐃᓕᓐᓂᐊᕐᕖᒃ ᐊᒻᒪᓗ ᖃᕋᓴᐅᔭᓕᕆᓂᖅ

  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐱᒻᒪᕆᐅᔪᒃᑯᑦ ᐱᓕᕆᐊᕆᔭᐅᔪᑦ ᓄᓇᕕᐅᑉ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ, ᓴᖅᑭᑎᑕᐅᓗᑎᒃ ᐊᒻᒪᓗ ᐃᑲᔪᖅᑕᐅᓪᓗᑎᒃ ᒪᑭᕕᒃ ᑯᐊᐳᕆᓴᓐᑯᖏᓐᓂᑦ.
  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᒪᔪᑦ ᐃᓱᒫᓘᑎᒋᔭᖏᓐᓂᒃ ᓄᑖᒧᑦ ᓯᓚᑦᑐᖅᓴᕐᕕᒃ ᓄᐊᑎᒃ ᑯᐱᒃᒥᑦ ᐃᑲᔪᑦᑎᐊᖅᓯᒪᖏᓐᓂᖏᑦ ᐃᑲᔪᖅᑎᒌᖕᓂᕐᒧᑦ ᓄᓇᒋᔭᐅᔪᒥ ᐊᐅᓇᑦᑎᓂᕐᒧᑦ, ᐊᒻᒪᓗ ᐃᓱᒫᓘᑎᖃᖅᑐᓂᒃ ᓴᖅᑭᑎᑕᐅᕙᓪᓕᐊᓂᖓᓄᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐱᔭᐅᔪᒪᔪᑦ ᑯᐱᒃ ᑐᓄᕕᐊᓄᑦ ᓯᓚᑖᓂᑦ ᑐᙵᕝᕕᒋᔭᐅᔪᒥᑦ.
  • ᐃᓚᒋᔭᐅᓚᐅᖅᑐᑦ ᐱᔪᒪᔪᑦ ᐱᕚᓪᓕᖅᓯᒪᔪᓂᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐃᓅᖃᑎᒌᒃᑐᒃᑯᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐃᑲᔪᕐᓗᑎᒃ ᓄᓇᒋᔭᐅᔪᓂᒃ ᐱᕙᓪᓕᐊᒐᓱᐊᖅᑐᓂᒃ ᐃᓅᖃᑎᒌᑦᑎᐊᕐᓂᕐᒧᑦ ᐊᒃᓱᕈᖅᑐᓂᒃ.
  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᒪᔪᑦ ᐱᒻᒪᕆᐅᓂᖓ ᓴᓇᓗᑎᒃ ᓄᓇᒋᔭᐅᔪᒥ ᐊᑐᐃᓐᓇᐅᔪᓐᓇᖅᑐᓂᒃ, ᐊᒻᒪᓗ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑐᓴᒐᔅᓴᓂᒃ ᐃᓚᒋᔭᖃᖅᑐᓂᒃ ᐅᑭᐅᖅᑕᖅᑐᒥ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ, ᐆᑦᑑᑎᒋᓗᒍ ArcticNet, ᐊᑲᐅᓈᕐᓂᖅᓴᐅᔪᑦ ᓄᓇᖃᖅᑐᓄᑦ.

ᓄᓇᓖᑦ ᐊᒻᒪᓗ ᓱᓇᒃᑯᑖᓂᒃ ᖃᐅᔨᓴᕐᓂᖅ

  • ᐃᓚᒋᔭᐅᓚᐅᖅᑐᑦ ᐱᔪᒪᒐᓗᐊᖅᑐᑦ ᐊᒥᓲᓂᖅᓴᒃᑯᑦ ᐃᓱᐊᓈᕈᑎᔅᓴᓂᒃ ᖃᐅᔨᓴᕐᓂᕐᒧᑦ ᓄᓇᒋᔭᐅᔪᒥ ᓱᕋᕐᓇᖅᑐᓂᒃ ᐊᒻᒪᓗ ᐃᓚᔅᓴᐅᔪᓂᒃ ᖃᐅᔨᓴᕐᓂᕐᒧᑦ.
  • ᐃᓚᒋᔭᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᐊᑲᐅᙱᓕᐅᕈᑕᐅᔪᒧᑦ "ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᓴᐱᖅᑐᓄᑦ" ᓄᓇᒋᔭᐅᔪᒥ, ᐅᖃᖅᑐᑎᒃ ᐊᒥᓱᑦ ᐱᕙᓪᓕᐊᓯᒪᔪᑦ ᓄᓇᒋᔭᐅᔪᒥ ᐃᑲᔪᖅᑐᑎᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᐃᓕᓐᓂᐊᖅᑎᑕᐅᓪᓗᑎᒃ ᖁᑦᑎᓐᓂᖅᐹᒃᑯᑦ ᐃᓕᓐᓂᐊᖅᓯᒪᓂᕐᒧᑦ ᐊᒻᒪᓗ ᑐᓂᔭᐅᓱᐃᑦᑑᓂᖏᑦ ᐃᓕᓐᓂᐊᖅᓯᒪᔭᖏᓐᓄᑦ ᐃᓕᑕᕆᔭᐅᔾᔪᓯᖏᓐᓄᑦ.
  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᒪᔪᑦ ᐱᖃᕆᐊᖃᕐᓂᖏᑦ ᓄᑖᓂᒃ ᐊᑐᖅᑕᐅᔪᓐᓇᖅᑐᒃ ᑐᓴᒐᔅᓴᓕᕆᓂᕐᒧᑦ ᓱᓇᒃᑯᑖᓂᒃ ᖃᐅᔨᓴᖅᑕᐅᓯᒪᔪᓂᒃ ᓄᓇᒋᔭᐅᔪᒧᑦ.
  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᒪᔪᑦ ᑕᑯᔪᒪᓪᓗᑎᒃ ᓱᓇᒃᑯᑖᓂᒃ ᖃᐅᔨᓴᖅᑕᐅᓯᒪᔪᓂᒃ ᖃᓄᐃᓕᐅᖅᓯᒪᓂᖏᓐᓂᒃ ᐅᑎᖅᑎᑕᐅᓗᑎᒃ ᓄᓇᒋᔭᐅᔪᒧᑦ ᐊᑐᖅᑕᐅᔪᓐᓇᖅᑐᓂᒃ.

ᐃᓄᐃᑦ ᐊᐅᓚᔪᓐᓇᕐᓂᖅ ᓱᓇᒃᑯᑖᓂᒃ ᖃᐅᔨᓴᕐᓂᒧᑦ

  • ᐃᓚᒋᔭᐅᓚᐅᖅᑐᑦ ᐱᔪᒪᔪᑦ ᓇᒻᒥᓂᖃᕐᓗᑎᒃ ᑎᑎᕋᖅᓯᒪᔪᓂᒃ ᑲᑎᖅᓱᖅᑕᐅᓯᒪᔪᓂᒃ ᓄᓇᒋᔭᐅᔪᒥ, ᑐᕌᖓᓗᐊᖅᑐᖅ ᐋᓐᓂᐊᖅᑕᐃᓕᒪᓂᕐᒧᑦ ᖃᐅᔨᓴᖅᑎᓪᓗᒋᑦ ᐆᑦᑑᑎᒋᓗᒍ ᑕᒪᓐᓇ.
  • ᐃᓚᒋᔭᐅᓚᐅᖅᑐᑦ ᐃᓱᒫᓘᑎᖃᓚᐅᖅᑐᑦ ᐊᔾᔨᒌᙱᑦᑐᓂᒃ ᑮᓇᐅᔭᒃᑯᑦ ᐃᑲᔪᖅᑕᐅᓂᕐᒧᑦ ᒐᕙᒪᑦ ᑲᓇᑕᒥᙶᖅᑐᓂᒃ ᑭᖑᓪᓕᖅᐹᖑᔪᓂᒃ ᓈᓴᖅᑕᐅᑎᓪᓗᒋᑦ ᐃᓄᐃᑦ ᐋᓐᓂᐊᖅᑕᐃᓕᒪᓂᕐᒧᑦ, ᐊᒻᒪᓗ ᐃᑲᔪᖅᑕᐅᔪᒪᒃᑯᓐᓂᖅᑐᑎᒃ ᓯᕗᓂᒥ.
  • ᐱᕕᔅᓴᖃᙱᓗᐊᕐᓂᖓ ᐃᓄᐃᑦ ᑕᐃᒪᐅᔪᓐᓇᕐᓂᖏᑦ ᐊᑲᐅᓈᕐᓂᓕᕆᓂᕐᒧᑦ ᑲᑎᒪᔨᓄᑦ ᐊᖏᔪᒃᑯᑦ ᓱᓇᒃᑯᑖᓂᒃ ᖃᐅᔨᓴᖅᑎᓪᓗᒋᑦ ᑲᑐᔾᔨᖃᑎᒌᓄᑦ ᐅᖃᐅᓯᕆᔭᐅᓚᐅᖅᑐᖅ.

ᓯᓚᐅᑉ ᐊᓯᙳᖅᐸᓪᓕᐊᓂᖓ

  • ᓯᓚᐅᑉ ᐊᓯᙳᖅᐸᓕᐊᓂᖓ ᓱᖏᐅᑎᓂᖅ, ᐊᒻᒪᓗ ᖃᓄᐃᓕᐅᖃᑦᑕᖅᓯᒪᓂᖓᓄᑦ ᐃᓅᖃᑎᒌᒃᑐᓄᑦ ᐊᒃᓱᕈᕐᓇᖅᑐᓂᒃ ᐊᒻᒪᓗ ᐊᓯᖏᓐᓄᑦ ᐊᑲᐅᙱᓕᐅᕈᑕᐅᔪᓂᒃ, ᐅᖃᐅᓯᐅᓚᐅᖅᑐᖅ. ᐊᑕᐅᓯᖅ ᐅᖃᓚᐅᖅᑐᖅ, "ᐃᓄᐃᑦ ᐊᐱᕆᓲᑦ ᖃᓄᖅ ᓱᖏᐅᑎᓲᖑᒻᒪᒑᑉᑖ ᐊᓯᙳᖅᐸᓪᓕᐊᔪᓄᑦ, ᑭᓯᐊᓂ ᑭᐅᓗᒍ: ᐋᓐᓂᐊᖅᑕᐃᓕᒪᓂᕐᒧᑦ ᑭᓯᐊᓂᐅᔪᖅ ᒫᓐᓇᐅᔪᖅ − ᓱᖏᐅᑎᔪᓐᓇᙱᑦᑐᒍᑦ ᓯᕗᓂᔅᓴᒧᑦ ᓱᖏᐅᑎᓯᒪᙱᑎᓪᓗᑕ ᒫᓐᓇᐅᔪᖅ."
  • ᐱᕙᓪᓕᐊᔪᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᓄᓇᒋᔭᐅᔪᒥ ᓂᕐᔪᑎᓄᑦ ᐊᒻᒪᓗ ᐃᓕᖅᑯᓯᐅᔪᒃᑯᑦ ᐊᓯᕙᖃᑦᑕᕐᓂᕐᒧᑦ ᐅᖃᐅᓯᕆᔭᐅᓚᐅᖅᑐᑦ.

ᐆᒪᔪᑦ

  • ᐃᓚᒋᔭᐅᓚᐅᖅᑐᑦ ᐃᑉᐱᒋᔭᖃᓚᐅᖅᑐᑦ ᐃᓱᒫᓘᑎᖃᕐᓗᑎᒃ ᓇᓗᓇᐃᔭᖅᑕᐅᓯᒪᔪᑦ ᐆᒪᔪᓄᑦ ᐊᑕᐅᓯᒥᑦ ᓇᔪᕐᕕᐅᔪᒥᑦ ᐅᑭᐅᖅᑕᖅᑐᒥ ᐊᓯᐊᓄᑦ ᐃᓱᒫᓘᑎᒋᔭᐅᓇᑎᒃ ᖃᓄᐃᓕᐅᕈᑕᐅᔪᓐᓇᖅᑐᓂᒃ ᐆᒪᔪᓄᑦ. ᐆᑦᑑᑎᒋᓗᒍ ᐅᒥᖕᒪᐃᑦ ᓄᑦᑎᖅᑐᖅᑕᐅᔪᑦ ᑯᐱᒃ ᑐᓄᕕᐊᓄᑦ.

ᓄᓇᖃᖅᖄᖅᓯᒪᔪᑦ ᖃᐅᔨᒪᓂᖏᑦ

  • ᐃᓚᒋᔭᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᑲᔪᓯᔪᓂᒃ ᐊᒃᓱᕈᕐᓇᖅᑐᓂᒃ ᐱᕙᓪᓕᐊᓂᕐᒧᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᖃᐅᔨᒪᓂᖏᓐᓄᑦ, ᓇᓗᓪᓗᑎᒃ ᒐᕙᒪᒃᑯᑦ ᐊᒻᒪᓗ ᓱᓇᒃᑯᑖᓂᒃ ᖃᐅᔨᓴᖅᑐᓕᕆᔨᒃᑯᑦ ᐱᕚᓪᓕᖅᓯᒪᙱᓐᓂᖏᑦ ᖁᓕᑦ ᐅᑭᐅᑦ ᖄᖏᖅᓯᒪᓕᖅᑐᓂᒃ ᐊᑭᓖᓗᑎᒃ "ᐅᖃᐅᓯᒃᑲᑦ ᐱᔨᑦᑎᕋᐅᑎᓂᒃ" ᐱᒻᒪᕆᐅᔪᒃᑯᑦ ᐱᕙᓪᓕᐊᓗᑎᒃ ᒪᕐᕉᓐᓄᒃ ᐃᑲᔪᖅᑎᒌᒃᑐᓂᒃ.
  • ᐃᓚᒋᔭᐅᓚᐅᖅᑐᑦ ᑎᒃᑯᐊᓚᐅᖅᑐᑦ ᐆᒪᔪᓕᕆᔩᑦ ᑲᑎᒪᔨᖏᓐᓄᑦ ᐅᑭᐅᖅᑕᖅᑐᒥ ᑲᑎᒪᖃᑦᑕᖅᑎᓗᒋᑦ ᐊᑐᐃᓐᓇᐅᑎᑦᑎᐊᖅᓯᒪᓂᖏᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᓄᓇᖃᖅᑳᖅᓯᒪᔪᒃᑯᒃ ᖃᐅᔨᒪᓂᖏᓐᓄᑦ.
  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᒪᔪᑦ ᐱᖃᕆᐊᖃᕐᓂᖏᑦ ᑕᒪᒃᑮᓐᓄᑦ ᐊᑐᕐᓗᑎᒃ ᖃᐅᔨᒪᔭᐅᔪᒃᑯᑦ ᐃᒻᒥᒃᑯᑦ ᑐᑭᓯᐊᔭᒥᑎᒍᑦ, ᐊᑐᑐᐃᓐᓇᙱᓪᓗᑎᒃ ᓄᓇᖃᖅᑳᖅᓯᒪᔪᒃᑯᑦ ᖃᐅᔨᒪᔭᐅᔪᓂᒃ ᖃᐅᔨᒋᐊᕐᓗᑎᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ.
  • ᐃᓚᒋᔭᐅᓚᐅᖅᑐᑦ ᐱᔪᒪᕗᑦ ᐱᕚᓪᓕᖅᓯᒪᔪᓂᒃ ᓄᓇᖃᖅᑳᖅᓯᒪᔪᓂᒃ ᖃᐅᔨᒪᔭᐅᔪᓂᒃ ᐊᖏᓂᖅᓴᒃᑯᑦ ᒐᕙᒪᓂᙶᖅᑐᓂᒃ, ᓇᓗᓇᐃᖅᓯᓪᓗᑎᒃ ᒐᕙᒪᒃᑰᖅᓯᒪᓂᖏᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᐱᕆᔭᐅᓲᖑᓂᖏᑦ ᐱᕙᓪᓕᐊᓂᕐᒧᑦ ᓄᓇᖃᖅᑳᖅᓯᒪᔪᓄᑦ ᖃᐅᔨᒪᔭᖏᓐᓄᑦ.
  • ᐃᓚᒋᔭᐅᓚᐅᖅᑐᑦ ᐃᓱᒫᓘᑎᖃᓚᐅᖅᑐᑦ ᑕᑯᓂᖏᑦ ᐱᖃᙱᓗᐊᕐᓂᖏᓐᓄᑦ ᑐᑭᓯᐊᓇᑦᑎᐊᖅᑐᒃᑯᑦ ᐊᑐᖅᑕᐅᓲᖑᔪᓂᒃ ᓄᓇᖃᖅᑳᖅᓯᒪᔪᓂᒃ ᖃᐅᔨᒪᔭᐅᔪᓂᒃ ᐃᓱᒪᔅᓴᖅᓯᐅᕐᓂᕐᒧᑦ ᒐᕙᒪᒃᑯᓐᓂᑦ.
  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᔪᑦ ᐱᒻᒪᕆᐅᔪᓄᑦ ᐃᓄᐃᑦ ᒐᕙᒪᓕᕆᓂᕐᒧᑦ ᓄᓇᒋᔭᐅᔪᒥ, ᐃᓚᒋᓗᒋᑦ ᐊᖑᓇᓱᐊᕐᓂᕐᒧᑦ ᓄᓇᒋᔭᐅᔪᒥ ᑕᕆᐅᖓᓂ ᐆᑦᑑᑎᒋᓗᒍ ᕿᓚᓗᒐᐃᑦ.
  • ᐱᒻᒪᕆᐅᓂᖓ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ ᐃᓱᒪᒋᔭᐅᓗᑎᒃ ᐊᕙᑎᓕᕆᔨᓄᑦ ᓇᓗᓇᐃᖅᑕᐅᓯᒪᔪᑦ ᑲᑎᒪᑎᓪᓗᒋᑦ.
  • ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᔪᑦ ᐱᕚᓪᓕᕈᓐᓇᕐᓂᖅ ᖃᕋᓴᐅᔭᓕᕆᓂᕐᒧᑦ ᐱᕚᓪᓕᕈᑕᐅᔪᓐᓇᖅᑐᑦ ᐊᑐᖅᑕᐅᔪᓐᓇᖅᑐᓂᒃ ᐅᑭᐅᖅᑕᖅᑐᒥᐅᑕᓄᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᖃᐅᔨᒪᔨᓄᑦ ᐊᑐᐃᓐᓇᐅᔪᓐᓇᖅᑐᓂᒃ.

ᐅᑭᐅᖅᑕᖅᑐᖅ ᓯᓚᕐᔪᐊᒥ

ᐅᓪᓗᖓᓂ ᐋᖅᑭᒋᐊᖅᑕᐅᔪᖅ:
sasasas